ಭಾರತ ವಿರುದ್ಧ ಗೆದ್ದ ಆಸ್ಟ್ರೇಲಿಯಾ ಸೆಮೀಸ್​ಗೆ ಲಗ್ಗೆ; ಹರ್ಮನ್ ಪಡೆಯ ಸೆಮಿಫೈನಲ್ ಕನಸು ಬಹುತೇಕ ಭಗ್ನ

ಮಹಿಳಾ ಟಿ20 ವಿಶ್ವಕಪ್ ಟೂರ್ನಿಯಲ್ಲಿ ಭಾರತ ತಂಡದ ಸೆಮಿಫೈನಲ್ ಕನಸು ಬಹುತೇಕ ಭಗ್ನಗೊಂಡಿದೆ. ತನ್ನ ಗೆಲ್ಲಲೇಬೇಕಿದ್ದ ಪಂದ್ಯದಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಟೀಮ್ ಇಂಡಿಯಾ 9 ರನ್​ಗಳ ಸೋಲು ಅನುಭವಿಸಿದೆ. ಆದರೆ, ಆಸೀಸ್​ ಲೀಗ್ ಹಂತದಲ್ಲಿ ಸತತ 4 ಪಂದ್ಯಗಳನ್ನೂ ಗೆದ್ದು ದಾಖಲೆಯ ಸೆಮೀಸ್​​ಗೆ ಪ್ರವೇಶಿಸಿದೆ. ಭಾರತ ಸೋತರೂ ನಾಲ್ಕರ ಘಟ್ಟಕ್ಕೆ ಪ್ರವೇಶಿಸಲು ಇನ್ನೂ ಅವಕಾಶ ಇದೆ. ಪ್ರಸ್ತುತ ಪಾಯಿಂಟ್ಸ್ ಟೇಬಲ್​​ನಲ್ಲಿ ಇರುವ ಮೂರನೇ ಸ್ಥಾನದಲ್ಲಿರುವ ನ್ಯೂಜಿಲೆಂಡ್ ತನ್ನ ಮುಂದಿನ ಪಂದ್ಯದಲ್ಲಿ ಸೋತರೆ ಮಾತ್ರ ಭಾರತ ತಂಡವು ಮುಂದಿನ ಹಂತಕ್ಕೆ ಹೋಗಲು ಅವಕಾಶ ಇದೆ.

ಗೆಲುವು ಅನಿವಾರ್ಯವಾಗಿದ್ದ ಪಂದ್ಯದಲ್ಲಿ ಟಾಸ್ ಗೆದ್ದು ಬ್ಯಾಟಿಂಗ್ ನಡೆಸಿದ ಆಸ್ಟ್ರೇಲಿಯಾ, ನಿಗದಿತ 20 ಓವರ್​​ಗಳಲ್ಲಿ 8 ವಿಕೆಟ್ ನಷ್ಟಕ್ಕೆ 158 ರನ್ ಗಳಿಸಿತು. ತಲಾ 2 ವಿಕೆಟ್ ಉರುಳಿಸಿದ ರೇಣುಕಾ ಸಿಂಗ್ ಮತ್ತು ದೀಪ್ತಿ ಶರ್ಮಾ ಬೌಲಿಂಗ್ ಅಬ್ಬರದ ನಡುವೆಯೂ ಗ್ರೇಸ್ ಹ್ಯಾರಿಸ್ (40), ಎಲಿಸ್ ಪೆರ್ರಿ (32), ತಹಿಲಾ ಮೆಗ್ರಾಥ್ (32) ಮಿಂಚಿನ ಪ್ರದರ್ಶನ ನೀಡಿದರು. ಈ ಗುರಿ ಬೆನ್ನಟ್ಟಿದ ಭಾರತ 20 ಓವರ್​​ಗಳು ಆಡಿದರೂ 9 ವಿಕೆಟ್ ನಷ್ಟಕ್ಕೆ 142 ರನ್ ಗಳಿಸಲಷ್ಟೇ ಶಕ್ತವಾಯಿತು. ಆದರೆ, ನಾಯಕಿ ಹರ್ಮನ್​ಪ್ರೀತ್ ಕೌರ್ ಅಜೇಯ ಅರ್ಧಶತಕದ ನಡುವೆಯೂ ಪಂದ್ಯವನ್ನು ಗೆದ್ದುಕೊಳ್ಳಲು ಭಾರತ ವಿಫಲವಾಯಿತು.

ಇದನ್ನೂ ಓದಿ: ವಿಶ್ವದಾಖಲೆಗಳ ಸರಮಾಲೆ, 133 ರನ್‌ಗಳಿಂದ ಬಾಂಗ್ಲಾದೇಶ ಮಣಿಸಿದ ಭಾರತ; 3-0 ಅಂತರದಿಂದ ಸರಣಿ ಕ್ಲೀನ್ ಸ್ವೀಪ್

ಭಾರತದ ಸೆಮಿಫೈನಲ್ ಹಾದಿ ಹೇಗಿದೆ?

ಟೀಮ್ ಇಂಡಿಯಾಗೆ ಸೆಮಿಫೈನಲ್ ಹಾದಿ ಇನ್ನೂ ಜೀವಂತವಾಗಿದೆ. ನ್ಯೂಜಿಲೆಂಡ್ ತಂಡವು ತನ್ನ ಮುಂದಿನ ಪಂದ್ಯದಲ್ಲಿ ಸೋಲಬೇಕು. ಪ್ರಸ್ತುತ ಆಸೀಸ್ ನಾಲ್ಕಕ್ಕೆ ನಾಲ್ಕು ಗೆದ್ದು 8 ಅಂಕಗಳೊಂದಿಗೆ ಆಡಿದ 9 ಆವೃತ್ತಿಗಳಲ್ಲೂ ಸೆಮಿಫೈನಲ್​ಗೆ ಪ್ರವೇಶಿಸಿದ ದಾಖಲೆ ಬರೆದಿದೆ. 2ನೇ ಸ್ಥಾನದಲ್ಲಿರುವ ಭಾರತ ತಂಡವು ಆಡಿರುವ 4ರಲ್ಲಿ 2 ಗೆಲುವು, 2 ಸೋಲು ಕಂಡಿದೆ. ನೆಟ್​ ರನ್ ರೇಟ್ +0.322. ಮೂರನೇ ಸ್ಥಾನದಲ್ಲಿರುವ ಕಿವೀಸ್, 3 ಪಂದ್ಯಗಳಲ್ಲಿ 2 ಗೆಲುವು, 1 ಗೆಲುವು ಸಾಧಿಸಿದೆ. ಇನ್ನೂ ಒಂದು ಪಂದ್ಯ ಬಾಕಿ ಉಳಿದಿದ್ದು, ಪಾಕಿಸ್ತಾನ ವಿರುದ್ಧ ಆಡಬೇಕಿದೆ. ಒಂದು ವೇಳೆ ಗೆದ್ದರೆ ಎ ಗುಂಪಿನಲ್ಲಿ ಎರಡನೇ ತಂಡವಾಗಿ ಸೆಮಿಫೈನಲ್​ಗೇರಲಿದೆ.

ಇದನ್ನೂ ಓದಿ: Sanju Samson: ಸಂಜು ಸ್ಯಾಮ್ಸನ್​ಗೆ ಸತತ 5 ಸಿಕ್ಸರ್ ಬಾರಿಸಲು ಹೇಳಿದ್ದು ಯಾರು ಗೊತ್ತೇ? ಇದಕ್ಕಾಗಿ 1 ವರ್ಷದಿಂದ ತಯಾರಿ