ಕನ್ನಡ ಸುದ್ದಿ  /  Cricket  /  India Vs England 4th Test Joe Root Century Takes Eng To 302/7 At Stumps On Day 1 Vs Ind In Ranchi Akash 3 Wickets Prs

ಆಕಾಶ್ ದೀಪ್ ಬೆಂಕಿ ಬೌಲಿಂಗ್, ಜೋ ರೂಟ್ ಶತಕದ ದಾಖಲೆ; ಉತ್ತಮ ಮೊತ್ತದತ್ತ ಪ್ರವಾಸಿ ಇಂಗ್ಲೆಂಡ್ ತಂಡ

India vs England 4th Test : ಭಾರತದ ವಿರುದ್ಧದ ನಾಲ್ಕನೇ ಟೆಸ್ಟ್​ ಪಂದ್ಯದ ಮೊದಲ ದಿನದಾಟದಂದು ಇಂಗ್ಲೆಂಡ್, ಉತ್ತಮ ಪ್ರದರ್ಶನ ನೀಡುತ್ತಿದೆ. ಆರಂಭದಲ್ಲಿ ಸಂಕಷ್ಟಕ್ಕೆ ಸಿಲುಕಿ ಇದೀಗ ದಿಟ್ಟ ಹೋರಾಟ ನಡೆಸುತ್ತಿದೆ.

ಜೋ ರೂಟ್ ಶತಕದ ದಾಖಲೆ; ಉತ್ತಮ ಮೊತ್ತದತ್ತ ಪ್ರವಾಸಿ ಇಂಗ್ಲೆಂಡ್ ತಂಡ
ಜೋ ರೂಟ್ ಶತಕದ ದಾಖಲೆ; ಉತ್ತಮ ಮೊತ್ತದತ್ತ ಪ್ರವಾಸಿ ಇಂಗ್ಲೆಂಡ್ ತಂಡ (PTI)

ರಾಂಚಿಯಲ್ಲಿ ನಡೆಯುತ್ತಿರುವ ನಾಲ್ಕನೇ ಟೆಸ್ಟ್ ಪಂದ್ಯದಲ್ಲಿ ಜೋ ರೂಟ್ (Joe Root) ಸಿಡಿಸಿದ ಭರ್ಜರಿ ಶತಕದ ನೆರವಿನಿಂದ ಇಂಗ್ಲೆಂಡ್, ಉತ್ತಮ ಮೊತ್ತದತ್ತ ಹೆಜ್ಜೆ ಹಾಕುತ್ತಿದೆ. ಕಳೆದ ಮೂರು ಪಂದ್ಯಗಳ 6 ಇನ್ನಿಂಗ್ಸ್​ಗಳಲ್ಲಿ 50ರ ಗಡಿ ದಾಟಲು ವಿಫಲವಾಗಿದ್ದ ರೂಟ್, ಈಗ ದಾಖಲೆಯ ಶತಕ ಸಾಧನೆ ಮಾಡಿದ್ದಾರೆ. ಮೊದಲ ದಿನದ ಅಂತ್ಯಕ್ಕೆ 90 ಓವರ್​​ಗಳಲ್ಲಿ 7 ವಿಕೆಟ್ ನಷ್ಟಕ್ಕೆ 302 ರನ್ ಕಲೆ ಹಾಕಿದೆ.

ಜೆಎಸ್​ಸಿಎ ಅಂತಾರಾಷ್ಟ್ರೀಯ ಕ್ರಿಕೆಟ್ ಮೈದಾನದಲ್ಲಿ ನಡೆಯುತ್ತಿರುವ ಈ ಪಂದ್ಯದಲ್ಲಿ ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ಆರಂಭಿಸಿದ ಇಂಗ್ಲೆಂಡ್, ಉತ್ತಮ ಆರಂಭ ಪಡೆಯುವಲ್ಲಿ ವಿಫಲವಾಯಿತು. ಡೆಬ್ಯು ಮಾಡಿದ ಆಕಾಶ್ ದೀಪ್ ಮಾರಕ ದಾಳಿಗೆ ಆಂಗ್ಲರು ಪೆವಿಲಿಯನ್ ಪರೇಡ್ ನಡೆಸಿದರು. ಮೊಹಮ್ಮದ್ ಸಿರಾಜ್, ರವಿಚಂದ್ರನ್ ಅಶ್ವಿನ್, ರವೀಂದ್ರ ಜಡೇಜಾ ಅವರು ಆಕಾಶ್​​ಗೆ ಸಾಥ್ ನೀಡಿದರು.

ಆರಂಭಿಕರಾಗಿ ಕಣಕ್ಕಿಳಿದ ಬೆನ್ ಡಕೆಟ್ 11, ಒಲ್ಲಿ ಫೋಪ್ 0, ಜಾಕ್ ಕ್ರ್ಯಾವ್ಲಿ 42, ಜಾನಿ ಬೈರ್​ಸ್ಟೋ 38, ಬೆನ್​ ಸ್ಟೋಕ್ಸ್ 3, ಬೆನ್ ಫೋಕ್ಸ್ 47 ರನ್ ಗಳಿಸಿ ಪೆವಿಲಿಯನ್ ಸೇರಿದರು. ಆದರೆ 112 ರನ್​ಗಳಿಗೆ 5 ವಿಕೆಟ್​ ಕಳೆದುಕೊಂಡು ಸಂಕಷ್ಟದಲ್ಲಿದ್ದ ಇಂಗ್ಲೆಂಡ್ ತಂಡವನ್ನು ನಾಲ್ಕನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್ ನಡೆಸಿದ ರೂಟ್​ ಮತ್ತು 7ನೇ ಸ್ಲಾಟ್​ನಲ್ಲಿ ಕಣಕ್ಕಿಳಿದ ಬೆನ್​ ಫೋಕ್ಸ್ ಅದ್ಭುತ ಆಟವಾಡಿ ನೆರವಾದರು.

ರೂಟ್​ ಶತಕ ಮತ್ತು ಶತಕದ ಜೊತೆಯಾಟ

ಸಂಕಷ್ಟದಲ್ಲಿದ್ದ ಇಂಗ್ಲೆಂಡ್ ತಂಡಕ್ಕೆ ಆಸರೆಯಾದ ಜೋ ರೂಟ್ ತನ್ನ 31ನೇ ಟೆಸ್ಟ್ ಶತಕವನ್ನು ಸಿಡಿಸಿ ಸಂಭ್ರಮಿಸಿದರು. 219 ಎಸೆತಗಳಲ್ಲಿ ನೂರರ ಗಡಿ ದಾಟಿದ ರೂಟ್, ಭಾರತದ ಎದುರು 10ನೇ ಟೆಸ್ಟ್​ ಶತಕದ ಸಾಧನೆಯನ್ನೂ ಮಾಡಿದರು. ಅಲ್ಲದೆ, 6ನೇ ವಿಕೆಟ್​ಗೆ ಬೆನ್​ಫೋಕ್ಸ್ ಜೊತೆ ಸೇರಿ 113 ರನ್​ಗಳ ಜೊತೆಯಾಟವಾಡಿದರು. 226 ಎಸೆತಗಳಲ್ಲಿ 9 ಬೌಂಡರಿ ಸಹಿತ 106 ರನ್ ಕಲೆ ಹಾಕಿದ್ದು ಅಜೇಯರಾಗಿದ್ದಾರೆ.

ಮತ್ತೊಂದೆಡೆ ಈ ಸರಣಿಯಲ್ಲಿ ಇದೇ ಮೊದಲ ಬಾರಿಗೆ ಅವಕಾಶ ಪಡೆದ ಒಲ್ಲಿ ರಾಬಿನ್ಸನ್ 31 ರನ್ ಸಿಡಿಸಿ ರೂಟ್​ಗೆ ಸಖತ್ ಸಾಥ್ ಕೊಡುತ್ತಿದ್ದಾರೆ. ಇಬ್ಬರು ಸೇರಿ 57 ರನ್​ಗಳ ಅಜೇಯ ಪಾಲುದಾರಿಕೆ ನೀಡಿದ್ದಾರೆ. ನಾಳೆಯೂ ಭಾರತೀಯ ಬೌಲರ್​​ಗಳನ್ನು ದಿಟ್ಟವಾಗಿ ಎದುರಿಸಲು ಸಿದ್ಧರಾಗಿದ್ದಾರೆ. ಮೊದಲ ಸೆಷನ್​ನಲ್ಲಿ ಐವರನ್ನು ಔಟ್ ಮಾಡಿದ ರೋಹಿತ್ ಪಡೆಯ ಬೌಲರ್​​ಗಳು ಎರಡನೇ ಸೆಷನ್​ ವಿಕೆಟ್ ಪಡೆಯಲು ಪರದಾಡಿದರು. 3ನೇ ಸೆಷನ್​ನಲ್ಲಿ 2 ವಿಕೆಟ್ ಪಡೆದರು.

ಆಕಾಶ್ ದೀಪ್ ಬೆಂಕಿ ಬೌಲಿಂಗ್

313ನೇ ಟೆಸ್ಟ್ ಪ್ಲೇಯರ್​ ಆಗಿ ಭಾರತೀಯ ತಂಡಕ್ಕೆ ಪದಾರ್ಪಣೆ ಮಾಡಿದ ಆಕಾಶ್ ದೀಪ್ ಬೆಂಕಿ ಬೌಲಿಂಗ್ ನಡೆಸಿದರು. ಚೊಚ್ಚಲ ಪಂದ್ಯದಲ್ಲೇ ಆಂಗ್ಲರ ಅಗ್ರ ಕ್ರಮಾಂಕದ ಮೂವರು ಬ್ಯಾಟರ್​​ಗಳನ್ನು ಔಟ್ ಮಾಡಿದರು. ಮತ್ತೊಂದೆಡೆ ಮೊಹಮ್ಮದ್ ಸಿರಾಜ್ ಇಬ್ಬರನ್ನು, ಜಡೇಜಾ ಮತ್ತು ಅಶ್ವಿನ್ ತಲಾ ಒಬ್ಬರನ್ನು ಔಟ್ ಮಾಡಿದ್ದಾರೆ. ಎರಡನೇ ದಿನದಾಟದಲ್ಲಿ ಯಾವ ರೀತಿಯ ಪ್ರದರ್ಶನ ಹೊರ ಬರಲಿದೆ ಎಂಬುದನ್ನು ಕಾದು ನೋಡಬೇಕಿದೆ.