ಸ್ಮೃತಿ ಮಂಧಾನ-ಹರ್ಮನ್​ಪ್ರೀತ್ ಸ್ಪೋಟಕ ಶತಕ; ಭಾರತಕ್ಕೆ 4 ರನ್​ಗಳ ರೋಚಕ ಗೆಲುವು, ಲಾರಾ-ಮರಿಜಾನ್ನೆ ಕಪ್ ಸೆಂಚುರಿ ವ್ಯರ್ಥ

ಬೆಂಗಳೂರಿನ ಎಂ ಚಿನ್ನಸ್ವಾಮಿ ಕ್ರಿಕೆಟ್ ಮೈದಾನದಲ್ಲಿ ನಡೆದ 2ನೇ ಏಕದಿನ ಪಂದ್ಯದಲ್ಲಿ ಭಾರತ ಮಹಿಳಾ ತಂಡವು 4 ರನ್​​ಗಳಿಂದ ರೋಚಕ ಗೆಲುವು ಸಾಧಿಸಿತು. ಕೊನೆಯ ಓವರ್​ ತನಕ ಕುತೂಹಲ ಹೆಚ್ಚಿಸಿದ್ದ ಪಂದ್ಯದಲ್ಲಿ ಸೌತ್ ಆಫ್ರಿಕಾ ಗೆಲ್ಲುವ ಭರವಸೆ ಹುಟ್ಟು ಹಾಕಿತ್ತು. ಆರಂಭಿಕರಾಗಿ ಕಣಕ್ಕಿಳಿದು ಶತಕ ಸಿಡಿಸಿ ಅಂತಿಮ ಎಸೆತದವರೆಗೂ ಕ್ರೀಸ್​ನಲ್ಲಿದ್ದ ಲಾರಾ ವೊಲ್ವಾರ್ಡ್ಟ್ ಗೆಲುವಿನ ಆಸೆ ಹೆಚ್ಚಿಸಿದ್ದರು. ಆದರೆ, ಗೆಲುವು ತಂದುಕೊಡಲು ವಿಫಲರಾದರು.

ಕೊನೆಯ ಓವರ್​​ನಲ್ಲಿ ಪೂಜಾ ವಸ್ತ್ರಾಕರ್​ ಶಿಸ್ತಿನ ಬೌಲಿಂಗ್ ದಾಳಿ ನಡೆಸಿ 11 ರನ್​ಗಳನ್ನು ರಕ್ಷಿಸಿಕೊಂಡು ರೋಚಕ ಗೆಲುವಿನ ಕ್ಷಣಕ್ಕೆ ಸಾಕ್ಷಿಯಾದರು. ಹರ್ಮನ್ ಪಡೆ ನೀಡಿದ್ದ 326 ರನ್​ಗಳ ಬೃಹತ್ ಮೊತ್ತ ಬೆನ್ನಟ್ಟಿದ ಸೌತ್ ಆಫ್ರಿಕಾ 321 ರನ್ ಗಳಿಸಲಷ್ಟೇ ಶಕ್ತವಾಯಿತು. ಈ ಪಂದ್ಯದಲ್ಲಿ ಭಾರತ ತಂಡದ ಪರ ಸ್ಮೃತಿ ಮಂಧಾನ, ಹರ್ಮನ್ ಪ್ರೀತ್ ಕೌರ್​ ಶತಕ ಸಿಡಿಸಿದರೆ, ದಕ್ಷಿಣ ಆಫ್ರಿಕಾ ಪರ ಮರಿಜಾನ್ನೆ ಕಪ್, ಲಾರಾ ವೊಲ್ವಾರ್ಡ್ಟ್ ಸೆಂಚುರಿ ಬಾರಿಸಿದರು.

ಮೊದಲು ಬ್ಯಾಟಿಂಗ್ ಮಾಡಿದ ಭಾರತ, ಉತ್ತಮ ಪ್ರದರ್ಶನ ತೋರಿತು. ಮೊದಲ ವಿಕೆಟ್​ಗೆ 38 ರನ್​ ಹರಿದು ಬಂತು. ಶಫಾಲಿ ವರ್ಮಾ 20 ರನ್ ಗಳಿಸಿ ಔಟಾದರು. ಸ್ಮೃತಿ ಮಂಧಾನ ಮತ್ತೊಂದು ಅದ್ಭುತ ಪ್ರದರ್ಶನ ತೋರಿದರು. ದಯಾಲನ್ ಹೇಮಲತಾ (24) ಅವರೊಂದಿಗೆ ಸೇರಿ 62 ರನ್​ಗಳ ಪಾಲುದಾರಿಕೆ ಒದಗಿಸಿದರು. ತಂಡವು 100 ರನ್​ಗೆ 2 ವಿಕೆಟ್ ಕಳೆದುಕೊಂಡಿದ್ದ ಅವಧಿಯಲ್ಲಿ ಹರ್ಮನ್​ಪ್ರೀತ್ ಕೌರ್ ಅವರು ಸ್ಮೃತಿ ಜೊತೆ ಸೇರಿ 3ನೇ ವಿಕೆಟ್​ಗೆ 171 ರನ್​ಗಳ ಪಾಲುದಾರಿಕೆ ನೀಡಿದರು.

ನಾಯಕಿ-ಉಪನಾಯಕಿ ಶತಕ

ಸೌತ್ ಆಫ್ರಿಕಾ ಬೌಲರ್​​ಗಳ ಮೇಲೆ ಸವಾರಿ ಮಾಡಿದ ಉಪನಾಯಕಿ ಹಾಗೂ ಆರಂಭಿಕ ಆಟಗಾರ್ತಿ ಸ್ಮೃತಿ ಮಂಧಾನ, ನಾಯಕಿ ಹರ್ಮನ್​ಪ್ರೀತ್​ ಕೌರ್​ ರನ್​ ಹೊಳೆ ಹರಿಸಿದರು. ಮೊದಲ ಏಕದಿನ ಪಂದ್ಯದಲ್ಲಿ ಸೆಂಚುರಿ ಸಿಡಿಸಿದ್ದ ಸ್ಮೃತಿ ಮಂಧಾನ, ಎರಡನೇ ಏಕದಿನ ಪಂದ್ಯದಲ್ಲೂ ನೂರರ ಗಡಿ ದಾಟಿದರು. ಇದರೊಂದಿಗೆ ದಾಖಲೆ ಕೂಡ ಬರೆದರು. ಇದು ಏಕದಿನದಲ್ಲಿ 7ನೇ ಶತಕವಾಗಿದೆ. 120 ಎಸೆತಗಳಲ್ಲಿ 12 ಬೌಂಡರಿ, 3 ಸಿಕ್ಸರ್​ ಸಹಿತ 135 ರನ್ ಬಾರಿಸಿ 46ನೇ ಓವರ್​​ನಲ್ಲಿ ಔಟಾದರು.

ಸ್ಮೃತಿ ಔಟಾದ ಬಳಿಕ ಬ್ಯಾಟಿಂಗ್ ಗೇರ್ ಚೇಂಜ್ ಮಾಡಿದ ಹರ್ಮನ್​ಪ್ರೀತ್ ಕೌರ್, ಮೂರಂಕಿ ದಾಟಿದರು. ಕೊನೆಯವರೆಗೂ ಕ್ರೀಸ್​ನಲ್ಲಿ ಉಳಿದು ಕೊನೆಯ ಓವರ್​​ನಲ್ಲಿ ತಮ್ಮ ಆರನೇ ಏಕದಿನ ಶತಕವನ್ನು ಪೂರೈಸಿದರು. 88 ಎಸೆತಗಳಲ್ಲಿ 9 ಬೌಂಡರಿ, 3 ಸಿಕ್ಸರ್​ ಸಹಿತ 103 ರನ್ ಗಳಿಸಿ ಅಜೇಯರಾಗಿ ಉಳಿದರು. ಇನ್ನು ರಿಚಾ ಘೋಷ್ 13 ಎಸೆತಗಳಲ್ಲಿ 3 ಬೌಂಡರಿ, 1 ಸಿಕ್ಸರ್​ ಸಹಿತ 25 ರನ್ ಗಳಿಸಿದರು. ಅಂತಿಮವಾಗಿ 50 ಓವರ್​​​ಗಳಲ್ಲಿ 3 ವಿಕೆಟ್ ನಷ್ಟಕ್ಕೆ 325 ರನ್ ಪೇರಿಸಿತು.

ಇದನ್ನೂ ಓದಿ: ಸ್ಮೃತಿ ಮಂಧಾನ ಸತತ 2ನೇ ಸೆಂಚುರಿ; ಮಿಥಾಲಿ ರಾಜ್ ಶತಕಗಳ ದಾಖಲೆ ಸರಿಗಟ್ಟಿದ ಆರ್​ಸಿಬಿ ಕ್ಯಾಪ್ಟನ್

326 ರನ್​ಗಳಗುರಿ ಬೆನ್ನಟ್ಟಿದ ಸೌತ್ ಆಫ್ರಿಕಾ, ಉತ್ತಮ ಆರಂಭ ಪಡೆಯಲಿಲ್ಲ. ತಂಜಿಮ್ ಬ್ರಿಟ್ಸ್ (5), ಅನ್ನೆಕೆ ಬಾಷ್ (18), ಸುನೆ ಲೂಸ್ (12) ಅವರು ನಿರಾಸೆ ಮೂಡಿಸಿದರು. ಈ ಹಂತದಲ್ಲಿ ಆರಂಭಿಕ ಆಟಗಾರ್ತಿ ಹಾಗೂ ನಾಯಕಿ ಲಾರಾ ವೊಲ್ವಾರ್ಡ್ಟ್ ಮತ್ತು ಮರಿಜಾನ್ನೆ ಕಪ್ ಅವರು 4ನೇ ವಿಕೆಟ್​ಗೆ 184 ರನ್​ಗಳ ಜೊತೆಯಾಟವಾಡಿದರು. ಅಲ್ಲದೆ, ಇಬ್ಬರೂ ಕೂಡ ಸೆಂಚುರಿ ಬಾರಿಸಿ ಐತಿಹಾಸಿಕ ಗುರಿ ಬೆನ್ನಟ್ಟಲು ದಿಟ್ಟ ಹೊರಾಟ ನಡೆಸಿದರು.

ಕಪ್ ಅವರು 94 ಎಸೆತಗಳಲ್ಲಿ 11 ಬೌಂಡರಿ, 3 ಸಿಕ್ಸರ್ ಸಹಿತ 114 ರನ್ ಗಳಿಸಿದರು. ಆ ಮೂಲಕ ತಂಡವನ್ನು ಗೆಲುವಿನತ್ತ ಕೊಂಡೊಯ್ಯಲು ಸಹಕಾರ ನೀಡಿದರು. ಕೊನೆಯಲ್ಲಿ ಔಟಾಗಿ ನಿರಾಸೆ ಮೂಡಿಸಿದರು. ಆದರೆ, ನಾಯಕಿ ಲಾರಾ ಕೊನೆಯ ಓವರ್​ನ ಕೊನೆಯ ಎಸೆತದವರೆಗೂ ಹೋರಾಡಿದರು. 135 ಎಸೆತಗಳಲ್ಲಿ 12 ಬೌಂಡರಿ, 3 ಸಿಕ್ಸರ್ ಸಹಿತ 135 ರನ್ ಗಳಿಸಿ ಅಜೇಯರಾಗಿ ಉಳಿದರು. ನಾಡಿನ್ ಡಿ ಕ್ಲರ್ಕ್ 28 ರನ್ ಗಳಿಸಿ ಸಾಥ್ ಕೊಟ್ಟರು. ಅಂತಿಮವಾಗಿ 6 ವಿಕೆಟ್​ಗೆ 321 ರನ್ ಗಳಿಸಿ 4 ರನ್​ಗಳಿಂದ ಸೋಲನುಭವಿಸಿದರು.

ಇದನ್ನೂ ಓದಿ: ಗೌತಮ್ ಗಂಭೀರ್ ಮಾತ್ರವಲ್ಲ, ಭಾರತ ಕ್ರಿಕೆಟ್ ತಂಡದ ಹೆಡ್​ಕೋಚ್ ಹುದ್ದೆಗೆ ಮತ್ತೊಬ್ಬರು ಎಂಟ್ರಿ!