ಏಕೈಕ ಟೆಸ್ಟ್: ಭಾರತ ವನಿತೆಯರ ಸರ್ವಶ್ರೇಷ್ಠ ಪ್ರದರ್ಶನಕ್ಕೆ ಶರಣಾದ ಇಂಗ್ಲೆಂಡ್; 347 ರನ್​ಗಳ ವಿಶ್ವದಾಖಲೆ ಗೆಲುವು

ಇಂಗ್ಲೆಂಡ್ ಮಹಿಳಾ ತಂಡದ ವಿರುದ್ಧದ ಏಕೈಕ ಟೆಸ್ಟ್ ಪಂದ್ಯದಲ್ಲಿ ಭಾರತದ ವನಿತೆಯರು (India Women vs England Women Only Test) ಐತಿಹಾಸಿಕ ಗೆಲುವಿಗೆ ಮುತ್ತಿಕ್ಕಿದ್ದಾರೆ. ಬ್ಯಾಟಿಂಗ್, ಬೌಲಿಂಗ್​ನಲ್ಲಿ ಖದರ್ ತೋರಿದ ಟೀಮ್ ಇಂಡಿಯಾ ಟಿ20 ಸರಣಿ ಸೋಲಿನ ಸೇಡು ತೀರಿಸಿಕೊಂಡಿದೆ. ನವಿ ಮುಂಬೈನ ಡಿವೈ ಪಾಟೀಲ್ ಸ್ಟೇಡಿಯಂನಲ್ಲಿ ನಡೆದ ಈ ಪಂದ್ಯದಲ್ಲಿ ಹರ್ಮನ್ ಪಡೆ ಬರೋಬ್ಬರಿ 347 ರನ್​ಗಳ ಅಂತರದಿಂದ ದಾಖಲೆ ಜಯ ಸಾಧಿಸಿದೆ. ವಿಶೇಷ ಅಂದರೆ ಈ ಪಂದ್ಯ ಮೂರೇ ದಿನಕ್ಕೆ ಮುಕ್ತಾಯಗೊಂಡಿದೆ.

ಇದನ್ನೂ ಓದಿ: ಹಿಂದೆ ಸರಿದ ದೀಪಕ್ ಚಹರ್, ಹೊರಬಿದ್ದ ಮೊಹಮ್ಮದ್ ಶಮಿ; ಆರ್​ಸಿಬಿ ವೇಗಿಗೆ ಮಣೆ ಹಾಕಿದ ಬಿಸಿಸಿಐ

ಸ್ಕೋರ್ ವಿವರ

ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ನಡೆಸಿದ ಭಾರತ, ಮೊದಲ ಇನ್ನಿಂಗ್ಸ್​​ನಲ್ಲಿ 428 ರನ್​ಗಳ ಬೃಹತ್ ಮೊತ್ತ ದಾಖಲಿಸಿತ್ತು. ಇದಕ್ಕೆ ಉತ್ತರವಾಗಿ ಬ್ಯಾಟಿಂಗ್ ನಡೆಸಿದ ಇಂಗ್ಲೆಂಡ್, ಭಾರತದ ಸ್ಪಿನ್​ ದಾಳಿಗೆ ತತ್ತರಿಸಿ ಕೇವಲ 136 ರನ್​ಗಳಿಗೆ ಸರ್ವಪತನ ಕಂಡಿತು. ಇದರೊಂದಿಗೆ 292 ರನ್​ಗಳ ಮುನ್ನಡೆ ಭಾರತ, ದ್ವಿತೀಯ ಇನ್ನಿಂಗ್ಸ್​​ನಲ್ಲಿ 6 ವಿಕೆಟ್ ನಷ್ಟಕ್ಕೆ 186 ರನ್ ಕಲೆ ಹಾಕಿ ಡಿಕ್ಲೇರ್ ಘೋಷಿಸಿತು. ಒಟ್ಟು 479 ರನ್​ಗಳ ಟಾರ್ಗೆಟ್ ಬೆನ್ನಟ್ಟಿದ ಆಂಗ್ಲರು 131ಕ್ಕೆ ಕುಸಿದರು.

ದೀಪ್ತಿ ಶರ್ಮಾ ಸ್ಪಿನ್ ಜಾದೂ

ಟೆಸ್ಟ್​ ಪಂದ್ಯದ ಗೆಲುವಿನಲ್ಲಿ ಆಲ್​ರೌಂಡರ್ ದೀಪ್ತಿ ಶರ್ಮಾ ಪ್ರಮುಖ ಪಾತ್ರವಹಿಸಿದರು. ಬ್ಯಾಟಿಂಗ್​ನಲ್ಲಿ ಅರ್ಧಶತಕ ಬಾರಿಸಿ ಬೌಲಿಂಗ್​ನಲ್ಲಿ ವಿಕೆಟ್​ ಬೇಟೆಯಾಡಿ ಇಂಗ್ಲೆಂಡ್ ಕುಸಿತಕ್ಕೆ ಕಾರಣರಾದರು. ಬ್ಯಾಟಿಂಗ್​ನಲ್ಲಿ 7ನೇ ಕ್ರಮಾಂಕದಲ್ಲಿ ಕಣಕ್ಕಿಳಿದು ಮೊದಲ ಇನ್ನಿಂಗ್ಸ್​ನಲ್ಲಿ 67 ರನ್, 2ನೇ ಇನ್ನಿಂಗ್ಸ್​ನಲ್ಲಿ 20 ರನ್ ಕಲೆ ಹಾಕಿದರು. ಇನ್ನು ಬೌಲಿಂಗ್​ನಲ್ಲಿ ಮೊದಲ ಇನ್ನಿಂಗ್ಸ್ 5 ವಿಕೆಟ್, 2ನೇ ಇನ್ನಿಂಗ್ಸ್ 4 ವಿಕೆಟ್​ ಪಡೆದು ಆಲ್​ರೌಂಡ್ ಶೋ ತೋರಿಸಿ ಗೆಲುವಿನ ರೂವಾರಿಯಾದರು.

ವಿಶ್ವದಾಖಲೆಯ ಜಯ

347 ರನ್​ಗಳಿಂದ ಅಮೋಘ ಜಯ ಸಾಧಿಸಿದ ಭಾರತ ಮಹಿಳಾ ಟೆಸ್ಟ್​ ಕ್ರಿಕೆಟ್​ನಲ್ಲಿ ಹೊಸ ಇತಿಹಾಸ ಸೃಷ್ಟಿಸಿದೆ. ಈ ಹಿಂದೆ 1998ರಲ್ಲಿ ವೆಸ್ಟ್ ಇಂಡೀಸ್ ವಿರುದ್ಧ ಶ್ರೀಲಂಕಾ ಮಹಿಳೆಯರು 309 ರನ್​ಗಳ ಅಂತರದಿಂದ ಗೆದ್ದು ವಿಶ್ವದಾಖಲೆ ನಿರ್ಮಿಸಿದ್ದರು. ಇದೀಗ ಈ ದಾಖಲೆ ಮುರಿದು ಹರ್ಮನ್ ಪಡೆ ಹೊಸ ದಾಖಲೆ ನಿರ್ಮಿಸಿದೆ. ಈ ಗೆಲುವಿನ ವಿಶ್ವಾಸದಲ್ಲಿರುವ ಭಾರತದ ವನಿತೆಯರು ಆಸ್ಟ್ರೇಲಿಯಾ ಎದುರಿನ ಟೆಸ್ಟ್ ಪಂದ್ಯದಲ್ಲೂ ಗೆಲ್ಲುವ ಯೋಜನೆಯಲ್ಲಿದ್ದಾರೆ.

ಇಂಗ್ಲೆಂಡ್ ಕಳಪೆಯಾಟ

ಬಲಿಷ್ಠ ಇಂಗ್ಲೆಂಡ್ ತಂಡವು ಅತ್ಯಂತ ಕಳಪೆ ಪ್ರದರ್ಶನ ನೀಡಿತು. ಇಂಗ್ಲೆಂಡ್ ಆಡಿದ ಎರಡೂ ಇನ್ನಿಂಗ್ಸ್​​ಗಳ ಪೈಕಿ ಒಂದೇ ಒಂದು ಹಾಫ್ ಸೆಂಚುರಿ ಮಾತ್ರ ದಾಖಲಾಗಿದೆ. ನಟಾಲಿ ಸೀವರ್ ಮಾತ್ರ ಎರಡೂ ಇನ್ನಿಂಗ್ಸ್​ಗಳಲ್ಲಿ ಅರ್ಧಶತಕ ಸಿಡಿಸಿದ್ದಾರೆ. ಉಳಿದಂತೆ ಹೀದರ್ ನೈಟ್, ಡೇನಿಯರ್ ವ್ಯಾಟ್, ಆ್ಯಮಿ ಜೋನ್ಸ್, ಸೋಫಿಯಾ ಡಂಕ್ಲಿ ಸೇರಿದಂತೆ ಪ್ರಮುಖ ಆಟಗಾರ್ತಿಯರೇ ರನ್ ಗಳಿಸಲು ವಿಫಲರಾದರು. ಅಲ್ಲದೆ, ಬೌಲಿಂಗ್​ನಲ್ಲೂ ಪರಿಣಾಮಕಾರಿಯಾಗಲಿಲ್ಲ.

ಭಾರತ ಸರ್ವಶ್ರೇಷ್ಠ ಪ್ರದರ್ಶನ

ಟಿ20ಯಲ್ಲಿ ಪ್ರದರ್ಶನ ತೋರಿದ ಟೀಮ್ ಇಂಡಿಯಾ, ಟೆಸ್ಟ್​ನಲ್ಲಿ ತಿರುಗೇಟು ನೀಡಿತು. ಸ್ಮೃತಿ ಮಂಧಾನ ಮತ್ತು ಶಫಾಲಿ ವರ್ಮಾ ಅಲ್ಪ ಕಾಣಿಕೆ ನೀಡಿದರೆ, ಕನ್ನಡತಿ ಶುಭಾ ಸತೀಶ್ 69, ಜಮೈಮಾ ರೋಡ್ರಿಗಸ್ 68, ಯಾಸ್ತಿಕಾ ಭಾಟಿಯಾ 66, ದೀಪ್ತಿ ಶರ್ಮಾ 67 ರನ್ ಸಿಡಿಸಿ ಗಮನ ಸೆಳೆದರು. ಬೌಲಿಂಗ್​ನಲ್ಲಿ ದೀಪ್ತಿ ಶರ್ಮಾಗೆ ರೇಣುಕಾ ಠಾಕೂರ್, ಪೂಜಾ ವಸ್ತ್ರಾಕರ್, ಸ್ನೇಹ್ ರಾಣ, ರಾಜೇಶ್ವರಿ ಗಾಯಕ್ವಾಡ್ ಸಾಥ್ ಕೊಟ್ಟರು.