Gautam Gambhir: ಲಕ್ನೋ ತಂಡಕ್ಕೆ ಗಂಭೀರ್ ಗುಡ್​ಬೈ; ಗೌತಮ್​ ಮೇಲೆ ಗಮನ ಹರಿಸಿದ ಕೆಕೆಆರ್

ಭಾರತದಲ್ಲಿ ಏಕದಿನ ವಿಶ್ವಕಪ್ ಟೂರ್ನಿಗೆ (ODI World Cup 2023) ಸಿದ್ಧತೆಯ ನಡುವೆಯೇ ಐಪಿಎಲ್​ ಫ್ರಾಂಚೈಸಿಗಳು (IPL 2024) ತಮ್ಮ ತಂಡಗಳಲ್ಲಿ ಬದಲಾವಣೆಗೆ ಹೆಚ್ಚು ಒತ್ತು ನೀಡುತ್ತಿವೆ. ಇತ್ತೀಚೆಗೆ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (Royal Challengers Bangalore) ನೂತನ ಕೋಚ್​ ನೇಮಕದ ಬೆನ್ನಲ್ಲೇ ಇದೀಗ ಲಕ್ನೋ ಸೂಪರ್ ಜೈಂಟ್ಸ್​ (Lucknow Super Giants) ತಂಡದಲ್ಲಿ ಮತ್ತೊಂದು ಮಹತ್ವದ ಬದಲಾವಣೆ ಕಾಣುವ ಸಾಧ್ಯತೆ ಇದೆ. ತಂಡದ ಮೆಂಟರ್​​ ಆಗಿ ಸೇವೆ ಸಲ್ಲಿಸಿದ್ದ ಗೌತಮ್ ಗಂಭೀರ್ (Gautam Gambhir) ಅವರಿಗೆ ಗೇಟ್​ಪಾಸ್​ ನೀಡಲು ಫ್ರಾಂಚೈಸಿ ಚಿಂತಿಸಿದೆ.

ಕಳೆದ ಎರಡು ಆವೃತ್ತಿಗಳಿಂದ ಲಕ್ನೋಗೆ ಮಾರ್ಗದರ್ಶನ ನೀಡುತ್ತಿದ್ದ ಆ್ಯಂಡಿ ಫ್ಲವರ್ (Andy Flower)​ ಬದಲಿಗೆ ಆಸ್ಟ್ರೇಲಿಯಾದ ಮಾಜಿ ಕೋಚ್​ ಜಸ್ಟಿನ್ ಲ್ಯಾಂಗರ್​ (Justin Langer) ಅವರನ್ನು ನೇಮಿಸಲಾಗಿದೆ. ಇದೀಗ ಎರಡು ಆವೃತ್ತಿಗಳಲ್ಲಿ ಎಲ್​ಎಸ್​ಜಿ ತಂಡವನ್ನು ಪ್ಲೇ ಆಫ್​​ಗೇರಿಸುವಲ್ಲಿ ಯಶಸ್ವಿಯಾಗಿದ್ದ ಗೌತಮ್ ಗಂಭೀರ್ ಅವರನ್ನು ಕೈಬಿಡಲು ಚಿಂತನೆ ನಡೆಸಿದೆ. ಬದಲಿಗೆ ಭಾರತದ ಮಾಜಿ ಮುಖ್ಯ ಆಯ್ಕೆಗಾರ ಎಂಎಸ್‌ಕೆ ಪ್ರಸಾದ್ (MSK Prasad) ಅವರನ್ನು ಕಾರ್ಯತಂತ್ರದ ಸಲಹೆಗಾರರಾಗಿ ನೇಮಿಸಿಕೊಳ್ಳಲು ಫ್ರಾಂಚೈಸಿ ಚಿಂತಿಸಿದೆ.

10 ಕೋಟಿ ಪಡೆಯುತ್ತಿದ್ದ ಗಂಭೀರ್​

ಲಕ್ನೋ ತಂಡದ ಪರ ಡಗೌಟ್​ನಲ್ಲಿ ಹೆಚ್ಚು ಸದ್ದು ಮಾಡಿದ ಗಂಭೀರ್ ಅವರಿಗೆ ಪ್ರತಿ ಐಪಿಎಲ್​​​ ಸೀಸನ್​​ಗೂ 10 ಕೋಟಿ ವೇತನ ಪಾವತಿ ಮಾಡಲಾಗುತ್ತಿತ್ತು. ಕೋಚ್​ ಆಗಿದ್ದ ಆ್ಯಂಡಿ ಫ್ಲವರ್ ಕೂಡ ತಂಡದ ಆಟಗಾರರ ವಿರುದ್ಧ ಕೆಂಡಕಾರುತ್ತಿರಲಿಲ್ಲ. ಆದರೆ, ಗಂಭೀರ್​ ಮಾತ್ರ ಪಂದ್ಯ ಸೋತಾಗೆಲ್ಲಾ ಆಟಗಾರರಿಗೆ ತರಾಟೆ ತೆಗೆದುಕೊಳ್ಳುತ್ತಿದ್ದರು. ಆ್ಯಂಡಿ ಫ್ಲವರ್ ನಂತರ ಗಂಭೀರ್ ಈಗ ಐಪಿಎಲ್ ಫ್ರಾಂಚೈಸಿ ತೊರೆಯಲಿದ್ದಾರೆ. ಇದಕ್ಕಿಂತ ಹೆಚ್ಚಿನದನ್ನು ನಾನು ಹೇಳಲಾರೆ ಎಂದು ಮೂಲವೊಂದು ತಿಳಿಸಿದೆ.

ಕೆಕೆಆರ್​​ ಕಡೆಗೆ ಗಂಭೀರ್ ಗಮನ

ಇತ್ತೀಚಿನ ವರದಿಯ ಪ್ರಕಾರ, ಗೌತಮ್ ಗಂಭೀರ್ ಐಪಿಎಲ್ 2024ಕ್ಕೆ ಮುನ್ನ ಕೋಲ್ಕತ್ತಾ ನೈಟ್ ರೈಡರ್ಸ್‌ ತಂಡಕ್ಕೆ ಸೇರ್ಪಡೆಗೊಳ್ಳುವ ಸಾಧ್ಯತೆ ಇದೆ. ನಾಯಕನಾಗಿ ಕೆಕೆಆರ್​ ತಂಡಕ್ಕೆ 2 ಟ್ರೋಫಿ ಗೆದ್ದುಕೊಟ್ಟಿರುವ ಗಂಭೀರ್​ ಅವರನ್ನು ತಮ್ಮ ತೆಕ್ಕೆಗೆ ಹಾಕಿಕೊಳ್ಳಲು ಫ್ರಾಂಚೈಸಿ ಸರ್ವಪ್ರಯತ್ನ ನಡೆಸುತ್ತಿದೆ ಎಂದು ವರದಿಯಾಗಿದೆ. ಗಂಭೀರ್​ ತಂಡ ತೊರೆದ ನಂತರ ಕೆಕೆಆರ್​, ಪ್ರಶಸ್ತಿ ಗೆಲ್ಲುವಲ್ಲಿ ವಿಫಲವಾಗಿದೆ. ಇಯಾನ್ ಮಾರ್ಗನ್ ನಾಯಕತ್ವದಲ್ಲಿ 2021ರಲ್ಲಿ ಕೆಕೆಆರ್ ಫೈನಲ್​ ಪ್ರವೇಶಿಸಿತ್ತು. ಆದರೆ ಪ್ರಶಸ್ತಿ ಗೆದ್ದಿರಲಿಲ್ಲ.

ಗಂಭೀರ್​​ ಮೇಲೇಕೆ ಕಣ್ಣು?

ಗಂಭೀರ್ ಕೆಕೆಆರ್​​​​​ಗೆ 2 ಐಪಿಎಲ್ ಪ್ರಶಸ್ತಿ ಗೆದ್ದುಕೊಟ್ಟಿದ್ದರು. 2011 ರಿಂದ 2017ರವರೆಗೂ ತಂಡವನ್ನು ಮುನ್ನಡೆಸಿದ್ದ ಗಂಭೀರ್​, ಅತ್ಯಂತ ಬಲಿಷ್ಠ ತಂಡವನ್ನಾಗಿ ಸಿದ್ಧಪಡಿಸಿದ್ದರು. ಚಂದ್ರಕಾಂತ್ ಪಂಡಿತ್ ಪ್ರಸ್ತುತ ಕೆಕೆಆರ್​​​ ಫ್ರಾಂಚೈಸಿಯ ಮುಖ್ಯ ಕೋಚ್ ಆಗಿ ಸೇವೆ ಸಲ್ಲಿಸುತ್ತಿದ್ದಾರೆ. ಆದರೆ ಈ ಬಾರಿ ತಂಡವನ್ನು ಪ್ಲೇಆಫ್‌ಗೇರಿಸುವಲ್ಲಿ ವಿಫಲರಾಗಿದ್ದರು. 2014ರ ಬಳಿಕ ಐಪಿಎಲ್​ ಟ್ರೋಫಿ ಬರ ನೀಗಿಸಲು ಕೆಕೆಆರ್​ ಸಿದ್ಧವಾಗುತ್ತಿದೆ. ಅದರಂತೆ ಗಂಭೀರ್​ಗೆ ಮಣೆ ಹಾಕಲು ಚಿಂತನೆ ರೂಪಿಸಿದೆ.

ಸನ್‌ರೈಸರ್ಸ್ ಹೈದರಾಬಾದ್, ಲಕ್ನೋ ಸೂಪರ್‌ಜೈಂಟ್ಸ್ ಮತ್ತು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡಗಳು ಐಪಿಎಲ್ 2024ರ ಋತುವಿನ ಆರಂಭಕ್ಕೂ ಮೊದಲೇ ತಮ್ಮ ಕೋಚಿಂಗ್ ಸಿಬ್ಬಂದಿ ಬದಲಿಸಿವೆ. ಈ 3 ತಂಡಗಳ ಮುಖ್ಯ ಕೋಚ್‌ಗಳು ಬದಲಾಗಿದ್ದಾರೆ. ಇದೀಗ ಲಕ್ನೋ ಮೆಂಟರ್ ಗೌತಮ್ ಗಂಭೀರ್ ಕೂಡ ತಂಡವನ್ನು ಬದಲಾಯಿಸಲಿದ್ದಾರೆ ಎಂಬ ವರದಿಗಳಿದ್ದು, ಇದು ನಿಜವಾಗುತ್ತಾ ಇಲ್ಲವೇ ಎಂಬುದನ್ನು ಕಾದುನೋಡಬೇಕಿದೆ.