ಐಪಿಎಲ್ 2025ರ ಉಚಿತ ಸ್ಟ್ರೀಮಿಂಗ್ ಇಲ್ಲ; ಜಿಯೋ-ಹಾಟ್ಸ್ಟಾರ್ ವಿಲೀನ ಬಳಿಕ ಹೊಸ ಕ್ರಮ ಸಾಧ್ಯತೆ, ಚಂದಾದಾರಿಕೆ ಯೋಜನೆ ಘೋಷಣೆ
ಹೊಸದಾಗಿ ಆರಂಭವಾದ ಜಿಯೋ ಹಾಟ್‌ಸ್ಟಾರ್‌ನಲ್ಲಿ ಐಪಿಎಲ್ ಪಂದ್ಯಗಳನ್ನು ವೀಕ್ಷಿಸಲು ಚಂದಾದಾರಿಕೆ ಪಡೆಯಬೇಕಾದ ಅಗತ್ಯವಿದೆ. ಪೂರ್ಣ ಪಂದ್ಯ ಉಚಿತ ಸ್ಟ್ರೀಮಿಂಗ್ ಇರುವುದಿಲ್ಲ. ಕನಿಷ್ಠ 149 ರೂ. ರೀಚಾರ್ಜ್‌ ಮಾಡಿದರೆ ಮಾತ್ರ ಪಂದ್ಯ ವೀಕ್ಷಿಸಬಹುದು.
ಈ ಬಾರಿಯ ಐಪಿಎಲ್ ಪಂದ್ಯಾವಳಿಯನ್ನು ಸಂಪೂರ್ಣ ಉಚಿತವಾಗಿ ನೋಡಬಹುದು ಎಂಬ ಕ್ರಿಕೆಟ್ ಅಭಿಮಾನಿಗಳಿಗೆ ನಿರಾಶೆಯಾಗಿದೆ. ಚಂದಾದಾರಿಕೆ ಪಡೆದರೆ ಮಾತ್ರವೇ ಉಚಿತ ಲೈವ್ ಸ್ಟ್ರೀಮಿಂಗ್ ಸಿಗುವ ಸಾಧ್ಯತೆ ಇದೆ. ವಯಾಕಾಮ್ 18 ಮತ್ತು ಸ್ಟಾರ್ ಇಂಡಿಯಾ ವಿಲೀನದಿಂದ ಹೊಸದಾಗಿ ರೂಪುಗೊಂಡ ಜಂಟಿ ಉದ್ಯಮವಾದ ಜಿಯೋಸ್ಟಾರ್‌ನಲ್ಲಿ ಐಪಿಎಲ್ ಪಂದ್ಯಗಳ ಸಂಪೂರ್ಣ ಉಚಿತ ಸ್ಟ್ರೀಮಿಂಗ್ ಇರುವುದಿಲ್ಲ. ಜಿಯೋ ಸಿನೆಮಾ ಮತ್ತು ಡಿಸ್ನಿ + ಹಾಟ್ಸ್ಟಾರ್ ಸ್ಟ್ರೀಮಿಂಗ್ ಪ್ಲಾಟ್‌ಫಾರ್ಮ್‌ಗಳು ವಿಲೀನಗೊಂಡು ಜಿಯೋಸ್ಟಾರ್ ಆಗಿ ರೂಪುಗೊಂಡಿದೆ. ಆದರೆ, ಹೊಸ ಹೈಬ್ರಿಡ್ ಚಂದಾದಾರಿಕೆ ಮಾದರಿಯು ಭಾರತದಾದ್ಯಂತ ಕ್ರಿಕೆಟ್ ಅಭಿಮಾನಿಗಳ ಜೇಬಿಗೆ ಕತ್ತರಿ ಹಾಕಲು ಯೋಜಿಸಿದೆ.
ಸುಮಾರು 3 ಲಕ್ಷ ಗಂಟೆಗಳ ಮನರಂಜನೆ, ಲೈವ್ ಸ್ಪೋರ್ಟ್ಸ್ ಕವರೇಜ್ ಮತ್ತು 50 ಕೋಟಿಗೂ ಹೆಚ್ಚು ಬಳಕೆದಾರರನ್ನು ಹೊಂದಿರುವ ಜಿಯೋಸ್ಟಾರ್, ವೀಕ್ಷಣೆಯ ವಿಶೇಷ ಅನುಭವವನ್ನು ಒದಗಿಸುವ ಗುರಿ ಹೊಂದಿದೆ. ಆದರೆ, ಈ ಬಾರಿ ಕ್ರಿಕೆಟ್ ಪ್ರಿಯರಿಗೆ ಮಾತ್ರ ನಿರಾಶೆಯಾಗುವ ಸಾಧ್ಯತೆ ಬಗ್ಗೆ ವರದಿಯಾಗಿದೆ.
ರಾಯಿಟರ್ಸ್ ವರದಿಯ ಪ್ರಕಾರ, ಅಭಿಮಾನಿಗಳು ಚಂದಾದಾರಿಕೆ ಇಲ್ಲದೆ ಐಪಿಎಲ್ ಪಂದ್ಯಗಳನ್ನು ಕೆಲವು ನಿಮಿಷಗಳ ಕಾಲ ಮಾತ್ರ ವೀಕ್ಷಿಸಬಹುದು. ಉಚಿತ ಅವಧಿ ಮುಗಿದ ನಂತರ, ಚಂದಾದಾರರಾಗಬೇಕಾಗುತ್ತದೆ. ಸಬ್ಸ್ಕ್ರಿಪ್ಷನ್ ಯೋಜನೆಗಳು 149 ರೂ.ಗಳಿಂದ ಪ್ರಾರಂಭವಾಗಲಿವೆ ಎಂದು ವರದಿ ಹೇಳಿದೆ.
ಈ ಹಿಂದೆ ಉಚಿತ ಸ್ಟ್ರೀಮಿಂಗ್ ಲಭ್ಯವಿತ್ತು
2023ರಿಂದ ಬರೋಬ್ಬರಿ 3 ಬಿಲಿಯನ್ ಡಾಲರ್‌ಗೆ ಜನಪ್ರಿಯ ಪಂದ್ಯಾವಳಿಯ ಹಕ್ಕುಗಳನ್ನು ಪಡೆದ ನಂತರ, ಜಿಯೋ ಸಿನೆಮಾ ಐದು ವರ್ಷಗಳವರೆಗೆ ಉಚಿತ ಐಪಿಎಲ್ ಸ್ಟ್ರೀಮಿಂಗ್‌ಗೆ ಅವಕಾಶ ನೀಡಿತ್ತು. ಆದರೆ 2025ರಿಂದ, ಅಭಿಮಾನಿಗಳು ಈಗ ಸಂಪೂರ್ಣ ಪಂದ್ಯವನ್ನು ವೀಕ್ಷಿಸಲು ತಮ್ಮ ಅವಶ್ಯಕತೆಗಳ ಅನುಸಾರ ಚಂದಾದಾರಿಕೆಗೆ ಹಣ ಪಾವತಿಸಬೇಕಾಗುತ್ತದೆ.
ಭಾರತದ ಶ್ರೀಮಂತ ಉದ್ಯಮಿ ಮುಖೇಶ್ ಅಂಬಾನಿ ಅವರ ರಿಲಯನ್ಸ್ ಮತ್ತು ವಾಲ್ಟ್ ಡಿಸ್ನಿ ಕಳೆದ ವರ್ಷ ತಮ್ಮ ಭಾರತೀಯ ಮಾಧ್ಯಮ ವೇದಿಕೆಗಳನ್ನು ವಿಲೀನಗೊಳಿಸಿದರು. ಹೀಗಾಗಿ ವಿಶ್ವದ ಶ್ರೀಮಂತ ಕ್ರಿಕೆಟ್ ಲೀಗ್ ಆದ ಐಪಿಎಲ್ ಸ್ಟ್ರೀಮಿಂಗ್ ನಿಯಮಗಳನ್ನು ಬದಲಾಯಿಸುವ ನಿರ್ಧಾರಕ್ಕೆ ಬರಲಾಗಿದೆ.
ಯೋಜನೆಗಳು ಗೌಪ್ಯವಾಗಿರುವುದರಿಂದ ಮೂಲಗಳು ಹೆಸರು ಹೇಳಲು ನಿರಾಕರಿಸಿವೆ. ಜಂಟಿ ಉದ್ಯಮವನ್ನು ನಿಯಂತ್ರಿಸುವ ರಿಲಯನ್ಸ್ ಸಂಸ್ಥೆಯು ಈ ಕುರಿತು ಪ್ರತಿಕ್ರಿಯೆ ನಿರಾಕರಿಸಿದೆ ಎಂದು ವರದಿ ತಿಳಿಸಿದೆ.
ಜಿಯೋಹಾಟ್‌ಸ್ಟಾರ್‌ನಲ್ಲಿ ಚಂದಾದಾರಿಕೆ ಯೋಜನೆಗಳು ಯಾವುವು?
ಹೊಸ ರೀಬ್ರಾಂಡ್ ಅಪ್ಲಿಕೇಶನ್‌ನಲ್ಲಿ ಸಬ್ಸ್ಕ್ರಿಪ್ಷನ್ ಆಯ್ಕೆ ಲಭ್ಯವಿರುತ್ತದೆ. ಇಲ್ಲಿ 149 ರೂಪಾಯಿಗಳಿಂದ ಮೂಲ ಯೋಜನೆ ಆರಂಭವಾಗಲಿದೆ. ಮೂರು ತಿಂಗಳವರೆಗೆ 499 ರೂ ಪಾವತಿಸಿ ಜಾಹೀರಾತು-ಮುಕ್ತ ಆವೃತ್ತಿಗೆ ಚಂದಾದಾರರಾಗಬಹುದು ಎಂದು ಮೂಲಗಳು ತಿಳಿಸಿವೆ.
ಅಲ್ಟ್ರಾ-ಎಚ್‌ಡಿ 4ಕೆ ಸ್ಟ್ರೀಮಿಂಗ್, ಎಐ-ಚಾಲಿತ ಒಳನೋಟಗಳು, ನೈಜ-ಸಮಯದ ಅಂಕಿಅಂಶ, ಮಲ್ಟಿ-ಆಂಗಲ್ ವೀಕ್ಷಣೆ ಸೇರಿದಂತೆ ಜಿಯೋಹಾಟ್‌ಸ್ಟಾರ್ ಮೂಲಕ ಉನ್ನತ ಸ್ಟ್ರೀಮಿಂಗ್ ಅನುಭವ ಪಡೆಯಬಹುದು.
Jayaraj
