ಸಂಬಂಧವಿಲ್ಲದ ವಿಚಾರಕ್ಕೆ ಕೆಣಕಿ ಕೆಟ್ಟ ಕಾನ್ಸ್ಟಾಸ್, ಜಸ್ಪ್ರೀತ್ ಬುಮ್ರಾ ತಿರುಗೇಟಿಗೆ ಗಪ್ಚುಪ್, ದಿನದ ಕೊನೆಯಲ್ಲಿ ಹೈಡ್ರಾಮ, VIDEO
Jasprit Bumrah: ಸಿಡ್ನಿ ಟೆಸ್ಟ್ ಮೊದಲ ದಿನದಂತ್ಯದ ಕೊನೆಯ ಎಸೆತಕ್ಕೂ ಮುನ್ನ ಕಾಲ್ಕೆರೆದು ಜಗಳಕ್ಕೆ ಬಂದಿದ್ದ ಸ್ಯಾಮ್ ಕಾನ್ಸ್ಟಾಸ್ಗೆ ಜಸ್ಪ್ರೀತ್ ಬುಮ್ರಾ ಸರಿಯಾಗಿ ತಿರುಗೇಟು ನೀಡಿದ್ದಾರೆ. ಅದರ ವಿಡಿಯೋ ಇಲ್ಲಿದೆ ನೋಡಿ.
ಬಾರ್ಡರ್-ಗವಾಸ್ಕರ್ ಟ್ರೋಫಿ: ಸಿಡ್ನಿ ಕ್ರಿಕೆಟ್ ಮೈದಾನದಲ್ಲಿ ನಡೆಯುತ್ತಿರುವ ಐದನೇ ಮತ್ತು ಅಂತಿಮ ಟೆಸ್ಟ್ ಪಂದ್ಯದ ಮೊದಲ ಇನ್ನಿಂಗ್ಸ್ನಲ್ಲಿ ಭಾರತ ತಂಡವನ್ನು 185 ರನ್ಗಳಿಗೆ ಆಲೌಟ್ ಮಾಡಿರುವ ಆಸ್ಟ್ರೇಲಿಯಾ, ಮೊದಲ ದಿನದ ಅಂತ್ಯಕ್ಕೆ 1 ವಿಕೆಟ್ ಕಳೆದುಕೊಂಡು 9 ರನ್ ಗಳಿಸಿದೆ. ಆದರೆ ಇನ್ನೂ 176 ರನ್ಗಳ ಹಿನ್ನಡೆಯಲ್ಲಿದೆ. ಆಸೀಸ್ ಪರ ಆರಂಭಿಕ ಆಟಗಾರ ಉಸ್ಮಾನ್ ಖವಾಜ ಅವರು ಮತ್ತೆ ವೈಫಲ್ಯ ಅನುಭವಿಸಿದ್ದು, 2 ರನ್ ಗಳಿಸಿ ಜಸ್ಪ್ರೀತ್ ಬುಮ್ರಾ ಬೌಲಿಂಗ್ನಲ್ಲಿ ಔಟಾದರು. ಸ್ಲಿಪ್ನಲ್ಲಿದ್ದ ಕೆಎಲ್ ರಾಹುಲ್ಗೆ ಕ್ಯಾಚ್ ನೀಡಿದರು. ಇದರೊಂದಿಗೆ ದಿನದಂತ್ಯವೂ ಮುಕ್ತಾಯಗೊಂಡಿತು.
ಖವಾಜ ಔಟಾಗುವುದಕ್ಕೂ ಮುನ್ನ ಇಡೀ ಮೈದಾನವೇ ಕೂಲ್ ಕೂಲ್ ಆಗಿತ್ತು. ಆದರೆ ಅದೊಂದು ಘಟನೆ ಮೊದಲ ದಿನದ ಹೈಲೈಟ್ ಆಗುವಂತೆ ಮಾಡಿತು. ಇದ್ದಕ್ಕಿದ್ದಂತೆ ವಾಗ್ವಾದ ಜೊರಾಯಿತು. ದಿನದ ಕೊನೆಯ ಓವರ್ನ ಅಂತಿಮ ಎಸೆತ ಎಸೆಯಲು ಟೀಮ್ ಇಂಡಿಯಾ ವೇಗಿ ಬುಮ್ರಾ ಸಜ್ಜಾಗಿದ್ದರು. ಈ ವೇಳೆ ಆಸೀಸ್ನ ಆರಂಭಿಕ ಆಟಗಾರ ಸ್ಯಾಮ್ ಕಾನ್ಸ್ಟಾಸ್ ಅನಗತ್ಯ ವಿಚಾರಕ್ಕೆ ಸುಖಾಸುಮ್ಮನೆ ಜಗಳಕ್ಕಿಳಿದರು. ಆದರೆ ಕಾಲ್ಕೆರೆದು ಜಗಳಕ್ಕೆ ನಿಂತ ಚಿಗುರು ಮೀಸೆಯ ಯುವಕನಿಗೆ ಬುಮ್ರಾ ಸರಿಯಾಗಿ ತಿರುಗೇಟು ಕೊಟ್ಟಿದ್ದು ಅದ್ಭುತವಾಗಿತ್ತು. ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಸಿಕ್ಕಾಪಟ್ಟೆ ವೈರಲ್ ಆಗುತ್ತಿದೆ. ಇಷ್ಟಕ್ಕೂ ಇಬ್ಬರ ನಡುವೆ ಆಗಿದ್ದೇನು? ಬುಮ್ರಾ ತಿರುಗೇಟು ನೀಡಿದ್ದು ಹೇಗೆ? ಇಲ್ಲಿದೆ ವಿವರ.
ಇಷ್ಟಕ್ಕೂ ಆಗಿದ್ದೇನು?
ಸಿಡ್ನಿ ಟೆಸ್ಟ್ನ ಮೊದಲ ದಿನದಾಟ ಮುಕ್ತಾಯಕ್ಕೆ ಇನ್ನೊಂದು ಓವರ್ ಬಾಕಿ ಉಳಿದಿತ್ತು. ಬುಮ್ರಾ ಬೌಲಿಂಗ್ ಮಾಡಲು ಬಂದರು. ಈ ಓವರ್ನಲ್ಲಿ ಮೊದಲ 3 ಎಸೆತಗಳನ್ನು ಎದುರಿಸಿದ್ದ ಕಾನ್ಸ್ಟಾಸ್, 3ನೇ ಎಸೆತದಲ್ಲಿ 1 ರನ್ ಪಡೆದು ನಾನ್ಸ್ಟ್ರೈಕ್ಗೆ ಬಂದರು. ಬಳಿಕ 4 ಮತ್ತು 5ನೇ ಎಸೆತವನ್ನು ಎದುರಿಸಿದ ಖವಾಜ, ರನ್ ಗಳಿಸಲು ವಿಫಲರಾದರು. ಆಗ ದಿನದ ಕೊನೆಯ ಎಸೆತವನ್ನು ಬೌಲ್ ಮಾಡಲು ಬುಮ್ರಾ ಮುಂದಾದರು. ಆದರೆ ಖವಾಜ, ಬ್ಯಾಟಿಂಗ್ಗೆ ಇನ್ನೂ ಸಿದ್ದವಾಗಿರಲಿಲ್ಲ. ಹಾಗಂತ ಬುಮ್ರಾ ಯಾವುದೇ ಕೋಪ ಮಾಡಿಕೊಂಡಿರಲಿಲ್ಲ. ಆದರೆ, ಮತ್ತೆ ಬೌಲ್ ಮಾಡಲು ಮುಂದಾದಾಗಲೂ ಖವಾಜ ಸಿದ್ದರಿರಲಿಲ್ಲ. ಈ ಘಟನೆ ಬುಮ್ರಾ ಕೋಪಕ್ಕೆ ಕಾರಣವಾಯಿತು.
ಬುಮ್ರಾ ಆ ವೇಳೆ ಬ್ಯಾಟಿಂಗ್ ಮಾಡಲು ಇನ್ನೆಷ್ಟು ಸಮಯ ಬೇಕು ಎನ್ನುವರ್ಥದಲ್ಲಿ ಕೈ ಸನ್ನೆ ಮಾಡಿ ಅಸಮಾಧಾನ ಹೊರಹಾಕಿದರು. ಆದರೆ ಸ್ಟ್ರೈಕ್ನಲ್ಲಿದ್ದ ಖವಾಜ ಸುಮ್ಮನಿದ್ದರೂ ನಾನ್ಸ್ಟ್ರೈಕ್ನಲ್ಲಿದ್ದ ಸ್ಯಾಮ್ ಕಾನ್ಟ್ಸಾಸ್ ತನ್ನ ಪಾಡಿಗೆ ತಾನಿರದೆ ಕಾಲ್ಕೆರದು ಜಗಳಕ್ಕೆ ಬಂದರು. ಬ್ಯಾಟಿಂಗ್ ಮಾಡುತ್ತಿದ್ದ ಖವಾಜ ಅವರೇ ಸುಮ್ಮನಿದ್ದರೆ, ಈತ ಬೇಕೆಂತಲೇ ಬುಮ್ರಾ ಜತೆಗೆ ಜಗಳಕ್ಕಿಳಿದು ದೊಡ್ಡ ಹೈಡ್ರಾಮಾವನ್ನೇ ಸೃಷ್ಟಿಸಿ ಬಿಟ್ಟರು. ಬುಮ್ರಾ ಬೌಲಿಂಗ್ ಮಾಡುವುದನ್ನೇ ಬಿಟ್ಟು ಕಾನ್ಸ್ಟಾಸ್ಗೆ ಬಳಿಗೆ ಬಂದರು. ಆಗ ಇಬ್ಬರ ನಡುವೆ ಮಾತಿಗೆ ಮಾತು ಬೆಳೆಯಿತು. ಅಂಪೈರ್ಸ್, ಸಹ ಆಟಗಾರರು ಮಧ್ಯ ಪ್ರವೇಶಿಸಿ ಪರಿಸ್ಥಿತಿಯನ್ನು ತಿಳಿಗೊಳಿಸಿದರು.
ಜಸ್ಪ್ರೀತ್ ಬುಮ್ರಾ ತಿರುಗೇಟು
ಪರಿಸ್ಥಿತಿ ತಿಳಿಯಾದ ಬಳಿಕ ದಿನದ ಕೊನೆಯ ಎಸೆತವನ್ನು ಎದುರಿಸಿದ ಸ್ಟ್ರೈಕ್ನಲ್ಲಿದ್ದ ಖವಾಜ ಅವರನ್ನು ಬುಮ್ರಾ ಔಟ್ ಮಾಡಿದರು. ಕೊನೆಯ ಎಸೆತವನ್ನು ಡಾಟ್ ಮಾಡಿ ಎರಡನೇ ದಿನಕ್ಕೆ ಬ್ಯಾಟಿಂಗ್ ಕಾಯ್ದುಕೊಳ್ಳಲು ಮುಂದಾಗಿದ್ದ ಖವಾಜಗೆ ಬುಮ್ರಾ ಗೇಟ್ ಪಾಸ್ ನೀಡಿದರು. ಖವಾಜರನ್ನು ಔಟ್ ಮಾಡಿದ ಬೆನ್ನಲ್ಲೇ ಭಾರತದ ಆಟಗಾರರು ಕಾನ್ಸ್ಟಾಸ್ ಮುಂದೆ ಬಂದು ಆಕ್ರಮಣಕಾರಿಯಾಗಿ ಸಂಭ್ರಮಿಸಿದರು. ತನಗೆ ಸಂಬಂಧ ಇಲ್ಲದ ವಿಚಾರಕ್ಕೆ ಕೈ ಹಾಕಿ ಕೆಣಕಿದ್ದ ಕಾನ್ಸ್ಟಾಸ್ಗೆ ಇದು ಮುಜುಗರವೂ ತಂದಿತು. ಆದರೆ ಔಟಾದ ಬೇಸರದಲ್ಲಿ ಖವಾಜ ತನ್ನ ಪಾಡಿಗೆ ತಾನು ಪೆವಿಲಿಯನ್ ಕಡೆಗೆ ಹೆಜ್ಜೆ ಹಾಕಿದರು. ಅದರಲ್ಲೂ ವಿರಾಟ್ ಕೊಹ್ಲಿ ಅವರ ಸಂಭ್ರಮವಂತೂ ಮುಗಿಲು ಮುಟ್ಟಿತ್ತು. ಕಾನ್ಸ್ಟಾಸ್ ಮುಂದೆಯೇ ಅಗ್ರೆಸ್ಸಿವ್ ಸೆಲೆಬ್ರೇಷನ್ ಮಾಡಿದರು. ಬುಮ್ರಾ ಸಹ ಕಾನ್ಸ್ಟಾಸ್ ಮುಂದೆಯೇ ಕಿರಿಚಾಡಿದರು. ವಿಧಿ ಇಲ್ಲದೆ ಕಾನ್ಸ್ಟಾಸ್ ತನಗೆ ಏನೂ ಸಂಬಂಧವೇ ಇಲ್ಲ ಎನ್ನುವಂತೆ ಗ್ಲೌಸ್ ತೆಗೆದು ಡಗೌಟ್ನತ್ತ ಹೆಜ್ಜೆ ಹಾಕಿದರು. ಆದರೆ ಈ ದೃಶ್ಯ ಎಲ್ಲರನ್ನೂ ರೋಮಾಂಚನಗೊಳಿಸಿದ್ದಂತೂ ಸುಳ್ಳಲ್ಲ.
