ಕನ್ನಡ ಸುದ್ದಿ  /  Cricket  /  Jemimah Rodrigues Meg Lanning Score Fifties Help Delhi Captitals Beat Mumbai Indians By 29 Runs Dc Vs Mi Wpl 2024 Prs

ತವರಿನಲ್ಲಿ ಘರ್ಜಿಸಿದ ಜೆಮಿಮಾ ರೋಡ್ರಿಗಸ್; ಡೆಲ್ಲಿ ವಿರುದ್ಧ 29 ರನ್​ಗಳಿಂದ ಸೋತ ಮುಂಬೈ ಇಂಡಿಯನ್ಸ್

Delhi Capitals vs Mumbai Indians : ಮುಂಬೈ ಇಂಡಿಯನ್ಸ್​ ವಿರುದ್ಧದ ಡಬ್ಲ್ಯುಪಿಎಲ್​ನ 12ನೇ ಪಂದ್ಯದಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್​ 29 ರನ್​ಗಳ ಭರ್ಜರಿ ಗೆಲುವು ದಾಖಲಿಸಿದೆ.

ಜೆಮಿಮಾ ರೋಡ್ರಿಗಸ್ ಬ್ಯಾಟಿಂಗ್ ವೈಭವ.
ಜೆಮಿಮಾ ರೋಡ್ರಿಗಸ್ ಬ್ಯಾಟಿಂಗ್ ವೈಭವ. (PTI)

ವುಮೆನ್ಸ್​ ಪ್ರೀಮಿಯರ್​​ ಲೀಗ್​​ನ 2ನೇ ಹಂತದಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್​ ಜಯದೊಂದಿಗೆ ಅಭಿಯಾನ ಆರಂಭಿಸಿದೆ. ಉದ್ಘಾಟನಾ ಪಂದ್ಯದಲ್ಲಿ ಮುಂಬೈ ಇಂಡಿಯನ್ಸ್ ವಿರುದ್ಧ ಸೋತಿದ್ದ ಡೆಲ್ಲಿ ಈಗ ಸೇಡು ತೀರಿಸಿಕೊಂಡಿದೆ. ತವರಿನ ಅರುಣ್ ಜೇಟ್ಲಿ ಮೈದಾನದಲ್ಲಿ ನಡೆದ 2ನೇ ಹಂತದ ಪ್ರಥಮ ಪಂದ್ಯದಲ್ಲಿ ಮೆಗ್ ಲ್ಯಾನಿಂಗ್ ಪಡೆ 29 ರನ್​ಗಳಿಂದ ಜಯದ ನಗೆ ಬೀರಿದ್ದು, ಅಂಕಪಟ್ಟಿಯಲ್ಲಿ ಅಗ್ರಸ್ಥಾನ ಭದ್ರಪಡಿಸಿಕೊಂಡಿದೆ.

ಟಾಸ್ ಗೆದ್ದ ಮುಂಬೈ ಇಂಡಿಯನ್ಸ್​, ಡೆಲ್ಲಿಗೆ ಮೊದಲು ಬ್ಯಾಟಿಂಗ್ ಮಾಡಲು ಆಹ್ವಾನ ಕೊಟ್ಟಿತು. ಅದರಂತೆ ಮೊದಲು ಬ್ಯಾಟಿಂಗ್ ನಡೆಸಿದ ಕ್ಯಾಪಿಟಲ್ಸ್​, ಬಿರುಸಿನ ಆರಂಭ ಪಡೆಯಿತು. ಶಫಾಲಿ ವರ್ಮಾ ಎಂದಿನಂತೆ ಆಕ್ರಮಣಕಾರಿ ಆಟಕ್ಕೆ ಒತ್ತು ನೀಡಿದರು. ಆದರೆ, 12 ಎಸೆತಗಳಲ್ಲಿ 3 ಬೌಂಡರಿ, 2 ಸಿಕ್ಸರ್​ ಸಿಡಿಸಿ 28 ರನ್ ಗಳಿಸಿ ಔಟಾದರು. ತದ ನಂತರ ಕಣಕ್ಕಿಳಿದ ಅಲೀಸ್ ಕ್ಯಾಪ್ಸೆ (19) ಹೆಚ್ಚು ಕ್ರೀಸ್​ನಲ್ಲಿ ಇರಲಿಲ್ಲ.

ಆದರೆ ಈ ಹಂತದಲ್ಲಿ ಒಂದಾದ ಆರಂಭಿಕ ಆಟಗಾರ್ತಿ ಮೆಗ್​ ಲ್ಯಾನಿಂಗ್ ಮತ್ತು ಜೆಮಿಮಾ ರೋಡ್ರಿಗಸ್ ಮುಂಬೈ ಬೌಲರ್​ಗಳಿಗೆ ಬೆಂಡೆತ್ತಿತ್ತು. ಅಲ್ಲದೆ, ತಂಡಕ್ಕೆ ಉತ್ತಮ ಅಡಿಪಾಯ ಹಾಕಿಕೊಟ್ಟರು. ಎರಡು ವಿಕೆಟ್ ನಂತರ ಜವಾಬ್ದಾರಿಯುತ ಬ್ಯಾಟಿಂಗ್ ನಡೆಸಿದ ನಾಯಕಿ ಮೆಗ್​ ಲ್ಯಾನಿಂಗ್​, ಭರ್ಜರಿ ಅರ್ಧಶತಕ ಸಿಡಿಸಿ ಆಸರೆಯಾದರು. 38 ಎಸೆತಗಳಲ್ಲಿ 6 ಬೌಂಡರಿ, 2 ಸಿಕ್ಸರ್​ ಸಹಿತ 53 ರನ್ ಗಳಿಸಿ ಔಟಾದರು.

ಲ್ಯಾನಿಂಗ್ ಜೊತೆಗೆ ನಿಧಾನವಾಗಿ ರನ್ ಕಲೆ ಹಾಕುತ್ತಿದ್ದ ಜೆಮಿಮಾ, ಅಂತಿಮ ಹಂತದ ಓವರ್​​ಗಳಲ್ಲಿ ಗೇರ್​ ಚೇಂಜ್ ಮಾಡಿದರು. ಮದವೇರಿದ ಆನೆಯಂತೆ ಘರ್ಜಸಿ ತಂಡವ ಮೊತ್ತವನ್ನು 190ರ ಗಡಿ ದಾಟಿಸಿದರು. ಬೌಂಡರಿ-ಸಿಕ್ಸರ್​​ಗಳ ಸುರಿಮಳೆಗೈದ ಜೆಮಿಮಾ, ಸ್ಪೋಟಕ ಅರ್ಧಶತಕ ಸಿಡಿಸಿದರು. ಕೇವಲ 32 ಎಸೆತಗಳಲ್ಲಿ 8 ಬೌಂಡರಿ, 3 ಸಿಕ್ಸರ್​ ಸಹಿತ ಅಜೇಯ 69 ರನ್ ಚಚ್ಚಿದರು. ಸ್ಟ್ರೇಕ್​ರೇಟ್ 209.09.

ಜೆಮಿಮಾ ಒಂದೆಡೆ ಬೆಂಡೆತ್ತುತ್ತಿದ್ದರೆ ಮತ್ತೊಂದೆಡೆ ಮರಿಜಾನ್ನೆ ಕಪ್ 11 ರನ್ ಗಳಿಸಿ ಸಾಥ್ ನೀಡಿದರು. ಅಂತಿಮವಾಗಿ ಡೆಲ್ಲಿ 20 ಓವರ್​​ಗಳಲ್ಲಿ 4 ವಿಕೆಟ್​ ನಷ್ಟಕ್ಕೆ 192 ರನ್​ಗಳ ಬೃಹತ್​ ಮೊತ್ತ ಕಲೆ ಹಾಕಿತು. ಮುಂಬೈ ಪರ ಶಬ್ನಿಮ್ ಇಸ್ಮಾಯಿಲ್, ಸಾಯಿಕಾ ಇಶಾಕ್, ಪೂಜಾ ವಸ್ತ್ರಕರ್, ಹೇಲಿ ಮ್ಯಾಥ್ಯೂಸ್ ತಲಾ ಒಂದು ವಿಕೆಟ್ ಪಡೆದರು.

ಡೆಲ್ಲಿ ನೀಡಿದ 193 ರನ್​ಗಳ ಗುರಿ ಬೆನ್ನಟ್ಟಿದ ಮುಂಬೈ, ಉತ್ತಮ ಆರಂಭ ಪಡೆಯಲಿಲ್ಲ. ಡೆಲ್ಲಿ ಬೌಲರ್ಸ್​ ಹರ್ಮನ್ ಪಡೆಯ ಬ್ಯಾಟರ್​​ಗಳಿಗೆ ಕಡಿವಾಣ ಹಾಕಿದರು. ಯಾಸ್ತಿಕಾ ಭಾಟಿಯಾ 6, ನಟಾಲಿ ಸೀವರ್ 5, ಹರ್ಮನ್​ಪ್ರೀತ್​ ಕೌರ್​​ 6 ರನ್ ಗಳಿಸಿ ಬೇಗನೇ ಔಟಾದರು. ಆದರೆ ಹೇಲಿ ಮ್ಯಾಥ್ಯೂಸ್ (29) ಹೋರಾಡಲು ಪ್ರಯತ್ನ ನಡೆಸಿದರಾದರೂ ಸಾಧ್ಯವಾಗಲಿಲ್ಲ. ಅಮೆಲಿಯಾ ಕೆರ್, ಪೂಜಾ ವಸ್ತ್ರಾಕರ್ ತಲಾ 17 ರನ್​ಗೆ ಸುಸ್ತಾದರು.

ಆದರೆ ಅದಾಗಲೇ ಮುಂಬೈ ಸೋಲೊಪ್ಪಿಕೊಂಡಿತ್ತು. ಚೇಸ್​ ಮಾಡುವುದು ಕಷ್ಟವಾಗಿತ್ತು. ಈ ಹಂತದಲ್ಲಿ ಅಮನ್ಜೋತ್ ಕೌರ್ ಮತ್ತು ಎಸ್ ಸಜನಾ ಅವರು ಫೈಟ್ ನೀಡಲು ಯತ್ನಿಸಿದರು. ಗೆಲುವಿಗಾಗಿ ಹೋರಾಡಿದರು. ಅಮನ್ಜೋತ್ 27 ಎಸೆತಗಳಲ್ಲಿ 7 ಬೌಂಡರಿ ಸಹಿತ 42 ರನ್ ಗಳಿಸಿದರು. ಮತ್ತೊಂದೆಡೆ ಸಜನಾ 24 ರನ್ ಗಳಿಸಿದರೂ ಗೆಲುವು ಅವರ ಪರ ತಿರುಗಲಿಲ್ಲ. ಮುಂಬೈ 20 ಓವರ್​​ಗಳಲ್ಲಿ 8 ವಿಕೆಟ್ ನಷ್ಟಕ್ಕೆ 168 ರನ್ ಕಲೆ ಹಾಕಲಷ್ಟೇ ಶಕ್ತವಾಯಿತು. ಜೆಸ್ ಜೊನಾಸೆನ್ ಮೂರು ವಿಕೆಟ್ ಪಡೆದರು.

IPL_Entry_Point