ಆರ್​ಸಿಬಿ ಆಟಗಾರನ ಅಬ್ಬರ, ಮಹಾರಾಜ ಟ್ರೋಫಿ ಗೆದ್ದ ಮೈಸೂರು ವಾರಿಯರ್ಸ್; ಫೈನಲ್​ನಲ್ಲಿ ಮುಗ್ಗರಿಸಿದ ಬೆಂಗಳೂರು ಬ್ಲಾಸ್ಟರ್ಸ್

ಮೂರನೇ ಆವೃತ್ತಿಯ ಮಹಾರಾಜ ಟ್ರೋಫಿ ಟಿ20 ಟೂರ್ನಿಯ ಫೈನಲ್ ಪಂದ್ಯದಲ್ಲಿ ಬೆಂಗಳೂರು ಬ್ಲಾಸ್ಟರ್​ ತಂಡವನ್ನು ಮಣಿಸಿದ ಮೈಸೂರು ವಾರಿಯರ್ಸ್ ಚೊಚ್ಚಲ ಟ್ರೋಫಿಯನ್ನು ಮುಡಿಗೇರಿಸಿಕೊಂಡಿದೆ. ಸರ್ವಾಂಗೀಣ ಪ್ರದರ್ಶನದೊಂದಿಗೆ ಅದ್ಭುತ ಮತ್ತು ಅಮೋಘ ಜಯ ಸಾಧಿಸಿ ಚಾಂಪಿಯನ್ ಪಟ್ಟ ಅಲಂಕರಿಸಿದೆ. ಅದರಲ್ಲೂ ಎಸ್​ಯು ಕಾರ್ತಿಕ್ (71), ನಾಯಕ ಕರುಣ್ ನಾಯರ್ (66) ಮತ್ತು ಆರ್​ಸಿಬಿ ಆಟಗಾರ ಮನೋಜ್ ಭಾಂಡಗೆ (44*) ಅವರ ಅಮೋಘ ಬ್ಯಾಟಿಂಗ್ ನೆರವಿನಿಂದ ಮೈಸೂರು ರನ್​ ಮಳೆ ಹರಿಸಿತು. ಇದರೊಂದಿಗೆ ಬೆಂಗಳೂರು ತಂಡದ ವಿರುದ್ಧ 45 ರನ್​ಗಳ ಭರ್ಜರಿ ಗೆಲುವು ಸಾಧಿಸಿತು.

ಬೆಂಗಳೂರಿನ ಚಿನ್ನಸ್ವಾಮಿ ಕ್ರಿಕೆಟ್ ಮೈದಾನದಲ್ಲಿ ನಡೆದ ಅಂತಿಮ ಹಾಗೂ ಕೊನೆಯ ಪಂದ್ಯದಲ್ಲಿ ಟಾಸ್ ಸೋತು ಮೊದಲು ಬ್ಯಾಟಿಂಗ್ ನಡೆಸಿದ ಮೈಸೂರು ಉತ್ತಮ ಆರಂಭ ಪಡೆಯಲು ವಿಫಲವಾಯಿತು. ಆ ಬಳಿಕ ಒಂದಾದ ಎಸ್​ಯು ಕಾರ್ತಿಕ್ ಮತ್ತು ಕರುಣ್ ನಾಯರ್​ ಬಿರುಸಿನ ಜೊತೆಯಾಟವಾಡಿದರು. 2ನೇ ವಿಕೆಟ್​ಗೆ 81 ರನ್​ಗಳ ಪಾಲುದಾರಿಕೆ ಹರಿದು ಬಂತು. ಕರುಣ್ ನಾಯರ್ 45 ಎಸೆತಗಳಲ್ಲಿ 6 ಬೌಂಡರಿ, 3 ಸಿಕ್ಸರ್ ಸಹಿತ 66 ರನ್ ಪೇರಿಸಿದರು. ಮತ್ತು ಕಾರ್ತಿಕ್ 44 ಎಸೆತಗಳಲ್ಲಿ 7 ಬೌಂಡರಿ, 3 ಸಿಕ್ಸರ್​ ಸಹಿತ 71 ರನ್ ಚಚ್ಚಿದರು. ಅಲ್ಲದೆ, 5ನೇ ಕ್ರಮಾಂಕದಲ್ಲಿ ಕಣಕ್ಕಿಳಿದ ಭಾಂಡಗೆ ಕೇವಲ 13 ಎಸೆತಗಳಲ್ಲಿ 2 ಬೌಂಡರಿ, 5 ಸಿಕ್ಸರ್ ಸಹಿತ ಅಜೇಯ 44 ರನ್ ಬಾರಿಸಿದರು.

ಇವರ ಬ್ಯಾಟಿಂಗ್ ವೈಭವದಿಂದ ಮೈಸೂರು 4 ವಿಕೆಟ್ ನಷ್ಟಕ್ಕೆ 207 ರನ್​ಗಳ ಬೃಹತ್ ಮೊತ್ತ ಪೇರಿಸಿತು. ಇದಕ್ಕೆ ಗುರಿಯಾಗಿ ಕಣಕ್ಕಿಳಿದ ಬೆಂಗಳೂರು ಆರಂಭಿಕ ಆಟಗಾರ ಎಲ್​ಆರ್ ಚೇತನ್ ಅರ್ಧಶತಕ ದಾಖಲಿಸಿದ್ದು ಬಿಟ್ಟರೆ, ಉಳಿದವರು ಪ್ರತಿರೋಧ ನೀಡಲಿಲ್ಲ. ಮಯಾಂಕ್ ಅಗರ್ವಾಲ್ 6, ಭುವನ್ ರಾಜು 1, ಶಿವಕುಮಾರ್ ರಕ್ಷಿತ್ 5, ಶುಭಾಂಗ್ ಹೆಗ್ಡೆ 5, ಸೂರಜ್ ಅಹುಜಾ 8 ರನ್ ಗಳಿಸಲಷ್ಟೆ ಶಕ್ತರಾದರು. ಇದರ ಪರಿಣಾಮವಾಗಿ 8 ವಿಕೆಟ್ ನಷ್ಟಕ್ಕೆ 162 ರನ್ ಗಳಿಸಲಷ್ಟೇ ಸಾಧ್ಯವಾಯಿತು. ಹಾಗಾಗಿ 45 ರನ್​​ಗಳಿಂದ ಶರಣಾಗಬೇಕಾಯಿತು. ವಿದ್ಯಾದರ್ ಪಾಟೀಲ್ 3 ವಿಕೆಟ್ ಮತ್ತು ಕೆ ಗೌತಮ್ 2 ವಿಕೆಟ್ ಪಡೆದು ಮಿಂಚಿದರು.

ಇದನ್ನೂ ಓದಿ: ರಾಹುಲ್ ಗಾಂಧಿ-ಸೋನಿಯಾ ಗಾಂಧಿ ಟೀಕಿಸಿದ್ದ ಪತ್ರಕರ್ತನ ವಿರುದ್ಧ ಬಿತ್ತು ಕೇಸ್; ಮತ್ತೊಂದು ಪ್ರಕರಣದಲ್ಲಿ 1.6 ಕೆಜಿ ಚಿನ್ನ ವಶ

ಮನೋಜ್ ಭಾಂಡಗೆ ಮಿಂಚು

ಆರ್​​ಸಿಬಿ ತಂಡದಲ್ಲಿ ಸ್ಥಾನ ಪಡೆದಿರುವ ಮನೋಜ್ ಭಾಂಡಗೆ ಮಹಾರಾಜ ಟ್ರೋಫಿಯಲ್ಲಿ ಮಿಂಚಿನ ಪ್ರದರ್ಶನ ನೀಡಿದ್ದಾರೆ. ಫೈನಲ್​​ನಲ್ಲೂ 13 ಎಸೆತಗಳಲ್ಲಿ 44 ರನ್ ಗಳಿಸಿ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದ್ದಾರೆ. 12 ಪಂದ್ಯಗಳಲ್ಲಿ 292 ರನ್ ಗಳಿಸಿದ್ದಾರೆ. ಅದು ಕೂಡ 41ರ ಬ್ಯಾಟಿಂಗ್ ಸರಾಸರಿ ಮತ್ತು 213ರ ಸ್ಟ್ರೈಕ್​ರೇಟ್​​ನಲ್ಲಿ ಅಬ್ಬರಿಸಿದ್ದಾರೆ. ಈ ಆವೃತ್ತಿಯಲ್ಲಿ 16 ಬೌಂಡರಿ, 25 ಸಿಕ್ಸರ್​ ಸಿಡಿಸಿದ್ದಾರೆ. ಆದರೆ ಇಂತಹ ಆಟಗಾರನಿಗೆ ಆರ್​ಸಿಬಿ ಒಂದೇ ಒಂದು ಅವಕಾಶ ನೀಡಿರಲಿಲ್ಲ. ಎರಡು ಆವೃತ್ತಿಗಳಲ್ಲೂ ಬೆಂಚ್​ಗೆ ಸೀಮಿತಗೊಳಿಸಿದೆ.

ಈವರೆಗೂ ಚಾಂಪಿಯನ್ ಆದ ತಂಡಗಳು

2022 - ಗುಲ್ಬರ್ಗಾ ಮಿಸ್ಟಿಕ್ಸ್

2023 - ಹುಬ್ಬಳ್ಳಿ ಟೈಗರ್ಸ್

2024 - ಮೈಸೂರು ವಾರಿಯರ್ಸ್

ಗರಿಷ್ಠ ರನ್ ಸಿಡಿಸಿದವರು (2024ರ ಆವೃತ್ತಿ)

ಕರುಣ್ ನಾಯರ್ - 560

ಅಭಿನವ್ ಮನೋಹರ್​ - 507

ಎಲ್​ಆರ್​ ಚೇತನ್ - 429

ಗರಿಷ್ಠ ವಿಕೆಟ್ ಪಡೆದವರು (2024ರ ಆವೃತ್ತಿ)

ಎಲ್​ಆರ್​ ಕುಮಾರ್​ - 17

ವಿದ್ಯಾದರ್ ಪಾಟೀಲ್ - 16

ಲವೀಶ್ ಕೌಶಲ್ - 16

ಗರಿಷ್ಠ ಸಿಕ್ಸರ್ ಸಿಡಿಸಿದವರು (2024ರ ಆವೃತ್ತಿ)

ಅಭಿನವ್ ಮನೋಹರ್​ - 52

ಕರುಣ್ ನಾಯರ್ - 30

ಮನೋಜ್ ಭಾಂಡಗೆ - 25

ಇದನ್ನೂ ಓದಿ: ಸಿದ್ದರಾಮಯ್ಯ ಸಾಮಾಜಿಕ ಖಾತೆಗಳ ನಿರ್ವಹಣೆ ಖರ್ಚು ಬಹಿರಂಗ; ತಿಂಗಳಿಗೆ 54 ಲಕ್ಷ ವ್ಯಯ, ಹಿಂದಿನ ಸಿಎಂಗಳಿಗೆ ಹೋಲಿಸಿದರೆ ತೀರಾ ಕಡಿಮೆ