ಕೊಹ್ಲಿ-ಪಾಂಡ್ಯ ಪವರ್​, ಆರ್​​ಸಿಬಿ ಟೇಬಲ್ ಟಾಪರ್; ಡೆಲ್ಲಿ ವಿರುದ್ಧ ಬೆಂಗಳೂರಿಗೆ ಭರ್ಜರಿ ಗೆಲುವು, ಪರ್ಪಲ್-ಆರೆಂಜ್ ಕ್ಯಾಪ್ ಬೋನಸ್

26ಕ್ಕೆ 3 ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿದ್ದರ ನಡುವೆಯೂ ಒತ್ತಡ ನಿಭಾಯಿಸಿ 119 ರನ್​ಗಳ ಜೊತೆಯಾಟವಾಡಿದ ವಿರಾಟ್ ಕೊಹ್ಲಿ (51) ಮತ್ತು ಕೃನಾಲ್ ಪಾಂಡ್ಯ (73 ಅಜೇಯ) ಅವರ ಅದ್ಭುತ ಆಟದ ಬಲದಿಂದ ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ ರಾಯಲ್ ಚಾಲೆಂಜರ್ಸ್ ಬೆಂಗಳೂರು 6 ವಿಕೆಟ್​​ಗಳ ಭರ್ಜರಿ ಗೆಲುವು ದಾಖಲಿಸಿದೆ. ಈ ಜಯದೊಂದಿಗೆ ತವರಿನ ಸೋಲಿಗೆ ಅವರದ್ದೇ ತವರಿನಲ್ಲಿ ಸೇಡು ತೀರಿಸಿಕೊಂಡಿದೆ. ಇದೀಗ ತವರಿನಾಚೆ ಸತತ 6 ಪಂದ್ಯಗಳನ್ನು ಗೆದ್ದಿರುವ ಆರ್​ಸಿಬಿ ಇದೀಗ ಒಟ್ಟು 7 ಗೆಲುವಿನೊಂದಿಗೆ 14 ಅಂಕ ಪಡೆದು ಟೇಬಲ್ ಟಾಪರ್​ ಆಗಿದೆ. ಇಲ್ಲಿ ಮತ್ತೊಂದು ಬೋನಸ್ ಎಂದರೆ ಆರೆಂಜ್ (ವಿರಾಟ್-443) ಮತ್ತು ಪರ್ಪಲ್ ಕ್ಯಾಪ್ (ಜೋಶ್ ಹೇಜಲ್ ವುಡ್ - 18 ವಿಕೆಟ್) ಎರಡೂ ನಮ್ಮವೇ ಆಗಿವೆ.

ದೆಹಲಿಯ ಅರುಣ್ ಜೇಟ್ಲಿ ಕ್ರಿಕೆಟ್ ಮೈದಾನದಲ್ಲಿ ನಡೆದ ಹೈವೋಲ್ಟೇಜ್ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ನಡೆಸಿದ ಡೆಲ್ಲಿ, ಆರ್​ಸಿಬಿ ಬೌಲರ್​ಗಳ ದಾಳಿಗೆ ತತ್ತರಿಸಿತು. ಇದರ ನಡುವೆಯೂ 20 ಓವರ್​​ ಪೂರ್ಣಗೊಳಿಸಿದ ಡಿಸಿ 8 ವಿಕೆಟ್ ನಷ್ಟಕ್ಕೆ 162 ರನ್ ಕಲೆ ಹಾಕಿತು. ಭುವನೇಶ್ವರ್​ ಕುಮಾರ್ 3 ವಿಕೆಟ್​, ಜೋಶ್ ಹೇಜಲ್​ವುಡ್ 2 ವಿಕೆಟ್ ಪಡೆದು ಅಕ್ಷರ್​ ಪಡೆಯನ್ನು ಕಟ್ಟಿ ಹಾಕಿದರು. ಈ ಸುಲಭ ಗುರಿ ಬೆನ್ನಟ್ಟಿದ ಆರ್​​ಸಿಬಿ ಪವರ್​ಪ್ಲೇನಲ್ಲೇ ಇಕ್ಕಟ್ಟಿಗೆ ಸಿಲುಕಿತು. ನೋಡ ನೋಡುತ್ತಿದ್ದಂತೆ 26 ರನ್​ಗೆ 3 ವಿಕೆಟ್ ಕಳೆದುಕೊಂಡಿತು. ಆದರೂ ಛಲ ಬಿಡದೆ ಹೋರಾಡಿ ಗೆದ್ದು ಬೀಗಿತು.

ಕೃನಾಲ್ ಪಾಂಡ್ಯ ಗೆಲುವಿನಾಟ

163 ರನ್ ಗುರಿ ಬೆನ್ನಟ್ಟಿದ ಆರ್​ಸಿಬಿ 4 ಓವರ್​ಗಳ ಅಂತ್ಯಕ್ಕೆ 26 ರನ್ ಗಳಿಸಿ ಮೂರು ವಿಕೆಟ್ ಕಳೆದುಕೊಂಡಿತು. ಪದಾರ್ಪಣೆ ಮಾಡಿದ ಜೇಕಬ್ ಬೆಥೆಲ್ (12), ಇನ್​ಫಾರ್ಮ್ ಬ್ಯಾಟರ್​ ದೇವದತ್ ಪಡಿಕ್ಕಲ್ (0), ನಾಯಕ ರಜತ್ ಪಾಟೀದಾರ್ (6) ಬೇಗನೇ ಔಟಾದರು. ಇದು ಆರ್​ಸಿಬಿ ತಂಡದ ಜೊತೆಗೆ ಅಭಿಮಾನಿಗಳಿಗೂ ಆತಂಕ ಹೆಚ್ಚಿಸಿತ್ತು. ಕೊಹ್ಲಿ ಇದ್ದರೂ ಎನ್ನುವ ಭರವಸೆಯ ಜೊತೆಗೆ ಸೋಲುವ ಆತಂಕವೂ ಉಳಿದಿತ್ತು. ಆದರೆ ಚಾಣಾಕ್ಷ ನಡೆ ಅನುಸರಿಸಿದ ಟೀಮ್ ಮ್ಯಾನೇಜ್​ಮೆಂಟ್ ಜಿತೇಶ್ ಶರ್ಮಾ ಬದಲಿಗೆ ಕೃನಾಲ್ ಪಾಂಡ್ಯರನ್ನು ಕಣಕ್ಕಿಳಿಸಿತು. ಮ್ಯಾನೇಜ್​ಮೆಂಟ್ ಇಟ್ಟ ನಂಬಿಕೆಗೂ ಕ್ರೀಸ್​​ನಲ್ಲಿ ಕೊಟ್ಟ ಅನುಭವದ ಸಲಹೆಗಳಿಗೆ ತಕ್ಕಂತೆ ಬ್ಯಾಟಿಂಗ್ ನಡೆಸಿದ ಕೃನಾಲ್, ಮ್ಯಾಚ್​ ವಿನ್ನಿಂಗ್ ಪ್ರದರ್ಶನ ಕೊಟ್ಟರು.

ಇದು ಕೃನಾಲ್ ಅವರ ವೃತ್ತಿಜೀವನದ ಶ್ರೇಷ್ಠ ಇನ್ನಿಂಗ್ಸ್​​ಗಳಲ್ಲಿ ಒಂದು ಎಂದರೂ ತಪ್ಪಾಗಲ್ಲ. ಒತ್ತಡ ನಿಭಾಯಿಸಿ ತಂಡವನ್ನು ಮುನ್ನಡೆಸಿಕೊಟ್ಟ ಕೃನಾಲ್ ಆಗಾಗ್ಗೆ ಚೆಂಡನ್ನು ಬೌಂಡರಿ ಗೆರೆ ದಾಟಿಸುವ ಮೂಲಕ ಒತ್ತಡವನ್ನು ನಿಯಂತ್ರಿಸುವ ಕೆಲಸ ಮಾಡಿದರು. ಅದಕ್ಕೆ ತಕ್ಕಂತೆ ತಕ್ಕನಾಗಿ ಕೊಹ್ಲಿ ಸಾಥ್ ಕೊಟ್ಟರು. ಸೊಗಸಾಗಿ ಸ್ಟ್ರೈಕ್​ ರೊಟೇಟ್ ಮಾಡಿದರು. ಬೌಲಿಂಗ್​ನಲ್ಲಿ 28ಕ್ಕೆ 1 ವಿಕೆಟ್ ಕಿತ್ತಿದ್ದ ಪಾಂಡ್ಯ, ಕೊಹ್ಲಿ ಜೊತೆಗೆ 119 ರನ್​ಗಳ ಅಮೋಘ ಪಾಲುದಾರಿಕೆ ಒದಗಿಸಿದರು. ಡೆಲ್ಲಿ ಬೌಲರ್​ಗಳು ವಿಕೆಟ್​​ಗಾಗಿ ತಂತ್ರಗಳನ್ನು ಪ್ರಯೋಗಿಸಿದರೂ ಪಾಂಡ್ಯ ಅದಕ್ಕೆ ಕ್ಯಾರೇ ಎನ್ನಲಿಲ್ಲ. 47 ಎಸೆತಗಳಲ್ಲಿ 5 ಬೌಂಡರಿ, 4 ಸಿಕ್ಸರ್ ಸಹಿತ ಅಜೇಯ 73 ರನ್ ಸಿಡಿಸಿ ಡೆಲ್ಲಿಗೆ ಸೋಲಿನ ಡಿಚ್ಚಿ ಮಾಡಿದರು.

ಕೊಹ್ಲಿ ಆಟವನ್ನು ಮರೆಯುವಂತಿಲ್ಲ

ಕೃನಾಲ್ ಪಾಂಡ್ಯದ ಆಟಕ್ಕೆ ಎಷ್ಟು ತೋಕವಿತ್ತೋ ಅಷ್ಟೇ ಕೊಹ್ಲಿ ಅವರ 51 ರನ್​ಗಳ ಇನ್ನಿಂಗ್ಸ್​​ಗೂ ಇತ್ತು. ಒತ್ತಡವನ್ನು ನಿಯಂತ್ರಿಸುವ ಅನುಭವನ್ನು ಮತ್ತೆ ಪ್ರಯೋಗಿಸಿದ ಕೊಹ್ಲಿ ಎದುರಾಳಿಗಳ ತಂತ್ರಗಳನ್ನು ವಿಫಲಗೊಳಿಸುವಲ್ಲಿ ಯಶಸ್ವಿಯಾದರು. ತಾನು ಪ್ರತಿ ಓವರ್​​ನಲ್ಲೂ ಚೆಂಡನ್ನು ಗಾಳಿಯಲ್ಲಿ ತೇಲಿಸದೆ ಕೇವಲ ಕೆಳಗಡೆಯೇ ಆಡುವ ಮೂಲಕ ಡೆಲ್ಲಿ ಬೌಲರ್​​ಗಳ ಮೇಲೆ ಒತ್ತಡ ಹೇರಿದರು. ರಕ್ಷಣಾತ್ಮಕ ಆಟದೊಂದಿಗೆ ಡೆಲ್ಲಿ ತಂಡವನ್ನು ಸುಸ್ತುಗೊಳಿಸಿ ಭರವಸೆ ಕಸಿದರು. ಸ್ಟ್ರೈಕ್​​ನಲ್ಲಿದ್ದ ಕೃನಾಲ್ ಆಡಲು ಎಲ್ಲಾ ರೀತಿಯ ಸಹಕಾರ ಕೊಟ್ಟರು. ಪರಿಣಾಮ 47 4 ಬೌಂಡರಿ ಸಹಿತ 51 ರನ್ ಗಳಿಸಿ ಔಟಾದರು. ಆದಾಗಲೇ ಗೆಲುವು ಆರ್​ಸಿಬಿ ಕೈಯಲ್ಲಿತ್ತು. ಪ್ರಸಕ್ತ ಐಪಿಎಲ್​ನಲ್ಲಿ ಇದು ಅವರ 6ನೇ ಅರ್ಧಶತಕ. ಯುವ ಆಟಗಾರರಿಗೆ ಒತ್ತಡ ಹೇಗೆ ನಿಭಾಯಿಸಬೇಕು ಎನ್ನುವುದಕ್ಕೆ ಸಂಬಂಧಿಸಿ ಕೊಹ್ಲಿ ಅವರ ಆಟ ಒಂದು ಉತ್ತಮ ಉದಾಹರಣೆ. ಕೊನೆಯಲ್ಲಿ ಟಿಮ್ ಡೇವಿಡ್ ಅಜೇಯ 19 ರನ್ ಗಳಿಸಿ ಪಂದ್ಯವನ್ನು ಮುಗಿಸಿದರು.