46 ಎಸೆತ, 219.57 ಸ್ಟ್ರೈಕ್​ರೇಟ್; ಬಿರುಗಾಳಿಯ ಇನ್ನಿಂಗ್ಸ್​ನೊಂದಿಗೆ 2025ರ ವರ್ಷದ ಮೊದಲ ಶತಕ ಸಿಡಿಸಿ ಕುಸಾಲ್ ಪೆರೆರಾ ದಾಖಲೆ

2025ರ ವರ್ಷವು ಕುಸಾಲ್ ಪೆರೆರಾ (Kusal Perera) ಅವರ ಅಬ್ಬರದ ಶತಕ ಮತ್ತು ಶ್ರೀಲಂಕಾದ ಗೆಲುವಿನೊಂದಿಗೆ ಅಂತಾರಾಷ್ಟ್ರೀಯ ಕ್ರಿಕೆಟ್ ಪ್ರಾರಂಭಗೊಂಡಿದೆ. ಈ ವರ್ಷದ ಮೊದಲ ಅಂತಾರಾಷ್ಟ್ರೀಯ ಪಂದ್ಯವು (ಟಿ20ಐ) ನ್ಯೂಜಿಲೆಂಡ್ ಮತ್ತು ಶ್ರೀಲಂಕಾ ನಡುವೆ (New Zealand vs Sri Lanka 3rd T20I) ನೆಲ್ಸನ್​ನ ಸ್ಯಾಕ್ಸ್ಟನ್ ಓವಲ್​ನಲ್ಲಿ ನಡೆಯಿತು. ಈ ಪಂದ್ಯದಲ್ಲಿ ಕುಸಾಲ್ ಪೆರೆರಾ ಸಿಡಿಸಿದ ಸಿಡಿಲಬ್ಬರದ ಶತಕದ ನೆರವಿನಿಂದ ಪ್ರವಾಸಿ ತಂಡ ಶ್ರೀಲಂಕಾ 7 ರನ್​ಗಳ ಅಂತರದಿಂದ ಗೆದ್ದು ಬೀಗಿದೆ. ಆದಾಗ್ಯೂ, ಆತಿಥೇಯ ನ್ಯೂಜಿಲೆಂಡ್ 3 ಪಂದ್ಯಗಳ ಸರಣಿಯನ್ನು 2-1 ರಿಂದ ಕೈವಶ ಮಾಡಿಕೊಂಡಿತು.

ನ್ಯೂಜಿಲೆಂಡ್ ವಿರುದ್ಧ ಮೊದಲು ಬ್ಯಾಟಿಂಗ್ ಮಾಡಿದ ಶ್ರೀಲಂಕಾ, 20 ಓವರ್​​ಗಳಲ್ಲಿ 5 ವಿಕೆಟ್ ನಷ್ಟಕ್ಕೆ 218 ರನ್ ಗಳಿಸಿತು. ಟಾಸ್ ಸೋತು ಮೊದಲು ಬ್ಯಾಟಿಂಗ್​​ಗೆ ಇಳಿದ ಶ್ರೀಲಂಕಾ ಉತ್ತಮ ಆರಂಭ ಪಡೆಯಿತು. ಪವರ್ ಪ್ಲೇನಲ್ಲಿ ತಂಡವು 49 ರನ್ ಗಳಿಸಿತು. ಆದರೆ 2 ವಿಕೆಟ್ ಕಳೆದುಕೊಂಡಿತು. 3ನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್​​ ಇಳಿದ ಕುಸಾಲ್ ಪೆರೆರಾ 46 ಎಸೆತಗಳಲ್ಲಿ 13 ಬೌಂಡರಿ, 4 ಸಿಕ್ಸರ್​ಗಳ ಸಹಾಯದಿಂದ 101 ರನ್ ಗಳಿಸಿ ತಂಡವನ್ನು 218 ಸ್ಕೋರ್​ಗಳ ಬೃಹತ್ ಮೊತಕ್ಕೆ ಕೊಂಡೊಯ್ದರು. ನಾಯಕ ಚರಿತ್ ಅಸಲಂಕಾ 24 ಎಸೆತಗಳಲ್ಲಿ 46 ರನ್ ಸಿಡಿಸಿ ಔಟಾದರು.

ದಾಖಲೆಯ ಶತಕ ಸಿಡಿಸಿದ ಕುಸಾಲ್ ಪೆರೆರಾ

ಚರಿತ್ ಅಸಲಂಕಾ ಜೊತೆಗೆ ಶತಕದ ಜೊತೆಯಾಟವಾಡಿದ ಪೆರೆರಾ ಅವರು ದಾಖಲೆ ನಿರ್ಮಿಸಿದ್ದಾರೆ. 219.57ರ ಬ್ಯಾಟಿಂಗ್ ಸ್ಟ್ರೈಕ್​ರೇಟ್​ನಲ್ಲಿ ಬ್ಯಾಟ್ ಬೀಸಿದ ಅವರು, ಶ್ರೀಲಂಕಾ ಪರ ದಾಖಲೆ ನಿರ್ಮಿಸಿದ್ದಾರೆ. ಮಹೇಲಾ ಜಯವರ್ಧನೆ, ತಿಲಕರತ್ನೆ ದಿಲ್ಶಾನ್ ನಂತರ ಶ್ರೀಲಂಕಾ ಪರ ಟಿ20ಐ ಕ್ರಿಕೆಟ್​ನಲ್ಲಿ ಶತಕ ಗಳಿಸಿದ ಮೂರನೇ ಆಟಗಾರ ಎಂಬ ಹೆಗ್ಗಳಿಕೆಗೆ ಕುಸಾಲ್ ಪೆರೆರಾ ಪಾತ್ರರಾದರು. 14 ವರ್ಷಗಳ ಬಳಿಕ ಶ್ರೀಲಂಕಾದ ಆಟಗಾರನೊಬ್ಬ ಟಿ20ಐನಲ್ಲಿ ಶತಕ ಬಾರಿಸಿದ್ದಾನೆ.

ಟಿ20ಐನಲ್ಲಿ ಶ್ರೀಲಂಕಾ ಪರ ಶತಕ

100 - ಮಹೇಲಾ ಜಯವರ್ಧನೆ, 2010

104* - ತಿಲಕರತ್ನೆ ದಿಲ್ಶಾನ್, 2011

101 - ಕುಸಾಲ್ ಪೆರೆರಾ, 2025

ದಿಟ್ಟ ಹೋರಾಟದ ನಡುವೆಯೂ ಸೋತ ನ್ಯೂಜಿಲೆಂಡ್

ನ್ಯೂಜಿಲೆಂಡ್ ಪರ ಆರಂಭಿಕ ಬ್ಯಾಟ್ಸಮನ್​ ರಚಿನ್ ರವೀಂದ್ರ 39 ಎಸೆತಗಳಲ್ಲಿ 5 ಬೌಂಡರಿ, 4 ಸಿಕ್ಸರ್​ಗಳ ಸಹಾಯದಿಂದ 69 ರನ್ ಗಳಿಸಿದರು. ಸಹ ಬ್ಯಾಟರ್​ ಟಿಮ್ ರಾಬಿನ್ಸನ್ (37) ಅವರೊಂದಿಗೆ ಮೊದಲ ವಿಕೆಟ್​​ಗೆ 81 ರನ್​ಗಳ ಜೊತೆಯಾಟವನ್ನು ಪೇರಿಸಿದರು. ಮಧ್ಯಮ ಕ್ರಮಾಂಕದಲ್ಲಿ ಡಾರೆಲ್ ಮಿಚೆಲ್ 17 ಎಸೆತಗಳಲ್ಲಿ 1 ಬೌಂಡರಿ, 4 ಸಿಕ್ಸರ್​ಗಳ ಸಹಾಯದಿಂದ 35 ರನ್ ಗಳಿಸಿದರು. ಆದರೆ, ಅವರು ಕೊನೆಯವರೆಗೂ ಉಳಿಯಲು ಸಾಧ್ಯವಾಗಲಿಲ್ಲ. ದಿಟ್ಟ ಹೋರಾಟದ ನಡುವೆಯೂ ನ್ಯೂಜಿಲೆಂಡ್ 7 ರನ್​ಗಳ ಅಂತರದಿಂದ ಸೋಲೊಪ್ಪಿಕೊಂಡಿತು. ನಿಗದಿತ 20 ಓವರ್​ಗಳಲ್ಲಿ 7 ವಿಕೆಟ್ ನಷ್ಟಕ್ಕೆ 211 ರನ್ ಗಳಿಸಲಷ್ಟೇ ಶಕ್ತವಾಯಿತು. ಶ್ರೀಲಂಕಾ ಪರ ಚರಿತ್ ಅಸಲಂಕಾ 3 ವಿಕೆಟ್ ಪಡೆದು ಮಿಂಚಿದರು. ಶತಕ ಸಿಡಿಸಿದ ಕುಸಾಲ್ ಪೆರೆರಾ ಪಂದ್ಯಶ್ರೇಷ್ಠ ಪ್ರಶಸ್ತಿಗೆ ಭಾಜನರಾದರು.

ಇದನ್ನೂ ಓದಿ: ಅಧಿಕೃತವಾಗಿ ಹೊರಬಿದ್ದ ಸ್ಟಾರ್ ವೇಗಿ, ರಿಷಭ್ ಪಂತ್ ವಿರುದ್ಧ ಕಠಿಣ ಕ್ರಮ? ಭಾರತ ತಂಡದ ಪ್ಲೇಯಿಂಗ್ XIಗೆ ಮೇಜರ್ ಸರ್ಜರಿ

ಹೊಸ ವರ್ಷ ಹೇಗಿರುತ್ತೆ? ಇಲ್ಲಿದೆ 2025 ರ ರಾಶಿವಾರು ಮಾಹಿತಿ

2025 ನಿಮಗೆ ಏನೆಲ್ಲಾ ಶುಭಫಲಗಳನ್ನು ನೀಡಲಿದೆ? ಹೊಸ ವರ್ಷದಲ್ಲಿ ಬದಲಾವಣೆಗಳು, ಉದ್ಯೋಗ ಪ್ರಗತಿ, ವಿದ್ಯಾಭ್ಯಾಸ, ಪ್ರೀತಿ, ದಾಂಪತ್ಯ ಸೇರಿದಂತೆ ನೀವು ತಿಳಿಯಬಯಸುವ ಸಮಗ್ರ ಮಾಹಿತಿ ಇಲ್ಲಿದೆ. ಪ್ರತಿ ರಾಶಿಯ ಸಮಗ್ರ ವಿವರ ಇಲ್ಲಿ ಲಭ್ಯ. ನೀವು ಈವರೆಗೆ ನೋಡಿಲ್ಲ ಅಂತಾದ್ರೆ ಬೇಗ ನೋಡಿ. ಈಗಾಗಲೇ ನೋಡಿದ್ದರೆ ನಿಮ್ಮ ಆಪ್ತರಿಗೂ ಈ ಬಗ್ಗೆ ತಿಳಿಸಿ. https://kannada.hindustantimes.com/astrology/yearly-horoscope