ವಿಧಿಯ ಕೈವಾಡ 2 ಘಟನೆ ನಡೀತು, ಅವನು ಹುಟ್ದ, ಆ ಜಾಗನೂ ಹುಟ್ತು; ಆರ್​ಸಿಬಿ ಜತೆಗೆ ವಿರಾಟ್ ಕೊಹ್ಲಿ 16ನೇ ವಾರ್ಷಿಕೋತ್ಸವ

ಭಾರತೀಯ ಕ್ರಿಕೆಟ್​ನ ಸೂಪರ್ ಸ್ಟಾರ್ ಆಟಗಾರ ವಿರಾಟ್ ಕೊಹ್ಲಿ ಅವರು (Virat Kohli) ಇಂಡಿಯನ್ ಪ್ರೀಮಿಯರ್ ಲೀಗ್‌ನ (Indian Premier League) ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡಕ್ಕೆ (Royal Challengers Bangalore) ಸೇರಿ 16 ವರ್ಷ ಪೂರೈಸಿದ್ದಾರೆ. ವಿರಾಟ್ ಇಂದು (ಮಾರ್ಚ್ 11) ಆರ್​ಸಿಬಿ ಜೊತೆಗೆ 16ನೇ ವಾರ್ಷಿಕೋತ್ಸವವನ್ನು ಆಚರಿಸಿಕೊಳ್ಳುತ್ತಿದ್ದಾರೆ.

ಉದ್ಘಾಟನಾ ಟೂರ್ನಿಯಿಂದ ಈವರೆಗೂ ಒಂದೇ ಫ್ರಾಂಚೈಸಿಯ ಪರ ಆಡಿದ ಏಕೈಕ ಆಟಗಾರ ಅಂದರೆ ಅದು ವಿರಾಟ್ ಕೊಹ್ಲಿ ಮಾತ್ರ. 2008ರ ಮಾರ್ಚ್ 11ರಂದು 'ರಾಯಲ್' ತಂಡವನ್ನು ಸೇರಿದ್ದ ಕಿಂಗ್​​ಗೆ ಆರ್​ಸಿಬಿ ವಿಶೇಷ ಗೌರವ ಸಲ್ಲಿಸಿದೆ. ಮಾರ್ಚ್ 11, 2008 ರಂದು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಆ ವರ್ಷದ ಅಂಡರ್​-19 ವಿಶ್ವಕಪ್‌ ಆಟಗಾರರನ್ನು ಆಯ್ಕೆ ಮಾಡಲು ಫ್ರಾಂಚೈಸಿಗಳಿಗೆ ಅನುಮತಿಸುವ ಕರಡು ವ್ಯವಸ್ಥೆಯ ಸಮಯದಲ್ಲಿ ವಿರಾಟ್​ರನ್ನು 12 ಲಕ್ಷಕ್ಕೆ ಖರೀದಿಸಿತ್ತು.

ವಿರಾಟ್ ಕೊಹ್ಲಿಯ 16 ವರ್ಷಗಳ ಪ್ರಯಾಣದ ವಿಡಿಯೋವನ್ನು ಆರ್​​ಸಿಬಿ ಹಂಚಿಕೊಂಡಿದೆ. ಕನ್ನಡದ ಬ್ಲಾಕ್‌ಬಸ್ಟರ್ ಕೆಜಿಎಫ್‌ನ ಥೀಮ್ ಸಾಂಗ್‌ನೊಂದಿಗೆ ಕಿಂಗ್​ಗೆ ಗೌರವ ಸಲ್ಲಿಸಿದೆ. ‘ವಿಧಿಯ ಕೈವಾಡ ಎರಡು ಘಟನೆ ನಡೆಯಿತು. ಅವನು ಹುಟ್ಟಿದ, ಆ ಜಾಗನೂ ಹುಟ್ಟಿತು‘ ಡೈಲಾಗ್​ನೊಂದಿಗೆ ಈ ವಿಡಿಯೋ ಆರಂಭವಾಗುತ್ತದೆ. ಫ್ರಾಂಚೈಸಿಗೆ ಅತ್ಯಂತ ನಿಷ್ಠೆ ತೋರಿರುವ ಆಟಗಾರ ಎಂಬ ಹೆಗ್ಗಳಿಕೆಗೂ ಪಾತ್ರರಾಗಿದ್ದಾರೆ.

ಇದನ್ನೂ ಓದಿ: ಆರ್‌ಸಿಬಿ ಅನ್‌ಬಾಕ್ಸ್‌ ಈವೆಂಟ್‌; ಫ್ಯಾನ್ಸ್‌ಗೆ ವಿರಾಟ್‌ ಸರ್‌ಪ್ರೈಸ್‌ ನಿರೀಕ್ಷೆ, ಟಿಕೆಟ್‌ ಖರೀದಿಸಲು ಹೀಗೆ ಮಾಡಿ

ಅನಿಲ್ ಕುಂಬ್ಳೆ, ರಾಹುಲ್ ದ್ರಾವಿಡ್ ಮತ್ತು ಜಾಕ್ ಕಾಲಿಸ್ ಅವರಂತಹ ಸ್ಟಾರ್​​​ಗಳ ತಂಡದಲ್ಲಿ ಕಾಣಿಸಿಕೊಂಡರೂ ಕೊಹ್ಲಿ ಆರ್​ಸಿಬಿ ತಂಡಕ್ಕಾಗಿ ವಿಶೇಷ ಚಾಪು ಮೂಡಿಸಿದ್ದರು. 2013ರಲ್ಲಿ ನಾಯಕತ್ವ ವಹಿಸಿಕೊಂಡ ಕಿಂಗ್, 2016ರಲ್ಲಿ ತಂಡವನ್ನು ಫೈನಲ್‌ಗೇರಿಸಿದ್ದರು. ಆ ಆವೃತ್ತಿಯಲ್ಲಿ 4 ಶತಕ ಸೇರಿ 973 ರನ್‌ಗಳ ದಾಖಲೆಯ ಮೊತ್ತವನ್ನು ಗಳಿಸಿದ್ದರು. ಆದರೆ, ಕೊಹ್ಲಿ ಪಡೆ ಫೈನಲ್‌ನಲ್ಲಿ ಡೇವಿಡ್ ವಾರ್ನರ್ ನೇತೃತ್ವದ ಸನ್‌ರೈಸರ್ಸ್ ಹೈದರಾಬಾದ್ ವಿರುದ್ಧ ಸೋತಿತ್ತು.

ನಾಯಕನಾಗಿ ವಿರಾಟ್​ ಕೊಹ್ಲಿ 143 ಪಂದ್ಯಗಳಲ್ಲಿ ಆರ್​ಸಿಬಿ ತಂಡವನ್ನು ಮುನ್ನಡೆಸಿದ್ದಾರೆ. 66ರಲ್ಲಿ ಗೆಲುವು, 70ರಲ್ಲಿ ಸೋಲು ಕಂಡಿದ್ದಾರೆ. 7 ಪಂದ್ಯಗಳು ಫಲಿತಾಂಶ ಪಡೆದಿಲ್ಲ. ಗೆಲುವಿನ ಪ್ರಮಾಣ ಶೇ 46.15ರಷ್ಟಿದೆ.

ಆರ್​​ಸಿಬಿ ಪರ 237 ಪಂದ್ಯಗಳಲ್ಲಿ ಕಣಕ್ಕಿಳಿದಿರುವ ಕೊಹ್ಲಿ, 7 ಶತಕ, 50 ಅರ್ಧಶತಕ ಸೇರಿದಂತೆ 7263 ರನ್ ಗಳಿಸಿದ್ದಾರೆ. ಐಪಿಎಲ್​ ಇತಿಹಾಸದಲ್ಲಿ ಅತ್ಯಧಿಕ ರನ್ ಗಳಿಸಿದ ಆಟಗಾರ ಎಂಬ ದಾಖಲೆಯನ್ನು ತನ್ನ ಹೆಸರಿಗೆ ಬರೆದುಕೊಂಡಿದ್ದಾರೆ. ಐಪಿಎಲ್ 2021ರ ಆವೃತ್ತಿಯಲ್ಲಿ ತನ್ನ ನಾಯಕತ್ವದಿಂದ ಕೆಳಗಿಳಿಯುವ ಮುನ್ನ ಕೊಹ್ಲಿ, 8 ವರ್ಷಗಳ ಕಾಲ ಆರ್‌ಸಿಬಿಯನ್ನು ಮುನ್ನಡೆಸಿದ್ದರು. ಕಳೆದ 2 ಋತುಗಳಲ್ಲಿ ಫಾಫ್ ಡು ಪ್ಲೆಸಿಸ್ ನಾಯಕತ್ವದಲ್ಲಿ ಕೊಹ್ಲಿ ಆಡುತ್ತಿದ್ದಾರೆ.

ಇದನ್ನೂ ಓದಿ: ಹೃದಯವಿದ್ರಾವಕ ಸೋಲಿನ ನಂತರ ಕಣ್ಣೀರಿಟ್ಟ ಸ್ಮೃತಿ ಮಂಧಾನ; ರಿಚಾ ಘೋಷ್ ಸಾಂತ್ವನದ ವೇಳೆ ಜಿನುಗುತ್ತಿತ್ತು ಕಣ್ಣಲ್ಲಿ ಹನಿ

ಫ್ರಾಂಚೈಸಿಗಳಿಂದ ಬಂದಿತ್ತು ಆಫರ್​

16 ವರ್ಷಗಳಿಂದ ಆರ್​ಸಿಬಿ ಪರ ಆಡುತ್ತಿರುವ ಕೊಹ್ಲಿಗೆ ಬೇರೆ ಫ್ರಾಂಚೈಸಿಗಳಿಂದಲೂ ಆಫರ್​ ಬಂದಿತ್ತು. ಹರಾಜಿಗೆ ಬರುವಂತೆ ಸಾಕಷ್ಟು ಫ್ರಾಂಚೈಸಿಗಳು ಕೇಳಿದ್ದವು. ಆದರೂ ಆರ್​ಸಿಬಿ ಜೊತೆಗೆ ಉಳಿಯಲು ನಿರ್ಧರಿಸಿದ್ದೇಕೆ ಎಂಬುದರ ಕುರಿತು ಕೊಹ್ಲಿ ಈ ಹಿಂದೆ ಹೇಳಿದ್ದರು. ನನ್ನನ್ನು ಹೇಗಾದರೂ ಹರಾಜಿಗೆ ಬರಲು ಸಾಕಷ್ಟು ಫ್ರಾಂಚೈಸಿಗಳು ಪ್ರಯತ್ನಿಸಿದವು. ಹಲವರು ನನ್ನನ್ನು ಸಂಪರ್ಕಿಸಿದ್ದವು. ಆದರೆ ಆರ್​ಸಿಬಿ ಜೊತೆಗಿನ ನಿಷ್ಠೆ ನನ್ನನ್ನು ಇಲ್ಲೇ ಉಳಿಸಿಕೊಂಡಿದೆ. ಹಾಗಾಗಿ ಆರ್​ಸಿಬಿ ಹೊರತುಪಡಿಸಿ ಬೇರೊಂದು ತಂಡಕ್ಕೆ ಹೋಗಲ್ಲ. ಆರ್​ಸಿಬಿಯೊಂದಿಗೆ ನನ್ನ ಕೊನೆಯ ಐಪಿಎಲ್ ಆಗಿರಲಿದೆ ಎಂದು 2022ರಲ್ಲಿ ಹೇಳಿದ್ದರು.

ಇದನ್ನೂ ಓದಿ: ಡೆಲ್ಲಿ ವಿರುದ್ಧ ವಿರೋಚಿತ ಸೋಲಿನ ನಂತರ ಪ್ಲೇಆಫ್ ಪ್ರವೇಶಿಸಲು ಆರ್​ಸಿಬಿ ಏನು ಮಾಡಬೇಕು? ಹೀಗಿದೆ ಲೆಕ್ಕಾಚಾರ