ಆರಂಭಿಕರ ಶತಕದ ಜೊತೆಯಾಟದ ಹೊರತಾಗಿಯೂ ಸೋತ ಪಂಜಾಬ್ ಕಿಂಗ್ಸ್; ಲಕ್ನೋ ಸೂಪರ್ ಜೈಂಟ್ಸ್​ಗೆ ಸೂಪರ್ ಗೆಲುವು

ಪಂಜಾಬ್ ಕಿಂಗ್ಸ್ ವಿರುದ್ಧ ತೋರಿದ ಆಲ್​ರೌಂಡ್ ಆಟದ ನೆರವಿನಿಂದ ಲಕ್ನೋ ಸೂಪರ್ ಜೈಂಟ್ಸ್ 17ನೇ ಆವೃತ್ತಿಯ ಐಪಿಎಲ್​ನಲ್ಲಿ ಮೊದಲ ಗೆಲುವಿನ ನಗೆ ಬೀರಿದೆ. ತನ್ನ ಮೊದಲ ಪಂದ್ಯದಲ್ಲಿ ಗೆದ್ದು ಅಭಿಯಾನ ಆರಂಭಿಸಿದ ಪಿಬಿಕೆಎಸ್, ಸತತ ಎರಡನೇ ಸೋಲಿನ ಮುಖಭಂಗಕ್ಕೆ ಒಳಗಾಗಿದೆ. ಶಿಖರ್​ ಧವನ್ ಹೋರಾಟದ ಹೊರತಾಗಿಯೂ ಪಂಜಾಬ್ 21 ರನ್​​ಗಳಿಂದ ಪರಾಜಯಗೊಂಡಿದೆ. ತವರಿನ ಮೈದಾನದಲ್ಲಿ ದಿಗ್ವಿಜಯ ಸಾಧಿಸಿದ ಲಕ್ನೋ, ಅಂಕಪಟ್ಟಿಯಲ್ಲಿ 5ನೇ ಸ್ಥಾನಕ್ಕೇರಿದೆ. ಪಂಜಾಬ್ 6ನೇ ಸ್ಥಾನದಲ್ಲಿದೆ.

ಏಕನಾ ಕ್ರಿಕೆಟ್ ಮೈದಾನದಲ್ಲಿ ನಡೆದ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ನಡೆಸಿದ ಎಲ್​ಎಸ್​ಜಿ ತಂಡವು ಕ್ವಿಂಟನ್ ಡಿ ಕಾಕ್ (54), ನಿಕೋಲಸ್ ಪೂರನ್ (42) ಮತ್ತು ಕೃನಾಲ್ ಪಾಂಡ್ಯ (43) ಅವರ ಅಮೋಘ ಆಟದ ಬಲದಿಂದ 199 ರನ್​ಗಳ ಬೃಹತ್ ಮೊತ್ತ ಪೇರಿಸಿತು. 200 ರನ್​ಗಳ ಗುರಿ ಬೆನ್ನಟ್ಟಿದ ಪಿಬಿಕೆಎಸ್, ಶಿಖರ್​ ಧವನ್ ಮತ್ತು ಜಾನಿ ಬೈರ್​​ಸ್ಟೋ ಅವರ ಶತಕದ ಜೊತೆಯಾಟದ ಹೊರತಾಗಿಯೂ 20 ಓವರ್​​ಗಳಲ್ಲಿ 178 ರನ್ ಗಳಿಸಲಷ್ಟೇ ಶಕ್ತವಾಯಿತು.

ಧವನ್-ಜಾನಿ ಅದ್ಭುತ ಆರಂಭ, ಮಧ್ಯಮ ಕ್ರಮಾಂಕ ಠುಸ್

ಲಕ್ನೋ ನೀಡಿದ್ದ ಟಾರ್ಗೆಟ್ ಬೆನ್ನಟ್ಟಿದ ಪಂಜಾಬ್, ಸ್ಫೋಟಕ ಆರಂಭ ಪಡೆಯಿತು. ಲಕ್ನೋ ಬೌಲರ್​​ಗಳಿಗೆ ಹಿಗ್ಗಾಮುಗ್ಗಾ ಜಾಡಿಸಿದ ಶಿಖರ್​ ಧವನ್-ಜಾನಿ ಬೈರ್​​ಸ್ಟೋ ಮೊದಲ ವಿಕೆಟ್​ಗೆ ಶತಕದ ಜೊತೆಯಾಟ ಬಂತು. 102 ರನ್​​ ಪೇರಿಸಿದ ನಂತರ ಬೈರ್​ಸ್ಟೋ ವಿಕೆಟ್ ಒಪ್ಪಿಸಿದರು. ಕಳೆದ ಎರಡು ಪಂದ್ಯಗಳಲ್ಲಿ ವೈಫಲ್ಯ ಅನುಭವಿಸಿದ್ದ ಜಾನಿ, 29 ಬಾಲ್​ಗಳಲ್ಲಿ 3 ಬೌಂಡರಿ, 3 ಸಿಕ್ಸರ್​ ಸಹಿತ 42 ರನ್ ಚಚ್ಚಿದರು.

ಇದನ್ನೂ ಓದಿ: ಕ್ರಿಕೆಟ್ ಇತಿಹಾಸದಲ್ಲೇ ಅತ್ಯಂತ ಕೆಟ್ಟ ರಿವಿವ್ಯೂ; 2016ರ ವಿರಾಟ್ ಕೊಹ್ಲಿ ಘಟನೆ ನೆನಪಿಸಿದ ಬಾಂಗ್ಲಾದೇಶ ನಾಯಕನ ನಿರ್ಧಾರ, ವಿಡಿಯೋ

ಅಷ್ಟರಲ್ಲಾಗಲೇ ಅರ್ಧಶತಕ ಸಿಡಿಸಿದ್ದ ಧವನ್​ ಮೊದಲ ವಿಕೆಟ್ ನಂತರ ನಿಧಾನವಾಗಿ ಸ್ಕೋರ್​ ಮಾಡಲಾರಂಭಿಸಿದರು. ಆದರೆ ನಂತರ ಕಣಕ್ಕಿಳಿದ ಪ್ರಭುಶಿಮ್ರಾನ್ 19ಕ್ಕೆ ಆಟ ಮುಗಿಸಿದರೆ, ಜಿತೇಶ್ ಶರ್ಮಾ 6 ರನ್ ಗಳಿಸಿ ನಿರಾಸೆ ಮೂಡಿಸಿದರು. ಮಯಾಂಕ್ ಯಾದವ್ ಈ ಮೂರು ವಿಕೆಟ್​​ಗಳನ್ನು ಪಡೆಯುವಲ್ಲಿ ಯಶಸ್ವಿಯಾದರು. ಅಂತಿಮ 4 ಓವರ್​​ಗಳಲ್ಲಿ ಪಂಜಾಬ್ ಗೆಲುವಿಗೆ 60 ರನ್ ಬೇಕಿದ್ದ ಅವಧಿಯಲ್ಲಿ ಶಿಖರ್​ ಧವನ್ ಔಟಾದರು. 50 ಎಸೆತಗಳಲ್ಲಿ 70 ರನ್ ಗಳಿಸಿದರು.

ಆದರೆ ಕೊನೆಯಲ್ಲಿ ಲಿಯಾಮ್ ಲಿವಿಂಗ್​ಸ್ಟನ್​ ಬಿರುಸಿನ ಬ್ಯಾಟಿಂಗ್​ಗೆ ಕೈ ಹಾಕಲಿಲ್ಲ. ಗಾಯಗೊಂಡಿದ್ದ ಕಾರಣ ಅವರು ಜೋರು ಆಟಕ್ಕೆ ಕೈ ಹಾಕಲು ಸಾಧ್ಯವಾಗಲಿಲ್ಲ. ಲಕ್ನೋ ಬೌಲರ್​​ಗಳ ಎದುರು ರನ್ ಗಳಿಸಿಲು ಪರದಾಡಿದರು. ಸ್ಯಾಮ್ ಕರನ್ ಕೂಡ ಡಕೌಟ್ ಆಗಿ ಹೊರ ನಡೆದರು. ಇದರೊಂದಿಗೆ ಪಂಜಾಬ್ ಸೋಲು ಖಚಿತವಾಯಿತು. ಕೊನೆಯ ಓವರ್​​ನಲ್ಲಿ ಗೆಲುವಿಗೆ 41 ರನ್ ಬೇಕಿತ್ತು. ಆದರೆ 178 ರನ್ ಗಳಿಸಲು ಮಾತ್ರ ಸಾಧ್ಯವಾಯಿತು. ಹಾಗಾಗಿ 21 ರನ್​ಗಳಿಂದ ಶರಣಾಯಿತು. ಲಕ್ನೋ ಪರ ಮಯಾಂಕ್ 3, ಮೊಹ್ಸಿನ್ ಖಾನ್ 2 ವಿಕೆಟ್ ಪಡೆದರು.

ಇದನ್ನೂ ಓದಿ: Bhagyalakshmi Serial: ಕಳ್ಳತನದ ವಿಡಿಯೋಗೆ ಹೆದರಿ ಅಕ್ಕ ಮಹಿತಾ ಕಾಮತ್‌ ಎದುರು ತಪ್ಪು ಒಪ್ಪಿಕೊಂಡ ಕನ್ನಿಕಾ; ಭಾಗ್ಯಲಕ್ಷ್ಮೀ ಧಾರಾವಾಹಿ

ಡಿಕಾಕ್, ಪೂರನ್, ಕೃನಾಲ್ ಅಬ್ಬರ

ಮೊದಲು ಬ್ಯಾಟಿಂಗ್ ನಡೆಸಿದ ಲಕ್ನೋ ಉತ್ತಮ ಆರಂಭ ಪಡೆಯಲಿಲ್ಲ. ಇಂಜುರಿ ಕಾರಣ ಇಂಪ್ಯಾಕ್ಟ್ ಪ್ಲೇಯರ್​ ಆಗಿ ಕಣಕ್ಕಿಳಿದ ಕೆಎಲ್ ರಾಹುಲ್ 15 ರನ್ ಗಳಿಸಿ ಔಟಾದರು. ದೇವದತ್ ಪಡಿಕ್ಕಲ್ (9), ಮಾರ್ಕಸ್ ಸ್ಟೋಯ್ನಿಸ್ (19) ಮತ್ತೆ ನಿರಾಸೆ ಮೂಡಿಸಿದರು. ಮೂರು ವಿಕೆಟ್ ಕಳೆದುಕೊಂಡರೂ ಆರಂಭಿಕ ಆಟಗಾರ ಕ್ವಿಂಟನ್​ ಡಿ ಕಾಕ್ ತನ್ನ ಅಬ್ಬರದ ಆಟವನ್ನು ಮುಂದುವರೆಸಿ ಅರ್ಧಶತಕ ಪೂರೈಸಿದರು. ಇದರ ಬೆನ್ನಲ್ಲೇ ಔಟ್ ಆದರು.

ಡಿ ಕಾಕ್ ಜತೆಗೂಡಿದ ಪೂರನ್ ಪಂಜಾಬ್ ಬೌಲರ್ಸ್ ಬೆವರಿಳಿಸಿದರು. ನಾಲ್ಕನೇ ವಿಕೆಟ್​ಗೆ 47 ರನ್​ಗಳ ಪಾಲುದಾರಿಕೆ ನೀಡಿದರು. ಸಿಕ್ಸರ್​​-ಬೌಂಡರಿ ಸುರಿಮಳೆಗೈದ ಪೂರನ್, 21 ಎಸೆತಗಳಲ್ಲಿ 3 ಬೌಂಡರಿ, 3 ಸಿಕ್ಸರ್​​ ಸಹಿತ 42 ರನ್ ಗಳಿಸಿ ಔಟಾದರು. ಬಳಿಕ ಆಯುಷ್ ಬದೋನಿ, ರವಿ ಬಿಷ್ಣೋಯ್ ಬೇಗನೇ ಔಟಾದರೆ 7ನೇ ಕ್ರಮಾಂಕದಲ್ಲಿ ಬ್ಯಾಟ್ ಬೀಸಿದ ಕೃನಾಲ್ ಪಾಂಡ್ಯ ಬಿರುಸಿನ ಬ್ಯಾಟಿಂಗ್ ಮೂಲಕ ಬೃಹತ್ ಮೊತ್ತ ಪೇರಿಸಲು ನೆರವಾದರು.

ಕೃನಾಲ್, 22 ಎಸೆತಗಳಲ್ಲಿ 4 ಬೌಂಡರಿ, 2 ಸಿಕ್ಸರ್​ಗಳ ಬಲದಿಂದ 43 ರನ್ ಗಳಿಸಿದರು. ಪರಿಣಾಮ ತಂಡದ ಮೊತ್ತ 199 ರನ್ ಕಲೆ ಹಾಕಲು ಸಾಧ್ಯವಾಯಿತು. ಸ್ಯಾಮ್ ಕರನ್ 3, ಅರ್ಷದೀಪ್ ಸಿಂಗ್ 2, ಕಗಿಸೊ ರಬಾಡ ಮತ್ತು ರಾಹುಲ್ ಚಹರ್​ ತಲಾ 1 ವಿಕೆಟ್ ಪಡೆದರು.

ಇದನ್ನೂ ಓದಿ: ಕರ್ನಾಟಕದ ಶಾಲೆಗಳಿಗೆ ಬೇಸಿಗೆ ರಜೆ, ಹೊಸ ಶೈಕ್ಷಣಿಕ ವರ್ಷ ಶಾಲೆ ಶುರು ಯಾವಾಗ, ದಿನಾಂಕ ಮತ್ತು ಇತರೆ ವಿವರ