ಗುಜರಾತ್ ಜೈಂಟ್ಸ್ ಸೋಲಿಸಿ ಫೈನಲ್​ಗೆ ಲಗ್ಗೆ ಇಟ್ಟ ಹರ್ಮನ್​ ಪಡೆ; ಮುಂಬೈ ಇಂಡಿಯನ್ಸ್ vs ಡೆಲ್ಲಿ ಕ್ಯಾಪಿಟಲ್ಸ್ ಪ್ರಶಸ್ತಿ ಫೈಟ್

ಬ್ಯಾಟಿಂಗ್ ಜೊತೆಗೆ ಬೌಲಿಂಗ್​ನಲ್ಲೂ ಮಿಂಚಿದ ಹೀಲಿ ಮ್ಯಾಥ್ಯೂಸ್ ಆಲ್​ರೌಂಡ್ ಆಟ, ನ್ಯಾಟ್ ಸೀವರ್​ ಬ್ರಂಟ್ ಮತ್ತು ಹರ್ಮನ್​ಪ್ರೀತ್​ ಕೌರ್​ ಆರ್ಭಟಕ್ಕೆ ನಲುಗಿದ ಗುಜರಾತ್ ಜೈಂಟ್ಸ್ ತಂಡದ ವಿರುದ್ಧದ ಮಹಿಳಾ ಪ್ರೀಮಿಯರ್ ಲೀಗ್ ಎಲಿಮಿನೇಟರ್ ಪಂದ್ಯದಲ್ಲಿ 47 ರನ್ನಿಂದ ಜಯಿಸಿದ ಮುಂಬೈ ಇಂಡಿಯನ್ಸ್ 2ನೇ ಬಾರಿಗೆ ಫೈನಲ್ ಪ್ರವೇಶಿಸಿದೆ. ಮಾರ್ಚ್​ 15ರಂದು ಶನಿವಾರ ಪ್ರಶಸ್ತಿ ಸುತ್ತಿನ ಪಂದ್ಯದಲ್ಲಿ ಮೆಗ್ ಲ್ಯಾನಿಂಗ್ ನೇತೃತ್ವದ ಡೆಲ್ಲಿ ಕ್ಯಾಪಿಟಲ್ಸ್ ತಂಡವನ್ನು ಎದುರಿಸಲಿದೆ. ಉಭಯ ತಂಡಗಳು 2ನೇ ಬಾರಿಗೆ ಫೈನಲ್​​ನಲ್ಲಿ ಮುಖಾಮುಖಿಯಾಗುತ್ತಿವೆ. 2023ರ ಉದ್ಘಾಟನಾ ಆವೃತ್ತಿಯಲ್ಲಿ ಡಬ್ಲ್ಯುಪಿಎಲ್​ ಫೈನಲ್​ನಲ್ಲಿ ಡೆಲ್ಲಿ-ಮುಂಬೈ ತಂಡಗಳು ಮುಖಾಮುಖಿಯಾಗಿದ್ದವು. ಅಂದು ಗೆದ್ದು ಚೊಚ್ಚಲ ಚಾಂಪಿಯನ್ ಆಗಿತ್ತ ಮುಂಬೈ ಮತ್ತೊಂದು ಟ್ರೋಫಿ ನಿರೀಕ್ಷೆಯಲ್ಲಿದೆ.

ಮತ್ತೊಂದೆಡೆ ಚೊಚ್ಚಲ ಫೈನಲ್​ ನಿರೀಕ್ಷೆಯಲ್ಲಿದ್ದ ಗುಜರಾತ್ ತನ್ನ ಕಳಪೆ ಫೀಲ್ಡಿಂಗ್, ಬೌಲಿಂಗ್ ಮತ್ತು ಬ್ಯಾಟಿಂಗ್​ನಿಂದಾಗಿ ಭಾರಿ ಬೆಲೆ ತೆತ್ತಿತು. ಕ್ಯಾಚ್​​ ಡ್ರಾಪ್, ಕೆಲವೊಂದು ರನೌಟ್​, ಮಿಸ್ ಫೀಲ್ಡಿಂಗ್​ನಿಂದ ರನ್ ಲೀಕ್ ಮಾಡಿದ್ದು ಕೂಡ ತಂಡಕ್ಕೆ ದೊಡ್ಡ ಹಿನ್ನಡೆಯಾಯಿತು. ಇದರ ಲಾಭ ಪಡೆದ ಮುಂಬೈನ ಹೀಲಿ ಮ್ಯಾಥ್ಯೂಸ್ (77), ನ್ಯಾಟ್ ಸೀವರ್ ಬ್ರಂಟ್ (77) ಮತ್ತು ಹರ್ಮನ್ (36) ಅಬ್ಬರದ ಬ್ಯಾಟಿಂಗ್ ನಡೆಸಿದ ಪರಿಣಾಮ ಮುಂಬೈ, 20 ಓವರ್​​ಗಳಲ್ಲಿ 4 ವಿಕೆಟ್ ನಷ್ಟಕ್ಕೆ ಸ್ಕೋರ್​ ಬೋರ್ಡ್​​​ನಲ್ಲಿ 213 ರನ್​ಗಳ ಬೃಹತ್ ಮೊತ್ತವನ್ನು ಪೇರಿಸಿತು. ಈ ಗುರಿ ಬೆನ್ನಟ್ಟಿದ ಗುಜರಾತ್​ಗೆ ಬ್ಯಾಟಿಂಗ್​ನಲ್ಲಿ ಕಾಡಿದ್ದ ಮುಂಬೈ ಬೌಲಿಂಗ್​ನಲ್ಲಿ ಕಾಡಿತು. ಡೇನಿಯಲ್ ಗಿಬ್ಸನ್ 34 ರನ್ ಗಳಿಸಿದ್ದೇ ಗುಜರಾತ್​ ಪರ ಗರಿಷ್ಠ ಸ್ಕೋರರ್​. ಮ್ಯಾಥ್ಯೂಸ್​ 3 ವಿಕೆಟ್ ಕಿತ್ತು ಮಿಂಚಿದರು.

ಇದನ್ನೂ ಓದಿ: ಗಾಯಗೊಂಡರೂ ಬದ್ಧತೆ ಮರೆಯದ ರಾಹುಲ್ ದ್ರಾವಿಡ್; ಕ್ರಚರ್ಸ್ ನೆರವಿನಿಂದ ಕುಂಟುತ್ತಲೇ ಆರ್​​ಆರ್​ ಕ್ಯಾಂಪ್ ಸೇರಿದ ಕೋಚ್

ಮ್ಯಾಥ್ಯೂಸ್-ಬ್ರಂಟ್ ದಾಖಲೆಯ ಜೊತೆಯಾಟ

ಮೊದಲು ಬ್ಯಾಟಿಂಗ್ ಮಾಡಿದ ಮುಂಬೈ  ಉತ್ತಮ ಆರಂಭ ಪಡೆಯಲಿಲ್ಲ. ಯಾಸ್ತಿಕಾ ಭಾಟಿಯಾ 15 ರನ್ ಗಳಿಸಿ ನಿರಾಸೆ ಮೂಡಿಸಿದರು. ಬಳಿಕ ಒಂದಾದ ಹೀಲಿ ಮ್ಯಾಥ್ಯೂಸ್ ಮತ್ತು ನ್ಯಾಟ್ ಸೀವರ್ ಬ್ರಂಟ್ ಗುಜರಾತ್ ಬೌಲರ್​ಗಳ ದಂಡಯಾತ್ರೆ ನಡೆಸಿದರು. ಎರಡನೇ ವಿಕೆಟ್​ಗೆ 133 ರನ್​ಗಳ ದಾಖಲೆಯ ಜೊತೆಯಾಟವಾಡಿದರು. ಸತತ ವೈಫಲ್ಯ ಅನುಭವಿಸಿದ್ದ ಹೀಲಿ ಅವರು ಭರ್ಜರಿ ಅರ್ಧಶತಕ ಸಿಡಿಸಿ ಫೈನಲ್​ಗೂ ಮುನ್ನ ಲಯಕ್ಕೆ ಮರಳಿ ತಂಡಕ್ಕೆ ಬಲ ತಂದರು. 50 ಎಸೆತಗಳಲ್ಲಿ 10 ಬೌಂಡರಿ, 3 ಸಿಕ್ಸರ್​ ಸಹಿತ 77 ರನ್ ಚಚ್ಚಿದ ವೆಸ್ಟ್ ಇಂಡೀಸ್ ಆಟಗಾರ್ತಿಯು ಕಾಶ್ವಿ ಗೌತಮ್ ಬೌಲಿಂಗ್​ನಲ್ಲಿ ಔಟಾದರು. ಬಳಿಕ ಮತ್ತೊಂದು ಪ್ರಸಕ್ತ ಟೂರ್ನಿಯಲ್ಲಿ ಐದನೇ ಅರ್ಧಶತಕ ಚಚ್ಚಿದ ಬ್ರಂಟ್, 41 ಎಸೆತಗಳಲ್ಲಿ 10 ಬೌಂಡರಿ, 2 ಸಿಕ್ಸರ್​ ಸಹಿತ 77 ರನ್ ಬಾರಿಸಿದರು. ಕೊನೆಯಲ್ಲಿ ಹರ್ಮನ್​ ಕೇವಲ 12 ಎಸೆತಗಳಲ್ಲಿ 36 ರನ್ ಬಾರಿಸಿದರು. ಅವರ ಇನ್ನಿಂಗ್ಸ್​ನಲ್ಲಿ 4 ಸಿಕ್ಸರ್​, 2 ಬೌಂಡರಿಗಳಿವೆ.

ಇದನ್ನೂ ಓದಿ: ಐಎಸ್​ಎಲ್​ ಪ್ಲೇಆಫ್ ವೇಳಾಪಟ್ಟಿ: ಅರ್ಹತೆ ಪಡೆದ ತಂಡಗಳು, ನಾಕೌಟ್ ಸುತ್ತು, ಸೆಮಿಫೈನಲ್, ಫೈನಲ್ ದಿನಾಂಕ ಹೀಗಿದೆ

ಮ್ಯಾಥ್ಯೂಸ್-ಕೇರ್​ ಮಿಂಚು, ಗುಜರಾತ್ ಬ್ಯಾಟಿಂಗ್ ವೈಫಲ್ಯ

ಚೊಚ್ಚಲ ಫೈನಲ್ ಪ್ರವೇಶಿಸುವ ಕನಸಿನಲ್ಲಿದ್ದ ಗುಜರಾತ್ ಕಳಪೆ ಬ್ಯಾಟಿಂಗ್ ಪ್ರದರ್ಶನ ನೀಡಿದ ಹಿನ್ನೆಲೆ ಹೀನಾಯ ಸೋಲಿಗೆ ಶರಣಾಯಿತು. ಡೇನಿಯಲ್ ಗಿಬ್ಸನ್ 34 ರನ್ ಗಳಿಸಿದ್ದೇ ಗುಜರಾತ್ ಪರ ಗರಿಷ್ಠ ಸ್ಕೋರ್ ಆಗಿದೆ, ಇವರ ನಂತರ ಫೀಬಿ ಲಿಚ್​ ಫೀಲ್ಡ್ 31 ರನ್, ಭಾರತಿ ಫುಲ್ಮಾಲಿ 30 ರನ್ ಗಳಿಸಿದ್ದಾರೆ. ಉಳಿದಂತೆ ಬೆತ್ ಮೂನಿ (6), ಹರ್ಲೀನ್ ಡಿಯೋಲ್ (8), ಆ್ಯಶ್ಲೆ ಗಾರ್ಡನರ್​ (8), ಕಾಶ್ವಿ ಗೌತಮ್ (4) ತೀವ್ರ ನಿರಾಸೆ ಮೂಡಿಸಿದರು. ಹೀಲಿ ಮ್ಯಾಥ್ಯೂಸ್ 3.2 ಓವರ್​​ಗಳಲ್ಲಿ 31 ರನ್ ಬಿಟ್ಟುಕೊಟ್ಟು 3 ವಿಕೆಟ್ ಕಿತ್ತರು. ಅಮೆಲಿಯಾ ಕೇರ್​ 4 ಓವರ್​​​ಗಳಲ್ಲಿ 28 ರನ್ ಬಿಟ್ಟುಕೊಟ್ಟು 2 ವಿಕೆಟ್ ಪಡೆದರು. ಇವರ ಸ್ಪಿನ್ ದಾಳಿಗೆ ನಲುಗಿದ ಗುಜರಾತ್ 20 ಓವರ್​​​ಗಳಲ್ಲಿ 166 ರನ್​ಗೆ ಆಲೌಟ್​ ಆಯಿತು. ಕಳೆದ ಎರಡು ಸೀಸನ್​ಗಳಲ್ಲಿ 5ನೇ ಸ್ಥಾನದಲ್ಲಿ ಟೂರ್ನಿ ಮುಗಿಸಿದ್ದ ಜಿಜಿ, ಈ ಸಲ ಮೂರನೇ ಸ್ಥಾನದೊಂದಿಗೆ ಅಭಿಯಾನ ಮುಗಿಸಿದೆ.

ಇದನ್ನೂ ಓದಿ: ಜೋಶ್ ಹೇಜಲ್​ವುಡ್ ಅಲಭ್ಯ, ವಿರಾಟ್ ಕೊಹ್ಲಿ ಆರಂಭಿಕ; ಕೆಕೆಆರ್ ವಿರುದ್ಧದ ಆರಂಭಿಕ ಪಂದ್ಯಕ್ಕೆ ಆರ್‌ಸಿಬಿ ಸಂಭಾವ್ಯ ಬಳಗ