ಆರ್​ಸಿಬಿ ಮಾಜಿ ಆಟಗಾರ ಮಿಂಚು, ಮುಂಬೈಗೆ ಮತ್ತೊಂದು ಭರ್ಜರಿ ಜಯ; ದಾಖಲೆಯ ಚೇಸ್ ಮಾಡಿದ್ದ ಎಸ್​ಆರ್​ಹೆಚ್​ಗೆ ಏನಾಯ್ತು?

2025ರ ಇಂಡಿಯನ್ ಪ್ರೀಮಿಯರ್ ಲೀಗ್​​ನ 33ನೇ ಪಂದ್ಯದಲ್ಲಿ ಸನ್​ರೈಸರ್ಸ್​ ಹೈದರಾಬಾದ್ ವಿರುದ್ಧ ಬ್ಯಾಟಿಂಗ್ ಮತ್ತು ಬೌಲಿಂಗ್ ಎರಡರಲ್ಲೂ ಸಂಘಟಿತ ಹೋರಾಟ ನೀಡಿದ ಮುಂಬೈ ಇಂಡಿಯನ್ಸ್​ ಸತತ 2ನೇ ಗೆಲುವು ದಾಖಲಿಸಿದೆ. ಕಳೆದ ಪಂದ್ಯದಲ್ಲಿ ಪಂಜಾಬ್ ಕಿಂಗ್ಸ್ ವಿರುದ್ಧ ದಾಖಲೆ ರನ್ ಚೇಸ್ ಮಾಡಿದ್ದ ಸನ್​ರೈಸರ್ಸ್​ ಹೈದರಾಬಾದ್ 5ನೇ ಸೋಲಿಗೆ ಶರಣಾಗಿದ್ದು, ಅಂಕಪಟ್ಟಿಯಲ್ಲಿ9 ಸ್ಥಾನದಲ್ಲಿದೆ. ಮತ್ತೊಂದೆಡೆ ಮೂರನೇ ಜಯದ ನಗೆ ಬೀರಿದ ಎಂಐ, 7ನೇ ಸ್ಥಾನದಲ್ಲಿದೆ.

ಮುಂಬೈನ ಐಕಾನಿಕ್ ವಾಂಖೆಡೆ ಕ್ರಿಕೆಟ್ ಸ್ಟೇಡಿಯಂನಲ್ಲಿ ನಡೆದ ಮಹತ್ವದ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ಸನ್​ರೈಸರ್ಸ್, ನಿಗದಿತ 20 ಓವರ್​​ಗಳಲ್ಲಿ 5 ವಿಕೆಟ್ ನಷ್ಟಕ್ಕೆ 166 ರನ್ ಗಳಿಸಿತು. ಅಭಿಷೇಕ್ ಶರ್ಮಾ 40 ರನ್ ಗಳಿಸಿದ್ದೇ ಗರಿಷ್ಠ ಸ್ಕೋರ್. ಈ ಗುರಿ ಬೆನ್ನಟ್ಟಿದ ಮುಂಬೈ, 18.1 ಓವರ್​​ಗಳಲ್ಲಿ 4 ವಿಕೆಟ್​​ಗೆ ಜಯದ ನಗೆ ಬೀರಿತು. ಇದು ಮುಂಬೈನ ಸತತ 2ನೇ ಗೆಲುವು. ಬೌಲಿಂಗ್​ನಲ್ಲಿ ಪ್ರಮುಖ 2 ವಿಕೆಟ್ ಉರುಳಿಸಿದ ವಿಲ್ ಜಾಕ್ಸ್​ ಬ್ಯಾಟಿಂಗ್​ನಲ್ಲಿ 36 ರನ್ ಗಳಿಸಿ ಪ್ರಮುಖ ಪಾತ್ರವಹಿಸಿದರು.

ಆರ್​​ಸಿಬಿ ಮಾಜಿ ಆಟಗಾರ ಅಬ್ಬರ

ಕಳೆದ ಸೀಸನ್​ನಲ್ಲಿ ಆರ್​ಸಿಬಿ ಪರ ಆಡಿದ್ದ ವಿಲ್ ಜಾಕ್ಸ್​ ಕೊನೆಗೂ ಮಿಂಚುವಲ್ಲಿ ಯಶಸ್ವಿಯಾಗಿದ್ದಾರೆ. ಕಳೆದ ಪಂದ್ಯಗಳಲ್ಲಿ ಅವಕಾಶ ಸಿಕ್ಕರೂ ವೈಫಲ್ಯ ಅನುಭವಿಸಿದ್ದ ಆರ್​ಸಿಬಿ ಮಾಜಿ ಆಟಗಾರ ಇದೀಗ ಎಸ್​ಆರ್​ಹೆಚ್ ವಿರುದ್ಧ ಬೌಲಿಂಗ್ ಮತ್ತು ಬ್ಯಾಟಿಂಗ್ ಎರಡರಲ್ಲೂ ಧಮಾಕ ಸೃಷ್ಟಿಸಿದ್ದಾರೆ. 3 ಓವರ್​ ಬೌಲಿಂಗ್ ಮಾಡಿದ ವಿಲ್ ಜಾಕ್ಸ್, ಕೇವಲ 14 ರನ್ ಬಿಟ್ಟುಕೊಟ್ಟು ಟ್ರಾವಿಸ್ ಹೆಡ್ ಮತ್ತು ಇಶಾನ್ ಕಿಶನ್​ರನ್ನು ಔಟ್ ಮಾಡಿದ್ದಾರೆ. ಬ್ಯಾಟ್​ನಲ್ಲಿ 26 ಎಸೆತಗಳನ್ನು ಎದುರಿಸಿ 3 ಬೌಂಡರಿ, 2 ಸಿಕ್ಸರ್ ಸಹಿತ 36 ರನ್ ಗಳಿಸಿ ಪ್ರಮುಖ ಪಾತ್ರವಹಿಸಿದರು.

ಇದನ್ನೂ ಓದಿ: ಲಾಲಾರಸ ಇದ್ರೇನೆ ಚೆಂಡು ಹೊಳಪು ಮಾಡ್ಬೋದಾ, ಬೇರೆ ಆಗಲ್ವಾ; ಶಮಿ-ಸಿರಾಜ್ ನಿಲುವಿಗೆ ವಿರುದ್ಧ ನಿಂತ ಮಿಚೆಲ್ ಸ್ಟಾರ್ಕ್

ಎಸ್​ಆರ್​ಹೆಚ್​ಗೆ ಏನಾಯ್ತು?

ತನ್ನ ಕಳೆದ ಪಂದ್ಯದಲ್ಲಿ ಪಂಜಾಬ್ ಕಿಂಗ್ಸ್ ವಿರುದ್ಧ 246 ರನ್​ಗಳ ದಾಖಲೆಯ ಚೇಸ್ ಮಾಡಿದ್ದ ಸನ್​ರೈಸರ್ಸ್ ಹೈದರಾಬಾದ್ ಬ್ಯಾಟರ್ಸ್​ ಈ ಪಂದ್ಯಗಳಲ್ಲಿ ರನ್ ಗಳಿಸಲು ಪರದಾಡಿದ್ದು ಅಚ್ಚರಿ ಮೂಡಿಸಿತು. ಅಭಿಷೇಕ್ ಶರ್ಮಾ (40), ಟ್ರಾವಿಸ್ ಹೆಡ್ (28), ಹೆನ್ರಿಚ್ ಕ್ಲಾಸೆನ್ (37) ದೊಡ್ಡ ಸ್ಕೋರ್​ಗೆ ಯತ್ನಿಸಿದರಾದರೂ ಮುಂಬೈ ಬೌಲರ್​ಗಳ ಹೊಡಿಬಡಿ ಆಟವಾಡಲು ಸಾಧ್ಯವಾಗಲಿಲ್ಲ. ಎಂಐ ಬೌಲರ್​ಗಳ ನಿಧಾನಗತಿಯ ಮತ್ತು ತಿರುವು ಪಡೆದ ಚೆಂಡನ್ನು ಬೌಂಡರಿ ಗೆರೆ ದಾಟಿಸಲು ಹರಸಾಹಸ ಪಟ್ಟರು. ಹಲವು ಜೀವದಾನ ಪಡೆದಿದ್ದರ ಹೊರತಾಗಿಯೂ ಯಾರೂ 50ರ ಗಡಿ ದಾಟಿಲ್ಲ.

ಇದನ್ನೂ ಓದಿ: ತಾಯಿ ಕೂಲಿ ಕೆಲಸ; ಬಡ ಪ್ರತಿಭೆಯ ಬೆನ್ನಿಗೆ ನಿಂತ ಸಚಿವ ಎಂಬಿ ಪಾಟೀಲ್, ಏಷ್ಯನ್ ಗೇಮ್ಸ್ ತಯಾರಿಗಾಗಿ 2.30 ಲಕ್ಷ ಆರ್ಥಿಕ ನೆರವು

ಮುಂಬೈ ಬೌಲರ್​ಗಳ ಮ್ಯಾಜಿಕ್

ದಂಡಂ ದಶಗುಣಂಗೆ ಹೆಸರಾದ ಎಸ್​ಆರ್​ಹೆಚ್ ಬ್ಯಾಟರ್​ಗಳನ್ನು ಮುಂಬೈ ಬೌಲರ್ಸ್​​ ಕಟ್ಟಿ ಹಾಕುವಲ್ಲಿ ಯಶಸ್ವಿಯಾದರು. ಆರಂಭದಲ್ಲಿ ದೀಪಕ್ ಚಹರ್, ಟ್ರೆಂಟ್ ಬೋಲ್ಟ್ (29/1), ನಂತರ ಜಸ್ಪ್ರೀತ್ ಬುಮ್ರಾ (21/1) ಮತ್ತು ವಿಲ್ ಜಾಕ್ಸ್​ (14/2) ಮಿಂಚಿದರು. ದೀಪಕ್ ವಿಕೆಟ್ ಪಡೆಯದಿದ್ದರೂ ಮೊದಲ 3 ಓವರ್​ಗಳಲ್ಲಿ ರನ್​ಗೆ ನಿಯಂತ್ರಣ ಹೇರಿದರು. ಬ್ಯಾಟಿಂಗ್ ಸ್ನೇಹಿ ಪಿಚ್​​ನಲ್ಲಿ ಬೌಲರ್​ಗಳ ಮೆರೆದಾಟ ನಿಜಕ್ಕೂ ಅದ್ಭುತವಾಗಿತ್ತು. ಆದರೆ ದೊಡ್ಡ ಗುರಿಯನ್ನೇ ಬೆನ್ನಟ್ಟಿದ್ದ ಹೈದರಾಬಾದ್​ ಏನಾಯ್ತೋ ಎಂಬ ಪ್ರಶ್ನೆ ಉದ್ಭವವಾಗಿದೆ.

ಇದನ್ನೂ ಓದಿ: ಭಾರತ ಕ್ರಿಕೆಟ್ ತಂಡದಲ್ಲಿ ಮೇಜರ್ ಸರ್ಜರಿ; ಗೌತಮ್ ಗಂಭೀರ್ ಆಪ್ತರನ್ನು ವಜಾಗೊಳಿಸಿದ ಬಿಸಿಸಿಐ, ಕಾರಣ ಹೀಗಿದೆ!