ಟೆಸ್ಟ್ ಕ್ರಿಕೆಟ್​ನಲ್ಲಿ ಅಶ್ವಿನ್ 500 ವಿಕೆಟ್​ಗಳ ಸರದಾರ; ಕನ್ನಡಿಗ ಅನಿಲ್ ಕುಂಬ್ಳೆ ದಾಖಲೆ ಮುರಿದ ಸ್ಪಿನ್ ಮಾಂತ್ರಿಕ

ಇಂಗ್ಲೆಂಡ್​ ವಿರುದ್ಧದ ಮೂರನೇ ಟೆಸ್ಟ್​​ನಲ್ಲಿ ಭಾರತದ ಅನುಭವಿ ಹಾಗೂ ಹಿರಿಯ ಸ್ಪಿನ್ನರ್​ ರವಿಚಂದ್ರನ್ ಅಶ್ವಿನ್ ಬೌಲಿಂಗ್​ನಲ್ಲಿ ಹೊಸ ವಿಶ್ವದಾಖಲೆ ಬರೆದಿದ್ದಾರೆ. ಇಂಗ್ಲೆಂಡ್​ ತಂಡದ ಆರಂಭಿಕ ಆಟಗಾರ ಜಾಕ್​ ಕ್ರಾವ್ಲಿ ಅವರನ್ನು ಔಟ್ ಮಾಡುವ ಮೂಲಕ ಟೆಸ್ಟ್​ ಕ್ರಿಕೆಟ್​​ನಲ್ಲಿ 500 ವಿಕೆಟ್​ಗಳ ಸಾಧನೆಗೈದಿದ್ದಾರೆ. ಈ ದಾಖಲೆ ಬರೆದ ಭಾರತದ 2ನೇ ಹಾಗೂ ವಿಶ್ವದ ಒಂಬತ್ತನೇ ಬೌಲರ್​ ಎಂಬ ಹೆಗ್ಗಳಿಕೆಗೆ ಪಾತ್ರರಾದರು.

ಇದನ್ನೂ ಓದಿ: ಇಂಗ್ಲೆಂಡ್ ವಿರುದ್ಧ ಶತಕ; 3000 ರನ್, 250+ ವಿಕೆಟ್​ ಪಡೆದ ದಿಗ್ಗಜರ ಎಲೈಟ್​ ಪಟ್ಟಿಗೆ ಸೇರಿದ ರವೀಂದ್ರ ಜಡೇಜಾ

ಅನಿಲ್ ಕುಂಬ್ಳೆ ಅವರು 500 ವಿಕೆಟ್​ಗಳ ಸಾಧನೆ ಮಾಡಿದ ಭಾರತದ ಮೊದಲ ಬೌಲರ್​ ಎಂಬ ದಾಖಲೆ ಬರೆದಿದ್ದಾರೆ. ಅವರು ಟೆಸ್ಟ್​​ನಲ್ಲಿ​ ಒಟ್ಟು 619 ವಿಕೆಟ್ ಉರುಳಿಸಿದ್ದಾರೆ. 37 ವರ್ಷದ ಕೇರಂ ಸ್ಪಿನ್ನರ್​ ತನ್ನ 98ನೇ ಟೆಸ್ಟ್​​ನಲ್ಲಿ​ ಇದೀಗ ಈ ಮೈಲಿಗಲ್ಲು ಸಾಧಿಸಿದ್ದಾರೆ. ಇಂಗ್ಲೆಂಡ್​ ವಿರುದ್ಧದ ಟೆಸ್ಟ್​ ಸರಣಿ ಆರಂಭಕ್ಕೂ ಮುನ್ನ ಅವರು 500 ವಿಕೆಟ್​​ಗಳ ಕ್ಲಬ್ ಸೇರಲು 10 ವಿಕೆಟ್​​ಗಳ ಅಗತ್ಯ ಇತ್ತು. ಮೊದಲ 2 ಪಂದ್ಯಗಳಲ್ಲಿ 9 ವಿಕೆಟ್ ಪಡೆದಿದ್ದರು.

ಹೀಗಾಗಿ ಐತಿಹಾಸಿಕ ದಾಖಲೆ ಬರೆಯಲು ಒಂದು ವಿಕೆಟ್ ಅಗತ್ಯ ಇತ್ತು. ಮೂರನೇ ಟೆಸ್ಟ್​ನ ಮೊದಲ ಇನ್ನಿಂಗ್ಸ್​​ನಲ್ಲಿ ಪ್ರಥಮ ವಿಕೆಟ್ ಪಡೆಯುವ ಮೂಲಕ ಈ ಮೈಲುಗಲ್ಲು ನಿರ್ಮಿಸಿದರು. ಅಶ್ವಿನ್ ಈವರೆಗೆ ಭಾರತ ಪರ 98 ಟೆಸ್ಟ್ ಪಂದ್ಯಗಳಲ್ಲಿ ಕಣಕ್ಕಿಳಿದು 500* ವಿಕೆಟ್​ ಕಬಳಿಸಿದ್ದಾರೆ. 34 ಬಾರಿ ಇನಿಂಗ್ಸ್​​ವೊಂದರಲ್ಲಿ 5 ವಿಕೆಟ್ ಉರುಳಿಸಿದ ಸಾಧನೆ ಮಾಡಿದ್ದಾರೆ. 8 ಬಾರಿ 10 ವಿಕೆಟ್​ (ಪಂದ್ಯವೊಂದರಲ್ಲಿ) ಗೊಂಚಲು ಪಡೆದಿದ್ದಾರೆ. ಅಶ್ವಿನ್ ಮೊದಲ ಟೆಸ್ಟ್ ಪಡೆದಿದ್ದು 2011ರಲ್ಲಿ ವೆಸ್ಟ್ ಇಂಡೀಸ್ ವಿರುದ್ಧ.

5ನೇ ಸ್ಪಿನ್ನರ್​, ಸಕ್ರಿಯ ಮೂರನೇ ಬೌಲರ್

ಟೆಸ್ಟ್​​ನಲ್ಲಿ 500 ವಿಕೆಟ್​ ಕ್ಲಬ್​ ಸೇರಿದ 9 ಬೌಲರ್​​ಗಳ ಪೈಕಿ ಅಶ್ವಿನ್, 5ನೇ ಸ್ಪಿನ್ನರ್​ ಆಗಿದ್ದಾರೆ. ಮುತ್ತಯ್ಯ ಮುರಳೀಧರನ್, ಶೇನ್ ವಾರ್ನ್, ಅನಿಲ್ ಕುಂಬ್ಳೆ, ನಾಥನ್ ಲಿಯಾನ್ ಅವರು ಅಶ್ವಿನ್​ಗೂ ಮೊದಲು ಈ ಸಾಧನೆ ಮಾಡಿದ್ದಾರೆ. ಸದ್ಯ ಕ್ರಿಕೆಟ್​ನಲ್ಲಿ ಸಕ್ರಿಯ ಆಟಗಾರರ ಪೈಕಿ 500+ ವಿಕೆಟ್​ ಪಡೆದರಲ್ಲಿ ಅಶ್ವಿನ್ ಮೂರನೇ ಬೌಲರ್​. ಇಂಗ್ಲೆಂಡ್​ ತಂಡದ ಜೇಮ್ಸ್​ ಆಂಡರ್ಸನ್ ​(696*) ಮತ್ತು ಆಸ್ಟ್ರೇಲಿಯಾದ ನಾಥಾನ್​ ಲಿಯಾನ್​ (512*) ಮೊದಲ ಎರಡು ಸ್ಥಾನದಲ್ಲಿದ್ದಾರೆ.

ಇದನ್ನೂ ಓದಿ: ನಾನು ಮಾಡಿದ ತಪ್ಪಿನಿಂದ ಸರ್ಫರಾಜ್ ಖಾನ್ ರನೌಟ್ ಆದರು; ಬಹಿರಂಗವಾಗಿ ಕ್ಷಮೆಕೋರಿದ ರವೀಂದ್ರ ಜಡೇಜಾ

ಟೆಸ್ಟ್​ನಲ್ಲಿ ವೇಗದ 500 ವಿಕೆಟ್​

ಟೆಸ್ಟ್​ ಕ್ರಿಕೆಟ್​ನಲ್ಲಿ ಅತಿ ಕಡಿಮೆ ಪಂದ್ಯಗಳಲ್ಲಿ 500 ವಿಕೆಟ್​ ಪಡೆದ ವಿಶ್ವದ ಎರಡನೇ ಬೌಲರ್​ ಎಂಬ ಖ್ಯಾತಿಗೆ ಅಶ್ವಿನ್ ಒಳಗಾಗಿದ್ದಾರೆ. ಆ ಮೂಲಕ 105 ಪಂದ್ಯಗಳಲ್ಲಿ ಈ ಸಾಧನೆಗೈದಿದ್ದ ಅನಿಲ್ ಕುಂಬ್ಳೆ ದಾಖಲೆ ಮುರಿದು ಎರಡನೇ ಸ್ಥಾನಕ್ಕೆ ಲಗ್ಗೆ ಇಟ್ಟಿದ್ದಾರೆ. ಮೊದಲ ಸ್ಥಾನದಲ್ಲಿ ಮುತ್ತಯ್ಯ ಮುರಳೀಧರನ್ ಅವರಿದ್ದು 87 ಟೆಸ್ಟ್​ಗಳಲ್ಲೇ 500 ವಿಕೆಟ್ ಕ್ಲಬ್ ಸೇರಿದ್ದರು. ಅಶ್ವಿನ್ 98 ಟೆಸ್ಟ್​​ಗಳಲ್ಲಿ ಈ ಸಾಧನೆ ಮಾಡಿದ್ದಾರೆ. ಶೇನ್ ವಾರ್ನ್ 108, ಗ್ಲೆನ್ ಮೆಗ್ರಾಥ್ 110 ಟೆಸ್ಟ್​​ಗಳಲ್ಲಿ 500 ವಿಕೆಟ್ ಸಾಧನೆ ಮಾಡಿದ್ದರು.

ಕಡಿಮೆ ಎಸೆತಗಳಲ್ಲಿ 500 ವಿಕೆಟ್​

ಅತಿ ಕಡಿಮೆ ಎಸೆತಗಳಲ್ಲಿ 500 ವಿಕೆಟ್​ ಪಡೆದ ಬೌಲರ್​ಗಳ ಪೈಕಿ ಅಶ್ವಿನ್ ಎರಡನೇ ಸ್ಥಾನಕ್ಕೇರಿದ್ದಾರೆ. ಆ ಮೂಲಕ ಜೇಮ್ಸ್​ ಆಂಡರ್​ಸನ್ ಅವರನ್ನು 3ನೇ ಸ್ಥಾನಕ್ಕೆ ತಳ್ಳಿದ್ದಾರೆ. ಅಗ್ರಸ್ಥಾನದಲ್ಲಿರುವ ಗ್ಲೆನ್ ಮೆಗ್ರಾಥ್ 25528 ಎಸೆತಗಳಲ್ಲಿ ಈ ಸಾಧನೆ ಮಾಡಿದ್ದಾರೆ. ಅಶ್ವಿನ್​ ಇಷ್ಟು ವಿಕೆಟ್ ತೆಗೆದುಕೊಳ್ಳಲು 25714 ಎಸೆತಗಳನ್ನು ಎಸೆದಿದ್ದಾರೆ. ಆಂಡರ್ಸನ್ 28150, ಸ್ಟುವರ್ಟ್ ಬ್ರಾಡ್ 28430, ಕರ್ಟ್ನಿ ವಾಲ್ಷ್ 28833 ಎಸೆತಗಳಲ್ಲಿ 500 ವಿಕೆಟ್ ಪಡೆದಿದ್ದಾರೆ.

​ಟೆಸ್ಟ್​ನಲ್ಲಿ ಅತಿ ಹೆಚ್ಚು ವಿಕೆಟ್​ ಪಡೆದ ಬೌಲರ್​ಗಳ ಪಟ್ಟಿ (ಟಾಪ್-10)

• ಮುತ್ತಯ್ಯ ಮುರಳೀಧರನ್ (ಶ್ರೀಲಂಕಾ) - 800
• ಶೇನ್ ವಾರ್ನ್ (ಆಸ್ಟ್ರೇಲಿಯಾ) - 708
• ಜೇಮ್ಸ್ ಆಂಡರ್ಸನ್ (ಇಂಗ್ಲೆಂಡ್) - 696*
• ಅನಿಲ್ ಕುಂಬ್ಳೆ (ಭಾರತ) - 619
• ಸ್ಟುವರ್ಟ್ ಬ್ರಾಡ್ (ಇಂಗ್ಲೆಂಡ್​) - 604
• ಗ್ಲೆನ್ ಮೆಕ್‌ಗ್ರಾತ್ (ಆಸ್ಟ್ರೇಲಿಯಾ) - 563
• ಕರ್ಟ್ನಿ ವಾಲ್ಷ್ (ವೆಸ್ಟ್​ ಇಂಡೀಸ್)​ - 519
• ನಾಥನ್ ಲಿಯಾನ್ (ಆಸ್ಟ್ರೇಲಿಯಾ) - 512*
• ರವಿಚಂದ್ರನ್ ಅಶ್ವಿನ್ (ಭಾರತ) - 500*
• ಡೇಲ್ ಸ್ಟೈನ್ (ದಕ್ಷಿಣ ಆಫ್ರಿಕಾ)- 439
  
  ಇದನ್ನೂ ಓದಿ: ದಾಖಲೆಗಾಗಿ ಸರ್ಫರಾಜ್​ರನ್ನು ರನೌಟ್ ಮಾಡಿದ್ರು; ಜಡೇಜಾರನ್ನು ದೂಷಿಸಿದ ನೆಟ್ಟಿಗರು, ಕೋಪದಿಂದ ಕ್ಯಾಪ್ ಬಿಸಾಡಿದ ರೋಹಿತ್