ಲೇಡಿ ಎಬಿ ಪೆರ್ರಿ ಪರಾಕ್ರಮ, ಕನ್ನಡತಿ ಖಡಕ್ ಆಟ; ಮುಂಬೈ ಇಂಡಿಯನ್ಸ್ ಮಣಿಸಿ ಚೊಚ್ಚಲ ಫೈನಲ್​ಗೇರಿದ ಆರ್​ಸಿಬಿ

ಮಹಿಳಾ ಪ್ರೀಮಿಯರ್​ ಲೀಗ್​ನ ಎರಡನೇ ಆವೃತ್ತಿಯಲ್ಲಿ ಹಾಲಿ ಚಾಂಪಿಯನ್ ಮುಂಬೈ ಇಂಡಿಯನ್ಸ್​ ಮಣಿಸಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು, ಮೊದಲ ಬಾರಿಗೆ ಫೈನಲ್ ಪ್ರವೇಶಿಸಿತು. ದೆಹಲಿಯ ಅರುಣ್ ಜೇಟ್ಲಿ ಮೈದಾನದಲ್ಲಿ ನಡೆದ ಎಲಿಮಿನೇಟರ್​​ಪಂದ್ಯದಲ್ಲಿ ಹರ್ಮನ್​ಪ್ರೀತ್​ ಕೌರ್ ನೇತೃತ್ವದ ಮುಂಬೈ ತಂಡವನ್ನು 5 ರನ್​ಗಳಿಂದ ಮಣಿಸಿದ ಆರ್​​ಸಿಬಿ, 16 ವರ್ಷಗಳ ಟ್ರೋಫಿ ಬರ ನೀಗಿಸಲು ಸಜ್ಜಾಗಿದೆ. ಆದರೆ, ಸತತ ಎರಡನೇ ಬಾರಿಗೆ ಫೈನಲ್ ಪ್ರವೇಶಿಸುವ ಮುಂಬೈ ಕನಸು ಭಗ್ನಗೊಂಡಿದೆ.

ಫೈನಲ್​ನಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್​ ಎದುರಾಳಿ

2ನೇ ಆವೃತ್ತಿಯ ಡಬ್ಲ್ಯುಪಿಎಲ್​ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನ ಪಡೆಯುವುದರೊಂದಿಗೆ ನೇರವಾಗಿ ಫೈನಲ್ ಪ್ರವೇಶಿಸಿದ್ದ ಡೆಲ್ಲಿ ಕ್ಯಾಪಿಟಲ್ಸ್ ತಂಡವನ್ನು ಪ್ರಶಸ್ತಿ ಸುತ್ತಿನ ಪಂದ್ಯದಲ್ಲಿ ಆರ್​ಸಿಬಿ ಎದುರಿಸಲಿದೆ. ಕಳೆದ ಬಾರಿಯೂ ಡೆಲ್ಲಿ ಫೈನಲ್ ಪ್ರವೇಶಿಸಿತ್ತು. ಆದರೆ ಮುಂಬೈ ವಿರುದ್ಧ ಸೋತು ರನ್ನರ್​ಅಪ್​ಗೆ ತೃಪ್ತಿಯಾಗಿತ್ತು. ಈ ಬಾರಿ ಆರ್​ಸಿಬಿ ಮತ್ತು ಡೆಲ್ಲಿ ಯಾರೇ ಗೆದ್ದರೂ ಡಬ್ಲ್ಯುಪಿಎಲ್​​ನಲ್ಲಿ ನೂತನ ಚಾಂಪಿಯನ್​ ಆಗಲಿದೆ.

ದೆಹಲಿಯ ಅರುಣ್ ಜೇಟ್ಲಿ ಮೈದಾನದಲ್ಲಿ ನಡೆದ ಈ ಪಂದ್ಯದಲ್ಲಿ ಟಾಸ್ ಗೆದ್ದ ಸ್ಮೃತಿ ಮಂಧಾನ ಬ್ಯಾಟಿಂಗ್ ಆಯ್ದುಕೊಂಡರು. ಆದರೆ ಅತ್ಯಂತ ಕಳಪೆ ಆರಂಭ ಪಡೆಯಿತು. ಸ್ಮೃತಿ ಮಂಧಾನ (10) ಮತ್ತು ಸೋಫಿ ಡಿವೈನ್ (10) ಮತ್ತು ದಿಶಾ ಕಸತ್ (0) ತಂಡದ ಮೊತ್ತ 23 ರನ್ ಆಗುವಷ್ಟರಲ್ಲಿ ಔಟಾದರು. ಇದು ಆರ್​ಸಿಬಿ ಸಂಕಷ್ಟಕ್ಕೆ ಸಿಲುಕುವಂತೆ ಮಾಡಿತು. ಫಾರ್ಮ್​​ನಲ್ಲಿದ್ದ ರಿಚಾ ಘೋಷ್ (14) ಕೂಡ ನಿರಾಸೆ ಮೂಡಿಸಿದರು.

ಎಲ್ಲಿಸ್ ಪೆರ್ರಿ ಏಕಾಂಗಿ ಹೋರಾಟ

ಸತತ ವಿಕೆಟ್​​ಗಳ ನಡುವೆಯೂ ನಿಧಾನವಾಗಿ ಬೀಸುತ್ತಾ ವಿಕೆಟ್ ಕಾಯ್ದುಕೊಂಡ ಪೆರ್ರಿ, ಮುಂಬೈ ಬೌಲಿಂಗ್​ ವಿರುದ್ಧ ದಿಟ್ಟವಾಗಿ ಹೋರಾಟ ನಡೆಸಿದರು. ಜವಾಬ್ದಾರಿಯುತ ಆಟವಾಡಿ ಏಕಾಂಗಿ ಹೋರಾಟ ನಡೆಸಿದರು. ಅಲ್ಪಮೊತ್ತಕ್ಕೆ ಕುಸಿಯಬೇಕಿದ್ದ ತಂಡಕ್ಕೆ ಸ್ಪರ್ಧಾತ್ಮಕ ಮೊತ್ತ ಕಲೆ ಹಾಕಲು ನೆರವಾದರು. 50 ಎಸೆತಗಳಲ್ಲಿ 8 ಬೌಂಡರಿ, 1 ಸಿಕ್ಸರ್ ಸಹಿತ 66 ರನ್ ಚಚ್ಚಿದರು. ಅಂತಿಮವಾಗಿ ಆರ್​​ಸಿಬಿ 20 ಓವರ್​​ಗಳಲ್ಲಿ 6 ವಿಕೆಟ್ ನಷ್ಟಕ್ಕೆ 135 ರನ್ ಗಳಿಸಿತ್ತು.

ಆದರೆ ಈ ಗುರಿ ಬೆನ್ನಟ್ಟಿದ ಮುಂಬೈ ಇಂಡಿಯನ್ಸ್​ 20 ಓವರ್​​​ಗಳಲ್ಲಿ 6 ವಿಕೆಟ್ ನಷ್ಟಕ್ಕೆ 130 ರನ್​ ಗಳಿಸಲು ಮಾತ್ರ ಶಕ್ತವಾಯಿತು. 5 ರನ್​ಗಳಿಂದ ಸೋತ ಹಾಲಿ ಚಾಂಪಿಯನ್ ಮುಂಬೈ ಇಂಡಿಯನ್ಸ್ ಎಲಿಮಿನೇಟರ್​​ನಿಂದ ಹೊರಬಿತ್ತು. ಯಾಸ್ತಿಕಾ ಭಾಟಿಯಾ 19, ಹೇಲಿ ಮ್ಯಾಥ್ಯೂಸ್ 15, ನಟಾಲಿ ಸೀವರ್​ 23 ರನ್ ಗಳಿಸಿದರು. ಆದರೆ ಕೊನೆಯಲ್ಲಿ ಹರ್ಮನ್​ಪ್ರೀತ್ ಕೌರ್ 33 ರನ್ ಗಳಿಸಿ ಹೋರಾಟ ನಡೆಸಿದರು. ಆದರೆ ಅವರು ಗೆಲುವು ತಂದುಕೊಡಲು ಸಾಧ್ಯವಾಗಲಿಲ್ಲ.

ಹರ್ಮನ್​ಪ್ರೀತ್​ ಅವರು ಔಟಾಗುವುದಕ್ಕೂ ಮುನ್ನ ಮುಂಬೈ ಗೆಲ್ಲುವುದು ಖಚಿತ ಎಂದು ಹೇಳಲಾಗಿತ್ತು. ಆದರೆ 18ನೇ ಓವರ್​​ನ ಕೊನೆಯಲ್ಲಿ ಶ್ರೇಯಾಂಕಾ ಪಾಟೀಲ್ ಬೌಲಿಂಗ್​ನಲ್ಲಿ ಲಾಂಗ್​ ಆನ್​ನಲ್ಲಿ ಕ್ಯಾಚ್ ನೀಡಿ ನಿರ್ಗಮಿಸಿದರು. ಆಗ 2 ಓವರ್​​ಗಳಲ್ಲಿ ಮುಂಬೈ ಗೆಲುವಿಗೆ ಕೇವಲ 16 ರನ್ ಬೇಕಿತ್ತು. ಆದರೆ ಪೂಜಾ ವಸ್ತ್ರಾಕರ್, ಎಸ್​ ಸಜನಾ, ಅಮನ್​ಜೋತ್​ ಕೌರ್​, 27 ರನ್ ಗಳಿಸಿ ಕ್ರೀಸ್​​ನಲ್ಲಿ ಸೆಟಲ್ ಆಗಿದ್ದ ಅಮೆಲಿಯಾ ಕೇರ್ ಅವರು ಆರ್​ಸಿಬಿ ಬೌಲಿಂಗ್​ ಮುಂದೆ ಮಂಡಿಯೂರಿತು. ಕೊನೆಯಲ್ಲಿ ಜಾರ್ಜಿಯಾ ವೇರ್ಹ್ಯಾಮ್, ಸೋಫಿ ಮೊಲಿನೆಕ್ಸ್, ಶ್ರೇಯಾಂಕಾ ಪಾಟೀಲ್, ಆಶಾ ಶೋಭನಾ ಅದ್ಭುತ ಬೌಲಿಂಗ್ ಪ್ರದರ್ಶನ ನೀಡಿದರು.

ಪೆರ್ರಿ ಪರಾಕ್ರಮ, ಕನ್ನಡತಿ ಖಡಕ್ ಆಟ

ಪಂದ್ಯದ ಗೆಲುವಿನಲ್ಲಿ ಪ್ರಮುಖ ಆಟಗಾರ್ತಿಯರು ಅಂದರೆ ಎಲ್ಲಿಸ್ ಪೆರ್ರಿ ಮತ್ತು ಕನ್ನಡತಿ ಶ್ರೇಯಾಂಕಾ ಪಾಟೀಲ್. ಹೌದು, ಲೇಡಿ ಎಬಿ ಎಂದೇ ಕರೆಸಿಕೊಳ್ಳುವ ಎಲ್ಲಿಸ್ ಪೆರ್ರಿ ಬ್ಯಾಟಿಂಗ್​ನಲ್ಲಿ ಅರ್ಧಶತಕ ಮತ್ತು ಬೌಲಿಂಗ್​ನಲ್ಲಿ ವಿಕೆಟ್ ಪಡೆದು ಮಿಂಚಿದರು. ಮತ್ತೊಂದೆಡೆ ಶ್ರೇಯಾಂಕಾ ಒತ್ತಡದಲ್ಲಿ ಎರಡು ವಿಕೆಟ್ ಪಡೆದರು. ಹೇಲಿ ಮ್ಯಾಥ್ಯೂಸ್ ಮತ್ತು ಹರ್ಮನ್​ಪ್ರೀತ್ ಕೌರ್​ ಅವರನ್ನು ಔಟ್ ಮಾಡಿದರು. 4 ಓವರ್​​ಗಳಲ್ಲಿ 16 ರನ್ ನೀಡಿ 2 ವಿಕೆಟ್​ ಕಬಳಿಸಿ ಮಿಂಚಿದರು. ಆಶಾ ಶೋಭನಾ, ವೇರ್ಹ್ಯಾಮ್, ಸೋಫಿ ಮೊಲಿನೆಕ್ಸ್ ತಲಾ 1 ವಿಕೆಟ್ ಪಡೆದರು.

ಇದನ್ನೂ ಓದಿ: ‘ಅವಳ ಸುದ್ದಿಗೆ ಬರಬೇಡಿ, ಅಮ್ಮ, ಅಕ್ಕ ಅನ್ನೋಕೆ ನಮಗೆ ಬರಲ್ಲ ಅಂತಲ್ಲ!’ ತಂಗಿಯನ್ನು ಟೀಕಿಸಿದವರ ಚಳಿ ಬಿಡಿಸಿದ ಬಿಗ್‌ ಬಾಸ್‌ ವಿನಯ್‌ ಗೌಡ

ಇದನ್ನೂ ಓದಿ: ಮುಂಬೈ ಇಂಡಿಯನ್ಸ್ ಫೋಟೋಶೂಟ್​ನಲ್ಲಿ ರೋಹಿತ್​ ಶರ್ಮಾ-ಇಶಾನ್ ಕಿಶನ್ ಬ್ರೊಮ್ಯಾನ್ಸ್; ಹಾರ್ದಿಕ್ ಪಾಂಡ್ಯ-ಹಿಟ್​ಮ್ಯಾನ್ ದೂರ ದೂರ

ಇದನ್ನೂ ಓದಿ: ಆ ಚಿತ್ರೋದ್ಯಮ ನೋಡಿದ್ರೆ ಹೊಟ್ಟೆಕಿಚ್ಚಾಗುತ್ತೆ, ಅಸೂಯೆ ಬರುತ್ತೆ, ಒಳ್ಳೇ ಕಲಾವಿದರೇ ಅಲ್ಲಿ ಸೃಷ್ಟಿಯಾಗ್ತಾರೆ; ರಾಜಮೌಳಿ