ಆಶಾ ಶೋಭಾನಾ ಬೆಂಕಿ ಬೌಲಿಂಗ್; ಮೊದಲ ಪಂದ್ಯದಲ್ಲೇ ಗೆದ್ದು ಬೀಗಿದ ಆರ್ಸಿಬಿ, ಯುಪಿ ವಾರಿಯರ್ಸ್ಗೆ 2 ರನ್ ಸೋಲು
RCB vs UPW: ಬೆಂಗಳೂರಿನ ಚಿನ್ನಸ್ವಾಮಿ ಮೈದಾನದಲ್ಲಿ ನಡೆದ ಯುಪಿ ವಾರಿಯರ್ಸ್ ವಿರುದ್ಧದ ಪಂದ್ಯದಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು 2 ರನ್ಗಳಿಂದ ಭರ್ಜರಿ ಗೆಲುವು ಸಾಧಿಸಿದೆ.
ಅಭಿಮಾನಿಗಳ ಆರ್ಸಿಬಿ.. ಆರ್ಸಿಬಿ.. ಘೋಷಣೆಯ ಬೆಂಬಲದೊಂದಿಗೆ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಭರ್ಜರಿ ಜಯ ಸಾಧಿಸಿದೆ. ಕಳೆದ ವರ್ಷ ಮೊದಲ ಐದು ಪಂದ್ಯಗಳಲ್ಲಿ ಸೋತಿದ್ದ ಸ್ಮೃತಿ ಮಂಧಾನ ಪಡೆ, ಇದೀಗ ತನ್ನ ಆರಂಭಿಕ ಪಂದ್ಯದಲ್ಲೇ ಶುಭಾರಂಭ ಮಾಡಿದೆ. ಯುಪಿ ವಾರಿಯರ್ಸ್ ವಿರುದ್ಧ 2 ರನ್ಗಳ ಅಂತರದಲ್ಲಿ ರೋಚಕ ಗೆಲುವು ಸಾಧಿಸಿ ಅಭಿಯಾನ ಆರಂಭಿಸಿದೆ. ಆಶಾ ಶೋಭನಾ ಅವರ ಬೆಂಕಿ ಬೌಲಿಂಗ್ ಮುಂದೆ ಅಲೀಸಾ ಹೀಲಿ ಪಡೆ ಮಂಡಿಯೂರಿತು.
ತವರಿನ ಚಿನ್ನಸ್ವಾಮಿ ಮೈದಾನದಲ್ಲಿ ನಡೆದ ಪಂದ್ಯದಲ್ಲಿ ಟಾಸ್ ಸೋತ ಆರ್ಸಿಬಿ ಮೊದಲು ಬ್ಯಾಟಿಂಗ್ ನಡೆಸಿತು. ರೆಡ್ ಆರ್ಮಿ ಪರ ಇನ್ನಿಂಗ್ಸ್ ಆರಂಭಿಸಿದ ಸ್ಮೃತಿ ಮಂಧಾನ ಮತ್ತು ಸೋಫಿ ಡಿವೈನ್ ಅಭಿಮಾನಿಗಳಿಗೆ ನಿರಾಸೆ ಮೂಡಿಸಿದರು. ಡಿವೈನ್ 1 ರನ್, ಸ್ಮೃತಿ 13 ರನ್ಗಳಿಗೆ ವಿಕೆಟ್ ಒಪ್ಪಿಸಿದರು. ನಂತರ ಕಣಕ್ಕಿಳಿದ ಎಲ್ಲಿಸ್ ಪೆರ್ರಿ 8 ರನ್ಗೆ ಆಟ ಮುಗಿಸಿ ಪೆವಿಲಿಯನ್ ಸೇರಿದರು. ಇದರೊಂದಿಗೆ ಆರ್ಸಿಬಿ ಆತಂಕಕ್ಕೆ ಸಿಲುಕಿತ್ತು.
ಮೇಘನಾ-ರಿಚಾ ಬೊಂಬಾಟ್ ಆಟ
54ಕ್ಕೆ 3 ವಿಕೆಟ್ ನಷ್ಟವಾಗಿದ್ದ ವೇಳೆ ತಂಡದ ಜವಾಬ್ದಾರಿ ಹೊತ್ತ ಸಬ್ಬಿನೇನಿ ಮೇಘನಾ ಮತ್ತು ರಿಚಾ ಘೋಷ್ ಸ್ಪೋಟಕ ಬ್ಯಾಟಿಂಗ್ ನಡೆಸಿದರು. ನೆರೆದಿದ್ದ ಪ್ರೇಕ್ಷಕರಿಗೆ ರಸದೌತಣ ಉಣಬಡಿಸಿದರು. ಇಬ್ಬರು ಸಹ ತಂಡದ ಮೊತ್ತವನ್ನು 100ರ ಗಡಿ ದಾಟಿಸಿದರು. ಅಲ್ಲದೆ ಈ ಜೋಡಿ 71 ರನ್ಗಳ ಜೊತೆಯಾಟವಾಡಿದರು. ಇದೇ ವೇಳೆ ಇಬ್ಬರೂ ಹಾಫ್ ಸೆಂಚುರಿ ಸಿಡಿಸಿದರು. ಇಬ್ಬರ ಆಟದಿಂದಾಗಿ ಆರ್ಸಿಬಿ ತಂಡ ಸ್ಪರ್ಧಾತ್ಮಕ ಮೊತ್ತ ಕಲೆಹಾಕಲು ಸಾಧ್ಯವಾಯಿತು.
ಅರ್ಧಶತಕ ಸಿಡಿಸಿ ಮಿಂಚು
ಮೇಘನಾ 44 ಎಸೆತಗಳಲ್ಲಿ 7 ಬೌಂಡರಿ, 1 ಸಿಕ್ಸರ್ ಸಹಿತ 53 ರನ್, ರಿಚಾ 37 ಎಸೆತಗಳಲ್ಲಿ 12 ಬೌಂಡರಿಗಳನ್ನು ಸಿಡಿಸಿ 62 ರನ್ ಚಚ್ಚಿದರು. ಆ ಮೂಲಕ ತಂಡವನ್ನು ಸವಾಲಿನ ಮೊತ್ತ ಕಲೆಹಾಕಲು ನೆರವಾದರು. ಸೋಫಿ ಮೊಲಿನೆಕ್ಸ್ 9, ಶ್ರೇಯಾಂಕಾ 8 ರನ್ ಸಿಡಿಸಿ ಅಜೇಯರಾಗಿ ಉಳಿದರು. ಅಂತಿಮವಾಗಿ 20 ಓವರ್ಗಳಲ್ಲಿ 6 ವಿಕೆಟ್ ನಷ್ಟಕ್ಕೆ 157 ರನ್ ಕಲೆ ಹಾಕಿತು. ರಾಜೇಶ್ವರಿ ಗಾಯಕ್ವಾಡ್ 2 ವಿಕೆಟ್ ಪಡೆದರು.
ಯುಪಿಗೂ ಆರಂಭಕ್ಕೂ ಆಘಾತ
158 ರನ್ಗಳ ಗುರಿ ಬೆನ್ನಟ್ಟಿದ ಯುಪಿ ವಾರಿಯರ್ಸ್ ತಂಡದ ಆರಂಭ ಕೂಡ ಉತ್ತಮವಾಗಿರಲಿಲ್ಲ. ನಾಯಕಿ ಅಲೀಸಾ ಹೀಲಿ 5 ರನ್ಗೆ ಆಟ ಮುಗಿಸಿದರು. ವೃಂದಾ ದಿನೇಶ್ ನಿಧಾನಗತಿಯ ಬ್ಯಾಟಿಂಗ್ ನಡೆಸಿ ತಂಡದ ಹಿನ್ನಡೆಗೆ ಕಾರಣರಾದರು. ತಹ್ಲಿಯಾ ಮೆಗ್ರಾತ್ 22 ರನ್ ಗಳಿಸಿ ಅಬ್ಬರಿಸುವ ನಿರೀಕ್ಷೆ ಹುಟ್ಟು ಹಾಕಿದ್ದರು. ಇಬ್ಬರಿಗೂ ಆಶಾ ಶೋಭನಾ ಗೇಟ್ ಪಾಸ್ ನೀಡಿದರು. ಆದರೆ ಉಳಿದ ಬೌಲರ್ಗಳಿಂದ ಸರಿಯಾದ ಸಾಥ್ ಸಿಗಲಿಲ್ಲ.
ಬೆಂಡೆತ್ತಿದ ಶ್ವೇತಾ - ಹ್ಯಾರಿಸ್
ಸಂಕಷ್ಟದಲ್ಲಿದ್ದ ತಂಡಕ್ಕೆ ಶ್ವೇತಾ ಸೆಹ್ರಾವತ್ ಮತ್ತು ಗ್ರೇಸ್ ಹ್ಯಾರಿಸ್ ಆಸರೆಯಾದರು. ಒಂದೆಡೆ ಇಬ್ಬರು ಸೇರಿ ಸಿಕ್ಸರ್ ಬೌಂಡರಿಗಳ ಸುರಿಮಳೆಗೈದರೆ, ಮತ್ತೊಂದೆಡೆ ಆರ್ಸಿಬಿ ಬೌಲರ್ಸ್ ವಿಕೆಟ್ಗಾಗಿ ಪರದಾಡಿದರು. ನೋಡ ನೋಡುತ್ತಲೇ ಗೆಲ್ಲುವ ಹಂತದಿಂದ ಸೋಲಿನ ಅಂಚಿಗೆ ಆರ್ಸಿಬಿಗೆ ಬಂದು ನಿಂತಿತು. ಕೊನೆಯ 4 ಓವರ್ಗಳಲ್ಲಿ 32 ಮಾತ್ರ ಆಗತ್ಯ ಇತ್ತು. ಆದರೆ 17ನೇ ಓವರ್ನಲ್ಲಿ ವಾರಿಯರ್ಸ್ 3 ವಿಕೆಟ್ ಕಳೆದುಕೊಂಡಿತು.
ಒಂದೇ ಓವರ್ನಲ್ಲಿ 3 ವಿಕೆಟ್ ಕಿತ್ತ ಆಶಾ
ಈ ವೇಳೆ ದಾಳಿಗಿಳಿದ ಆಶಾ, 17ನೇ ಓವರ್ನಲ್ಲಿ 3 ವಿಕೆಟ್ ಕಿತ್ತರು. ಅದ್ಭುತ ಪ್ರದರ್ಶನ ನೀಡುತ್ತಿದ್ದ ಸೆಹ್ರಾವತ್ (31), ಹ್ಯಾರಿಸ್ಗೆ (38) ಗೇಟ್ ಪಾಸ್ ನೀಡಿದರು. 38 ರನ್ ಗಳಿಸಿ ಔಟಾದರು. ಇನ್ನು ಕೊನೆಯ ಎಸೆತದಲ್ಲಿ ಕಿರಣ್ ನವ್ಗಿರೆ ಸ್ಟಂಪ್ ಆದರು. ಇದರೊಂದಿಗೆ ಆಶಾ ತನ್ನ ಅಂತಿಮ ಓವರ್ನಲ್ಲಿ 3 ವಿಕೆಟ್ ಸಹಿತ ಒಟ್ಟು 5 ವಿಕೆಟ್ ಪಡೆದರು. ಈ ಓವರ್ ಮ್ಯಾಚ್ ಟರ್ನಿಂಗ್ಗೆ ಪ್ರಮುಖ ಕಾರಣವಾಯಿತು.
ಕೊನೆಯ ಮೂರು ಓವರ್ಗಳಲ್ಲಿ 30 ರನ್ ಬೇಕಿದ್ದ ಅವಧಿಯಲ್ಲಿ ಶ್ರೇಯಾಂಕಾ 18ನೇ ಓವರ್ನಲ್ಲಿ 14 ರನ್ ಬಿಟ್ಟುಕೊಟ್ಟು ತಂಡವನ್ನು ಇಕ್ಕಟ್ಟಿಗೆ ಸಿಲುಕಿಸಿದರು. ಆದರೆ ಜಾರ್ಜಿಯಾ ವೇರ್ಹ್ಯಾಮ್ ಮತ್ತೆ ಮುನ್ನಡೆ ತಂದುಕೊಟ್ಟರು. ಅಂತಿಮ ಹಂತದಲ್ಲಿ 14 ರನ್ ಚಚ್ಚಿದ್ದ ಪೂನಂ ಖೇಮ್ನಾರ್ಗೆ ಗೇಟ್ಪಾಸ್ ಕೊಟ್ಟರು. ಕೊನೆಯ ಓವರ್ನಲ್ಲಿ ಯುಪಿಗೆ 11 ರನ್ ಬೇಕಿತ್ತು. ಆದರೆ 7 ರನ್ ಮಾತ್ರ ಗಳಿಸಲಾಯಿತು. ಇದರೊಂದಿಗೆ ಆರ್ಸಿಬಿ ಗೆಲುವಿನ ನಗೆ ಬೀರಿತು.
