ಅಶ್ವಿನ್, ಕುಲ್ದೀಪ್​ ಸ್ಪಿನ್ ಮೋಡಿಗೆ ತತ್ತರಿಸಿದ ಇಂಗ್ಲೆಂಡ್; ಗೆಲುವಿನ ಸನಿಹದಲ್ಲಿ ಭಾರತ, ಸರಣಿ ಜಯಿಸಲು ಕಾತರ

ಇಂಗ್ಲೆಂಡ್ ವಿರುದ್ಧದ ನಾಲ್ಕನೇ ಟೆಸ್ಟ್​ನಲ್ಲಿ ಭಾರತ ಗೆಲುವಿನ ಸನಿಹಕ್ಕೆ ಬಂದಿದೆ. ಪ್ರವಾಸಿ ತಂಡದ ಎದುರು 192 ರನ್​ಗಳ ಅಲ್ಪ ಗುರಿ ಪಡೆದ ಟೀಮ್ ಇಂಡಿಯಾ, ಮೂರನೇ ದಿನದಂತ್ಯಕ್ಕೆ 8 ಓವರ್​​ಗಳಿಗೆ 40 ರನ್ ಗಳಿಸಿದೆ. ನಾಲ್ಕನೇ ದಿನದಾಟದಲ್ಲಿ ಗೆಲುವಿಗೆ 152 ರನ್​ ಗಳಿಸಿದರೆ ಜಯದ ಗೆರೆ ದಾಟಲಿದೆ. ಸ್ಪಿನ್ನರ್​​​ಗಳ ದಾಳಿಗೆ ವಿಲವಿಲ ಒದ್ದಾಡಿದ ಇಂಗ್ಲೆಂಡ್​, 2ನೇ ಇನ್ನಿಂಗ್ಸ್​​ನಲ್ಲಿ 145 ರನ್​ಗಳಿಗೆ ಕುಸಿತ ಕಂಡಿತು.

ಇದನ್ನೂ ಓದಿ: ಧೋನಿಯನ್ನು ಹಾಡಿ ಹೊಗಳಿದ ಗೌತಮ್ ಗಂಭೀರ್; ಮಾಹಿಯನ್ನು ಸದಾ ಟೀಕಿಸುತ್ತಿದ್ದ ಗೌತಿ ಪೋಸ್ಟ್ ಕಂಡು ಫ್ಯಾನ್ಸ್ ಅಚ್ಚರಿ

ಏಳು ವಿಕೆಟ್​ ನಷ್ಟಕ್ಕೆ 219 ರನ್ ಗಳಿಸಿದ್ದಲ್ಲಿಂದ ಎರಡನೇ ದಿನದಾಟ ಆರಂಭಿಸಿದ ರೋಹಿತ್ ಪಡೆಗೆ ಧ್ರುವ್ ಜುರೆಲ್ ಆಸರೆಯಾದರು. ದ್ವಿತೀಯ ದಿನದಂದು 30 ರನ್​ ಗಳಿಸಿದ್ದ ಜುರೆಲ್, ಶತಕದ ಅಂಚಿನಲ್ಲಿ ಎಡವಿದರು. ಆ ಮೂಲಕ ಬೃಹತ್ ಅಂತರದ ಹಿನ್ನಡೆ ತಗ್ಗಿಸಿದರು. 149 ಎಸೆತಗಳಲ್ಲಿ 6 ಬೌಂಡರಿ, 4 ಸಿಕ್ಸರ್​ ಸಹಿತ 90 ರನ್ ​ಗಳಿಸಿ ಔಟಾದರು. ಇದರೊಂದಿಗೆ ತಂಡವನ್ನು 300ರ ಗಡಿ ದಾಟಿಸಿದರು.

ಇಂಗ್ಲೆಂಡ್ ಮೊದಲ ಇನ್ನಿಂಗ್ಸ್​ನಲ್ಲಿ 353 ರನ್ ಗಳಿಸಿತ್ತು. ಇದಕ್ಕೆ ಪ್ರತ್ಯುತ್ತರವಾಗಿ ಭಾರತ 307 ರನ್ ಕಲೆ ಹಾಕಿತು. ಇದರೊಂದಿಗೆ 46 ರನ್​ಗಳ ಹಿನ್ನಡೆ ಅನುಭವಿಸಿತು. ಇಷ್ಟು ರನ್​ಗಳ ಮುನ್ನಡೆಯೊಂದಿಗೆ 2ನೇ ಇನ್ನಿಂಗ್ಸ್​ ಆರಂಭಿಸಿದ ಪ್ರವಾಸಿ ತಂಡ ದೊಡ್ಡ ಮೊತ್ತದ ಗುರಿ ನೀಡುವ ವಿಶ್ವಾಸ ಹೊಂದಿತ್ತು. ಆದರೆ ಅಶ್ವಿನ್, ಕುಲ್ದೀಪ್ ಯಾದವ್ ದಾಳಿಗೆ 145 ರನ್​​ಗಳಿಗೆ ಆಲೌಟ್ ಆಯಿತು

46 ರನ್​ಗಳ ಮುನ್ನಡೆ ಮತ್ತು ಎರಡನೇ ಇನ್ನಿಂಗ್ಸ್​ನಲ್ಲಿ ಗಳಿಸಿದ 145 ರನ್​ ಸೇರಿ ಒಟ್ಟು 192 ರನ್​ಗಳ ಗುರಿ ನೀಡಿತು. ಈ ಗುರಿ ಬೆನ್ನಟ್ಟಿದ ಆತಿಥೇಯರು, ಮೂರನೇ ದಿನದಾಟದ ಅಂತ್ಯಕ್ಕೆ ವಿಕೆಟ್ ನಷ್ಟವಿಲ್ಲದೆ 40 ರನ್ ಗಳಿಸಿದೆ. ಗೆಲುವಿಗೆ ಇನ್ನೂ 152 ರನ್​ ಬೇಕಿದೆ. ಸದ್ಯ ರೋಹಿತ್​ ಶರ್ಮಾ 24, ಯಶಸ್ವಿ ಜೈಸ್ವಾಲ್ 16 ರನ್ ಗಳಿಸಿ ಅಜೇಯರಾಗಿದ್ದಾರೆ.

ಇದನ್ನೂ ಓದಿ: ಹೇ ಈತನಿಗೆ ಹಿಂದಿ ಬರಲ್ಲ ಎಂದ ಸರ್ಫರಾಜ್; ಥೋಡಿ ಥೋಡಿ ಆತಿಹೈ ಎಂದು ಪ್ರತ್ಯುತ್ತರ ಕೊಟ್ಟ ಬಶೀರ್, ಮಜಾ ಇದೆ ನೋಡಿ ವಿಡಿಯೋ

ಅಶ್ವಿನ್ ಮತ್ತು ಕುಲ್ದೀಪ್ ಸ್ಪಿನ್ ಮ್ಯಾಜಿಕ್

ಎರಡನೇ ಇನ್ನಿಂಗ್ಸ್​​ನಲ್ಲಿ ಬೃಹತ್ ರನ್ ಪೇರಿಸುವ ನಿರೀಕ್ಷೆ ಮತ್ತು ಕನಸಿನಲ್ಲಿದ್ದ ಇಂಗ್ಲೆಂಡ್​ಗೆ ಆರ್​ ಅಶ್ವಿನ್ ಮತ್ತು ಕುಲ್ದೀಪ್ ಯಾದವ್ ತಣ್ಣೀರು ಹಾಕಿದರು. ಅಶ್ವಿನ್ 5 ವಿಕೆಟ್ ಪಡೆದರೆ, ಬ್ಯಾಟಿಂಗ್​ನಲ್ಲಿ 28 ರನ್​ಗಳ ಕಾಣಿಕೆ ನೀಡಿದ್ದ ಕುಲ್ದೀಪ್​ ಬೌಲಿಂಗ್​ನಲ್ಲಿ 4 ವಿಕೆಟ್ ಕಿತ್ತು ಗಮನ ಸೆಳೆದರು. ಇದರ ನಡುವೆಯೂ ಜಾಕ್​ ಕ್ರಾವ್ಲಿ 60 ರನ್ ಸಿಡಿಸಿದರು. ಆ ಮೂಲಕ ಗರಿಷ್ಠ ಸ್ಕೋರರ್ ಆಗಿದ್ದಾರೆ.

ಮೊದಲ ಮೂರು ಪಂದ್ಯಗಳ ಫಲಿತಾಂಶ

ಹೈದರಾಬಾದ್​​​ನಲ್ಲಿ ನಡೆದ ಮೊದಲ ಟೆಸ್ಟ್​ ಪಂದ್ಯದಲ್ಲಿ 28 ರನ್​ಗಳಿಂದ ಗೆಲುವು ಸಾಧಿಸಿದ್ದ ಇಂಗ್ಲೆಂಡ್, ತದ ನಂತರ ವಿಶಾಖಪಟ್ಟಣಂ ಮತ್ತು ರಾಜ್​ಕೋಟ್​ನಲ್ಲಿ ಭಾರತದ ಎದುರಿಗೆ ಶರಣಾದವು. ಕ್ರಮವಾಗಿ 106 ಮತ್ತು 434 ರನ್​ಗಳ ಅಂತರದಿಂದ ಸೋಲು ಅನುಭವಿಸಿತು. ಇದೀಗ 4ನೇ ಪಂದ್ಯದಲ್ಲೂ ಸೋಲಿನ ಅಂಚಿನಲ್ಲಿದೆ. ಈ ಟೆಸ್ಟ್​ನಲ್ಲಿ ಪರಾಭವಗೊಂಡರೆ ಒಂದು ಪಂದ್ಯ ಬಾಕಿ ಇರುವಂತೆಯೇ ಸರಣಿಯನ್ನು ಇಂಗ್ಲೆಂಡ್ ಕೈಚೆಲ್ಲಲಿದೆ.

ಇದನ್ನೂ ಓದಿ: ನವಜೋತ್​ ಸಿಂಗ್​ರಂತೆ ರಾಜಕೀಯದಲ್ಲೂ ಸಿಕ್ಸರ್​ ಕಿಂಗ್ ಆಗಲು ಹೊರಟ ಯುವರಾಜ್​ ಸಿಂಗ್; ಈ ಪಕ್ಷದಿಂದ ಕಣಕ್ಕೆ, ಕ್ಷೇತ್ರವೂ ಫಿಕ್ಸ್?