ಟಿ20ಐ ಬೆನ್ನಲ್ಲೇ ಏಕದಿನ, ಟೆಸ್ಟ್ ಕ್ರಿಕೆಟ್ ನಿವೃತ್ತಿ ಕುರಿತು ತುಟಿ ಬಿಚ್ಚಿದ ರೋಹಿತ್​ ಶರ್ಮಾ

11 ವರ್ಷಗಳ ಬಳಿಕ ಐಸಿಸಿ ಟ್ರೋಫಿ ಬರ ನೀಗಿಸಿದ ಭಾರತ ತಂಡ, 2025ರಲ್ಲಿ ನಡೆಯುವ ಚಾಂಪಿಯನ್ಸ್ ಟ್ರೋಫಿ ಮೇಲೆ ಕಣ್ಣಿಟ್ಟಿದೆ. ಅಮೆರಿಕ ಮತ್ತು ವೆಸ್ಟ್ ಇಂಡೀಸ್​ನಲ್ಲಿ ನಡೆದ ಟಿ20 ವಿಶ್ವಕಪ್​​​ನಲ್ಲಿ ರೋಹಿತ್​ ಶರ್ಮಾ (Rohit Sharma) ನಾಯಕತ್ವದಲ್ಲಿ ಭಾರತ ತಂಡ ಚಾಂಪಿಯನ್ ಆಯಿತು. ಕಪಿಲ್ ದೇವ್ (Kapil Dev) ಮತ್ತು ಎಂಎಸ್ ಧೋನಿ (MS Dhoni) ನಂತರ ವಿಶ್ವಕಪ್ ಟ್ರೋಫಿ ಎತ್ತಿ ಹಿಡಿದ ಭಾರತದ ಮೂರನೇ ನಾಯಕರಾದ ರೋಹಿತ್​, ಫೈನಲ್ ಪಂದ್ಯದ ಬಳಿಕ ಟಿ20ಐ ವೃತ್ತಿಜೀವನ ಕೊನೆಗೊಳಿಸಿದರು. ಏಕದಿನ, ಟೆಸ್ಟ್ ​ಭವಿಷ್ಯದ ಕುರಿತು ಪ್ರಶ್ನೆಗಳು ಎದ್ದಿವೆ.

ಚಾಂಪಿಯನ್ಸ್ ಟ್ರೋಫಿ ಬಳಿಕ ರೋಹಿತ್​​ ಏಕದಿನ, ಟೆಸ್ಟ್ ವೃತ್ತಿಜೀವನ ಕೊನೆಗೊಳ್ಳುವ ಸಾಧ್ಯತೆ ಇದೆ ಎಂದು ಊಹಾಪೋಹಗಳು ಹರಡಿವೆ. ರೋಹಿತ್ ತನ್ನ ಭವಿಷ್ಯದ ಬಗ್ಗೆ ದೊಡ್ಡ ಸುಳಿವು ನೀಡಿದ್ದಾರೆ. ಟೆಕ್ಸಾಸ್​​ನ ಡಲ್ಲಾಸ್‌ನಲ್ಲಿ ನಡೆದ ಕಾರ್ಯಕ್ರಮವೊಂದರಲ್ಲಿ ಹಿಟ್​ಮ್ಯಾನ್​​​ರನ್ನು 2027ರ ಏಕದಿನ ವಿಶ್ವಕಪ್ ಆಡುತ್ತೀರಾ ಎಂದು ಕೇಳಲಾಯಿತು. ಸ್ವಲ್ಪ ಸಮಯದವರೆಗೆ ಟೆಸ್ಟ್ ಮತ್ತು ಏಕದಿನ ಕ್ರಿಕೆಟ್‌ನಲ್ಲಿ ಆಡುವುದನ್ನು ಮುಂದುವರಿಸುವ ಇಂಗಿತವನ್ನು ಭಾರತ ತಂಡದ ನಾಯಕ ರೋಹಿತ್ ಶರ್ಮಾ ವ್ಯಕ್ತಪಡಿಸಿದ್ದಾರೆ.

ಬಾರ್ಬಡೋಸ್‌ನಲ್ಲಿ ಫೈನಲ್​​ನಲ್ಲಿ ದಕ್ಷಿಣ ಆಫ್ರಿಕಾ ತಂಡವನ್ನು ಸೋಲಿಸುವ ಮೂಲಕ ಭಾರತ ತಂಡ ಟಿ20ಐ ವಿಶ್ವಕಪ್ ಪ್ರಶಸ್ತಿ ಗೆದ್ದುಕೊಂಡಿತು. ಫೈನಲ್ ನಂತರ ರೋಹಿತ್ ಜೊತೆಗೆ ಹಿರಿಯ ಸ್ಟಾರ್ ಕ್ರಿಕೆಟಿಗರಾದ ವಿರಾಟ್ ಕೊಹ್ಲಿ, ರವೀಂದ್ರ ಜಡೇಜಾ ಅವರು ಕೂಡ ಟಿ20ಐ ಕ್ರಿಕೆಟ್​​ಗೆ ನಿವೃತ್ತ ಘೋಷಿಸಿದರು. ರೋಹಿತ್ 159 ಪಂದ್ಯಗಳಲ್ಲಿ 5 ಶತಕ, 32 ಅರ್ಧಶತಕಗಳೊಂದಿಗೆ 4,231 ರನ್‌ ಸಿಡಿಸಿದ್ದಾರೆ. ಸ್ವಲ್ಪ ದಿನಗಳ ಕಾಲ ಏಕದಿನ, ಟೆಸ್ಟ್​​ನಲ್ಲಿ ಆಟವನ್ನು ಮುಂದುವರಿಸಬೇಕು ಎಂದು ಹೇಳಿರುವ ರೋಹಿತ್​, ಎರಡು ಸ್ವರೂಪಗಳಲ್ಲಿ ಸದ್ಯದಲ್ಲೇ ನಿವೃತ್ತಿಯಾಗುತ್ತಿಲ್ಲ ಎಂಬ ಸುಳಿವು ನೀಡಿದ್ದಾರೆ. ಇದರ ವಿಡಿಯೋ ವೈರಲ್ ಆಗುತ್ತಿದೆ.

ಫೈನಲ್​​ ನಂತರ ರೋಹಿತ್ ಹೇಳಿದ್ದೇನು?

ಇದು ನನ್ನ ಕೊನೆಯ (ಟಿ20ಐ) ಪಂದ್ಯ ಆಗಿದೆ. ಈ ಸ್ವರೂಪಕ್ಕೆ ವಿದಾಯ ಹೇಳಲು ಇದಕ್ಕಿಂತ ಉತ್ತಮ ಸಮಯ ಇಲ್ಲ. ನಾನು ಈ ಪ್ರತಿಯೊಂದು ಕ್ಷಣವನ್ನು ಪ್ರೀತಿಸುತ್ತೇನೆ. ಟಿ20ಐ ಕ್ರಿಕೆಟ್​ ಮೂಲಕ ನಾನು ಟೀಮ್ ಇಂಡಿಯಾಗೆ ಪದಾರ್ಪಣೆ ಮಾಡಿದ್ದೆ. ನಾನು ಕಪ್ ಗೆಲ್ಲಲು ಬಯಸಿದ್ದೆ. ಅದರಂತೆ ಟ್ರೋಫಿ ಗೆದ್ದಿದ್ದೇನೆ. ಇದನ್ನು ಪದಗಳಲ್ಲಿ ಹೇಳಲು ತುಂಬಾ ಕಷ್ಟ. ಇದು ನನಗೆ ತುಂಬಾ ಭಾವನಾತ್ಮಕ ಕ್ಷಣ. ನನ್ನ ಜೀವನದಲ್ಲಿ ಈ ಟ್ರೋಫಿಗಾಗಿ ನಾನು ತುಂಬಾ ಹತಾಶನಾಗಿದ್ದೆ. ನಾವು ಅಂತಿಮವಾಗಿ ಗೆರೆಯನ್ನು ದಾಟಿದ್ದಕ್ಕೆ ಸಂತೋಷವಾಗಿದೆ ಎಂದು ರೋಹಿತ್ ಫೈನಲ್ ನಂತರ ಸುದ್ದಿಗಾರರಿಗೆ ತಿಳಿಸಿದ್ದರು.

37 ವರ್ಷದ ರೋಹಿತ್​​ ಪ್ರಸ್ತುತ ವಿಶ್ರಾಂತಿಯಲ್ಲಿದ್ದಾರೆ. ಈ ತಿಂಗಳ ಕೊನೆಯಲ್ಲಿ ಶ್ರೀಲಂಕಾಕ್ಕೆ ಭಾರತದ ಮುಂಬರುವ ಸೀಮಿತ ಓವರ್‌ಗಳ ಪ್ರವಾಸವನ್ನು ಕಳೆದುಕೊಳ್ಳಲಿದ್ದಾರೆ ಎಂದು ವರದಿಯಾಗಿದೆ. ಮತ್ತೊಂದು ವರದಿಯಲ್ಲಿ ರೋಹಿತ್​ ಆಡಬೇಕೆಂದು ನೂತನ ಕೋಚ್​ ಗಂಭೀರ್ ಒತ್ತಾಯಿಸಿದ್ದಾರೆ. ಭವಿಷ್ಯದ ಕುರಿತು ಯೋಚಿಸುವುದಿಲ್ಲ. ಆದರೆ ಸ್ವಲ್ಪ ಸಮಯದವರೆಗೂ ತಂಡದಲ್ಲಿ ಕಾಣಿಸಿಕೊಳ್ಳಲಿದ್ದೇನೆ. ನೀವು ಕೂಡ ನೋಡಲಿದ್ದೀರಿ ಎಂದು ರೋಹಿತ್ ಭಾನುವಾರ ಯುಎಸ್‌ನಲ್ಲಿ ನಡೆದ ಪ್ರಚಾರ ಕಾರ್ಯಕ್ರಮವೊಂದರಲ್ಲಿ ಹೇಳಿದ್ದಾರೆ.

ಟೆಸ್ಟ್​, ಏಕದಿನದಲ್ಲಿ ರೋಹಿತ್​ ಭರ್ಜರಿ ಪ್ರದರ್ಶನ

ರೋಹಿತ್ ಆರಂಭಿಕನಾಗಿ ಹಾಗೂ ನಾಯಕನಾಗಿ ಏಕದಿನ, ಟೆಸ್ಟ್​ ಸ್ವರೂಪಗಳಲ್ಲಿ ಭಾರತ ತಂಡದ ಯೋಜನೆಗಳ ಅವಿಭಾಜ್ಯ ಅಂಗವಾಗಿ ಮುಂದುವರಿಯುತ್ತಾರೆ. ಕಳೆದ ವರ್ಷ ತವರಿನಲ್ಲಿ ನಡೆದ 2023ರ ಏಕದಿನ ವಿಶ್ವಕಪ್‌ನಲ್ಲಿ ಸ್ಫೋಟಕ ಬ್ಯಾಟಿಂಗ್ ನಡೆಸಿದ್ದ ರೋಹಿತ್​, 120-ಪ್ಲಸ್ ಸ್ಟ್ರೈಕ್ ರೇಟ್‌ನಲ್ಲಿ 597 ರನ್‌ ಸಿಡಿಸಿದ್ದರು. 2019 ರಿಂದ ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್​​​ನಲ್ಲಿ ಭಾರತದ ಅತ್ಯಂತ ಯಶಸ್ವಿ ಬ್ಯಾಟರ್ ಆಗಿದ್ದು, 35 ಪಂದ್ಯಗಳಲ್ಲಿ 2552 ರನ್ ಗಳಿಸಿದ್ದಾರೆ. 2023-25ರ ಆವೃತ್ತಿಯಲ್ಲಿ 7 ಪಂದ್ಯಗಳಲ್ಲಿ ರೋಹಿತ್ 3 ಶತಕ, 1 ಅರ್ಧಶತಕ ಸಹಿತ 700 ರನ್ ಬಾರಿಸಿದ್ದಾರೆ.