ರೋಹಿತ್ ಬೇಡ, ಕೊಹ್ಲಿ ಬೇಕು; ಇಂಗ್ಲೆಂಡ್ ವಿರುದ್ಧ ಸೋಲಿನ ಬಳಿಕ ಎದ್ದಿದೆ ಭಾರತ ಟೆಸ್ಟ್ ನಾಯಕತ್ವದ ಚರ್ಚೆ

ಇಂಗ್ಲೆಂಡ್ ವಿರುದ್ಧ ಮೊದಲ ಟೆಸ್ಟ್​ ಪಂದ್ಯದ ಸೋಲಿನ ನಂತರ ಭಾರತ ತಂಡದಲ್ಲಿ ನಾಯಕತ್ವದ ಚರ್ಚೆ ಆರಂಭಗೊಂಡಿದೆ. ನಮಗೆ ರೋಹಿತ್ ಶರ್ಮಾ (Rohit Sharma) ಬೇಡ, ವಿರಾಟ್ ಕೊಹ್ಲಿ (Virat Kohli) ಬೇಕು ಎಂದು ಸಾಮಾಜಿಕ ಜಾಲತಾಣಗಳಲ್ಲಿ ಮಾಜಿ ಕ್ರಿಕೆಟಿಗರು, ಅಭಿಮಾನಿಗಳು ಪರ ವಿರೋಧದ ಡಿಬೇಟ್​ಗಳು ಆರಂಭಗೊಂಡಿವೆ.

ಇದನ್ನೂ ಓದಿ: ಶುಭ್ಮನ್ ಗಿಲ್ ಔಟ್, ರಜತ್ ಪಾಟೀದಾರ್ ಇನ್; ಇಂಗ್ಲೆಂಡ್ ವಿರುದ್ಧ ಎರಡನೇ ಟೆಸ್ಟ್​ಗೆ ಭಾರತದ ಸಂಭಾವ್ಯ XI

ತವರಿನಲ್ಲಿ ರೋಹಿತ್ ಶರ್ಮಾ ಅವರ ಕಳಪೆ ನಾಯಕತ್ವಕ್ಕೆ ದೊಡ್ಡ ಮಟ್ಟದಲ್ಲಿ ಟೀಕೆ ವ್ಯಕ್ತವಾಗುತ್ತಿದೆ. ಏಕದಿನ ಕ್ರಿಕೆಟ್​ ಮತ್ತು ಟಿ20 ಕ್ರಿಕೆಟ್​ನಲ್ಲಿ ಭಾರತ ತಂಡವನ್ನು ಅತ್ಯುತ್ತಮವಾಗಿ ಮುನ್ನಡೆಸಿದ ದಾಖಲೆ ಹೊಂದಿದ್ದಾರೆ. ಆದರೆ ಟೆಸ್ಟ್ ಕ್ರಿಕೆಟ್​ ಅಷ್ಟು ಧಮ್ ಇಲ್ಲ. ಕಾರ್ಯತಂತ್ರಗಳು ಹೇಳಿಕೊಳ್ಳುವಂತಿಲ್ಲ ಎಂಬುದು ಹಲವರ ವಾದ

ಇದೇ ವೇಳೆ ವಿರಾಟ್ ಕೊಹ್ಲಿ ಅವರನ್ನು ಟೆಸ್ಟ್​ ತಂಡಕ್ಕೆ ಮತ್ತೆ ನಾಯಕನನ್ನಾಗಿ ನೇಮಿಸಬೇಕು ಎಂಬ ಒತ್ತಾಯಗಳು ಕೇಳಿ ಬರುತ್ತಿವೆ. ಕೊಹ್ಲಿ ಕ್ಯಾಪ್ಟನ್ಸಿಯಲ್ಲಿ ಎದುರಾಳಿ ತಂಡಗಳು ಮೈದಾನಕ್ಕಿಳಿಯಲು ಕೂಡ ಭಯಪಡುತ್ತವೆ. ದೇಶ-ವಿದೇಶಗಳಲ್ಲಿ ಭಾರತ ತಂಡವನ್ನು ಎಲೆ ಎತ್ತಿ ಓಡಾಡುವಂತೆ ಮಾಡಿದ ಗತ್ತು ಅವರೇ ಎಂಬುದು ಮತ್ತೊಂದು ವರ್ಗದ ವಾದ.

ಟೆಸ್ಟ್ ಕ್ರಿಕೆಟ್​​ನಲ್ಲಿ ರೋಹಿತ್​ ನಾಯಕತ್ವದಲ್ಲಿ ತವರಿನಲ್ಲಿ ಭಾರತ ಸೋತಿರುವ ದಾಖಲೆಗೂ, ಹಾಗೆಯೇ ವಿರಾಟ್ ಕೊಹ್ಲಿ ಕ್ಯಾಪ್ಟನ್ಸಿಯಲ್ಲಿ ಭಾರತ ಸೋತಿರುವ ದಾಖಲೆಗೂ ಹೋಲಿಕೆ ಮಾಡಲಾಗುತ್ತಿದೆ. ಈ ಇಬ್ಬರ ಅಂಕಿ-ಅಂಶಗಳ ಸಮೇತ ಯಾರು ಬೆಸ್ಟ್ ಕ್ಯಾಪ್ಟನ್ ಎಂಬ ಚರ್ಚೆಗಳಲ್ಲಿ ಅಭಿಮಾನಿಗಳು ತೊಡಗಿದ್ದಾರೆ.

ಕೊನೆಯ ಮೂರು ಪಂದ್ಯಗಳಲ್ಲಿ ರೋಹಿತ್ ದಾಖಲೆ

ರೋಹಿತ್​ ತವರಿನಲ್ಲಿ ನಾಯಕತ್ವ ವಹಿಸಿದ ಕೊನೆಯ 3 ಟೆಸ್ಟ್​ಗಳಲ್ಲಿ ಭಾರತ ಎರಡಲ್ಲಿ ಸೋತಿದೆ. ಭಾರತದಲ್ಲಿ 1 ವರ್ಷದ ಅವಧಿಗೂ ಮುನ್ನವೇ ರೋಹಿತ್​ ನಾಯಕತ್ವದಲ್ಲಿ 2 ಪಂದ್ಯಗಳಲ್ಲಿ ಸೋತಿದ್ದಾರೆ. ಕಳೆದ ವರ್ಷ ಬಾರ್ಡರ್ ಗವಾಸ್ಕರ್ ಟ್ರೋಫಿ 3ನೇ ಪಂದ್ಯ ಸೋಲು, 4ನೇ ಪಂದ್ಯ ಡ್ರಾ ಸಾಧಿಸಿದ್ದ ಭಾರತ, ಈಗ ಇಂಗ್ಲೆಂಡ್ ಎದುರು ಸೋತಿದೆ.

8 ವರ್ಷಗಳಲ್ಲಿ ಸೋತಿದ್ದೇ ಎರಡು

ವಿರಾಟ್ ಕೊಹ್ಲಿ 2013ರಿಂದ 2021ರವರೆಗೆ ಟೆಸ್ಟ್​ ನಾಯಕತ್ವ ವಹಿಸಿದ್ದರು. ಆದರೆ 8 ವರ್ಷಗಳ ಅವಧಿಯಲ್ಲಿ ಭಾರತದ ನೆಲದಲ್ಲಿ ಅವರ ಕ್ಯಾಪ್ಟನ್ಸಿಯಲ್ಲಿ ಟೀಮ್ ಇಂಡಿಯಾ ಸೋತಿದ್ದು ಎರಡೇ ಪಂದ್ಯ. ಅಷ್ಟರ ಮಟ್ಟಿಗೆ ಪರಾಕ್ರಮ ಮೆರೆದಿದ್ದರು. ಅಲ್ಲದೆ, ಪ್ರವಾಸಿ ತಂಡಗಳ ಎದುರು ಹಿಡಿತ ಸಾಧಿಸಿದ್ದರು.

ತವರಿನಲ್ಲಿ ಇಬ್ಬರ ದಾಖಲೆ ಹೇಗಿದೆ?

ರೋಹಿತ್​ ಶರ್ಮಾ ತವರಿನಲ್ಲಿ 7 ಪಂದ್ಯಗಳಲ್ಲಿ ನಾಯಕತ್ವ ವಹಿಸಿದ್ದು, 4 ಪಂದ್ಯಗಳಲ್ಲಿ ಭಾರತ ಗೆಲುವು ಸಾಧಿಸಿದೆ. 1 ಡ್ರಾ, 2 ಸೋಲು ಕಂಡಿದೆ. ಗೆಲುವಿನ ಶೇ 50+ ರಷ್ಟು ಹೊಂದಿದ್ದಾರೆ. ಆದರೆ ತವರಿನಲ್ಲಿ ಕೊಹ್ಲಿ, 31 ಪಂದ್ಯಗಳನ್ನು ಮುನ್ನಡೆಸಿ 24 ಗೆಲುವು, 5 ಡ್ರಾ, 2 ಸೋಲು ಮಾತ್ರ ಕಂಡಿದ್ದು, 77.41ರಷ್ಟು ಗೆಲುವಿನ ಶೇಕಡವಾರು ಕಂಡಿದ್ದಾರೆ.

ಒಟ್ಟಾರೆ ನಾಯಕತ್ವದಲ್ಲಿ ಇಬ್ಬರ ಅಂಕಿ-ಅಂಶ

• ವಿರಾಟ್ ಕೊಹ್ಲಿ ಒಟ್ಟಾರೆ 68 ಟೆಸ್ಟ್​ ಪಂದ್ಯಗಳನ್ನು ಮುನ್ನಡೆಸಿದ್ದು, 40 ಗೆಲುವು ಸಾಧಿಸಿದ್ದು, ಕೇವಲ 17 ಸೋಲು, 11 ಡ್ರಾ ಸಾಧಿಸಿದ್ದಾರೆ.
• ರೋಹಿತ್​ ಒಟ್ಟು 12 ಟೆಸ್ಟ್​ ಪಂದ್ಯಗಳಲ್ಲಿ ಭಾರತ ತಂಡವನ್ನು ಮುನ್ನಡೆಸಿದ್ದಾರೆ. ಗೆಲುವು 6, ಸೋಲು 4, ಡ್ರಾ 2 ಪಂದ್ಯಗಳಲ್ಲಿ ಸಾಧಿಸಿದ್ದಾರೆ. ಗೆಲುವಿನ ಶೇಕಡವಾರು 50ರಷ್ಟು.
• ಎಂಎಸ್ ಧೋನಿ 60 ಟೆಸ್ಟ್​ ಪಂದ್ಯಗಳಲ್ಲಿ ಮುನ್ನಡೆಸಿದ್ದು, 27 ಗೆಲುವು, 18 ಸೋಲು, 15 ಡ್ರಾ ಸಾಧಿಸಿದ್ದಾರೆ. ಗೆಲುವಿನ ಶೇಕಡವಾರು 45ರಷ್ಟು.