ಶಿವಂ ದುಬೆಗೆ ರೋಹಿತ್ ಶರ್ಮಾ ಬೌಲಿಂಗ್ ಪಾಠ; ನೆಟ್ಸ್ನಲ್ಲಿ ರಿಂಕು ಸಿಂಗ್ ಭರ್ಜರಿ ಪ್ರಾಕ್ಟೀಸ್, VIDEO
T20 World Cup 2024: ಟಿ20 ವಿಶ್ವಕಪ್ನಲ್ಲಿ ಬಾಂಗ್ಲಾದೇಶ ವಿರುದ್ಧದ ಅಭ್ಯಾಸ ಪಂದ್ಯಕ್ಕೂ ಮುನ್ನ ನಾಯಕ ರೋಹಿತ್ ಶರ್ಮಾ ಅವರು ಶಿವಂ ದುಬೆ ಅವರಿಗೆ ಬೌಲಿಂಗ್ ಪಾಠ ಮಾಡಿದ್ದಾರೆ. ಮತ್ತೊಂದೆಡೆ ರಿಂಕು ಸಿಂಗ್ಗೆ ಭರ್ಜರಿ ಪ್ರಾಕ್ಟೀಸ್ ಮಾಡಿದ್ದಾರೆ.
Rohit Sharma: 2024ರ ಟಿ20 ವಿಶ್ವಕಪ್ ಟೂರ್ನಿಯಲ್ಲಿ ಆರಂಭಿಕ ಪಂದ್ಯಕ್ಕೂ ಮುನ್ನ ಭಾರತ ತಂಡವು ಜೂನ್ 1ರ ಶನಿವಾರ ನ್ಯೂಯಾರ್ಕ್ನ ನಸ್ಸೌ ಕೌಂಟಿ ಅಂತಾರಾಷ್ಟ್ರೀಯ ಕ್ರಿಕೆಟ್ ಕ್ರೀಡಾಂಗಣದಲ್ಲಿ ಬಾಂಗ್ಲಾದೇಶ ತಂಡವನ್ನು ಎದುರಿಸಲಿದೆ. ಪಂದ್ಯಕ್ಕೆ ಮುಂಚಿತವಾಗಿ, ಟೀಮ್ ಇಂಡಿಯಾ ತನ್ನ ಅಂತಿಮ ಅಭ್ಯಾಸ ಅವಧಿಯಲ್ಲಿ ಕಣಕ್ಕಿಳಿಯಲಿದ್ದು, ಮಾಜಿ ನಾಯಕ ವಿರಾಟ್ ಕೊಹ್ಲಿ ಇನ್ನೂ ಗೈರು ಹಾಜರಾಗಲಿದ್ದಾರೆ. ಆದರೆ ಪ್ರಾಕ್ಟೀಸ್ ಮ್ಯಾಚ್ಗೂ ಮುನ್ನ ನಾಯಕ ರೋಹಿತ್ ಶರ್ಮಾ ಶಿವಂ ದುಬೆಗೆ ಬೌಲಿಂಗ್ ತರಬೇತಿ ನೀಡಿದ್ದಾರೆ.
ಗುರುವಾರದಂತೆಯೇ (ಮೇ 30) ಭಾರತ ತಂಡ ಶುಕ್ರವಾರ (ಮೇ 31) ಬೆಳಿಗ್ಗೆಯೂ 3 ಗಂಟೆಗಳ ಸುದೀರ್ಘ ಅಭ್ಯಾಸ ನಡೆಸಿತು. 35ರ ಹರೆಯದ ಕೊಹ್ಲಿ, ನ್ಯೂಯಾರ್ಕ್ನಲ್ಲಿ ಭಾರತ ತಂಡವನ್ನು ಸೇರಿಕೊಂಡಿದ್ದಾರೆ. ಐಪಿಎಲ್-2024 ಅಭಿಯಾನದ ಅಂತ್ಯದ ನಂತರ ಕೊಹ್ಲಿ ತಮ್ಮ ವಿರಾಮದ ಅವಧಿಯನ್ನು ವಿಸ್ತರಿಸಿದ್ದರು. ಹಾಗಾಗಿ ವಿಶ್ವಕಪ್ಗೆ ತೆರಳಿದ ಮೊದಲ ಬ್ಯಾಚ್ ಆಟಗಾರರ ಭಾಗವಾಗಿರಲಿಲ್ಲ. ಫೀಲ್ಡಿಂಗ್ ಕೋಚ್ ಟಿ ದಿಲೀಪ್ ಅವರ ಕಣ್ಗಾವಲಿನಲ್ಲಿ ಭಾರತ ಫೀಲ್ಡಿಂಗ್ ತರಬೇತಿ ಪಡೆದುಕೊಂಡಿತು.
ನಂತರ ಆಟಗಾರರು ನೆಟ್ಸ್ನಲ್ಲಿ ಬ್ಯಾಟಿಂಗ್ ಪ್ರಾಕ್ಟೀಸ್ ನಡೆಸಿದರು. ಸೂರ್ಯಕುಮಾರ್ ಯಾದವ್ ಅವರು ಥ್ರೋಡೌನ್ಗಳನ್ನು ಎದುರಿಸಲು ಸಾಕಷ್ಟು ಸಮಯ ಕಳೆದರು. ಮತ್ತೊಂದೆಡೆ ಖಲೀಲ್ ಅಹ್ಮದ್, ದುಬೆ, ಕುಲ್ದೀಪ್ ಯಾದವ್, ಅವೇಶ್ ಖಾನ್ ಮತ್ತು ರವೀಂದ್ರ ಜಡೇಜಾ ಅವರಂತಹ ಬೌಲರ್ಗಳ ವಿರುದ್ಧ ಅಭ್ಯಾಸ ನಡೆಸಿದ ರೋಹಿತ್, ಸ್ಪಿನ್ನರ್ಗಳ ವಿರುದ್ಧ ರಿವರ್ಸ್ ಸ್ವೀಪ್ ಅಭ್ಯಾಸ ಮಾಡಿ ಗಮನ ಸೆಳೆದರು. ಇದೇ ವೇಳೆ ದುಬೆ ಅವರಿಗೆ ಬೌಲಿಂಗ್ ತರಬೇತಿಯನ್ನೂ ನೀಡಿದರು.
ಶಿವಂ ದುಬೆಗೆ ರೋಹಿತ್ ಶರ್ಮಾ ಬೌಲಿಂಗ್ ಪಾಠ
ನ್ಯೂಯಾರ್ಕ್ನಲ್ಲಿರುವ ಈ ಪಿಚ್ ಡ್ರಾಪ್-ಇನ್ ಪಿಚ್ ಆಗಿರುವ ಕಾರಣ ಹೇಗೆ ಬೌಲಿಂಗ್ ಮಾಡಬೇಕು, ಸ್ವಿಂಗ್, ಬೌನ್ಸ್ ಎಸೆಯಬೇಕು ಎಂಬುದರ ಕುರಿತು ದುಬೆ ಅವರೊಂದಿಗೆ ರೋಹಿತ್ ಶರ್ಮಾ ಸುದೀರ್ಘ ಚಾಟ್ ಮಾಡುತ್ತಿರುವುದು ಕಂಡುಬಂತು. ಸ್ಟಾರ್ ಸ್ಪೋರ್ಟ್ಸ್ ಬಿಡುಗಡೆ ಮಾಡಿದ ವಿಡಿಯೋದ ಪ್ರಕಾರ, ರೋಹಿತ್ ದುಬೆಗೆ ಲೆಂಗ್ತ್ ಮತ್ತು ಬ್ಯಾಟರ್ಗಳು ಪ್ರಯತ್ನಿಸಬಹುದಾದ ಶಾಟ್ಗಳ ಪ್ರಕಾರದ ಬಗ್ಗೆ ವಿವರಿಸಿದ್ದಾರೆ.
ಐಪಿಎಲ್ 2024ರಲ್ಲಿ ಹೆಚ್ಚು ಬೌಲಿಂಗ್ ಮಾಡದಿದ್ದರೂ ದುಬೆ ಅವರನ್ನು ಭಾರತೀಯ ತಂಡದಲ್ಲಿ ಆಲ್ರೌಂಡರ್ ಆಗಿಯೇ ಪರಿಗಣಿಸಿ ಆಯ್ಕೆ ಮಾಡಲಾಗಿದೆ. ಜನವರಿಯಲ್ಲಿ ಅಫ್ಘಾನಿಸ್ತಾನ ವಿರುದ್ಧದ ತವರು ಸರಣಿಯಲ್ಲಿ ಬೌಲಿಂಗ್ ಮಾಡಿದ ನಂತರ, ದುಬೆ ಐಪಿಎಲ್ನಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ಪರ ಕೇವಲ ಒಂದು ಓವರ್ ಮಾಡಿದ್ದರು. ಅದರಲ್ಲಿ ಒಂದು ವಿಕೆಟ್ ಕೂಡ ಕಿತ್ತಿದ್ದರು. ಆದರೆ ಮತ್ತೆ ಬೌಲಿಂಗ್ ಮಾಡಲು ಸಾಧ್ಯವಾಗಲಿಲ್ಲ.
ಮತ್ತೊಂದೆಡೆ ಯಶಸ್ವಿ ಜೈಸ್ವಾಲ್ ಸಹ ಉತ್ತಮ ತರಬೇತಿ ಪಡೆದರು. ಭಾರತದ ಆರಂಭಿಕ ತಮ್ಮ ಕವರ್ ಡ್ರೈವ್ ಮತ್ತು ಶಾಟ್ಗಳನ್ನೇ ಹೆಚ್ಚಾಗಿ ಪ್ರಾಕ್ಟೀಸ್ ಮಾಡಿದರು. ಆದರೆ, ಹಾರ್ದಿಕ್ ಪಾಂಡ್ಯ ಮತ್ತೊಮ್ಮೆ ಬ್ಯಾಟಿಂಗ್ ಕೋಚ್ ವಿಕ್ರಮ್ ರಾಥೋರ್ ಅವರೊಂದಿಗೆ ನಿಯಮಿತವಾಗಿ ಸಂಭಾಷಣೆ ನಡೆಸಿ ಸುದೀರ್ಘ ಬ್ಯಾಟಿಂಗ್ ಅಭ್ಯಾಸ ನಡೆಸಿದರು. ರಾಥೋರ್ ತನ್ನ ತಲೆಯ ಸ್ಥಾನ, ನಿಲುವು ಮತ್ತು ಫುಟ್ವರ್ಕ್ ಬಗ್ಗೆ ಹಾರ್ದಿಕ್ಗೆ ಅತ್ಯದ್ಭುತವಾಗಿ ವಿವರಿಸಿದ್ದು ಕಂಡು ಬಂತು.
ನೆಟ್ಸ್ನಲ್ಲಿ ರಿಂಕು ಸಿಂಗ್ ಭರ್ಜರಿ ಪ್ರಾಕ್ಟೀಸ್
ಕೋಲ್ಕತಾ ನೈಟ್ ರೈಡರ್ಸ್ ಬ್ಯಾಟ್ಸ್ಮನ್ ರಿಂಕು ಸಿಂಗ್ ಟಿ20 ವಿಶ್ವಕಪ್ ತಂಡದಲ್ಲಿ ಸ್ಥಾನ ಪಡೆಯದೇ ಇರಬಹುದು. ಆದರೂ ಮೀಸಲು ಸ್ಥಾನದಲ್ಲಿರುವ ರಿಂಕು ನೆಟ್ಸ್ನಲ್ಲಿ ಸತತ ಬ್ಯಾಟಿಂಗ್ ಪ್ರಾಕ್ಟೀಸ್ನಲ್ಲಿ ಮುಳುಗಿದ್ದಾರೆ. ಪತ್ರಕರ್ತ ವಿಮಲ್ ಕುಮಾರ್ ಅವರ ಪ್ರಕಾರ, ರಿಂಕು ನೆಟ್ಸ್ನಲ್ಲಿ ಅದ್ಭುತವಾಗಿ ತರಬೇತಿ ಪಡೆಯುತ್ತಿದ್ದಾರೆ. ಇದು ಹಾರ್ದಿಕ್ ಪಾಂಡ್ಯ ಗಾಯಗೊಂಡ ಕಾರಣ, ರಿಂಕು ಪ್ರಮುಖ ತಂಡದಲ್ಲಿ ಸ್ಥಾನ ಪಡೆಯಬಹುದು ಎಂಬ ವರದಿಗಳಿಗೆ ಪುಷ್ಠಿ ನೀಡುವಂತಿದೆ. ಕೊಹ್ಲಿ ಬಾಂಗ್ಲಾದೇಶ ವಿರುದ್ಧದ ಅಭ್ಯಾಸ ಪಂದ್ಯದಿಂದ ಹೊರಗುಳಿಯುವ ಸಾಧ್ಯತೆಯಿದೆ.
