ಕನ್ನಡ ಸುದ್ದಿ  /  Cricket  /  Royal Challengers Bangalore Beat Up Warriorz By 23 Runs For Third Win Of The Wpl 2024 Season Smriti Mandhana Perry Prs

ಯುಪಿ ವಾರಿಯರ್ಸ್​ಗೆ 23 ರನ್​​ಗಳ​ ಸೋಲುಣಿಸಿ 3ನೇ ಜಯ ಸಾಧಿಸಿದ ಆರ್​​ಸಿಬಿ; ಬೆಂಗಳೂರಿಗೆ ಗೆಲುವಿನ ವಿದಾಯ ಹೇಳಿದ ಮಂಧಾನ ಪಡೆ

UP Warriorz vs Royal Challengers Bangalore: ಡಬ್ಲ್ಯುಪಿಎಲ್​ನ 11ನೇ ಪಂದ್ಯದಲ್ಲಿ ಯುಪಿ ವಾರಿಯರ್ಸ್ ವಿರುದ್ಧ ರಾಯಲ್ ಚಾಲೆಂಜರ್ಸ್ ಬೆಂಗಳೂರು 23 ರನ್​ಗಳ ಭರ್ಜರಿ ಗೆಲುವು ಸಾಧಿಸಿತು.

ಯುಪಿ ವಾರಿಯರ್ಸ್​ಗೆ 23 ರನ್​​ಗಳ​ ಸೋಲುಣಿಸಿ 3ನೇ ಜಯ ಸಾಧಿಸಿದ ಆರ್​​ಸಿಬಿ
ಯುಪಿ ವಾರಿಯರ್ಸ್​ಗೆ 23 ರನ್​​ಗಳ​ ಸೋಲುಣಿಸಿ 3ನೇ ಜಯ ಸಾಧಿಸಿದ ಆರ್​​ಸಿಬಿ (PTI)

ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತನ್ನ ತವರಿನ ಎಂ ಚಿನ್ನಸ್ವಾಮಿ ಮೈದಾನದಲ್ಲಿ ಗೆಲುವಿನೊಂದಿಗೆ ಬೆಂಗಳೂರು ಲೆಗ್​ ಪಂದ್ಯಗಳಿಗೆ ಗುಡ್​ಬೈ ಹೇಳಿದೆ. ಡಬ್ಲ್ಯುಪಿಎಲ್​ನ 11ನೇ ಪಂದ್ಯದಲ್ಲಿ ಯುಪಿ ವಾರಿಯರ್ಸ್ ವಿರುದ್ಧ ಆರ್​ಸಿಬಿ 23 ರನ್​​ ಗೆಲುವು ಸಾಧಿಸಿದೆ. ಇದು ಟೂರ್ನಿಯಲ್ಲಿ ಸ್ಮೃತಿ ಮಂಧಾನ ಪಡೆ ದಕ್ಕಿದ ಮೂರನೇ ಜಯವಾಗಿದೆ. ಸತತ ಎರಡು ಸೋಲುಗಳ ಬಳಿಕ ಗೆಲುವಿನ ಹಳಿಗೆ ಮರಳಿದ್ದು, ಪ್ಲೇ ಆಫ್​ಗೇರುವ ಕನಸನ್ನು ನನಸಾಗಿಕೊಳ್ತಿದೆ.

ಮೊದಲು ಬ್ಯಾಟಿಂಗ್​ ನಡೆಸಿದ ರೆಡ್​ ಆರ್ಮಿ, ಭರ್ಜರಿ ಆರಂಭ ಪಡೆಯಿತು. ಸಬ್ಬಿನೇನಿ ಮೇಘನಾ ಮತ್ತು ಸ್ಮೃತಿ ಮಂಧಾನ ಬಿರುಸಿನ ಆರಂಭವನ್ನು ಒದಗಿಸಿದರು. ಪರಿಣಾಮ ಮೊದಲ ವಿಕೆಟ್​​​ಗೆ 51 ರನ್​ಗಳು ಹರಿದು ಬಂದವು. ಆದರೆ ಮೇಘನಾ 21 ಎಸೆತಗಳಲ್ಲಿ 5 ಬೌಂಡರಿ ಸಹಿತ 28 ರನ್ ಚಚ್ಚಿ ಅಂಜಲಿ ಸರ್ವಾನಿ ಬೌಲಿಂಗ್​​ನಲ್ಲಿ ಔಟಾದರು. ಆ ಬಳಿಕ ಜೊತೆಯಾದ ಸ್ಮೃತಿ ಮಂಧಾನ ಮತ್ತು ಎಲಿಸ್ ಪೆರ್ರಿ ಆರ್​​ಸಿಬಿ ದೊಡ್ಡ ಮೊತ್ತ ಕಲೆ ಹಾಕಲು ಸಹಾಯ ಮಾಡಿದರು. ಇಬ್ಬರು ಸಹ ಅರ್ಧಶತಕ ಸಿಡಿಸಿದರು.

ಆರಂಭದಿಂದಲೂ ಸ್ಪೋಟಕ ಆಟವಾಡುತ್ತಿದ್ದ ಮಂಧಾನ, ಯುಪಿ ವಾರಿಯರ್ಸ್ ಬೌಲರ್​​ಗಳ ಮೇಲೆ ಸವಾರಿ ಮಾಡಿದರು. ಅಲ್ಲದೆ, ಪೆರ್ರಿ ತಾನೆದುರಿಸಿದ ಮೊದಲ ಎಸೆತದಲ್ಲೇ ಬೌಂಡರಿ ಸಿಡಿಸಿ ಆಕ್ರಮಣಕಾರಿ ಆಟಕ್ಕೆ ಒತ್ತು ನೀಡಿದರು. ಈ ಜೋಡಿ ಎರಡನೇ ವಿಕೆಟ್​ಗೆ 95 ರನ್​ಗಳು ಹರಿದು ಬಂದವು. ಇದೇ ವೇಳೆ ಸ್ಮೃತಿ ತನ್ನ ಎರಡನೇ ಅರ್ಧಶತಕವನ್ನು ಪೂರೈಸಿ ಶತಕದತ್ತ ಹೆಜ್ಜೆ ಹಾಕಿದರು. ಹಾಫ್ ಸೆಂಚುರಿ ನಂತರವೂ ಬೌಂಡರಿ-ಸಿಕ್ಸರ್​​​ಗಳ ಬೆಂಡೆತ್ತಿದ ಮಂಧಾನ 50 ಎಸೆತಗಳಲ್ಲಿ 10 ಬೌಂಡರಿ, 3 ಸಿಕ್ಸರ್ ಸಹಿತ 80 ರನ್ ಗಳಿಸಿ ದೀಪ್ತಿ ಶರ್ಮಾ ಬೌಲಿಂಗ್​ನಲ್ಲಿ ಔಟಾದರು.

ಮತ್ತೊಂದೆಡೆ ಸ್ಮೃತಿ ಔಟಾದ ಬೆನ್ನಲ್ಲೇ ಬೌಲರ್​​ಗಳ ಮೇಲೆ ಚಾರ್ಜ್ ಮಾಡಲು ಶುರುವಿಟ್ಟ ಪೆರ್ರಿ ಕೊನೆಯಲ್ಲಿ ಸಿಕ್ಸರ್​​ಗಳ ಮಳೆ ಸುರಿಸಿದರು. 37 ಎಸೆತಗಳಲ್ಲಿ 4 ಬೌಂಡರಿ, 4 ಸಿಕ್ಸರ್​​ಗಳ ಸಹಿತ ಭರ್ಜರಿ 58 ರನ್ ಚಚ್ಚಿದರು. ಕೊನೆಯಲ್ಲಿ 10 ಎಸೆತಗಳಲ್ಲಿ 1 ಸಿಕ್ಸರ್​, 2 ಬೌಂಡರಿ ಸಹಿತ ಅಜೇಯ 21 ರನ್ ಬಾರಿಸಿದರು. ಅಂತಿಮವಾಗಿ ಆರ್​ಸಿಬಿ 20 ಓವರ್​​ಗಳಲ್ಲಿ 3 ವಿಕೆಟ್ ನಷ್ಟಕ್ಕೆ 198 ರನ್​ಗಳ ಬೃಹತ್ ಮೊತ್ತ ಪೇರಿಸಿತು. ಆದರೆ, ಈ ಗುರಿ ಬೆನ್ನಟ್ಟಿದ ಯುಪಿ ವಾರಿಯರ್ಸ್ 20 ಓವರ್​ಗಳಲ್ಲಿ 8 ವಿಕೆಟ್ ನಷ್ಟಕ್ಕೆ 178 ರನ್​​ಗಳಿಸಿ 23 ರನ್​ಗಳ ಸೋಲನುಭವಿಸಿತು.

ಅಲಿಸಾ ಹೀಲಿ ಹೋರಾಟ ವ್ಯರ್ಥ

ಬೃಹತ್ ಗುರಿ ಬೆನ್ನಟ್ಟಿದ ಯುಪಿ ಭರ್ಜರಿ ಆರಂಭವನ್ನೇ ಪಡೆಯಿತು. ಮೊದಲ ವಿಕೆಟ್​​ಗೆ 4.2 ಓವರ್​​ಗಳಲ್ಲಿ 47 ರನ್ ಕಲೆ ಹಾಕಿತು. ಆದರೆ, ಕಿರಣ್ ನವ್​ಗಿರೆ 18 ರನ್ ಗಳಿಸಿ ಔಟಾದರು. ಬಳಿಕ ಚಾಮರಿ ಅಟ್ಟಾಪಟ್ಟು ಔಟಾಗಿ ನಿರಾಸೆ ಮೂಡಿಸಿದರು. ಆದರೆ ಅಲಿಸಾ ಹೀಲಿ ಏಕಾಂಗಿ ಹೋರಾಟ ನಡೆಸಿದರು. 33 ಎಸೆತಗಳಲ್ಲಿ 7 ಬೌಂಡರಿ, 3 ಸಿಕ್ಸರ್ ಸಹಿತ 58 ರನ್ ಗಳಿಸಿದರು. ಆದರೆ ಆರ್​ಸಿಬಿ ಬೌಲರ್​​ಗಳು ಆಗಾಗ್ಗೆ ವಿಕೆಟ್​ ಪಡೆಯುವ ಮೂಲಕ ಎದುರಾಳಿ ತಂಡಕ್ಕೆ ಆಘಾತ ನೀಡಿದರು. ದೀಪ್ತಿ ಶರ್ಮಾ 33 ರನ್, ಪೂನಂ ಖೇಮ್ನಾರ್ 31 ರನ್ ಗಳಿಸಿ ಪೈಪೋಟಿ ನೀಡಿದರು.

ಅಂತಿಮವಾಗಿ ಯುಪಿ ವಾರಿಯರ್ಸ್ 8 ವಿಕೆಟ್ ನಷ್ಟಕ್ಕೆ 178 ರನ್ ಗಳಿಸಲಷ್ಟೇ ಶಕ್ತವಾಯಿತು. ಆರ್​ಸಿಬಿ ಪರ ಸೋಫಿ ಡಿವೈನ್, ಜಾರ್ಜಿಯಾ ವೇರ್ಹ್ಯಾಮ್, ಸೋಫಿ ಮೊಲಿನಿಕ್ಸ್, ಆಶಾ ಶೋಭಾನಾ ತಲಾ 2 ವಿಕೆಟ್ ಪಡೆದರು. ಈ ಗೆಲುವಿನೊಂದಿಗೆ ಆರ್​​ಸಿಬಿ ಅಂಕಪಟ್ಟಿಯಲ್ಲಿ ಮೂರನೇ ಸ್ಥಾನಕ್ಕೆ ಏರಿದೆ. ಸೋತ ಯುಪಿ ವಾರಿಯರ್ಸ್ ನಾಲ್ಕನೇ ಸ್ಥಾನಕ್ಕೆ ಕುಸಿದಿದೆ.