ನಿರ್ಣಾಯಕ ಪಂದ್ಯದಲ್ಲಿ ಡೆಲ್ಲಿ ವಿರುದ್ಧ ಆರ್ಸಿಬಿಗೆ 47 ರನ್ಗಳ ಗೆಲುವು; ಸತತ 5ನೇ ಜಯದೊಂದಿಗೆ ಪ್ಲೇಆಫ್ ಆಸೆ ಜೀವಂತ
RCB vs DC Highlights: 17ನೇ ಆವೃತ್ತಿಯ 62ನೇ ಪಂದ್ಯದಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ವಿರುದ್ಧ ರಾಯಲ್ ಚಾಲೆಂಜರ್ಸ್ ಬೆಂಗಳೂರು 47 ರನ್ಗಳಿಂದ ಭರ್ಜರಿ ಗೆಲುವು ಸಾಧಿಸಿತು. ಇದರೊಂದಿಗೆ ಪ್ಲೇಆಫ್ ಜೀವಂತವಾಗಿರಿಸಿದೆ.
ನಿರ್ಣಾಯಕ ಪಂದ್ಯದಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ತಂಡವನ್ನು 47 ರನ್ಗಳಿಂದ ಮಣಿಸಿದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಪ್ಲೇಆಫ್ ಆಸೆಯನ್ನು ಜೀವಂತವಾಗಿರಿಸಿದೆ. ಬ್ಯಾಟಿಂಗ್ ಮತ್ತು ಬೌಲಿಂಗ್ನಲ್ಲಿ ಆಲ್ರೌಂಡ್ ಪ್ರದರ್ಶನ ತೋರಿದ ಆರ್ಸಿಬಿ, ಸತತ 5ನೇ ಗೆಲುವು ಸಾಧಿಸಿ ಅಂಕಪಟ್ಟಿಯಲ್ಲಿ 5ನೇ ಸ್ಥಾನಕ್ಕೇರಿದೆ. ಆರ್ಸಿಬಿ ತನ್ನ ಕೊನೆಯ ಪಂದ್ಯದಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ ತಂಡವನ್ನು ಎದುರಿಸಲಿದೆ. ಬೆಂಗಳೂರಿನ ಚಿನ್ನಸ್ವಾಮಿ ಮೈದಾನದಲ್ಲೇ ಈ ಪಂದ್ಯ ನಡೆಯಲಿದೆ.
ಬೆಂಗಳೂರಿನ ಎಂ ಚಿನ್ನಸ್ವಾಮಿ ಕ್ರಿಕೆಟ್ ಮೈದಾನದಲ್ಲಿ ನಡೆದ ಮಹತ್ವದ ಪಂದ್ಯದಲ್ಲಿ ಟಾಸ್ ಸೋತು ಮೊದಲು ಬ್ಯಾಟಿಂಗ್ ನಡೆಸಿತು. ಮೊದಲ 10 ಓವರ್ಗಳಲ್ಲಿ ಅಬ್ಬರಿಸಿ ಕೊನೆಯಲ್ಲಿ ರನ್ ಗಳಿಸಲು ತಡಬಡಾಯಿತು. ಆದರೂ 20 ಓವರ್ಗಳಲ್ಲಿ 9 ವಿಕೆಟ್ ನಷ್ಟಕ್ಕೆ 187 ರನ್ ಪೇರಿಸಿತು. ಈ ಗುರಿ ಬೆನ್ನಟ್ಟಿದ ಡೆಲ್ಲಿ ಆರಂಭದಿಂದಲೇ ಸಂಕಷ್ಟಕ್ಕೆ ಸಿಲುಕಿತು. ಆರ್ಸಿಬಿ ಬೌಲರ್ಗಳ ಮಾರಕ ದಾಳಿಗೆ ತತ್ತರಿಸಿತು. 19.1 ಓವರ್ಗಳಲ್ಲಿ 140ಕ್ಕೆ ಆಲೌಟ್ ಆಯಿತು.
ಅಕ್ಷರ್ ಪಟೇಲ್ ಹೋರಾಟ ವ್ಯರ್ಥ
188 ರನ್ಗಳ ಸವಾಲು ಬೆನ್ನಟ್ಟಿದ ಡಿಸಿ, ಪವರ್ಪ್ಲೇನಲ್ಲಿ 4 ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತು. ಡೇವಿಡ್ ವಾರ್ನರ್, ಅಭಿಷೇಕ್ ಪೊರೆಲ್, ಜೇಕ್ ಫ್ರೇಸರ್ ಮೆಕ್ಗುರ್ಕ್, ಕುಮಾರ್ ಕುಶಾಗ್ರ ತಂಡದ ಮೊತ್ತ 30 ರನ್ ಆಗಿದ್ದಾಗಲೇ ಔಟಾದರು. ಆದರೆ ಶಾಯ್ ಹೋಪ್ ಮತ್ತು ಅಕ್ಷರ್ ಪಟೇಲ್ ಕೆಲಹೊತ್ತು ಹೋರಾಟ ನಡೆಸಿದರು. ಆದರೆ ಹೋಪ್ 29 ರನ್ ಗಳಿಸಿ ತನ್ನ ಹೋಪ್ ಕಳೆದುಕೊಂಡರು. ಆದರೆ ಅಕ್ಷರ್ ಹೋರಾಟ ಮುಂದುವರೆಸಿದರು.
ಸತತ ವಿಕೆಟ್ಗಳ ಪತನದ ನಡುವೆಯೂ ಸ್ಫೋಟಕ ಬ್ಯಾಟಿಂಗ್ ನಡೆಸಿ ಭರ್ಜರಿ ಹಾಫ್ ಸೆಂಚುರಿ ಬಾರಿಸಿದ ಅಕ್ಷರ್, 39 ಎಸೆತಗಳಲ್ಲಿ 5 ಬೌಂಡರಿ, 3 ಸಿಕ್ಸರ್ ಸಹಿತ 59 ರನ್ ಸಿಡಿಸಿ ಯಶ್ ದಯಾಳ್ ಬೌಲಿಂಗ್ನಲ್ಲಿ ವಿಕೆಟ್ ಒಪ್ಪಿಸಿದರು. ಟ್ರಿಸ್ಟಾನ್ ಸ್ಟಬ್ಸ್ (3) ಅನಗತ್ಯ ರನ್ ಗಳಿಸಲು ಯತ್ನಿಸಿ ರನೌಟ್ ಆದರು. ಬೆಂಗಳೂರು ಬೌಲರ್ಗಳು ಮಾರಕ ಬೌಲಿಂಗ್ ದಾಳಿ ನಡೆಸಿದ ಪರಿಣಾಮ ಡೆಲ್ಲಿ 140 ರನ್ಗಳಿಗೆ ಕುಸಿತ ಕಂಡಿತು. ದಯಾಳ್ 3 ವಿಕೆಟ್, ಲಾಕಿ ಫರ್ಗ್ಯುಸನ್ 2, ಸಿರಾಜ್, ಸ್ವಪ್ನಿಲ್, ಗ್ರೀನ್ ತಲಾ 1 ವಿಕೆಟ್ ಪಡೆದು ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದರು.
ರಜತ್ ಪಾಟೀದಾರ್ ಮಿಂಚು
ಮೊದಲು ಬ್ಯಾಟಿಂಗ್ ನಡೆಸಿದ ಆರ್ಸಿಬಿ ಬಿರುಸಿನ ಆರಂಭಕ್ಕೆ ಒತ್ತು ಕೊಟ್ಟಿತು. ಆದರೆ, ಆರಂಭಿಕರಾದ ವಿರಾಟ್ ಕೊಹ್ಲಿ ಮತ್ತು ಫಾಫ್ ಡು ಪ್ಲೆಸಿಸ್ ಬೇಗನೇ ಔಟಾದರು. ಆಗ ತಂಡದ ಮೊತ್ತ 36/2. ಕೊಹ್ಲಿ 13 ಎಸೆತಗಳಲ್ಲಿ 3 ಸಿಕ್ಸರ್, 1 ಬೌಂಡರಿ ಸಹಿತ 27 ರನ್ ಚಚ್ಚಿದರು. ಆ ಬಳಿಕ ಜೊತೆಯಾದ ರಜತ್ ಪಾಟೀದಾರ್ ಮತ್ತು ವಿಲ್ ಜಾಕ್ಸ್, 88 ರನ್ಗಳ ಪಾಲುದಾರಿಕೆ ಒದಗಿಸಿದರು. ಆ ಮೂಲಕ ತಂಡಕ್ಕೆ ಚೇತರಿಕೆ ನೀಡಿದರು. ಇದೇ ವೇಳೆ ರಜತ್ ಪಾಟೀದಾರ್ ಮತ್ತೊಂದು ಅರ್ಧಶತಕ ಸಿಡಿಸಿದರು.
ಪಾಟೀದಾರ್ 32 ಎಸೆತಗಳಲ್ಲಿ 3 ಸಿಕ್ಸರ್ ಮತ್ತು 3 ಬೌಂಡರಿ ಸಹಿತ 52 ರನ್ ಬಾರಿಸಿದರು. ಈ ಐಪಿಎಲ್ನಲ್ಲಿ ಅವರ 5ನೇ ಅರ್ಧಶತಕವಾಗಿದೆ. ಅಚ್ಚರಿ ಏನೆಂದರೆ, ಈ ಐದು ಅರ್ಧಶತಕಗಳಲ್ಲಿ ಒಮ್ಮೆಯೂ 60 ರ ಗಡಿ ದಾಟಿಲ್ಲ. ವಿಲ್ ಜಾಕ್ಸ್ ಮಹತ್ವದ 41 ರನ್ ಸಿಡಿಸಿದರೆ, ಕ್ಯಾಮರೂನ್ ಗ್ರೀನ್ ಕೊನೆಯಲ್ಲಿ ಅಜೇಯ 32 ರನ್ಗಳ ಕಾಣಿಕೆ ನೀಡಿದರು. ಆದರೆ ಮಹಿಪಾಲ್ ಲೊಮ್ರೊರ್ (13), ದಿನೇಶ್ ಕಾರ್ತಿಕ್ (0), ಸ್ವಪ್ನಿಲ್ ಸಿಂಗ್ (0) ನಿರಾಸೆ ಮೂಡಿಸಿದರು. ಡೆಲ್ಲಿ ಪರ ಖಲೀಲ್ ಅಹ್ಮದ್, ರಸಿಖ್ ಸಲಾಮ್ ತಲಾ 2, ಕುಲ್ದೀಪ್, ಮುಕೇಶ್, ಇಶಾಂತ್ ತಲಾ 1 ವಿಕೆಟ್ ಕಬಳಿಸಿ ಮಿಂಚಿದರು.
