ಅಗ್ರಸ್ಥಾನಕ್ಕೇರುವ ಹುಮ್ಮಸ್ಸಿನಲ್ಲಿ ಕುಸಿದ ರಾಜಸ್ಥಾನ್ ರಾಯಲ್ಸ್; ಎದ್ದುಬಿದ್ದು ಗೆದ್ದು ಬೀಗಿದ ಪಂಜಾಬ್ ಕಿಂಗ್ಸ್

ಸ್ಯಾಮ್ ಕರನ್ ಅವರ ಆಲ್​ರೌಂಡ್ ಆಟಕ್ಕೆ ಸಂಜು ಸ್ಯಾಮ್ಸನ್ ನೇತೃತ್ವದ ತಂಡವು ಪಂಜಾಬ್ ಕಿಂಗ್ಸ್​ ವಿರುದ್ಧ ತಲೆಬಾಗಿತು. ಆದರೆ ಅಗ್ರಸ್ಥಾನಕ್ಕೆ ಏರುವ ಹುಮ್ಮಸ್ಸಿನಲ್ಲಿದ್ದ ರಾಜಸ್ಥಾನ್ ರಾಯಲ್ಸ್ ಸತತ ನಾಲ್ಕನೇ ಸೋಲಿಗೆ ಶರಣಾಗಿದೆ. ಟೂರ್ನಿಯ ಆರಂಭದಲ್ಲಿ ಸತತ ಗೆಲುವುಗಳೊಂದಿಗೆ ಮುನ್ನುಗ್ಗಿದ ಆರ್​ಆರ್​, ಕೊನೆಯ ಪಂದ್ಯಗಳಲ್ಲಿ ಸತತ ಸೋಲುಗಳು ಕಾಣುತ್ತಿದೆ. ಪಿಬಿಕೆಎಸ್ ತನ್ನ ಔಪಚಾರಿಕ ಪಂದ್ಯದಲ್ಲಿ ದಿಗ್ವಿಜಯ ಸಾಧಿಸಿ ಅಂಕಪಟ್ಟಿಯಲ್ಲಿ 10 ರಿಂದ 9ನೇ ಸ್ಥಾನಕ್ಕೇರಿದೆ.

ಗುವಾಹಟಿಯ ಬರ್ಸಾಪುರ ಕ್ರಿಕೆಟ್ ಮೈದಾನದಲ್ಲಿ ನಡೆದ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ನಡೆಸಿದ ಆರ್​ಆರ್, ಪಿಬಿಕೆಎಸ್ ಬೌಲರ್​​ಗಳ ದಾಳಿಗೆ ತತ್ತರಿಸಿತು. ರಿಯಾನ್ ಪರಾಗ್ (28) ಮತ್ತೊಮ್ಮೆ ಉತ್ತಮ ಪ್ರದರ್ಶನ ನೀಡುವ ಮೂಲಕ ಗಮನ ಸೆಳೆದರು. ಈ ಗುರಿ ಬೆನ್ನಟ್ಟಿದ ಪಂಜಾಬ್ ಕಿಂಗ್ಸ್, 18.5 ಓವರ್​ಗಳಲ್ಲಿ ಗೆಲುವಿನ ನಗೆ ಬೀರಿತು. ಬ್ಯಾಟಿಂಗ್ ಮತ್ತು ಬೌಲಿಂಗ್ ಎರಡರಲ್ಲೂ ಅತ್ಯದ್ಭುತ ಪ್ರದರ್ಶನ ನೀಡಿದ ಸ್ಯಾಮ್ ಕರನ್ ತಂಡಕ್ಕೆ ಅಮೋಘ ಗೆಲುವು ತಂದುಕೊಟ್ಟರು.

ಸ್ಯಾಮ್ ಕರನ್ ಮಿಂಚು

145 ರನ್​ಗಳ ಗುರಿ ಬೆನ್ನಟ್ಟಿದ ಪಿಬಿಕೆಎಸ್​ಗೆ ಆರಂಭಿಕ ವಿಘ್ನ ಎದುರಾಯಿತು. ಪ್ರಭುಸಿಮ್ರಾನ್ ಸಿಂಗ್ (6), ಜಾನಿ ಬೈರ್​ಸ್ಟೋ (14), ರಿಲಿ ರೊಸೊ (22) ಮತ್ತು ಶಶಾಂಕ್ ಸಿಂಗ್ (0) ಬೇಗನೇ ವಿಕೆಟ್ ಒಪ್ಪಿಸಿದರು. ಆವೇಶ್ ಖಾನ್ ಒಂದೇ ಓವರ್​​ನಲ್ಲಿ ಎರಡು ವಿಕೆಟ್ ಪಡೆದು ಆರ್​ಆರ್​ಗೆ ಮುನ್ನಡೆ ತಂದುಕೊಟ್ಟರು. ಆದರೆ ಸಂಕಷ್ಟದಲ್ಲಿದ್ದ ಹಂತದಲ್ಲಿ ಸ್ಯಾಮ್ ಕರನ್-ಜಿತೇಶ್ ಶರ್ಮಾ ಅರ್ಧಶತಕ ಜೊತೆಯಾಟವಾಡಿದರು. ಟೂರ್ನಿಯುದ್ದಕ್ಕೂ ನಿರಾಸೆ ಮೂಡಿಸಿದ್ದ ಜಿತೇಶ್ ಶರ್ಮಾ, ಭರವಸೆ ಮೂಡಿಸಿ 22ಕ್ಕೆ ಆಟ ಮುಗಿಸಿದರು.

ಇದನ್ನೂ ಓದಿ: ಭಾರತ ತಂಡದ ಹೆಡ್​ಕೋಚ್​ ಸ್ಥಾನಕ್ಕೆ ಎಂಎಸ್ ಧೋನಿ ನೆಚ್ಚಿನ ತರಬೇತುದಾರ; ರಾಹುಲ್ ದ್ರಾವಿಡ್ ಉತ್ತರಾಧಿಕಾರಿ ಯಾರು?

ಯುಜ್ವೇಂದ್ರ ಚಹಲ್ ಈ ಜೋಡಿಯನ್ನು ಬೇರ್ಪಡಿಸಿತು. ಆದರೆ ಸ್ಯಾಮ್ ಕರನ್ ತನ್ನ ಹೋರಾಟ ಮುಂದುವರೆಸಿದರು. ಅಲ್ಲದೆ, ಬೊಂಬಾಟ್ ಅರ್ಧಶತಕವನ್ನೂ ಸಿಡಿಸಿ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದರು. ಕರನ್ 41 ಎಸೆತಗಳಲ್ಲಿ 5 ಬೌಂಡರಿ, 3 ಸಿಕ್ಸರ್ ಸಹಿತ 63 ರನ್ ಸಿಡಿಸಿದರು. ಕೊನೆಯಲ್ಲಿ ಆಶುತೋಷ್ ಶರ್ಮಾ ಕೂಡ ಅಜೇಯ 17 ರನ್ ಸಿಡಿಸಿದರು. ಚಹಲ್, ಆವೇಶ್ ಖಾನ್ ತಲಾ 2 ವಿಕೆಟ್ ಪಡೆದರು.

ರಿಯಾನ್ ಪರಾಗ್ ಮತ್ತೊಮ್ಮೆ ಉತ್ತಮ ಪ್ರದರ್ಶನ

ಟಾಸ್​ ಗೆದ್ದು ರಾಜಸ್ಥಾನ್ ರಾಯಲ್ಸ್, ಮೊದಲು ಬ್ಯಾಟಿಂಗ್ ನಡೆಸಿತು. ಅಗ್ರಸ್ಥಾನಕ್ಕೇರುವ ಹುಮ್ಮಸ್ಸಿನಲ್ಲಿದ್ದ ಆರ್​ಆರ್​ ನೀಡಿದ್ದು, ನೀರಸ ಪ್ರದರ್ಶನ. ಜೈಸ್ವಾಲ್ ಮೊದಲ ಓವರ್​​​ನಲ್ಲೇ ಕ್ಲೀನ್ ಬೋಲ್ಡ್ ಆದರೆ, ಜೋಸ್ ಬಟ್ಲರ್ ಅಲಭ್ಯತೆಯಲ್ಲಿ ಕಣಕ್ಕಿಳಿದ ಟಾಮ್ ಕೊಹ್ಲರ್-ಕ್ಯಾಡ್ಮೋರ್ ಅವರು ರನ್ ಗಳಿಸಲು ಪರದಾಡಿದರು. 23 ಎಸೆತಗಳಲ್ಲಿ 18 ರನ್ ಗಳಿಸಿ ರಾಹುಲ್​ ಚಹರ್​​ ಬೌಲಿಂಗ್​ನಲ್ಲಿ ಔಟಾದರು. ನಾಯಕ ಸಂಜು ಸ್ಯಾಮ್ಸನ್ ಸಹ 18ಕ್ಕೆ ಆಟ ಮುಗಿಸಿದರು.

ಇದನ್ನೂ ಓದಿ: ಸಚಿನ್ ತೆಂಡೂಲ್ಕರ್ ಭದ್ರತಾ ಸಿಬ್ಬಂದಿ ಗುಂಡು ಹಾರಿಸಿಕೊಂಡು ಆತ್ಮಹತ್ಯೆ; ತನಿಖೆ ಚುರುಕು

ಅಗ್ರ ಕ್ರಮಾಂಕದ ವೈಫಲ್ಯ ನಂತರ ರಿಯಾನ್ ಪರಾಗ್ ಮತ್ತು 5ನೇ ಕ್ರಮಾಂಕಕ್ಕೆ ಬಡ್ತಿ ಪಡೆದ ರವಿಚಂದ್ರನ್ ಅಶ್ವಿನ್ ಅವರು ಚೇತರಿಕೆ ನೀಡುವ ಯತ್ನಕ್ಕೆ ಕೈ ಹಾಕಿದರು. ನಾಲ್ಕನೇ ವಿಕೆಟ್​​ಗೆ 50 ರನ್​ಗಳ ಸೊಗಸಾದ ಜೊತೆಯಾಟ ಮೂಡಿಬಂತು. ಇದರ ನಡುವೆಯೂ ಪಂಜಾಬ್ ಬೌಲರ್​ಗಳು ಮೇಲುಗೈ ಸಾಧಿಸಿದರು. ಆದರೆ ಪರಾಗ್ (48)ಶತಕದ ಅಂಚಿನಲ್ಲಿ ಎಡವಿದರೆ, ಅಶ್ವಿನ್ ಉಪಯುಕ್ತ 28 ರನ್​ ಕಾಣಿಕೆ ನೀಡಿದರು.

ಧ್ರುವ್ ಜುರಲ್ (0), ರೊವ್ಮನ್ ಪೊವೆಲ್ (4), ಡೊನೊವನ್ ಫೆರೆರಾ (7) ತೀವ್ರ ನಿರಾಸೆ ಮೂಡಿಸಿದರು. ಕೊನೆಯಲ್ಲಿ ಟ್ರೆಂಟ್ ಬೋಲ್ಟ್ 12 ರನ್​ಗಳ ಕೊಡುಗೆ ನೀಡಿದರು. 144 ರನ್​ಗಳಿಗೆ ಕಟ್ಟಿ ಹಾಕಿದ ಪಿಬಿಕೆಎಸ್ ಪರ ಸ್ಯಾಮ್ ಕರನ್, ಹರ್ಷಲ್ ಪಟೇಲ್, ರಾಹುಲ್ ಚಹರ್ ತಲಾ 2, ಅರ್ಷದೀಪ್ ಸಿಂಗ್, ನಾಥನ್ ಎಲ್ಲಿಸ್ ತಲಾ 1 ವಿಕೆಟ್ ಪಡೆದರು.

ಇದನ್ನೂ ಓದಿ: ಐಪಿಎಲ್​ ಇತಿಹಾಸದಲ್ಲಿ ಆರ್​ಸಿಬಿ ವಿರುದ್ಧ ಸಿಎಸ್​ಕೆ ತಂಡದ್ದೇ ದರ್ಬಾರ್; ಚಿನ್ನಸ್ವಾಮಿ ಮೈದಾನದಲ್ಲೂ ಅವರದ್ದೇ ಕಾರುಬಾರು