ಪಂಜಾಬ್ ಕಿಂಗ್ಸ್ ಅತಿರೋಚಕ ಚೇಸಿಂಗ್; ಶಶಾಂಕ್ ಸಿಂಗ್ ಆರ್ಭಟಕ್ಕೆ ಬೆಚ್ಚಿದ ಗುಜರಾತ್ ಟೈಟಾನ್ಸ್​ಗೆ ಸೋಲು

ಶಶಾಂಕ್ ಸಿಂಗ್ (61*) ಅವರ ಅಬ್ಬರದ ಹೋರಾಟದ ಫಲವಾಗಿ ಗುಜರಾತ್ ಟೈಟಾನ್ಸ್ ವಿರುದ್ಧ ಪಂಜಾಬ್ ಕಿಂಗ್ಸ್​ ರೋಚಕ ಗೆಲುವು ದಾಖಲಿಸಿದೆ. ಐಪಿಎಲ್​ನ 17ನೇ ಪಂದ್ಯದಲ್ಲಿ 200 ರನ್​​ಗಳ ಸೂಪರ್ ಚೇಸ್​ನಲ್ಲಿ ಮಿಂಚಿದ ಪಿಬಿಕೆಎಸ್, ಟೂರ್ನಿಯಲ್ಲಿ ಎರಡನೇ ಜಯದ ನಗೆ ಬೀರಿದೆ. ಅತ್ತ 89 ರನ್ ಬಾರಿಸಿದ್ದ ಶುಭ್ಮನ್ ಗಿಲ್ ಅವರ ಆಕರ್ಷಕ ಆಟ ವ್ಯರ್ಥಗೊಂಡಿತು. ಗುಜರಾತ್​ 2ನೇ ಸೋಲು ಅನುಭವಿಸಿದೆ. ಪಂಜಾಬ್ ಆಡಿದ 4ರಲ್ಲಿ ತಲಾ ಎರಡು ಗೆಲುವು-ಸೋಲು ಕಂಡಿದೆ. ಅದೇ ರೀತಿ ಟೈಟಾನ್ಸ್ ಕೂಡ ಅಷ್ಟೆ ಗೆಲುವು ಸೋಲು ಕಂಡಿದೆ.

ಅಹ್ಮದಾಬಾದ್​ನ ನರೇಂದ್ರ ಮೋದಿ ಕ್ರಿಕೆಟ್ ಮೈದಾನದಲ್ಲಿ ನಡೆದ ಪಂದ್ಯದಲ್ಲಿ ಟಾಸ್ ಸೋತು ಮೊದಲು ಬ್ಯಾಟಿಂಗ್ ನಡೆಸಿದ ಗುಜರಾತ್ ಉತ್ತಮ ಪ್ರದರ್ಶನ ತೋರಿತು. ಶುಭ್ಮನ್ ಗಿಲ್ (89*) ಅವರ ಅದ್ಭುತ ಆಟದ ನೆರವಿನಿಂದ ಜಿಟಿ ಬೃಹತ್ ಮೊತ್ತ ಕಲೆ ಹಾಕಲು ನೆರವಾಯಿತು. 20 ಓವರ್​​ಗಳಲ್ಲಿ 4 ವಿಕೆಟ್​ಗೆ 199 ರನ್ ಗಳಿಸಿತು. 200 ರನ್​​ಗಳ ಮೊತ್ತ ಬೆನ್ನಟ್ಟಿದ ಪಂಜಾಬ್​ ಶಶಾಂಕ್ ಸಿಂಗ್ ಹೋರಾಟದ ಫಲವಾಗಿ ಗೆದ್ದು ಬೀಗಿದೆ. ಒಂದು ಎಸೆತ ಬಾಕಿ ಇರುವಂತೆಯೇ 3 ವಿಕೆಟ್​​ಗಳಿಂದ ಗೆದ್ದಿತು.

ಇದನ್ನೂ ಓದಿ: ತಂಡದ ಮೀಟಿಂಗ್​ಗೆ ತಡವಾಗಿ ಬಂದ ಇಶಾನ್​ ಕಿಶನ್; ಕಠಿಣ ಶಿಕ್ಷೆ ವಿಧಿಸಿದ ಮುಂಬೈ ಇಂಡಿಯನ್ಸ್, ವಿಡಿಯೋ ನೋಡಿ

ಬೃಹತ್ ಮೊತ್ತ ಚೇಸ್ ಮಾಡಿದ ಪಂಜಾಬ್, ಜಿಟಿ ಬೌಲರ್​​ಗಳ ದಾಳಿಗೆ ತತ್ತರಿಸಿತು. ಶಿಖರ್ ಧವನ್ (1), ಜಾನಿ ಬೈರ್​ಸ್ಟೋ (22), ಸ್ಯಾಮ್ ಕರನ್ (5) ಬೇಗನೇ ಔಟಾದರು. ಇದರ ಬೆನ್ನಲ್ಲೇ ಚೇತರಿಕೆ ನೀಡುತ್ತಿದ್ದ ಪ್ರಭುಸಿಮ್ರಾನ್ ಸಿಂಗ್ 35ಕ್ಕೆ ಆಟ ಮುಗಿಸಿದರು. ಈ ಐಪಿಎಲ್​ನಲ್ಲಿ ಮೊದಲ ಅವಕಾಶ ಪಡೆದ ಸಿಕಂದರ್ ರಾಝಾ ಕೂಡ ಮಿಂಚಲಿಲ್ಲ. ಇದು ತಂಡವನ್ನು ಮತ್ತಷ್ಟು ಸಂಕಷ್ಟಕ್ಕೆ ಸಿಲುಕುವಂತೆ ಮಾಡಿತು. ಟಾಪ್-5 ಬ್ಯಾಟರ್ಸ್ ಕ್ರೀಸ್​ ಕಚ್ಚಿ ನಿಲ್ಲುವ ಪ್ರಯತ್ನಕ್ಕೆ ಕೈ ಹಾಕಲಿಲ್ಲ.

ಶಶಾಂಕ್ ಸಿಂಗ್ ಮಿಂಚು

6ನೇ ಕ್ರಮಾಂಕದಲ್ಲಿ ಕಣಕ್ಕಿಳಿದ ಶಶಾಂಕ್ ಸಿಂಗ್​ ಪಂಜಾಬ್ ಬೌಲರ್​ಗಳಿಗೆ ಬೆವರಿಳಿಸಿದರು. ಸತತ ವಿಕೆಟ್ ಪತನವಾಗುತ್ತಿದ್ದರೂ, ದಿಟ್ಟ ಹೋರಾಟ ನಡೆಸಿದರು. ಸೂಪರ್ ಚೇಸ್​ನಲ್ಲಿ ಕೇವಲ 15 ರನ್​ ಗಳಿಸಿ ಜಿತೇಶ್ ಶರ್ಮಾ ಔಟಾದರೆ, ಇಂಪ್ಯಾಕ್ಟ್ ಪ್ಲೇಯರ್ ಆಗಿ ಕಣಕ್ಕಿಳಿದ ಅಶುತೋಷ್ ಶರ್ಮಾ ಸಂಖತ್ ಇಂಪ್ಯಾಕ್ಟ್​ಫುಲ್ ಇನ್ನಿಂಗ್ಸ್ ಕಟ್ಟಿದರು. 17 ಎಸೆತಗಳಲ್ಲಿ 3 ಬೌಂಡರಿ, 1 ಸಿಕ್ಸರ್​ನೊಂದಿಗೆ 31 ರನ್ ಗಳಿಸಿದರು. ಅದಾಗಲೇ ಪಂಜಾಬ್​ ಗೆಲುವಿನ ಸನಿಹಕ್ಕೆ ಬಂದಿತ್ತು. ಶಶಾಂಕ್, 29 ಎಸೆತಗಳಲ್ಲಿ 6 ಬೌಂಡರಿ, 4 ಸಿಕ್ಸರ್​​ಗಳೊಂದಿಗೆ ಅಜೇಯ 61 ರನ್ ಗಳಿಸಿದರು. ಕೊನೆಯ ಓವರ್​​​ನಲ್ಲಿ ಪಂಜಾಬ್​ ಗೆಲುವಿಗೆ 7 ರನ್ ಬೇಕಿತ್ತು. ಇನ್ನೂ ಒಂದು ಎಸೆತ ಬಾಕಿ ಇರುವಂತೆಯೇ ಗೆದ್ದು ಬೀಗಿತು.

ಇದನ್ನೂ ಓದಿ: Prakash Raj: ‘ನನ್ನನ್ನು ಕೊಳ್ಳುವಷ್ಟು ಆ ಪಕ್ಷ ಸೈದ್ಧಾಂತಿಕವಾಗಿ ಶ್ರೀಮಂತವಾಗಿಲ್ಲ!​’ ಬಿಜೆಪಿ ಸೇರ್ಪಡೆ ಬಗ್ಗೆ ಪ್ರಕಾಶ್‌ ರಾಜ್‌ ವ್ಯಂಗ್ಯ

ಶುಭ್ಮನ್ ಗಿಲ್ ಸಖತ್ ಆಟ

ಮೊದಲು ಬ್ಯಾಟಿಂಗ್ ನಡೆಸಿದ ಗುಜರಾತ್​ಗೆ ವೃದ್ಧಿಮಾನ್ ಸಾಹ (11) ಮತ್ತೊಮ್ಮೆ ನಿರಾಸೆ ಮೂಡಿಸಿದರು. ಆದರೆ ನಾಯಕ ಶುಭ್ಮನ್ ಗಿಲ್ ಜವಾಬ್ದಾರಿಯುತ ಆಟದ ಮೂಲಕ ಗಮನ ಸೆಳೆದರು. ಅವರಿಗೆ ಸಾಥ್ ನೀಡಿದ ಕೇನ್ ವಿಲಿಯಮ್ಸನ್ 26 ರನ್ ಗಳಿಸಿ ಔಟಾದರು. ಹರ್ಪ್ರೀತ್ ಬ್ರಾರ್ ಈ ವಿಕೆಟ್ ಪಡೆದರು. ಮತ್ತೊಂದೆಡೆ ಬ್ಯಾಟಿಂಗ್ ಅಬ್ಬರವನ್ನು ಮುಂದುವರೆಸಿದ ಗಿಲ್ ಭರ್ಜರಿ ಅರ್ಧಶತಕವನ್ನು ಪೂರೈಸಿದರು. ಈ ಐಪಿಎಲ್​ನಲ್ಲಿ ಅವರ ಮೊದಲ ಅರ್ಧಶತಕ.

ಗಿಲ್ ಜೊತೆ ಅರ್ಧಶತಕದ ಪಾಲುದಾರಿಕೆ ನೀಡಿದ ಸಾಯಿ ಸುದರ್ಶನ್, 33 ರನ್​ಗಳ ಕಾಣಿಕೆ ನೀಡಿದರು. ಕೊನೆಯವರೆಗೂ ಕ್ರೀಸ್​ ಕಚ್ಚಿ ನಿಂತ ಶುಭ್ಮನ್ ಗಿಲ್ ಅಜೇಯರಾಗಿ ಉಳಿದರು. 48 ಎಸೆತಗಳಲ್ಲಿ 6 ಬೌಂಡರಿ, 4 ಸಿಕ್ಸರ್​​​ಗಳೊಂದಿಗೆ 89 ರನ್ ಚಚ್ಚಿದರು. ವಿಜಯ್ ಶಂಕರ್ 8 ರನ್ ಗಳಿಸಿ ನಿರಾಸೆ ಮೂಡಿಸಿದರೆ, ಕೊನೆಯಲ್ಲಿ ರಾಹುಲ್ ತೆವಾಟಿಯಾ 8 ಎಸೆತಗಳಲ್ಲಿ 23 ರನ್ ಗಳಿಸಿ ಮಿಂಚಿದರು. ಪರಿಣಾಮ ಜಿಟಿ 20 ಓವರ್​​ಗಳಲ್ಲಿ 4 ವಿಕೆಟ್ ನಷ್ಟಕ್ಕೆ 199 ರನ್ ಗಳಿಸಿತು.

ಇದನ್ನೂ ಓದಿ: ಅಶ್ವಿನಿ ಪುನೀತ್‌ ರಾಜ್‌ಕುಮಾರ್‌ ಬಗ್ಗೆ ತುಚ್ಯ ಪದ ಬಳಕೆ; ರೊಚ್ಚಿಗೆದ್ದ ಅಪ್ಪು ಫ್ಯಾನ್ಸ್‌ ಕಡೆಯಿಂದ ಕ್ಷಮೆಗೆ ಆಗ್ರಹ