ಶುಭ್ಮನ್ ಗಿಲ್ ಟು ಕೆಎಲ್ ರಾಹುಲ್: ರೋಹಿತ್ ಶರ್ಮಾ ಆರಂಭಿಕ ಸ್ಥಾನ ತುಂಬಬಲ್ಲ ಬಲಿಷ್ಠ ಐವರು ಆಟಗಾರರಿವರು!
ಭಾರತೀಯ ಟೆಸ್ಟ್ ಕ್ರಿಕೆಟ್ಗೆ ನಿವೃತ್ತಿ ಘೋಷಿಸಿರುವ ರೋಹಿತ್ ಶರ್ಮಾ ಅವರ ಆರಂಭಿಕ ಸ್ಥಾನ ತುಂಬಲು ಈ ಐವರ ನಡುವೆ ಪೈಪೋಟಿ ಏರ್ಪಟ್ಟಿದೆ. ಅವರ ಪಟ್ಟಿ ಇಂತಿದೆ.
ಮೇ 7 ರಂದು ರೋಹಿತ್ ಶರ್ಮಾ ಟೆಸ್ಟ್ ಕ್ರಿಕೆಟ್‌ನಿಂದ ಹಠಾತ್ತನೆ ನಿವೃತ್ತಿ ಘೋಷಿಸಿದ್ದು, ಕ್ರಿಕೆಟ್ ಜಗತ್ತನ್ನೇ ಬೆಚ್ಚಿ ಬೀಳಿಸಿದೆ. ಇಂಗ್ಲೆಂಡ್ ವಿರುದ್ಧ 5 ಪಂದ್ಯಗಳ ಸರಣಿಗೆ ರೋಹಿತ್ ಅವರನ್ನು ನಾಯಕ ಸ್ಥಾನದಿಂದ ಕೆಳಗಿಳಿಸುತ್ತಾರೆ ಎನ್ನುವ ವರದಿಗಳು ಹರಡಿದ ಬೆನ್ನಲ್ಲೇ ಈ ಘಟನೆ ಸಂಭವಿಸಿದ್ದು ಅಚ್ಚರಿ ಮೂಡಿಸಿದೆ. ಇದೀಗ ನೂತನ ಟೆಸ್ಟ್ ನಾಯಕ ಯಾರು ಎನ್ನುವ ಪ್ರಶ್ನೆಯ ಜೊತೆಗೆ ಯಶಸ್ವಿ ಜೈಸ್ವಾಲ್ಗೆ ಹೊಸ ಪಾಲುದಾರ ಯಾರಾಗಬಹುದು ಎನ್ನುವ ಗೊಂದಲವೂ ಹೆಚ್ಚಾಗಿದೆ. ಭಾರತೀಯ ಟೆಸ್ಟ್ ಆರಂಭಿಕ ಸ್ಥಾನಕ್ಕೆ ರೋಹಿತ್ ಜಾಗ ತುಂಬಲು ಈ ಐವರ ನಡುವೆ ಪೈಪೋಟಿ ಏರ್ಪಟ್ಟಿದೆ.
1. ಶುಭ್ಮನ್ ಗಿಲ್
ರೋಹಿತ್ ಶರ್ಮಾ ಬದಲಿಗೆ ಭಾರತ ಟೆಸ್ಟ್ ತಂಡದ ನಾಯಕನಾಗುವ ಪ್ರಮುಖ ಸ್ಪರ್ಧಿ ಶುಭ್ಮನ್ ಗಿಲ್. ಯಶಸ್ವಿ ಜೈಸ್ವಾಲ್ ತಂಡಕ್ಕೆ ಸೇರ್ಪಡೆ ಆಗುವ ತನಕವೂ ಗಿಲ್, ರೋಹಿತ್ಗೆ ಪಾಲುದಾರನಾಗಿದ್ದರು. ನಂತರ 3ನೇ ಸ್ಥಾನಕ್ಕೆ ಕುಸಿದರು. ಅಲ್ಲಿಯೂ ಶುಭ್ಮನ್ ಸಾಧಾರಣ ಯಶಸ್ಸನ್ನು ಕಂಡಿದ್ದಾರೆ. ರೋಹಿತ್ ಈಗ ನಿವೃತ್ತರಾಗುತ್ತಿರುವುದರಿಂದ ಜೈಸ್ವಾಲ್ ಜೊತೆಗೆ ಗಿಲ್ ಆರಂಭಿಕ ಬ್ಯಾಟಿಂಗ್‌ಗೆ ಮರಳಬಹುದು.
2. ಕೆಎಲ್ ರಾಹುಲ್
ತಮ್ಮ ಟೆಸ್ಟ್ ವೃತ್ತಿಜೀವನದ ಬಹುಪಾಲು ಸಮಯವನ್ನು ಆರಂಭಿಕ ಸ್ಥಾನದಲ್ಲೇ ಆಡಿರುವ ಕೆಎಲ್ ರಾಹುಲ್, ಇತ್ತೀಚೆಗಷ್ಟೇ ಮಧ್ಯಮ ಕ್ರಮಾಂಕದಲ್ಲಿ ಬ್ಯಾಟಿಂಗ್ ಮಾಡಿದ್ದರು. ರೋಹಿತ್ ಅಲಭ್ಯತೆ ಕಾರಣ ಮತ್ತೆ ಓಪನಿಂಗ್ ಸ್ಥಾನಕ್ಕೆ ಮರಳಬಹುದು. ಆರಂಭಿಕ ಸ್ಥಾನಕ್ಕಿಂತ ಮಧ್ಯಮ ಕ್ರಮಾಂಕದಲ್ಲೇ ಅತ್ಯುತ್ತಮ ದಾಖಲೆ ಹೊಂದಿದ್ದರೂ ಟೀಮ್ ಮ್ಯಾನೇಜ್ಮೆಂಟ್ ಓಪನಿಂಗ್ ಸ್ಥಾನಕ್ಕೆ ಆದ್ಯತೆ ನೀಡಬಹುದು.
3. ಸಾಯಿ ಸುದರ್ಶನ್
2025ರ ಐಪಿಎಲ್ನಲ್ಲಿ ಸಾಯಿ ಸುದರ್ಶನ್ ಅದ್ಭುತ ಲಯದಲ್ಲಿದ್ದಾರೆ. ಇದು ಅವರನ್ನು ಟೆಸ್ಟ್ ತಂಡಕ್ಕೆ ಆಯ್ಕೆ ಮಾಡುವಂತೆ ಅನೇಕರು ಒತ್ತಾಯಿಸಲು ಕಾರಣವಾಗಿದೆ. ದೇಶೀಯ ಕ್ರಿಕೆಟ್ನಲ್ಲೂ ಅತ್ಯುತ್ತಮ ದಾಖಲೆ ಹೊಂದಿರುವ ಸುದರ್ಶನ್, ಇಂಗ್ಲೆಂಡ್ ಪ್ರವಾಸಕ್ಕೆ ಬ್ಯಾಕಪ್ ಓಪನರ್ ಆಗಿ ಆಯ್ಕೆಯಾಗಬಹುದು. ಒಂದು ವೇಳೆ ರಾಹುಲ್, ಗಿಲ್ ಮಧ್ಯಮ ಕ್ರಮಾಂಕಕ್ಕೆ ಫಿಕ್ಸ್ ಆದರೆ, ಸುದರ್ಶನ್ ಅವರನ್ನೇ ಆರಂಭಿಕ ಸ್ಥಾನಕ್ಕೆ ಪರಿಗಣಿಸಬಹುದು. ಟೆಸ್ಟ್ ಕ್ರಿಕೆಟ್ನಲ್ಲಿ ಭಾರತದ ಮುಂದಿನ ದೊಡ್ಡ ಓಪನರ್ ಆಗಲು ಅವರ ಬಳಿ ಎಲ್ಲಾ ಸಾಮರ್ಥ್ಯವಿದೆ.
4. ಅಭಿಮನ್ಯು ಈಶ್ವರನ್
ಅಭಿಮನ್ಯು ಈಶ್ವರನ್ ಭಾರತ ಎ ತಂಡದಲ್ಲಿ ಬಹಳ ಸಮಯದಿಂದ ನಿಯಮಿತ ಆಟಗಾರರಾಗಿದ್ದಾರೆ. ಬಾರ್ಡರ್-ಗವಾಸ್ಕರ್ ಟ್ರೋಫಿಗಾಗಿ ಅವರು ಭಾರತ ತಂಡದ ಭಾಗವಾಗಿದ್ದರು. ಆದರೆ ಅವರು ಆಡುವ 11ರ ಬಳಗದಲ್ಲಿ ಅವಕಾಶ ಪಡೆಯಲಿಲ್ಲ. ದೇಶೀಯ ಕ್ರಿಕೆಟ್ನಲ್ಲಿ ಪ್ರಮುಖ ಆಟಗಾರರಾಗಿದ್ದು, 100ಕ್ಕೂ ಹೆಚ್ಚು ಪಂದ್ಯಗಳಲ್ಲಿ 7500 ರನ್ ಗಳಿಸಿದ್ದಾರೆ. ರೋಹಿತ್ ಅನುಪಸ್ಥಿತಿಯಲ್ಲಿ ಟೀಮ್ ಇಂಡಿಯಾ ಪರ ಆರಂಭಿಕ ಆಟಗಾರನಾಗಲು ಅವರು ಮತ್ತೊಂದು ಉತ್ತಮ ಆಯ್ಕೆ.
5. ಋತುರಾಜ್ ಗಾಯಕ್ವಾಡ್
ಒಂದು ಕಾಲದಲ್ಲಿ ಭಾರತ ತಂಡದಲ್ಲಿ ಭವಿಷ್ಯಕ್ಕೆ ಖಚಿತ ಹೆಸರೆಂದು ಪರಿಗಣಿಸಲ್ಪಟ್ಟಿದ್ದ ಋತುರಾಜ್ ಗಾಯಕ್ವಾಡ್, ಇತ್ತೀಚಿನ ವರ್ಷಗಳಲ್ಲಿ ಭಾರತೀಯ ತಂಡದಲ್ಲಿ ತಮ್ಮ ಸ್ಥಾನವನ್ನು ಕಳೆದುಕೊಂಡಿದ್ದಾರೆ. ಆದಾಗ್ಯೂ, ಅವರ ತಂತ್ರ ಮತ್ತು ಮನೋಧರ್ಮ ಟೆಸ್ಟ್ ಪಂದ್ಯಗಳಿಗೆ ಸೂಕ್ತವಾಗಿದೆ. ರೋಹಿತ್ ನಿವೃತ್ತಿ ಹೊಂದುತ್ತಿರುವುದರಿಂದ, ಯಶಸ್ವಿ ಜೈಸ್ವಾಲ್ ಜೊತೆಗೆ ಅಗ್ರ ಕ್ರಮಾಂಕದಲ್ಲಿ ಅವರನ್ನು ಪರೀಕ್ಷಿಸಲು ಭಾರತವು ಅಂತಿಮವಾಗಿ ಗಾಯಕವಾಡ್‌ಗೆ ಅವಕಾಶ ನೀಡಬಹುದು.
Prasanna Kumar PN
