ಫಾಲೋ ಆನ್​ಗೆ ಸಿಲುಕಿದ ಪಾಕಿಸ್ತಾನಕ್ಕೆ 10 ವಿಕೆಟ್​ಗಳ ಹೀನಾಯ ಸೋಲು; ಗೆದ್ದ ದಕ್ಷಿಣ ಆಫ್ರಿಕಾಗೆ ಟೆಸ್ಟ್​ ಸರಣಿ

ಪಾಕಿಸ್ತಾನ ವಿರುದ್ಧದ ಎರಡನೇ ಟೆಸ್ಟ್​ ಪಂದ್ಯದಲ್ಲೂ ದಕ್ಷಿಣ ಆಫ್ರಿಕಾ ಭರ್ಜರಿ ಗೆಲುವು ಸಾಧಿಸಿದೆ. ಕೇಪ್​ಟೌನ್​​ನಲ್ಲಿ ನಡೆದ ಪಂದ್ಯದಲ್ಲಿ 10 ವಿಕೆಟ್​ಗಳಿಂದ ಗೆದ್ದು ತವರಿನಲ್ಲಿ 2-0 ಅಂತರದಿಂದ ಸರಣಿಯನ್ನು ವಶಪಡಿಸಿಕೊಂಡಿದೆ. ಟಿ20ಐ ಸರಣಿ ಸೋತು, ಏಕದಿನ ಸರಣಿ ಕ್ಲೀನ್ ಸ್ವೀಪ್ ಮಾಡಿದ್ದ ಪಾಕಿಸ್ತಾನ ಆರಂಭಿಕ ಟೆಸ್ಟ್​ನಲ್ಲಿ ಪರಾಭವದ ಬಳಿಕ 2ನೇ ಟೆಸ್ಟ್ ಜಯಿಸಿ ಸರಣಿ ಡ್ರಾ ಮಾಡುವ ಲೆಕ್ಕಾಚಾರದಲ್ಲಿತ್ತು. ಆದರೀಗ ಫಾಲೋಆನ್​ಗೆ ಸಿಲುಕಿ ಹರಿಣಗಳ ಎದುರು ಮಂಡಿಯೂರಿದೆ. 

ಪಾಕ್ ನೀಡಿದ್ದ 58 ರನ್​ಗಳ ಗುರಿ ಬೆನ್ನಟ್ಟಿದ ಆಫ್ರಿಕಾ 4ನೇ ದಿನದ ಅಂತ್ಯದಲ್ಲಿ 7.1 ಓವರ್​​​ಗಳಲ್ಲೇ ಗೆದ್ದು ಬೀಗಿತು. ಟೆಂಬಾ ಬವುಮಾ ನಾಯಕನಾಗಿ ತಮ್ಮ ಅಜೇಯ ದಾಖಲೆಯನ್ನು ಹಾಗೆಯೇ ಉಳಿಸಿಕೊಂಡಿದ್ದಾರೆ. ಏಕೆಂದರೆ ಇದುವರೆಗೂ ನಾಯಕನಾಗಿ ಅವರು ಸೋಲೇ ಕಂಡಿಲ್ಲ. 34 ವರ್ಷದ ಬುಮ್ರಾ, 9 ಟೆಸ್ಟ್‌ಗಳಲ್ಲಿ ಸೌತ್ ಆಫ್ರಿಕಾ ತಂಡವನ್ನು ಮುನ್ನಡೆಸಿದ್ದು, 8 ಗೆಲುವು, ಡ್ರಾ ಹೊಂದಿದ್ದಾರೆ. ಸೌತ್ ಆಫ್ರಿಕಾ ಜೂನ್ 11ರಂದು ಡಬ್ಲ್ಯುಟಿಸಿ​ ಫೈನಲ್​ನಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಸೆಣಸಾಟ ನಡೆಸಲಿದ್ದಾರೆ.

ಇದನ್ನೂ ಓದಿ: ಸಿಬಿಎಸ್​​ಸಿ ಟಾಪರ್​, ಸೈಕಾಲಜಿ ಪದವಿ, ಬಾಸ್ಕೆಟ್ ಬಾಲ್ ಚಾಂಪಿಯನ್; ಇವರು ಭಾರತ ಮಹಿಳಾ ಕ್ರಿಕೆಟ್ ತಂಡದ ಹೊಸ ಪ್ರತಿಭೆ!

ಸೌತ್ ಆಫ್ರಿಕಾ ಭರ್ಜರಿ ಬ್ಯಾಟಿಂಗ್, ಬೃಹತ್ ಮೊತ್ತ

ಮೊದಲು ಬ್ಯಾಟಿಂಗ್ ನಡೆಸಿದ್ದ ಸೌತ್ ಆಫ್ರಿಕಾ ತಂಡವು, ರಿಯಾನ್ ರಿಕೆಲ್ಟನ್​ರ ದ್ವಿಶತಕ (259), ಟೆಂಬಾ ಬವುಮಾ (106) ಮತ್ತು ಕೈಲ್ ವೆರ್ರೆನ್ನೆ (100) ಅವರ ಶತಕಗಳ ನೆರವಿನಿಂದ ಆಫ್ರಿಕಾ 615 ರನ್​ಗಳ ಬೃಹತ್ ಮೊತ್ತ ಕಲೆ ಹಾಕಿತು. ಆರಂಭಿಕ ವಿಕೆಟ್​​ಗೆ 61 ರನ್​​ಗಳ ಜೊತೆಯಾಟ ಬಂದರೂ ತಂಡದ ಮೊತ್ತ 72 ರನ್ ಆಗುವಷ್ಟರಲ್ಲಿ ಮೂರು ವಿಕೆಟ್ ಕಳೆದುಕೊಂಡಿತು. ಆ ಬಳಿಕ ರಿಯಾನ್ ಮತ್ತು ಬವುಮಾ ಒಂದಾಗಿ ನಾಲ್ಕನೇ ವಿಕೆಟ್​ಗೆ 235 ರನ್​ ಸೇರಿಸಿದರು. ಇದೇ ವೇಳೆ ಇಬ್ಬರು ಭರ್ಜರಿ ಶತಕ ಸಿಡಿಸಿ ಮಿಂಚಿದರು.

ಆದರೆ ಬವುಮಾ 179 ಎಸೆತಗಳಲ್ಲಿ 9 ಬೌಂಡರಿ, 2 ಸಿಕ್ಸರ್ ಸಹಿತ 106 ರನ್ ಸಿಡಿಸಿ ಸಲ್ಮಾನ್ ಆಘಾ ಬೌಲಿಂಗ್​ನಲ್ಲಿ ನಿರ್ಗಮಿಸಿದರು. ಇವರ ಬೆನ್ನಲ್ಲೇ ಡೇವಿಡ್ ಬೆಡಿಂಗ್​ಹ್ಯಾಮ್ (5) ಕೂಡ ಬೇಗನೇ ಪೆವಿಲಿಯನ್ ಸೇರಿದರು. ನಂತರ 6ನೇ ವಿಕೆಟ್​​ಗೆ ರಿಯಾನ್ ಮತ್ತು ವೆರ್ರೆನ್ನೆ 148 ರನ್​ಗಳ ಪಾಲುದಾರಿಕೆ ಒದಗಿಸಿದರು. ಇದೇ ವೇಳೆ ರಿಯಾನ್ ತಮ್ಮ ಚೊಚ್ಚಲ ದ್ವಿಶತಕ ಬಾರಿಸಿ ದಾಖಲೆ ನಿರ್ಮಿಸಿದರು. ಮತ್ತೊಂದೆಡೆ ವೆರ್ರೆನ್ನೆ ಅಮೋಘ ಸೆಂಚುರಿ ಬಾರಿಸಿ ತಂಡದ ಮೊತ್ತ ಏರಿಸಿದರು. 147 ಎಸೆತಗಳಿಗೆ 9 ಬೌಂಡರಿ, 5 ಸಿಕ್ಸರ್ ಸಹಿತ 100 ರನ್ ಸಿಡಿಸಿ ಔಟಾದರು.

ಇದನ್ನೂ ಓದಿ: ಐಸಿಸಿ ಚಾಂಪಿಯನ್ಸ್ ಟ್ರೋಫಿ: ಭಾರತ ತಂಡದ ಉಪನಾಯಕನ ಸ್ಥಾನಕ್ಕೆ ಐವರ ನಡುವೆ ಪೈಪೋಟಿ, ಆಯ್ಕೆದಾರರಿಗೆ ತಲೆನೋವು

ಒಂದೆಡೆ ವಿಕೆಟ್ ಉದುರಲು ಆರಂಭಿಸಿದರೂ ತನ್ನ ಬ್ಯಾಟಿಂಗ್ ಆರ್ಭಟ ನಿಲ್ಲಿಸಿದ ರಿಯಾನ್, ತಾನು 250ರ ಗಡಿ ದಾಟಿದ್ದಲ್ಲದೆ ತಂಡದ ಮೊತ್ತವನ್ನೂ 600ರ ಗಡಿ ದಾಟಿಸಿದರು. 343 ಎಸೆತಗಳಲ್ಲಿ 29 ಬೌಂಡರಿ, 3 ಬೌಂಡರಿ ಸಹಿತ 259 ರನ್ ಸಿಡಿಸಿ ಔಟಾದರು. ಇವರಿಗೆ ಮಾರ್ಕೋ ಜಾನ್ಸನ್​ 60 ರನ್, ಕೇಶವ್ ಮಹಾರಾಜ್ 40 ರನ್ ಸಿಡಿಸಿ ಅದ್ಭುತ ಸಾಥ್ ಕೊಟ್ಟರು. ದಕ್ಷಿಣ ಆಫ್ರಿಕಾ ವಿರುದ್ಧ ಬೆಂಡೆತ್ತಿಸಿಕೊಂಡ ಪಾಕಿಸ್ತಾನದ​ ಬೌಲರ್​​ಗಳ ಪೈಕಿ ಮೊಹಮ್ಮದ್ ಅಬ್ಬಾಸ್, ಸಲ್ಮಾನ್ ಆಘಾ ತಲಾ 3 ವಿಕೆಟ್ ಪಡೆದರು. ಮಿರ್ ಹಮ್ಜಾ, ಖುರಾನ್ ಶಹಬಾಜ್ ತಲಾ 2 ವಿಕೆಟ್ ಉರುಳಿಸಿದರು.

58 ರನ್​ಗಳ ಗುರಿ ನೀಡಿದ ಪಾಕಿಸ್ತಾನ

ಈ ಮೊತ್ತಕ್ಕೆ ಉತ್ತರವಾಗಿ ಬ್ಯಾಟಿಂಗ್ ನಡೆಸಿದ ಪಾಕಿಸ್ತಾನ ತನ್ನ ಮೊದಲ ಇನ್ನಿಂಗ್ಸ್​​ನಲ್ಲಿ ವೈಫಲ್ಯ ಅನುಭವಿಸಿತು. ಪರಿಣಾಮ 194 ರನ್​ಗಳಿಗೆ ಆಲೌಟ್ ಆಯಿತು. ಇದರೊಂದಿಗೆ 421 ರನ್​ಗಳ ಹಿನ್ನಡೆ ಅನುಭವಿಸಿತು. ಹೀಗಾಗಿ ದಕ್ಷಿಣ ಆಫ್ರಿಕಾ ತಂಡವು ಪಾಕ್​ಗೆ ಫಾಲೋ ಆನ್​ ಹೇರಿತು. ಹೀಗಾಗಿ 2ನೇ ಇನ್ನಿಂಗ್ಸ್​ ಆರಂಭಿಸಿದ ಪಾಕಿಸ್ತಾನ ಪುಟಿದೇಳಿತು. ಶಾನ್ ಮಸೂದ್ ಅದ್ಭುತ ಶತಕ (145) ಮತ್ತು ಬಾಬರ್ ಅಜಮ್ (81) ಮತ್ತೊಂದು ಅರ್ಧಶತಕ ಸಿಡಿಸಿದರೆ, ಉಳಿದ ಬ್ಯಾಟರ್ಸ್ ಮತ್ತೆ ವೈಫಲ್ಯ ಅನುಭವಿಸಿದರು. ಪರಿಣಾಮ 478 ರನ್​ಗಳಿಗೆ ಆಲೌಟ್ ಪಾಕಿಸ್ತಾನ, ಆಫ್ರಿಕಾಗೆ 58 ರನ್​ಗಳ ಗುರಿ ನೀಡಿತು. ಆದರೆ ಈ ಗುರಿಯನ್ನು ವಿಕೆಟ್ ನಷ್ಟವಿಲ್ಲದೆ 7.1 ಓವರ್​​ಗಳಲ್ಲೇ ಗುರಿ ಮುಟ್ಟಿತು.

ಇದನ್ನೂ ಓದಿ: ಶಫಾಲಿ ವರ್ಮಾ ಔಟ್, ಸ್ಮೃತಿ ಮಂಧಾನ ನಾಯಕಿ, ಹರ್ಮನ್​ಗೆ ವಿಶ್ರಾಂತಿ; ಐರ್ಲೆಂಡ್ ವಿರುದ್ಧ ಸರಣಿಗೆ ಭಾರತ ತಂಡ ಪ್ರಕಟ