ಕನ್ನಡ ಸುದ್ದಿ  /  Cricket  /  Sunrisers Hyderabad Offers Captaincy To Only Successful Player Fans Reacts Against Srh Pat Cummins Aiden Markram Ipl Prs

ವೈಫಲ್ಯ ಅನುಭವಿಸಿದರೆ ಕಿತ್ತೆಸೆಯುವ ಚಾಳಿ; ಆವೃತ್ತಿಗೊಬ್ಬರಂತೆ ನಾಯಕರ ನೇಮಕ, ಹೀಗಿದೆ ಎಸ್​ಆರ್​ಎಚ್ ಇತಿಹಾಸ

Sunrisers Hyderabad : ಪ್ಯಾಟ್ ಕಮಿನ್ಸ್ ಅವರನ್ನು ನಾಯಕನಾಗಿ ನೇಮಿಸಿದ ಬೆನ್ನಲ್ಲೇ ಸನ್​ರೈಸರ್ಸ್ ಹೈದರಾಬಾದ್ ಮೇಲೆ ಆಕ್ರೋಶ ವ್ಯಕ್ತವಾಗಿದೆ. ಆಟಗಾರರ ಮೇಲೆ ನಂಬಿಕೆ ಇಡದೆ ಸೀಸನ್​ಗೊಬ್ಬರಂತೆ ನಾಯಕರನ್ನು ನೇಮಿಸುವುದಕ್ಕೆ ಅಭಿಮಾನಿಗಳು ಕಿಡಿಕಾರುತ್ತಿದ್ದಾರೆ.

ವೈಫಲ್ಯ ಅನುಭವಿಸಿದರೆ ಕಿತ್ತೆಸೆಯುವ ಚಾಳಿ; ಆವೃತ್ತಿಗೊಬ್ಬರಂತೆ ನಾಯಕರ ನೇಮಕ
ವೈಫಲ್ಯ ಅನುಭವಿಸಿದರೆ ಕಿತ್ತೆಸೆಯುವ ಚಾಳಿ; ಆವೃತ್ತಿಗೊಬ್ಬರಂತೆ ನಾಯಕರ ನೇಮಕ

17ನೇ ಆವೃತ್ತಿಯ ಇಂಡಿಯನ್ ಪ್ರೀಮಿಯರ್​ ಲೀಗ್ (IPL 2024)​​​ ಆರಂಭಕ್ಕೆ ದಿನಗಣನೆ ಆರಂಭಗೊಂಡಿದೆ. ಮಾರ್ಚ್ 22ರಿಂದ ಶ್ರೀಮಂತ ಲೀಗ್​ಗೆ ಚಾಲನೆ ಸಿಗಲಿದೆ. ಟೂರ್ನಿಗೆ ಕೆಲವೇ ದಿನಗಳು ಬಾಕಿ ಇರುವಾಗ ಸನ್​ರೈಸರ್ಸ್ ಹೈದರಾಬಾದ್ (Sunrisers Hyderabad) ತಂಡದ ನಾಯಕತ್ವದ ಬದಲಾವಣೆಯಾಗಿದೆ. ಸೌತ್​ ಆಫ್ರಿಕಾದ ಏಡನ್ ಮಾರ್ಕ್ರಮ್ ಅವರನ್ನು ಕೆಳಗಿಳಿಸಿ ಏಕದಿನ ವಿಶ್ವಕಪ್ ಗೆದ್ದುಕೊಟ್ಟ ಆಸ್ಟ್ರೇಲಿಯಾದ ಪ್ಯಾಟ್ ಕಮಿನ್ಸ್ ಅವರಿಗೆ ನಾಯಕತ್ವ ವಹಿಸಲಾಗಿದೆ.

ಆದರೆ, ಕ್ಯಾಪ್ಟನ್ಸಿ ಬದಲಾವಣೆ ಬೆನ್ನಲ್ಲೇ ಸನ್​ರೈಸರ್ಸ್​ ಹೈದರಾಬಾದ್ ನಡೆಗೆ ಟೀಕೆ ವ್ಯಕ್ತವಾಗಿದೆ. ಆವೃತ್ತಿಗೊಬ್ಬರಂತೆ ನಾಯಕರನ್ನು ಬದಲಿಸಿ ಆಟಗಾರರ ಆತ್ಮ ವಿಶ್ವಾಸವನ್ನು ಕುಸಿಯುವಂತೆ ಮಾಡುತ್ತಿದೆ. ಇದೇ ಕಾರಣಕ್ಕೆ ಫ್ರಾಂಚೈಸಿ ಫೈನಲ್​ಗೇರಲು ಪದೇ ಪದೇ ವಿಫಲವಾಗುತ್ತಿದೆ ಎಂದು ಅಭಿಮಾನಿಗಳು ಕಿಡಿಕಾರಿದ್ದಾರೆ. ಒಂದೇ ಒಂದು ವರ್ಷ ಫೇಲ್ ಆಗಿದ್ದಕ್ಕೆ ನಾಯಕತ್ವದಿಂದ ತೆಗೆದುಹಾಕುವುದು ಯಾವ ರೀತಿಯ ನಂಬಿಕೆ ಎಂದು ಸೋಷಿಯಲ್ ಮೀಡಿಯಾದಲ್ಲಿ ಪ್ರಶ್ನಿಸುತ್ತಿದ್ದಾರೆ.

ಮಾರ್ಕ್ರಮ್ ಕಿತ್ತಾಕಿ ಕಮಿನ್ಸ್​ಗೆ ಮಣೆ

2023ರಲ್ಲಿ ಹೈದರಾಬಾದ್ ತಂಡವನ್ನು ಸೇರಿಕೊಂಡ ಏಡನ್ ಮಾರ್ಕ್ರಮ್ ಅವರನ್ನು ನೂತನ ನಾಯಕರನನ್ನಾಗಿ ನೇಮಿಸಿತು. ಆದರೆ ಕಳೆದ ಆವೃತ್ತಿಯಲ್ಲಿ ಕಳಪೆ ನಾಯಕತ್ವ ನೀಡಿದ ಕಾರಣ ಅವರನ್ನು ಕೆಳಗಿಳಿಸಿದೆ. 2023ರ ಆರಂಭದಲ್ಲಿ ನಡೆದ ಎಸ್​ಎಟಿ20 ಲೀಗ್​​ನಲ್ಲಿ ಎಸ್​ಆರ್​​ಎಚ್​ ಮಾಲೀಕತ್ವದ ಸನ್​ರೈಸರ್ಸ್ ಈಸ್ಟರ್ನ್ ಕೇಪ್ ತಂಡವನ್ನು ಚಾಂಪಿಯನ್ ಮಾಡಿದ್ದ ಕಾರಣಕ್ಕೆ ಮಾರ್ಕ್ರಮ್​ರನ್ನು ಖರೀದಿಸಿ ನಾಯಕತ್ವ ನೀಡಿತ್ತು.

ಅಂದು ಯಶಸ್ವಿ ಕ್ಯಾಪ್ಟನ್ ಆಗಿದ್ದ ಕಾರಣಕ್ಕೆ ಐಪಿಎಲ್​​ನಲ್ಲೂ ತಂಡದ ಸಾರಥ್ಯ ವಹಿಸಿದ್ದ ಎಸ್​ಆರ್​ಎಚ್​, ಇಂದು ವೈಫಲ್ಯ ಅನುಭವಿಸಿದ್ದಾರೆಂದು ಜವಾಬ್ದಾರಿಯಿಂದ ತೊಲಗಿಸಿದೆ. ಆಟಗಾರರ ಯಶಸ್ಸನ್ನು ಕಂಡು ಅವರಿಗೆ ಮಣೆ ಹಾಕುವ ಎಸ್​ಆರ್​ಎಚ್​, ವೈಫಲ್ಯ ಅನುಭವಿಸಿದ ಅದೇ ಆಟಗಾರರಿಗೆ ಕೊಕ್ ನೀಡುವುದು ಯಾವ ನ್ಯಾಯ. ಒಂದೇ ಆವೃತ್ತಿಯಲ್ಲಿ ನಾಯಕತ್ವ ಕೆಟ್ಟದಾಗಿತ್ತು ಎಂದರೆ, ಅವರು ಕೆಟ್ಟ ನಾಯಕರೆಂದು ಅಲ್ಲ. ಕಮಿನ್ಸ್​​ಗೆ ನಾಯಕತ್ವ ನೀಡಲು ಆತನ ಯಶಸ್ಸೇ ಕಾರಣವಾಗಿದೆ.

2023ರಲ್ಲಿ ವಿಶ್ವಕಪ್, ಡಬ್ಲ್ಯುಟಿಸಿ ಗೆದ್ದಿದ್ದ ಕಮಿನ್ಸ್

ಪ್ಯಾಟ್ ಕಮಿನ್ಸ್​ಗೆ ನಾಯಕತ್ವ ನೀಡಲು ಬೇರೆ ಕಾರಣವಲ್ಲ. ಅವರು ನಾಯಕನಾಗಿ ಕಳೆದ ವರ್ಷ ಅದ್ಭುತ ಪ್ರದರ್ಶನ ನೀಡಿದ್ದರು. ಎರಡು ಐಸಿಸಿ ಟ್ರೋಫಿ ಗೆದ್ದಿದ್ದರು. ವಿಶ್ವ ಟೆಸ್ಟ್​ ಚಾಂಪಿಯನ್​ಶಿಪ್ ಮತ್ತು ಏಕದಿನ ವಿಶ್ವಕಪ್ ಟೂರ್ನಿಯಲ್ಲಿ ಆಸ್ಟ್ರೇಲಿಯಾ ತಂಡವನ್ನು ಚಾಂಪಿಯನ್ ಮಾಡಿದ್ದರು. ಅಲ್ಲದೆ, ದ್ವಿಪಕ್ಷೀಯ ಸರಣಿಗಳಲ್ಲೂ ಅಮೋಘ ಪ್ರದರ್ಶನ ನೀಡಿದ್ದರು. ಹೀಗಾಗಿ ಅವರ ಮೇಲೆ 20.50 ಕೋಟಿ ಸುರಿದ ಎಸ್​ಆರ್​ಎಚ್ ಈಗ ನಾಯಕತ್ವವನ್ನೂ ನೀಡಿದೆ.

ಕಳೆದ ಬಾರಿ ಎಸ್​ಆರ್​​ಎಚ್​ ಪ್ರದರ್ಶನ

ಕಳೆದ ಬಾರಿ ಸನ್​ರೈಸರ್ಸ್ ಅತ್ಯಂತ ಕಳಪೆ ಪ್ರದರ್ಶನ ನೀಡಿತ್ತು. ತಂಡದಲ್ಲಿ ಘಟಾನುಘಟಿ ಆಟಗಾರರನ್ನೇ ಹೊಂದಿದ್ದರೂ ಅವರು ನಿರೀಕ್ಷಿತ ಪ್ರದರ್ಶನ ನೀಡುವಲ್ಲಿ ವಿಫಲವಾಗಿದ್ದರು. ಈ ಕಾರಣಕ್ಕೆ ಕಳೆದ ವರ್ಷ ಅಂಕಪಟ್ಟಿಯಲ್ಲಿ ಕೊನೆಯ ಸ್ಥಾನ ಪಡೆದಿತ್ತು. ಆಡಿದ 14 ಪಂದ್ಯಗಳಲ್ಲಿ 4 ಗೆಲುವು, 10 ಸೋಲಿನೊಂದಿಗೆ 8 ಅಂಕ ಮಾತ್ರ ಪಡೆದಿತ್ತು. ಈ ಬಾರಿ ಪುಟಿದೇಳುವ ವಿಶ್ವಾಸದಲ್ಲಿದೆ.

ಆಟಗಾರರ ಮೇಲೆ ನಂಬಿಕೆ ಇಡಲ್ಲ ಎಸ್​ಆರ್​ಎಚ್​

ಆಟಗಾರರ ಪ್ರದರ್ಶನ ಹೊರಬೇಕೆಂದರೆ ನಂಬಿಕೆ ಬಹಳ ಮುಖ್ಯ. ಆದರೆ ಸನ್​ರೈಸರ್ಸ್​ ಆ ಕೆಲಸಕ್ಕೆ ಮುಂದಾಗಲ್ಲ. ಈ ವರ್ಷ ಸರಿಯಾದ ಪ್ರದರ್ಶನ ನೀಡಲಿಲ್ಲವೆಂದರೆ ಅಂತಹ ಆಟಗಾರರನ್ನು ಲೀಗ್​ ಮುಗಿದ ಬೆನ್ನಲ್ಲೇ ಮಿನಿ ಹರಾಜಿಗೆ ಬಿಟ್ಟು ಬಿಡುತ್ತದೆ. ಇದು ಆಟಗಾರರ ಆತ್ಮ ವಿಶ್ವಾಸ ಕುಸಿಯುವಂತೆ ಮಾಡುತ್ತದೆ. ಆಟಗಾರರ ಮೇಲೆ ನಂಬಿಕೆ ಇಡದ ಕಾರಣ ಫ್ರಾಂಚೈಸಿ ಸತತ ವೈಫಲ್ಯ ಅನುಭವಿಸುತ್ತಿದೆ.

ವಾರ್ನರ್​-ವಿಲಿಯಮ್ಸನ್ ಹೆಚ್ಚು ಅವಧಿ

2013ರ ಸನ್​ರೈಸರ್ಸ್ ಹೈದರಾಬಾದ್ ಐಪಿಎಲ್​ಗೆ ಎಂಟ್ರಿಕೊಟ್ಟಿತು. ಅಂದಿನಿಂದ ಈವರೆಗೂ ಅಂದರೆ 11 ಆವೃತ್ತಿಗಳಲ್ಲಿ 10 ಮಂದಿ ನಾಯಕರಾಗಿ ನೇಮಕಗೊಂಡಿದ್ದಾರೆ. ಆದರೆ ಈ ಅವಧಿಯಲ್ಲಿ ದೀರ್ಘಕಾಲ ನಾಯಕರಾಗಿ ಸೇವೆ ಸಲ್ಲಿಸಿದ್ದು ಮಾತ್ರ ಡೇವಿಡ್ ವಾರ್ನರ್ ಮತ್ತು ಕೇನ್ ವಿಲಿಯಮ್ಸನ್. ವಾರ್ನರ್ 2015ರಿಂದ 2021ರ ತನಕ ನಾಯಕನಾಗಿದ್ದರು. 67 ಪಂದ್ಯಗಳಲ್ಲಿ ಮುನ್ನಡೆಸಿದ್ದರು. ಇನ್ನು ಕೇನ್ ವಿಲಿಯಮ್ಸನ್ (2018-2022 ವಾರ್ನರ್ ಅಲಭ್ಯತೆ ಸೇರಿ) 46 ಪಂದ್ಯಗಳಲ್ಲಿ ನಾಯಕನಾಗಿದ್ದರು. ಆದರೆ ಒಬ್ಬರು ಪ್ರಶಸ್ತಿ ಗೆದ್ದುಕೊಟ್ಟರೆ, ಮತ್ತೊಬ್ಬರು ತಂಡವನ್ನು ರನ್ನರ್​ಅಪ್ ಮಾಡಿದ್ದರು. ಆದರೆ ಅವರೊಂದಿಗೆ ಅಗೌರವವಾಗಿ ವರ್ತಿಸಿ ತಂಡದಿಂದ ಕೈಬಿಟ್ಟಿತು.

2013ರಲ್ಲಿ ಎಸ್​ಆರ್​ಎಚ್​ಗೆ ಮೂವರು ನಾಯಕರು

ಐಪಿಎಲ್​ಗೆ ಪ್ರವೇಶಿಸಿದ 2013ರ ವರ್ಷವೇ ಆ ಫ್ರಾಂಚೈಸಿಯನ್ನು ಮೂವರು ಮುನ್ನಡೆಸಿದ್ದರು. ಮೊದಲು ಕುಮಾರ್ ಸಂಗಕ್ಕಾರ, ಕ್ಯಾಮರೂನ್ ವೈಟ್, ಧವನ್ ನಾಯಕನಾಗಿದ್ದರು. ಇನ್ನು ಶಿಖರ್ ಧವನ್ 1 ವರ್ಷ, ಡರೇನ್ ಸ್ಯಾಮಿ 1 ವರ್ಷ, ಭುವನೇಶ್ವರ್ ಕುಮಾರ್ 8 ಪಂದ್ಯ, ಮನೀಶ್ ಪಾಂಡೆ 1 ಪಂದ್ಯ, ಮಾರ್ಕ್ರಮ್ 1 ವರ್ಷ ಎಸ್​ಆರ್​ಎಚ್​ ಪರ ನಾಯಕರಾಗಿ ಸೇವೆ ಸಲ್ಲಿಸಿದ್ದಾರೆ.

IPL_Entry_Point