ನಿಮ್ಮೊಂದಿಗೆ ನಮ್ಮ ಮರ್ಯಾದೆಯೂ ತೆಗೆಯುತ್ತಿದ್ದೀರಿ; ಹಸನ್ ರಾಝಾ ವಿವಾದಾತ್ಮಕ ಹೇಳಿಕೆಗೆ ವಾಸೀಂ ಅಕ್ರಮ್ ತಿರುಗೇಟು

ಏಕದಿನ ವಿಶ್ವಕಪ್ ಟೂರ್ನಿಯಲ್ಲಿ (ODI World Cup 2023) ಭಾರತೀಯ ಬೌಲರ್​​ಗಳಿಗೆ ಐಸಿಸಿ (ICC) ಮತ್ತು ಬಿಸಿಸಿಐ (BCCI) ಸ್ಪೆಷಲ್​ ಬಾಲ್​​ಗಳನ್ನು ನೀಡುತ್ತಿದೆ ಎಂದು ವಿವಾದಾತ್ಮಕ ಹೇಳಿಕೆ ನೀಡಿದ್ದ ಪಾಕಿಸ್ತಾನದ ಮಾಜಿ ಕ್ರಿಕೆಟಿಗ ಹಸನ್ ರಾಝಾಗೆ (Hasan Raza) ಅದೇ ದೇಶದ ದಿಗ್ಗಜ ಕ್ರಿಕೆಟಿಗ ವಾಸೀಂ ಅಕ್ರಮ್ (Wasim Akram) ತಿರುಗೇಟು ಕೊಟ್ಟಿದ್ದಾರೆ. ಇಂತಹ ಹೇಳಿಕೆ ನೀಡುವ ಮೂಲಕ ನೀವಷ್ಟೇ ಅಲ್ಲ, ನಮ್ಮ ಮರ್ಯಾದೆಯೂ ತೆಗೆಯುತ್ತಿದ್ದೀರಿ ಎಂದು ಹೇಳಿದ್ದಾರೆ.

ನವೆಂಬರ್ 2ರಂದು ಮುಂಬೈನ ವಾಂಖೆಡೆ ಮೈದಾನದಲ್ಲಿ ನಡೆದ ಪಂದ್ಯದಲ್ಲಿ ಭಾರತೀಯ ಬೌಲರ್​​ಗಳ ಘಾತಕ ಬೌಲಿಂಗ್ ದಾಳಿಗೆ ತತ್ತರಿಸಿದ ಶ್ರೀಲಂಕಾ ಕೇವಲ 55 ರನ್​ಗಳಿಗೆ ಕುಸಿದಿತ್ತು. ಈ ಪಂದ್ಯದ ಬೆನ್ನಲ್ಲೇ ಪಾಕ್ ಚಾನೆಲ್​ವೊಂದರಲ್ಲಿ ವಿಶ್ಲೇಷಕರಾಗಿ ಭಾಗವಹಿಸಿದ್ದ ಹಸನ್ ರಾಝಾ, ಸಂದರ್ಶಕರ ಪ್ರಶ್ನೆಗೆ ಉತ್ತರಿಸುವಾಗ ನಾಲಿಗೆಯ ಹರಿಯಬಿಟ್ಟಿದ್ದರು. ಇದರಿಂದ ಸಾಕಷ್ಟು ಟೀಕೆಯೂ ವ್ಯಕ್ತವಾಗಿದೆ.

ರಾಝಾ ಹೇಳಿದ್ದೇನು?

ವಿಶ್ವಕಪ್​​ನಲ್ಲಿ ಉಳಿದ ತಂಡಗಳಿಗೆ ಹೋಲಿಸಿದರೆ, ಭಾರತದ ತಂಡಕ್ಕೆ ಐಸಿಸಿ ಮತ್ತು ಬಿಸಿಸಿಐ ಹೆಚ್ಚು ಸೀಮ್ ಮತ್ತು ಸ್ವಿಂಗ್​ ಆಗುವ ಬಾಲ್​​ಗಳನ್ನೇ ನೀಡುತ್ತಿವೆ. ಇದೇ ಕಾರಣಕ್ಕೆ ಮೆನ್​ ಇನ್ ಬ್ಲೂ ಬೌಲರ್​​ಗಳು ಪರಿಣಾಮಕಾರಿ ಬೌಲಿಂಗ್ ನಡೆಸಲು ಸಾಧ್ಯವಾಗುತ್ತಿದೆ. ಇದು ತನಿಖೆ ಆಗಬೇಕು ಎಂದು ವಿವಾದಾತ್ಮಕ ಹೇಳಿಕೆ ನೀಡಿದ್ದರು. ಈ ಬಗ್ಗೆ ಕ್ರಿಕೆಟ್​ ವಲಯದಲ್ಲಿ ಸಾಕಷ್ಟು ಚರ್ಚೆಯನ್ನು ಹುಟ್ಟು ಹಾಕಿತ್ತು.

ವಾಸೀಂ ಅಕ್ರಮ್ ಕಟು ಟೀಕೆ

ರಾಝಾ ಅವರು ಮಾಡಿದ್ದ ಗಂಭೀರ ಆರೋಪಕ್ಕೆ ಪ್ರತಿಕ್ರಿಯಿಸಿದ ಪಾಕ್ ಮಾಜಿ ನಾಯಕ ವಾಸಿಂ ಅಕ್ರಮ್, ತಿರುಗೇಟು ನೀಡಿದ್ದಾರೆ. ಸದ್ಯ ಅಕ್ರಮ್ ಟೀಕಿಸಿದ್ದು, ನೀವು ಮಾತ್ರವಲ್ಲದೆ ನಮಗೂ ಮುಜುಗರ ತರುವಂತೆ ಮಾಡುತ್ತಿದ್ದೀರಿ ಎಂದರು. ಚೆಂಡುಗಳ ಆಯ್ಕೆ ಹೇಗೆ ಮಾಡಲಾಗುತ್ತದೆ ಎಂಬುದರ ಕುರಿತು ಸಹ ವಿವರಿಸಿದ ವಾಸೀಂ ಅಕ್ರಮ್, ರಾಝಾರ ಬಾಲಿಶ ಹೇಳಿಕೆ ತಿರುಗೇಟು ಕೊಟ್ಟಿದ್ದಾರೆ.

ಮ್ಯಾಚ್​​ಗೂ ಮುನ್ನ ಅಂಪೈರ್​​ಗಳು 12 ಚೆಂಡುಗಳ ಬಾಕ್ಸ್​​ನೊಂದಿಗೆ ಬೌಲರ್​​ಗಳ ತರುತ್ತಾರೆ. ಅವರು ಆದ್ಯತೆಯ ಅನುಗುಣವಾಗಿ ಎರಡು ಚೆಂಡುಗಳನ್ನು ಆಯ್ಕೆ ಮಾಡುತ್ತಾರೆ. ಉಳಿದ 10 ಚೆಂಡುಗಳನ್ನು 4ನೇ ಅಂಪೈರ್​​​ ಕೊಂಡೊಯ್ಯುತ್ತಾರೆ. ಬಳಿಕ ಮೊದಲು ಬ್ಯಾಟಿಂಗ್ ನಡೆಸಿದ ತಂಡವೂ ಮತ್ತೆ ಬೌಲಿಂಗ್​​ಗಿಳಿಯುವಾಗ ಇದೇ ರೀತಿ ಮಾಡಲಾಗುತ್ತದೆ. ಆಗಲೂ ಎರಡು ಚೆಂಡುಗಳನ್ನು ಆಯ್ಕೆ ಮಾಡುತ್ತಾರೆ ಎಂದರು.

ಜಗತ್ತಿನ ಮುಂದೆ ಅವಮಾನಿಸುತ್ತಿದ್ದೀರಿ?

ಇದು ಎಲ್ಲಾ ಪಂದ್ಯಗಳಲ್ಲೂ ಇದೇ ಕ್ರಮ ಜರುಗುತ್ತದೆ. ಆದರೆ ಭಾರತದ ಬೌಲರ್ಸ್​​ಗೆ ಬೇರೆ ಚೆಂಡು ನೀಡಲಾಗುತ್ತದೆ ಎಂಬುದು ತಪ್ಪು. ಕಳೆದ ಎರಡು ದಿನಗಳಿಂದ ಈ ಆರೋಪದ ಬಗ್ಗೆ ಕೇಳುತ್ತಿದ್ದೆ. ನೀವು ನಿಮ್ಮನ್ನು ಮುಜುಗರಕ್ಕೆ ಒಳಗಾಗುವುದಲ್ಲದೆ, ಜಗತ್ತಿನ ಮುಂದೆ ನೀವು ನಮ್ಮನ್ನು ಅವಮಾನಿಸುತ್ತೀರಿ ಎಂದು ಎ ಸ್ಪೋರ್ಟ್ಸ್‌ನಲ್ಲಿ ಹೇಳಿದ್ದಾರೆ. ವಾಸೀಂ ಅಕ್ರಮ್ ಭಾರತದ ಬೌಲಿಂಗ್​ ವಿಭಾಗವನ್ನೂ ಹೊಗಳಿದರು.

ಭಾರತಕ್ಕೆ ಭರ್ಜರಿ ಗೆಲುವು

ಶ್ರೀಲಂಕಾ ವಿರುದ್ಧ ಟೀಮ್ ಇಂಡಿಯಾ 302 ರನ್​ಗಳ ದಾಖಲೆಯ ಗೆಲುವು ಸಾಧಿಸಿತು. ಭಾರತೀಯ ಬೌಲರ್​​ಗಳ ದಾಳಿಗೆ ತತ್ತರಿಸಿದ ಲಂಕಾ 55 ರನ್​ಗಳಿಗೆ ಸರ್ವಪತನಗೊಂಡಿತು. ಮೊಹಮ್ಮದ್ ಶಮಿ 5 ವಿಕೆಟ್, ಸಿರಾಜ್ 3, ಜಸ್ಪ್ರೀತ್ ಬುಮ್ರಾ, ರವೀಂದ್ರ ಜಡೇಜಾ ತಲಾ 1 ವಿಕೆಟ್ ಪಡೆದರು. ಟೀಮ್ ಇಂಡಿಯಾ ಅದ್ಭುತ ಬೌಲಿಂಗ್ ಪ್ರದರ್ಶನ ನೀಡುತ್ತಿರುವ ಹಿನ್ನೆಲೆ ಅರಗಿಸಿಕೊಳ್ಳಲಾಗದೆ ಈ ರೀತಿ ಹೇಳಿಕೆ ನೀಡುತ್ತಿದ್ದಾರೆ ಎಂದು ಅಭಿಮಾನಿಗಳು ಟೀಕೆ ಮಾಡುತ್ತಿದ್ದಾರೆ.