ಅಡಿಲೇಡ್ ಟೆಸ್ಟ್​​ನಲ್ಲಿ ಭಾರತ ತಂಡ ಗೆದ್ದರೆ ಅಥವಾ ಸೋತರೆ ಡಬ್ಲ್ಯುಟಿಸಿ ಪಾಯಿಂಟ್ಸ್ ಟೇಬಲ್​​ ಬೀರುವ ಪರಿಣಾಮ ಏನು?

ಬಾರ್ಡರ್​ ಗವಾಸ್ಕರ್ ಟ್ರೋಫಿಯಲ್ಲಿ ಭಾರತ ಮತ್ತು ಆಸ್ಟ್ರೇಲಿಯಾ ನಡುವಿನ ಎರಡನೇ ಟೆಸ್ಟ್ ಪಂದ್ಯ ಅಡಿಲೇಡ್​ನ ಓವಲ್ ಕ್ರಿಕೆಟ್​ ಮೈದಾನದಲ್ಲಿ ನಡೆಯುತ್ತಿದೆ. ಇದು ಪಿಂಕ್ ಬಾಲ್ ಟೆಸ್ಟ್ ಪಂದ್ಯವಾಗಿದ್ದು, ಹಗಲು-ರಾತ್ರಿ ನಡೆಯಲಿದೆ. ಅಡಿಲೇಡ್ ಟೆಸ್ಟ್​ ಜಯಿಸಿ ಸರಣಿಯಲ್ಲಿ 2-0 ಮುನ್ನಡೆ ಸಾಧಿಸಲು ಬಯಸುತ್ತಿರುವ ಭಾರತ ತಂಡ, ವಿಶ್ವ ಟೆಸ್ಟ್ ಚಾಂಪಿಯನ್​ಶಿಪ್​ ಫೈನಲ್ ಪ್ರವೇಶಿಸುವ ಕನಸನ್ನು ಹೊಂದಿದೆ. ಮತ್ತೊಂದೆಡೆ, ಭಾರತ ಸೋತರೆ, ನಂಬರ್ -1 ಕಿರೀಟವನ್ನು ಕಳೆದುಕೊಳ್ಳುವ ಸಾಧ್ಯತೆ ಇದೆ. ಅಡಿಲೇಡ್ ಟೆಸ್ಟ್​​ನಲ್ಲಿ ಟೀಮ್ ಇಂಡಿಯಾದ ಗೆಲುವು ಅಥವಾ ಸೋಲು ಡಬ್ಲ್ಯುಟಿಸಿ ಪಾಯಿಂಟ್ಸ್ ಟೇಬಲ್ ಮೇಲೆ ಹೇಗೆ ಪರಿಣಾಮ ಬೀರುತ್ತದೆ ಎಂದು ತಿಳಿಯೋಣ.

ಭಾರತ ತಂಡ ಗೆದ್ದರೆ…

ಪ್ರಸ್ತುತ ಮೂರು ತಂಡಗಳ ನಡುವೆ ಡಬ್ಲ್ಯುಟಿಸಿ ಫೈನಲ್​​​ಗೆ ಕಠಿಣ ಸ್ಪರ್ಧೆ ಏರ್ಪಟ್ಟಿದೆ. ಈ ಪಟ್ಟಿಯಲ್ಲಿ ಭಾರತ ಶೇ 61.11 ಅಂಕಗಳೊಂದಿಗೆ ಮೊದಲ ಸ್ಥಾನದಲ್ಲಿದ್ದರೆ, ದಕ್ಷಿಣ ಆಫ್ರಿಕಾ ಶೇ 59.26 ಅಂಕಗಳೊಂದಿಗೆ ಎರಡನೇ ಸ್ಥಾನದಲ್ಲಿದೆ. ಆಸ್ಟ್ರೇಲಿಯಾ ಶೇ 57.69 ಅಂಕ ಪಡೆದು ಮೂರನೇ ಸ್ಥಾನದಲ್ಲಿದೆ. ಈ ಮೂರು ತಂಡಗಳು ಫೈನಲ್ ಪ್ರವೇಶಿಸಲು ಪ್ರಬಲ ಪೈಪೋಟಿ  ನೀಡುತ್ತಿವೆ. ಅಡಿಲೇಡ್ ಟೆಸ್ಟ್​ನಲ್ಲಿ ಭಾರತ ಸೋತರೆ, ಸರಣಿಯಲ್ಲಿ ತನ್ನ ಮುನ್ನಡೆಯನ್ನು ಕಳೆದುಕೊಳ್ಳುತ್ತದೆ. ಜೊತೆಗೆ ಡಬ್ಲ್ಯುಟಿಸಿ ಪಾಯಿಂಟ್ಸ್ ಟೇಬಲ್​ನಲ್ಲಿ ನಂಬರ್​ 1 ಸ್ಥಾನವನ್ನೂ ಕಳೆದುಕೊಳ್ಳುವುದರ ಜತೆಗೆ ಗೆಲುವಿನ ಶೇಕಡವಾರು 57.29 ಅಂಕಕ್ಕೆ ಕುಸಿಯಲಿದೆ. ಆಸ್ಟ್ರೇಲಿಯಾ ಗೆಲುವಿನ ಶೇಕಡವಾರು 60.71 ಅಂಕಕ್ಕೆ ಏರಿಕೆಯಾಗುವುದರ ಜೊತೆಗೆ ನಂಬರ್ ಒನ್ ಪಟ್ಟಕ್ಕೂ ಏರಲಿದೆ.

ಭಾರತ ತಂಡ ಸೋತರೆ…

ಮತ್ತೊಂದೆಡೆ, ಅಡಿಲೇಡ್​​​ನಲ್ಲಿ ಟೀಮ್ ಇಂಡಿಯಾ ಗೆಲುವು ಸಾಧಿಸಿದರೆ ಸರಣಿಯಲ್ಲಿ 2-0 ಮುನ್ನಡೆ ಸಾಧಿಸುವಲ್ಲಿ ಯಶಸ್ವಿಯಾಗಲಿದೆ. ಹಾಗೆಯೇ ಡಬ್ಲ್ಯುಟಿಸಿ ಪಾಯಿಂಟ್ಸ್ ಟೇಬಲ್​​ನಲ್ಲಿ ಅಗ್ರಸ್ಥಾನವನ್ನು ಉಳಿಸಿಕೊಳ್ಳಲಿದೆ. 2ನೇ ಟೆಸ್ಟ್​​ನಲ್ಲಿ ಕಾಂಗರೂ ಪಡೆ ಸೋಲಿಸಿದ ಬಳಿಕ ತಮ್ಮ ಖಾತೆಯಲ್ಲಿ 63.54 ಶೇಕಡಾ ಅಂಕ ಪಡೆಯಲಿದೆ. ಅದೇ ಸಮಯದಲ್ಲಿ ಆಸ್ಟ್ರೇಲಿಯಾ ಗೆಲುವಿನ ಶೇಕಡವಾರು 53.57ಕ್ಕೆ ಕುಸಿಯಲಿದೆ. ಮತ್ತೊಂದೆಡೆ ಶ್ರೀಲಂಕಾ ವಿರುದ್ಧ ನಡೆಯುತ್ತಿರುವ ಟೆಸ್ಟ್​​ನಲ್ಲಿ ದಕ್ಷಿಣ ಆಫ್ರಿಕಾ ಜಯಿಸಿದರೆ ಗೆಲುವಿನ ಶೇಕಡವಾರು 63.33 ರೊಂದಿಗೆ ಪಾಯಿಂಟ್ಸ್ ಟೇಬಲ್​ನಲ್ಲಿ ನಂ.1 ಸ್ಥಾನ ಪಡೆಯಲಿದೆ. ಒಂದು ವೇಳೆ ಶ್ರೀಲಂಕಾ ಗೆದ್ದರೆ ಶೇಕಡಾ 54.54ಕ್ಕೆ ಕುಸಿದು ಅಗ್ರ -3 ರಲ್ಲಿ ಸ್ಥಾನ ಪಡೆಯಬಹುದು. ಆಗ ದಕ್ಷಿಣ ಆಫ್ರಿಕಾ ಶೇಕಡಾ 53.33 ಅಂಕಗಳೊಂದಿಗೆ ನಾಲ್ಕನೇ ಸ್ಥಾನಕ್ಕೆ ಕುಸಿಯಬಹುದು.

ಇದನ್ನೂ ಓದಿ: ಟಿ20 ಇತಿಹಾಸದಲ್ಲಿ ಅತ್ಯಧಿಕ ಮೊತ್ತ, ಇನ್ನಿಂಗ್ಸ್​ನಲ್ಲಿ ಅತಿ ಹೆಚ್ಚು ಸಿಕ್ಸರ್​; ಇದು ಬರೋಡಾ ತಂಡ ನಡೆಸಿದ ದಾಖಲೆಗಳ ದಂಡಯಾತ್ರೆ

ಅಡಿಲೇಡ್​​ನಲ್ಲಿ ಕಳೆದ ಬಾರಿ ಭಾರತ ಹಗಲು-ರಾತ್ರಿ ಟೆಸ್ಟ್ ಪಂದ್ಯದಲ್ಲಿ ಭಾರತ ತಂಡ ಹೀನಾಯ ಸೋಲು ಅನುಭವಿಸಿತ್ತು. ಇಡೀ ತಂಡ ಮೊದಲ ಇನ್ನಿಂಗ್ಸ್​​ನಲ್ಲಿ ಕೇವಲ 36 ರನ್ ಗಳಿಸಿತ್ತು. ಪ್ರಸ್ತುತ ಆಡುತ್ತಿರುವ ಪಿಂಕ್ ಬಾಲ್ ಟೆಸ್ಟ್​​ನಲ್ಲೂ ಭೋಜನ ವಿರಾಮಕ್ಕೆ ಭಾರತ ತಂಡ 4 ವಿಕೆಟ್​​ಗಳನ್ನು ಕಳೆದುಕೊಂಡಿದೆ. ಯಶಸ್ವಿ ಜೈಸ್ವಾಲ್ ಗೋಲ್ಡನ್ ಡಕ್, ವಿರಾಟ್ ಕೊಹ್ಲಿ 7 ರನ್ ಗಳಿಸಿ ನಿರಾಸೆ ಮೂಡಿಸಿದರು. ಕೆಎಲ್ ರಾಹುಲ್ 37 ರನ್, ಶುಭ್ಮನ್ ಗಿಲ್ 31 ರನ್ ಬಾರಿಸಿ ತಂಡಕ್ಕೆ ಆಸರೆಯಾದರು. ಮಿಚೆಲ್ ಸ್ಟಾರ್ಕ್​ ಪ್ರಮುಖ ಮೂರು ವಿಕೆಟ್ ಪಡೆಯುವಲ್ಲಿ ಯಶಸ್ವಿಯಾದರು. ಭೋಜನ ವಿರಾಮಕ್ಕೆ ಭಾರತ 82-4. ಪ್ರಸ್ತುತ ರೋಹಿತ್ ಶರ್ಮಾ ಮತ್ತು ರಿಷಭ್ ಪಂತ್ ಕ್ರೀಸ್​ನಲ್ಲಿದ್ದಾರೆ.

ಇದನ್ನೂ ಓದಿ: ಹಗಲು-ರಾತ್ರಿ ಪಂದ್ಯಕ್ಕೆ ಕೆಂಪು ಚೆಂಡಿನ ಬದಲಿಗೆ ಪಿಂಕ್ ಬಾಲ್ ಬಳಸುವುದೇಕೆ; ಗುಲಾಬಿ ಚೆಂಡಿನ ಬೆಲೆಯೆಷ್ಟು, ವಿಶೇಷತೆಗಳೇನು?