Pathaan Break 10 Records: ಶಾರುಖ್ ಖಾನ್ ‘ಪಠಾಣ್’ ಹೊಡೆತಕ್ಕೆ ಪುಡಿಯಾದ 10 ದಾಖಲೆಗಳಿವು.. ವಿವರ ಇಲ್ಲಿದೆ..
ಪಠಾಣ್ ಸಿನಿಮಾ ಮೂಲಕ ಮರುಜನ್ಮ ಪಡೆದ ಶಾರುಖ್, ಇದೀಗ ಬಾಕ್ಸ್ ಆಫೀಸ್‌ನಲ್ಲಿ ಹಲವು ದಾಖಲೆಗಳನ್ನೂ ಹಿಂದಿಕ್ಕಿದ್ದಾರೆ.
Pathaan Break 10 Records: ಶಾರುಖ್ ಖಾನ್ ನಟನೆಯ ‘ಪಠಾಣ್’ ಸಿನಿಮಾ ಜನವರಿ 25ರಂದು ವಿಶ್ವದಾದ್ಯಂತ ಬಿಡುಗಡೆ ಆಗಿದೆ. ಈ ಮೊದಲೇ ಹೇಳಿಕೊಂಡಂತೆ ಈ ಚಿತ್ರಕ್ಕೆ ದೊಡ್ಡ ಮಟ್ಟದ ಓಪನಿಂಗ್‌ ಸಿಕ್ಕಿತ್ತು. ಬಾಕ್ಸ್‌ಆಫೀಸ್‌ನಲ್ಲಿ ಅಷ್ಟೇ ದೊಡ್ಡ ಮಟ್ಟದ ಕಲೆಕ್ಷನ್‌ ಫಸಲು ತೆಗೆಯಲಿದೆ ಎಂದೇ ನಿರೀಕ್ಷಿಸಲಾಗಿತ್ತು. ಈಗ ಅದು ನಿಜವಾಗಿದೆ. ಅಚ್ಚರಿಯ ರೀತಿಯಲ್ಲಿ ‘ಪಠಾಣ್’ ಸಿನಿಮಾ ಬಂಗಾರದ ಬೆಳೆಯನ್ನೇ ತೆಗೆದಿದೆ. ಬಿಡುಗಡೆಯಾದ ಮೊದಲ ದಿನ (ಜನವರಿ 25) ಅನಾಯಾಸವಾಗಿ 55 ಕೋಟಿ ರೂ. ಕಲೆಕ್ಷನ್‌ ಮಾಡಿ ಹೊಸ ದಾಖಲೆ ತನ್ನದಾಗಿಸಿಕೊಂಡಿದೆ.
ಕಳೆದ ವರ್ಷ ಪ್ಯಾನ್‌ ಇಂಡಿಯಾ ಮಟ್ಟದಲ್ಲಿ ಸದ್ದು ಮಾಡಿದ್ದ ಕನ್ನಡದ ‘ಕೆಜಿಎಫ್‌ 2’ ಸಿನಿಮಾ ದಾಖಲೆಯನ್ನು ‘ಪಠಾಣ್’ ಮುರಿದಿದೆ. ‘ಕೆಜಿಎಫ್‌ 2’ ಚಿತ್ರ ಹಿಂದಿ ಅವತರಣಿಕೆ ಮೊದಲ ದಿನ 53.95 ಕೋಟಿ ಗಳಿಕೆ ಕಂಡಿತ್ತು. ಅತಿ ಹೆಚ್ಚು ಗಳಿಕೆ ಕಂಡ ಸಿನಿಮಾಗಳ ಸಾಲಿನಲ್ಲಿ ಮೊದಲ ಸ್ಥಾನದಲ್ಲಿತ್ತು. ಇದೀಗ 55 ಕೋಟಿ ಕಲೆಕ್ಷನ್‌ ಮಾಡಿ ಮೊದಲ ಸ್ಥಾನ ಅಲಂಕರಿಸಿದೆ ‘ಪಠಾಣ್’. ಇನ್ನುಳಿದಂತೆ 51.60 ಕೋಟಿ ಗಳಿಸಿರುವ ವಾರ್ ಸಿನಿಮಾ ಮೂರನೇ ಸ್ಥಾನದಲ್ಲಿದ್ದರೆ, ಥಗ್ಸ್ ಆಫ್ ಹಿಂದೂಸ್ಥಾನ್‌ ಸಿನಿಮಾ 50.75 ಕೋಟಿ ಗಳಿಸಿ ನಾಲ್ಕನೇ ಸ್ಥಾನದಲ್ಲಿದೆ.
ಪಠಾಣ್ ಚಿತ್ರದ ಈ ದಾಖಲೆಗಳು ಇಷ್ಟಕ್ಕೆ ಮುಗಿದಿಲ್ಲ. ಇನ್ನೂ ಹತ್ತು ಹಲವು ದಾಖಲೆಗಳನ್ನು ಪಠಾಣ್ ಸಿನಿಮಾ ಮುರಿದಿದೆ. ಅದು ಬಿಡುಗಡೆಯಾದ ಸ್ಕ್ರೀನ್‌ಗಳ ಸಂಖ್ಯೆಯಲ್ಲಿರಬಹುದು, ಚಿತ್ರ ನಿರ್ಮಿಸಿದ ಯಶ್ ರಾಜ್ ಬ್ಯಾನರ್‌ಗೂ ಇದು ಹಲವು ವಿಶೇಷತೆಗಳನ್ನು ನೀಡಿದೆ. ಆ 10 ದಾಖಲೆಗಳನ್ನು ಆಜ್‌ ತಕ್‌ ವರದಿ ಮಾಡಿದೆ. ಹಾಗಾದರೆ, ಆ ಹತ್ತು ದಾಖಲೆಗಳನ್ನು ನೋಡುವುದಾದರೆ...
ಪಠಾಣ್ ದಾಖಲೆಗಳ ಪಟ್ಟಿ...
- 1. ಭಾರತದಲ್ಲಿ ಇದುವರೆಗೆ ಗರಿಷ್ಠ ಸಂಖ್ಯೆಯ ಸ್ಕ್ರೀನ್‌ಗಳಲ್ಲಿ ಬಿಡುಗಡೆಯಾದ ಮೊದಲ ಚಿತ್ರ ಪಠಾಣ್
- 2. ಬಾಕ್ಸ್ ಆಫೀಸ್‌ನಲ್ಲಿ ಮೊದಲ ದಿನ ಅತಿ ಹೆಚ್ಚು ಗಳಿಕೆ ಮಾಡಿದ ಹಿಂದಿ ಚಿತ್ರ ಪಠಾಣ್
- 3. ರಜೆಯಿಲ್ಲದ ದಿನದಂದು ಬಿಡುಗಡೆಯಾಗಿ ಮೊದಲ ದಿನವೇ ಅತಿ ಹೆಚ್ಚು ಗಳಿಸಿದ ಮೊದಲ ಚಿತ್ರ ಪಠಾಣ್
- 4. ವಾರ್ (53.35 ಕೋಟಿ) ಮತ್ತು ಥಗ್ಸ್ ಆಫ್ ಹಿಂದೂಸ್ತಾನ್ (52.25 ಕೋಟಿ) ನಂತರ ಬಾಕ್ಸ್ ಆಫೀಸ್‌ನಲ್ಲಿ ಮೊದಲ ದಿನ 50 ಕೋಟಿಗೂ ಹೆಚ್ಚು ಗಳಿಕೆ ಮಾಡಿದ ಯಶ್ ರಾಜ್ ಬ್ಯಾನರ್‌ನ ಮೂರನೇ ಚಿತ್ರ
- 5. ಏಕ್ ಥಾ ಟೈಗರ್ ಮತ್ತು ವಾರ್ ನಂತರ ದಾಖಲೆಗಳನ್ನು ನಿರ್ಮಿಸಿದ ಮೂರನೇ ಯಶ್ ರಾಜ್ ಸ್ಪೈ ಯೂನಿವರ್ಸ್ ಚಿತ್ರ
- 6. ಶಾರುಖ್ ಖಾನ್ ಅವರ ವೃತ್ತಿಜೀವನದ ಮೊದಲ ಅತಿ ಹೆಚ್ಚು ಗಳಿಕೆ ಮಾಡಿದ ಸಿನಿಮಾ ಎಂಬ ಖ್ಯಾತಿಯೂ ಪಠಾಣ್‌ಗೆ ಸಲ್ಲಬೇಕು
- 7. ಜಾನ್ ಅಬ್ರಹಾಂ ಅವರ ವೃತ್ತಿಜೀವನದಲ್ಲಿ ಮೊದಲ ದಿನದಲ್ಲಿ ಅತಿ ಹೆಚ್ಚು ಗಳಿಕೆ ಮಾಡಿದ ಮೊದಲ ಚಿತ್ರವೂ ಪಠಾಣ್
- 8. ದೀಪಿಕಾ ಪಡುಕೋಣೆ ಅವರ ವೃತ್ತಿಜೀವನದಲ್ಲಿ ಮೊದಲ ದಿನವೇ ಅತಿ ಹೆಚ್ಚು ಗಳಿಕೆ ಮಾಡಿದ ಮೊದಲ ಚಿತ್ರವಾಗಿ ಹೊರಹೊಮ್ಮಿದೆ ಪಠಾಣ್ ಸಿನಿಮಾ
- 9. ಮೊದಲ ದಿನದಲ್ಲಿ ಯಶ್ ರಾಜ್ ಫಿಲಂಸ್‌ನ ಅತಿ ಹೆಚ್ಚು ಗಳಿಕೆ ಮಾಡಿದ ಮೊದಲ ಚಿತ್ರ
- 10. ನಿರ್ದೇಶಕ ಸಿದ್ಧಾರ್ಥ್ ಆನಂದ್ ಅವರ ಸಿನಿಮಾ ಕೆರಿಯರ್‌ನಲ್ಲಿ ಅತಿ ಹೆಚ್ಚು ಗಳಿಕೆ ಕಂಡ ಮೊದಲ ಚಿತ್ರವೂ ಪಠಾಣ್.
