Veera Simha Reddy: 'ವೀರಸಿಂಹರೆಡ್ಡಿ' ಸಕ್ಸಸ್‌ ಖುಷಿಯನ್ನು ಸಹನಟಿ ಹನಿ ರೋಸ್ ಜೊತೆ ತಮ್ಮದೇ ಸ್ಟೈಲ್‌ನಲ್ಲಿ ಹಂಚಿಕೊಂಡ ಬಾಲಕೃಷ್ಣ
ಭಾನುವಾರದ ಸಕ್ಸಸ್‌ ಮೀಟ್‌ನಲ್ಲಿ ಬಾಲಕೃಷ್ಣ, ನಟಿ ಹನಿ ರೋಸ್‌ನೊಂದಿಗೆ ಗೆಲುವಿನ ಖುಷಿ ಹಂಚಿಕೊಳ್ಳುತ್ತಿರುವ ಫೋಟೋವೊಂದು ಬಹಳ ವೈರಲ್‌ ಆಗುತ್ತಿದೆ. ಬಾಲಯ್ಯ ಸ್ಟೈಲ್‌ ಕಂಡು ಅಭಿಮಾನಿಗಳು ಆಶ್ಚರ್ಯ ವ್ಯಕ್ತಪಡಿಸಿದ್ದಾರೆ. ಬಾಲಕೃಷ್ಣ ಅವರ ಮುಂದಿನ ಸಿನಿಮಾಗೂ ಹನಿ ರೋಸ್ ಆಯ್ಕೆ ಆಗಿರುವುದು ವಿಶೇಷ.
ಜನವರಿ 12 ರಂದು ತೆರೆ ಕಂಡ ಬಾಲಕೃಷ್ಣ ಅಭಿನಯದ ತೆಲುಗಿನ 'ವೀರಸಿಂಹರೆಡ್ಡಿ' ಸಿನಿಮಾ ಗೆದ್ದಿದೆ. ಅಭಿಮಾನಿಗಳು ಮತ್ತೊಮ್ಮೆ ಬಾಲಯ್ಯನ ಆಕ್ಟಿಂಗ್‌, ಡೈಲಾಗ್‌ಗೆ ಥ್ರಿಲ್‌ ಆಗಿದ್ದಾರೆ. ಚಿತ್ರದ ಹಾಡುಗಳನ್ನು ಮೆಚ್ಚಿದ್ದಾರೆ. ಚಿತ್ರತಂಡ ಭಾನುವಾರ ಹೈದರಾಬಾದ್‌ನಲ್ಲಿ ಆಯೋಜಿಸಿದ್ದ ಸಕ್ಸಸ್‌ ಪಾರ್ಟಿಗೆ ಬಾಲಕೃಷ್ಣ, ವರಲಕ್ಷ್ಮಿ ಶರತ್ ಕುಮಾರ್‌, ಹನಿ ರೋಸ್, ಶ್ರುತಿ ಹಾಸನ್‌ ಹಾಗೂ ಇನ್ನಿತರರು ಆಗಮಿಸಿದ್ದರು.
ಬಾಲಕೃಷ್ಣ ಅವರ ಹಿಂದಿನ ಸಿನಿಮಾ 'ಅಖಂಡ' ಕೂಡಾ ದೊಡ್ಡ ಹಿಟ್ ಆಗಿತ್ತು. ಇದೀಗ 'ವೀರಸಿಂಹರೆಡ್ಡಿ' ಕೂಡಾ ಹಿಟ್ ಆಗಿದ್ದು ಬಾಲಯ್ಯ ಬ್ಯಾಕ್‌ ಟು ಬ್ಯಾಕ್‌ ಹಿಟ್ ಖುಷಿಯಲ್ಲಿದ್ದಾರೆ. ಈ ಚಿತ್ರದಲ್ಲಿ ಬಾಲಯ್ಯ 'ವೀರಸಿಂಹರೆಡ್ಡಿ' ಹಾಗೂ ಜಯಸಿಂಹರೆಡ್ಡಿ ಎಂಬ ಪಾತ್ರಗಳಲ್ಲಿ ಡ್ಯೂಯೆಲ್‌ ರೋಲ್‌ನಲ್ಲಿ ನಟಿಸಿದ್ದಾರೆ. ವೀರಸಿಂಹರೆಡ್ಡಿ ಪಾತ್ರಕ್ಕೆ ಮಲಯಾಳಂ ನಟಿ ಹನಿ ರೋಸ್ ಹಾಗೂ ಜಯಸಿಂಹರೆಡ್ಡಿ ಪಾತ್ರಕ್ಕೆ ಶ್ರುತಿ ಹಾಸನ್‌ ನಾಯಕಿಯರಾಗಿ ನಟಿಸಿದ್ದಾರೆ. ಭಾನುವಾರದ ಸಕ್ಸಸ್‌ ಮೀಟ್‌ನಲ್ಲಿ ಬಾಲಕೃಷ್ಣ, ನಟಿ ಹನಿ ರೋಸ್‌ನೊಂದಿಗೆ ಗೆಲುವಿನ ಖುಷಿ ಹಂಚಿಕೊಳ್ಳುತ್ತಿರುವ ಫೋಟೋವೊಂದು ಬಹಳ ವೈರಲ್‌ ಆಗುತ್ತಿದೆ. ಬಾಲಯ್ಯ ಸ್ಟೈಲ್‌ ಕಂಡು ಅಭಿಮಾನಿಗಳು ಆಶ್ಚರ್ಯ ವ್ಯಕ್ತಪಡಿಸಿದ್ದಾರೆ. ಬಾಲಕೃಷ್ಣ ಅವರ ಮುಂದಿನ ಸಿನಿಮಾಗೂ ಹನಿ ರೋಸ್ ಆಯ್ಕೆ ಆಗಿರುವುದು ವಿಶೇಷ.
ಮೈತ್ರಿ ಮೂವಿ ಮೇಕರ್ಸ್‌ ಬ್ಯಾನರ್‌ ಅಡಿ 'ವೀರಸಿಂಹರೆಡ್ಡಿ' ಚಿತ್ರವನ್ನು ನವೀನ್ ಯರನೇನಿ ಹಾಗೂ ವೈ. ರವಿ ಶಂಕರ್ ನಿರ್ಮಾಣ ಮಾಡಿದ್ದಾರೆ. ಗೋಪಿಚಂದ್‌ ಮಲಿನೇನಿ ಚಿತ್ರಕ್ಕೆ ಆಕ್ಷನ್‌ ಕಟ್‌ ಹೇಳಿದ್ದಾರೆ. ಸಾಯಿ ಮಾದೇವ್ ಸಂಭಾಷಣೆ, ರಾಷ್ಟ್ರ ಪ್ರಶಸ್ತಿ ಪುರಸ್ಕೃತ ನವಿನ್ ನೂಲಿ ಸಂಕಲನ, ರಿಶಿ ಪುಂಜಾಬಿ ಕ್ಯಾಮೆರಾ ವರ್ಕ್, ರಾಮ್- ಲಕ್ಷ್ಮಣ್ ಹಾಗೂ ವೆಂಕಟ್ ಸಾಹಸ ನಿರ್ದೇಶನ ಚಿತ್ರಕ್ಕಿದೆ. ಈ ಚಿತ್ರದಲ್ಲಿ ಹಿಂದೆಂದೂ ಕಾಣದ ಹೊಸ ಅವತಾರದಲ್ಲಿ ನಂದಮುರಿ ಬಾಲಕೃಷ್ಣ ಕಾಣಿಸಿಕೊಂಡಿದ್ದಾರೆ. ಎಸ್‌. ತಮನ್‌ ಸಂಗೀತ ನೀಡಿರುವ ಜೈ ಬಾಲಯ್ಯ.. ಮಾಸ್ ಸಾಂಗ್ ಅಭಿಮಾನಿಗಳಿಗೆ ಬಹಳ ಇಷ್ಟವಾಗಿದೆ. ಸ್ಯಾಂಡಲ್‌ವುಡ್ ಬ್ಲ್ಯಾಕ್ ಕೋಬ್ರಾ ದುನಿಯಾ ವಿಜಯ್ ಈ ಚಿತ್ರದಲ್ಲಿ ಪ್ರತಾಪ್‌ ರೆಡ್ಡಿ ಎಂಬ ವಿಲನ್‌ ಪಾತ್ರದಲ್ಲಿ ನಟಿಸಿದ್ದಾರೆ. ವರಲಕ್ಷ್ಮಿ ಶರತ್ ಕುಮಾರ್‌, ನವೀನ್ ಚಂದ್ರ, ವರಲಕ್ಷ್ಮಿ ಶರತ್ ಕುಮಾರ್‌, ಅಜಯ್‌ ಘೋಷ್‌, ಮುರಳಿ ಶರ್ಮ ಹಾಗೂ ಇನ್ನಿತರರು ಚಿತ್ರದ ಮುಖ್ಯ ತಾರಾಗಣದಲ್ಲಿದ್ದಾರೆ.
ಚಿತ್ರವನ್ನು ಗ್ರ್ಯಾಂಡ್‌ ವೆಲಕಮ್‌ ಮಾಡಿದ್ದ ಅಭಿಮಾನಿಗಳು
ಜನವರಿ 12 ರಂದು ಅಭಿಮಾನಿಗಳು 'ವೀರಸಿಂಹರೆಡ್ಡಿ' ಚಿತ್ರವನ್ನು ಬಹಳ ಅದ್ಧೂರಿಯಾಗಿ ಬರಮಾಡಿಕೊಂಡಿದ್ದರು. ಕೆಲವೆಡೆ ಬಾಲಕೃಷ್ಣ ಅವರ ದೊಡ್ಡ ಕಟೌಟ್‌ಗಳನ್ನು ನಿಲ್ಲಿಸಿ ಹೂವಿನ ಮಳೆ ಸುರಿಸಿದರೆ ಕೆಲವೆಡೆ ಹಾಲಿನ ಅಭಿಷೇಕ ಮಾಡಿದ್ದರು. ಇನ್ನೂ ಕೆಲವೆಡೆ ಅಭಿಮಾನಿಗಳು ರಂಪಾಟ ನಡೆಸಿದ್ದರು. ಅಮೆರಿಕದ ಡಲ್ಲಾಸ್‌ನಲ್ಲಿ ಅಭಿಮಾನಿಗಳು ಥಿಯೇಟರ್‌ ಒಳಗೆ ಪೇಪರ್‌ ಚೂರುಗಳನ್ನು ಎಸೆದು ಅರಚಾಡಿ ರಂಪಾಟ ಮಾಡಿದ್ದಕ್ಕೆ ಶೋ ಸ್ಥಗಿತಗೊಂಡಿತ್ತು. ನಂತರ ಅಭಿಮಾನಿಗಳು ಹೊರ ಬಂದು ಥಿಯೇಟರ್‌ ಹೊರಗೆ ಬಾಲಯ್ಯ ಹೆಸರು ಘೋಷಣೆ ಕೂಗಿದ್ದರು. ಜನರು ಗುಂಪು ಗೂಡಿದ್ದರಿಂದ ಕೆಲವು ಹೊತ್ತು ಅಮೆರಿಕ ರಸ್ತೆಗಳಲ್ಲೂ ಟ್ರಾಫಿಕ್‌ ಜಾಮ್‌ ಉಂಟಾಗಿತ್ತು.
ಚಿತ್ರಮಂದಿರದಲ್ಲಿ ಸಿನಿಮಾ ಹಾಡುಗಳಿಗೆ ಕೆಲವರು ಹುಚ್ಚೆದ್ದು ಕುಣಿದಿದ್ದರು. ಅದರಲ್ಲೂ ಜೈ ಬಾಲಯ್ಯ.. ಹಾಡಿಗಂತೂ ಮಕ್ಕಳು, ದೊಡ್ಡವರು ಎನ್ನದೆ ಎಲ್ಲರೂ ಚಿತ್ರಮಂದಿರದಲ್ಲೇ ಕುಣಿದು ಕುಪ್ಪಣಿಸಿದ್ದರು. ವೃದ್ಧರೊಬ್ಬರು ಈ ಹಾಡಿಗೆ ಥಿಯೇಟರ್‌ನಲ್ಲಿ ಡ್ಯಾನ್ಸ್‌ ಮಾಡುತ್ತಿದ್ದ ವಿಡಿಯೋ ಸೋಷಿಯಲ್‌ ಮೀಡಿಯಾದಲ್ಲಿ ವೈರಲ್‌ ಆಗಿತ್ತು.
