Priyamani Dr56 First Look: ಪ್ರಿಯಾಮಣಿ ಅಭಿನಯದ 'ಡಾ56' ಫಸ್ಟ್ ಲುಕ್ ಬಿಡುಗಡೆ ಮಾಡಿದ ವಿಜಯ್ ಸೇತುಪತಿ
ಸಿನಿಮಾ ಕನ್ನಡದಲ್ಲಿ ತಯಾರಾಗುತ್ತಿದ್ದು ತೆಲುಗು, ತಮಿಳು ಹಾಗೂ ಮಲಯಾಳಂ ಭಾಷೆಗಳಿಗೆ ಡಬ್‌ ಆಗಿ ಏಕಕಾಲಕ್ಕೆ ತೆರೆ ಕಾಣುತ್ತಿದೆ. ಇತ್ತೀಚೆಗಷ್ಟೇ ಚಿತ್ರತಂಡವು ಪ್ರಿಯಾಮಣಿಯ ಫಸ್ಟ್ ಲುಕ್ ಬಿಡುಗಡೆ ಮಾಡಿದೆ. ಕಾಲಿವುಡ್ ಸ್ಟಾರ್ ನಟ ವಿಜಯ್ ಸೇತುಪತಿ ಈ ಫಸ್ಟ್ ಲುಕ್ ಬಿಡುಗಡೆ ಮಾಡಿ ಚಿತ್ರತಂಡಕ್ಕೆ ಶುಭ ಕೋರಿದ್ದಾರೆ.
ಬಹುಭಾಷಾ ನಟಿ ಪ್ರಿಯಾಮಣಿಗೆ ಚಿತ್ರರಂಗದಲ್ಲಿ ಮೊದಲಿನಷ್ಟೇ ಬೇಡಿಕೆ ಈಗಲೂ ಇದೆ. ಮದುವೆ ನಂತರ ಕೂಡಾ ನಾಯಕಿಯಾಗಿ ಹೆಸರು ಮಾಡಿರುವ ಪ್ರಿಯಾಮಣಿ ಈಗ 4-5 ಪ್ರಾಜೆಕ್ಟ್‌ಗಳಲ್ಲಿ ಬ್ಯುಸಿ ಇದ್ದಾರೆ. 'ದಿ ಫ್ಯಾಮಿಲಿ ಮ್ಯಾನ್' ವೆಬ್ ಸೀರೀಸ್‌ನಲ್ಲಿ ನಟಿಸುವ ಮೂಲಕ ಸಾಕಷ್ಟು ಗಮನ ಸೆಳೆದ ಪ್ರಿಯಾಮಣಿ, ಆಹಾ ಒಟಿಟಿಯಲ್ಲಿ ತೆರೆ ಕಂಡ 'ಭಾಮಾ ಕಲಾಪಮ್' ಚಿತ್ರದ ಮೂಲಕ ಮತ್ತೆ ಭರ್ಜರಿ ಯಶಸ್ಸನ್ನು ಪಡೆದರು.
ಇದೀಗ ಪ್ರಿಯಾಮಣಿ ಮತ್ತೊಂದು ಹೀರೋಯಿನ್ ಓರಿಯೆಂಟೆಡ್ ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ. 'ಡಾ56' ಹೆಸರಿನ ಸಿನಿಮಾ ಕನ್ನಡದಲ್ಲಿ ತಯಾರಾಗುತ್ತಿದ್ದು ತೆಲುಗು, ತಮಿಳು ಹಾಗೂ ಮಲಯಾಳಂ ಭಾಷೆಗಳಿಗೆ ಡಬ್‌ ಆಗಿ ಏಕಕಾಲಕ್ಕೆ ತೆರೆ ಕಾಣುತ್ತಿದೆ. ಇತ್ತೀಚೆಗಷ್ಟೇ ಚಿತ್ರತಂಡವು ಪ್ರಿಯಾಮಣಿಯ ಫಸ್ಟ್ ಲುಕ್ ಬಿಡುಗಡೆ ಮಾಡಿದೆ. ಕಾಲಿವುಡ್ ಸ್ಟಾರ್ ನಟ ವಿಜಯ್ ಸೇತುಪತಿ ಈ ಫಸ್ಟ್ ಲುಕ್ ಬಿಡುಗಡೆ ಮಾಡಿ ಚಿತ್ರತಂಡಕ್ಕೆ ಶುಭ ಕೋರಿದ್ದಾರೆ. ಚಿತ್ರದ ಟೈಟಲ್‌ ನೋಡಿದರೆ ಇದು ಡಾಕ್ಟರ್‌ ವೃತ್ತಿಗೆ ಸಂಬಂಧಿಸಿದ ಸಿನಿಮಾ ಎಂದುಕೊಳ್ಳುವುದು ಸಹಜ. ಆದರೆ ಟೈಟಲ್‌ ನೋಡಿ ಯಾವ ನಿರ್ಧಾರಕ್ಕೂ ಬರಲು ಸಾಧ್ಯವಿಲ್ಲ. ಚಿತ್ರತಂಡ ಬಿಡುಗಡೆ ಮಾಡಿರುವ ಪೋಸ್ಟರ್‌ನಲ್ಲಿ ಪ್ರಿಯಾ ಮಣಿ ಕಪ್ಪು ಕೋಟ್‌ ಧರಿಸಿ ಲಾಯರ್‌ನಂತೆ ಕಾಣುತ್ತಿದ್ದಾರೆ. ಎಡಕೈನಲ್ಲಿ ಟೈಮರ್‌ ಹಿಡಿದಿರುವ ಪ್ರಿಯಾಮಣಿ ಬಹಳ ಗಂಭೀರವಾಗಿ ಕಾಣುತ್ತಿದ್ದಾರೆ.
ಈ ಫಸ್ಟ್ ಲುಕ್, ಸಿನಿಮಾದ ಮೇಲಿನ ನಿರೀಕ್ಷೆ ಹೆಚ್ಚಿದೆ. ಭಾಮಾ ಕಲಾಪಮ್ ನಂತರ ಪ್ರಿಯಾಮಣಿ ಮತ್ತೊಂದು ಹಿಟ್ ಗಳಿಸುವುದು ಖಚಿತ ಎನ್ನಲಾಗುತ್ತಿದೆ. ಈ ಸಿನಿಮಾ ಯಶಸ್ವಿಯಾದರೆ ಪ್ರಿಯಾಮಣಿಗೆ ಇನ್ನಷ್ಟು ಅವಕಾಶಗಳು ಬರುವುದರಲ್ಲಿ ಅನುಮಾನವೇ ಇಲ್ಲ. ಈ ನಡುವೆ ಪ್ರಿಯಾಮಣಿ ಈ ಚಿತ್ರದ ಜೊತೆಗೆ 'ಸೈನೈಡ್' ಎಂಬ ಚಿತ್ರದಲ್ಲೂ ನಟಿಸುತ್ತಿದ್ದಾರೆ. ಚಿತ್ರವನ್ನು ವೆಂಕಟ್ ಪ್ರಭು ನಿರ್ದೇಶಿಸುತ್ತಿದ್ದು, ಶೀಘ್ರದಲ್ಲೇ ಚಿತ್ರೀಕರಣ ಪ್ರಾರಂಭವಾಗಲಿದೆ. ಇದರ ಜೊತೆಗೆ 'ಖೈಮರಾ', ಹೆಸರಿಡದ ಹೊಸ ಸಿನಿಮಾ, ತಮಿಳಿನ ಕೊಟೇಷನ್ ಗ್ಯಾಂಗ್ ಸಿನಿಮಾಗಳಲ್ಲಿ ಅವರು ಬ್ಯುಸಿ ಇದ್ದಾರೆ.
ಬೆಂಗಳೂರಿನಲ್ಲಿ ಹುಟ್ಟಿ ಬೆಳೆದ ಪ್ರಿಯಾಮಣಿ, ಶಾಲಾ ದಿನಗಳಲ್ಲೇ ಸೀರೆ ಕಂಪನಿಯ ಜಾಹೀರಾತುಗಳಲ್ಲಿ ಕಾಣಿಸಿಕೊಂಡಿದ್ದರು. 2003ರಲ್ಲಿ ಬಿಡುಗಡೆಯಾದ 'ಎವರೇ ಅತಗಾಡು' ತೆಲುಗು ಸಿನಿಮಾ ಮೂಲಕ ಚಿತ್ರರಂಗಕ್ಕೆ ಬಂದ ಪ್ರಿಯಾಮಣಿ 2009 ರಲ್ಲಿ ಪುನೀತ್ ರಾಜ್ಕುಮಾರ್ ಜೊತೆ 'ರಾಮ್' ಚಿತ್ರದಲ್ಲಿ ನಟಿಸುವ ಮೂಲಕ ಸ್ಯಾಂಡಲ್ವುಡ್ಗೆ ಬಂದರು. ಸತ್ಯಂ, ಮಧು , ಟಾಸ್, ಯಮದೊಂಗ, ಪುತಿಯ ಮುಖಂ, ಏನೋ ಒಂಥರಾ, ವಿಷ್ಣುವರ್ಧನ, ಚಾರುಲತಾ ಸೇರಿ ಕನ್ನಡ, ತೆಲುಗು, ತಮಿಳು, ಮಲಯಾಳಂ, ಹಿಂದಿ ಭಾಷೆಗಳ ಬಹಳಷ್ಟು ಸಿನಿಮಾಗಳಲ್ಲಿ ಪ್ರಿಯಾಮಣಿ ನಟಿಸಿದ್ದಾರೆ. 2017 ರಲ್ಲಿ ತಮ್ಮ ಧೀರ್ಘಕಾಲದ ಗೆಳೆಯ ಮುಸ್ತಫಾ ರಾಜ್ ಅವರ ಕೈಹಿಡಿದ ಪ್ರಿಯಾಮಣಿ ಮದುವೆಯಾದ ನಂತರ ಕೂಡಾ ಸಿನಿಮಾಗಳಲ್ಲಿ ನಟಿಸುತ್ತಿದ್ದಾರೆ.
