BBK 10: ಬಿಗ್‌ಬಾಸ್‌ನಲ್ಲಿ ಡ್ರೋಣ್ ಪ್ರತಾಪ್ ಸೋಲು; ಮೆಣಸಿನಕಾಯಿ ತಿಂದು, ಅರ್ಧ ಗಡ್ಡ, ಮೀಸೆ ಬೋಳಿಸಿದ ಯುವಕ!
ಬಿಗ್ ಬಾಸ್ ಸೀಸನ್ 10ರಲ್ಲಿ ಡ್ರೋನ್ ಪ್ರತಾಪ್ ಸೋತದ್ದೇ ತಡ, ದಕ್ಷಿಣ ಕನ್ನಡ ಜಿಲ್ಲೆಯ ಕಡಬದ ಯುವಕನೋರ್ವ ಅರ್ಧ ಗಡ್ಡ, ಅರ್ಧ ಮೀಸೆ ತೆಗೆದು ಗಮನ ಸೆಳೆದಿದ್ದಾರೆ. ಕಡಬ ತಾಲೂಕಿನ ಬಂಟ್ರ ಗ್ರಾಮದ ಪಾಲೆತ್ತಡ್ಕ ನಿವಾಸಿ ಝೈನುಲ್ ಅಬಿದ್ ಎಂಬಾತ ಈ ರೀತಿಯಲ್ಲಿ ತಮ್ಮ ಬೇಸರ ಹೊರ ಹಾಕಿದ್ದಾರೆ.
Drone Prathap: ಬಿಗ್ ಬಾಸ್ ಕನ್ನಡ ಸೀಸನ್ 10ರ ವಿಜೇತರಾಗಿ ಕಾರ್ತಿಕ್ ಮಹೇಶ್‌ ಕಪ್‌ ಎತ್ತಿ ಹಿಡಿದಿದ್ದಾರೆ. ಇತ್ತ ಡ್ರೋಣ್ ಪ್ರತಾಪ್ ಮೊದಲ ರನ್ನರ್ ಅಪ್ ಸ್ಥಾನಕ್ಕೆ ತೃಪ್ತಿಪಟ್ಟಿದ್ದಾರೆ. ಇದೆಲ್ಲದರ ನಡುವೆ ಈ ಸಲದ ಬಿಗ್ ಬಾಸ್ ದೊಡ್ಡ ಮಟ್ಟದಲ್ಲಿ ಸದ್ದು ಮಾಡಿತ್ತು. ಜಗಳ, ಕಿತ್ತಾಟ, ಮುನಿಸಿನ ಮೂಲಕವೇ ಇಡೀ ಶೋ ಮುಗಿದಿತ್ತು. ಇತ್ತ ವೀಕ್ಷಕರಲ್ಲೂ ಈ ಸಲದ ಬಿಗ್ ಬಾಸ್ ಅಷ್ಟೇ ಮನರಂಜನೆಯನ್ನೂ ನೀಡಿದೆ. ಸ್ಪರ್ಧಿಗಳ ಫ್ಯಾನ್‌ ಪೇಜ್‌ ಸೃಷ್ಟಿಸಿ ಅವರ ಪರ ಪ್ರಚಾರ ಮಾಡಿದವರು ಒಬ್ಬಿಬ್ಬರಲ್ಲ. ಈ ನಡುವೆಯೇ ಇಲ್ಲೊಬ್ಬ ಅಪರೂಪದ ಅಭಿಮಾನಿ ಡ್ರೋಣ್ ಪ್ರತಾಪ್ ವಿಚಾರಕ್ಕೆ ಮುನ್ನೆಲೆಗೆ ಬಂದಿದ್ದಾರೆ.
ಬಿಗ್ ಬಾಸ್ ಸೀಸನ್ 10ರಲ್ಲಿ ಡ್ರೋನ್ ಪ್ರತಾಪ್ ಸೋತದ್ದೇ ತಡ, ದಕ್ಷಿಣ ಕನ್ನಡ ಜಿಲ್ಲೆಯ ಕಡಬದ ಯುವಕನೋರ್ವ ಅರ್ಧ ಗಡ್ಡ, ಅರ್ಧ ಮೀಸೆ ತೆಗೆದು ಗಮನ ಸೆಳೆದಿದ್ದಾರೆ. ಕಡಬ ತಾಲೂಕಿನ ಬಂಟ್ರ ಗ್ರಾಮದ ಪಾಲೆತ್ತಡ್ಕ ನಿವಾಸಿ ಝೈನುಲ್ ಅಬಿದ್ ಎಂಬಾತ ಈ ರೀತಿಯಲ್ಲಿ ಬೇಸರ ಹೊರ ಹಾಕಿದ್ದಾರೆ. ಈತ ಬಿಗ್ಬಾಸ್ ನಲ್ಲಿ ಡ್ರೋಣ್ ಪ್ರತಾಪ್ ಗೆದ್ದೇ ಗೆಲ್ಲುತ್ತಾರೆ, ಸೋತರೆ ಅರ್ಧ ಗಡ್ಡ, ಮೀಸೆ ತೆಗೆಯುತ್ತೇನೆ ಎಂದು ಸೋಶಿಯಲ್ ಮೀಡಿಯಾ ಇನ್‌ಸ್ಟಾಗ್ರಾಂನಲ್ಲಿ ಚಾಲೆಂಜ್ ಹಾಕಿದ್ದರು. ಅಲ್ಲದೆ, ಹಸಿ ಮೆಣಸಿನಕಾಯಿ ತಿನ್ನುವುದಾಗಿ ಮತ್ತೊಂದು ವಿಡಿಯೋ ಹರಿಬಿಟ್ಟಿದ್ದರು.
ಆದರೆ, ಭಾನುವಾರ ಝೈನುಲ್ ಅಬಿದ್ ಅವರ ಲೆಕ್ಕಾಚಾರ ಉಲ್ಟಾ ಆಗಿದೆ. ಕಾರ್ತಿಕ್ ಮಹೇಶ್‌ ವಿಜೇತರಾಗಿ ಹೊರಹೊಮ್ಮಿದ್ದಾರೆ. ಡ್ರೋಣ್ ಪ್ರತಾಪ್ ಕೇವಲ ರನ್ನರ್ ಅಪ್‌ಗೆ ಸಮಾಧಾನಪಟ್ಟುಕೊಂಡಿದ್ದಾರೆ. ಇತ್ತ ಈ ಫಲಿತಾಂಶ ಹೊರಬರುತ್ತಿದ್ದಂತೆಯೇ ಅಬಿದ್ ಅರ್ಧ ಗಡ್ಡ, ಅರ್ಧ ಮೀಸೆ ಬೋಳಿಸಿಕೊಂಡಿದ್ದಾರೆ. ಹಸಿಮೆಣಸಿನಕಾಯಿ ತಿಂದ ವಿಡಿಯೋವನ್ನೂ ಸೋಷಿಯಲ್ ಮೀಡಿಯಾದಲ್ಲಿ ಅಪ್ಲೋಡ್ ಮಾಡಿಕೊಂಡಿದ್ದಾರೆ.
ಅಭಿರಾಜ್ ಹೆಸರಲ್ಲಿ ಇನ್‌ಸ್ಟಾಗ್ರಾಂ ಖಾತೆ
ಕನ್ನಡ ಬಿಗ್ಬಾಸ್ 10ರ ಸೀಸನ್‌ನಲ್ಲಿ ಈ ಬಾರಿ ಕಾರ್ತಿಕ್ ವಿನ್ನರ್ ಆಗಿರೋದು ಅಬಿದ್‌ಗೆ ಶಾಕಿಂಗ್ ನ್ಯೂಸ್. ವಿನ್ ಆಗಬೇಕು ಅಂದವರು ವಿನ್ ಆಗಿಲ್ಲ ಅನ್ನೋ ಕಾರಣದಿಂದ ಅವರು ಕಣ್ಣೀರಿಟ್ಟಿದ್ದಾರೆ. ಇದಕ್ಕೂ ಮೊದಲು ಡ್ರೋನ್ ಪ್ರತಾಪ್ ಅಭಿಮಾನಿಯಾಗಿ, ಈ ಬಾರಿ ಬಿಗ್ಬಾಸ್ 10ರ ವಿಜೇತರಾಗುವುದು ಪ್ರತಾಪ್ ಮಾತ್ರ ಎಂದು ಹೇಳಿದ್ದರು. ಅಭಿರಾಜ್ ಹೆಸರಿನ ಇನ್‌ಸ್ಟಾಗ್ರಾಂನಲ್ಲಿ ಈ ಬಗ್ಗೆ ಅಬಿದ್ ವಿಡಿಯೋ ಶೇರ್‌ ಮಾಡಿದ್ದರು.
ಬಿಗ್ಬಾಸ್ ಮನೆಯಲ್ಲಿ ಈ ಬಾರಿ ಡ್ರೋನ್ ಪ್ರತಾಪ್ ವಿನ್ ಆಗ್ತಾರೆ. ಡ್ರೋನ್ ಪ್ರತಾಪ್ ಕರಿ ಸಿಂಹ, ಕರಿ ಚಿರತೆ ಪ್ರತಾಪ್ ವಿನ್ ಆಗೇ ಆಗುತ್ತಾನೆ. ವಿನ್ ಆಗಿಲ್ಲ ಅಂದ್ರೆ ನಾನು ನನ್ನ ಅರ್ಧ ಮೀಸೆ, ಅರ್ಧ ಗಡ್ಡ ತೆಗೆಯುತ್ತೇನೆ. ನಾನು ಕೊಟ್ಟ ಮಾತು ತಪ್ಪೋದಿಲ್ಲ. ಸಂಗೀತಾ ಗೆದ್ರೂ ಸಹ ನಾನು ನನ್ನ ಅರ್ಧ ಮೀಸೆ, ಅರ್ಧ ಗಡ್ಡ ತೆಗೆಯುತ್ತೇನೆ ಎಂದಿದ್ದರು. ಕರ್ನಾಟಕದ ಜನತೆಗೆ ಗೊತ್ತು ಪ್ರತಾಪ್ ಎಂಥಾ ಆಟ ಆಡಿದ್ದಾನೆ ಅಂತ ಎಂದಿದ್ದರು.
ಇದೀಗ ಬಿಗ್‌ಬಾಸ್‌ನಲ್ಲಿ ಕಾರ್ತಿಕ್ ಗೆದ್ದು ಡ್ರೋನ್ ಪ್ರತಾಪ್ ರನ್ನರ್ ಅಪ್ ಆಗಿದ್ದಾರೆ. ಅಭಿರಾಜ್ ತಾನು ಹಾಕಿದ ಸವಾಲಿನಂತೆ ಅರ್ಧ ಮೀಸೆ, ಅರ್ಧ ಗಡ್ಡ ತೆಗೆದು ವಿಡಿಯೋ ಮಾಡಿ ಸೋಷಿಯಲ್ ಮೀಡಿಯಾದಲ್ಲಿ ಹಾಕಿದ್ದಾರೆ. ಡ್ರೋನ್ ಪ್ರತಾಪ್ ಅಭಿಮಾನಿಗಳು ಈ ವಿಡಿಯೋ ನೋಡಿ ಸಮಾಧಾನ ಮಾಡ್ತಾ ಇದ್ರೆ, ಕಾರ್ತಿಕ್ ಅಭಿಮಾನಿಗಳು ನೀವು ಕಾರ್ತಿಕ್ ಮೇಲೆ ಬೆಟ್ ಕಟ್ಟಬೇಕಿತ್ತು ಎಂದು ಕಾಲೆಳೆದಿದ್ದಾರೆ.
(ವರದಿ: ಹರೀಶ್‌ ಮಾಂಬಾಡಿ, ಮಂಗಳೂರು)
