BBK 10: ವಿನಯ್‌ಗೆ ರಾಜಯೋಗ, ನಮ್ರತಾಗೆ ಶತ್ರುಕಾಟ, ಡ್ರೋಣ್‌ ಪ್ರತಾಪ್ ಅತಂತ್ರ! ವಿದ್ಯಾಶಂಕರಾನಂದ ಸರಸ್ವತಿ ಗುರೂಜಿ ಭವಿಷ್ಯ
ಹೊಸ ವರ್ಷದ ಪ್ರಯುಕ್ತ ಬಿಗ್‌ ಬಾಸ್‌ ಮನೆಗೆ ಶ್ರೀ ವಿದ್ಯಾಶಂಕರಾನಂದ ಸರಸ್ವತಿ ಗುರೂಜಿ ಆಗಮನವಾಗಿತ್ತು. ಎಲ್ಲ ಸ್ಪರ್ಧಿಗಳ ಬಗ್ಗೆ ಅಚ್ಚರಿಯ ಭವಿಷ್ಯ ನುಡಿದಿದ್ದಾರೆ ಗುರೂಜಿ. ಅದರ ಅಕ್ಷರರೂಪ ಇಲ್ಲಿದೆ.
BBK 10: ಬಿಗ್‌ಬಾಸ್‌ ಮನೆಯ ಸ್ಪರ್ಧಿಗಳಿಗೆ ಹೊಸ ವರ್ಷದ ಹೊಸ್ತಿಲಲ್ಲಿ ಮಹಾಗುರುಗಳ ಆಶೀರ್ವಾದ ಸಿಕ್ಕಿದೆ. ಶ್ರೀ ವಿದ್ಯಾಶಂಕರಾನಂದ ಸರಸ್ವತಿ ಗುರೂಜಿ ಬಿಗ್‌ಬಾಸ್‌ಮನೆಯೊಳಗೆ ಅಡಿಯಿಟ್ಟು ಎಲ್ಲರನ್ನೂ ಆಶೀರ್ವದಿಸಿದ್ದಾರೆ. ಬಿಗ್‌ ಮನೆಯ ಎಲ್ಲ ಸ್ಪರ್ಧಿಗಳ ಭವಿಷ್ಯದ ಬಗ್ಗೆ ಒಬ್ಬೊಬ್ಬರನ್ನೇ ಕರೆದು ಅವರ ಭವಿಷ್ಯ ಹೇಳಿದ್ದಾರೆ. ಈ ವರ್ಷ ಏನೆಲ್ಲ ಆಗಲಿದೆ ಎಂದಿದ್ದಾರೆ. ಆ ಪೈಕಿ ಕೆಲವರಿಗೆ ಅಚ್ಚರಿಯ ಉತ್ತರಗಳು ಸಿಕ್ಕರೆ ಇನ್ನು ಕೆಲವರು ಕಣ್ಣೀರು ಹಾಕಿದ್ದಾರೆ. ಹಾಗಾದರೆ ಯಾರ ಭವಿಷ್ಯ ಹೇಗಿದೆ? ಇಲ್ಲಿದೆ ಗುರೂಜಿಯ ಭವಿಷ್ಯ.
ನಮ್ರತಾಗೆ ಶತ್ರು ಕಾಟ
ಮೊದಲಿಗೆ ನಮ್ರತಾ ಅವರ ಭವಿಷ್ಯ ನುಡಿದ ಗುರೂಜಿ, ಆರೋಗ್ಯದ ಬಗ್ಗೆ ಗಮನಹರಿಸುವಂತೆ ಎಚ್ಚರಿಸಿದ್ದಾರೆ. ಉದಾಸೀನ ಒಳ್ಳೆಯದಲ್ಲ ಎಂದಿದ್ದಾರೆ. ಮುಂದೆ ಅದು ದೊಡ್ಡದಾಗುವ ಸಾಧ್ಯತೆ ಎಂದಿದ್ದಾರೆ. ಅದೃಷ್ಟದ ಮಚ್ಚೆಗಳು ದೇಹದ ಬಲಭಾಗದಲ್ಲಿ ಇವೆ. ಅವುಗಳಿಂದಲೇ ನಿಮ್ಮ ಬದುಕಿನಲ್ಲಿ ಏಳಿಗೆ ಕಂಡಿದ್ದೀರಿ. ವಿಳ್ಯದೆಲೆ ತೂತಾಗಿದೆ. ಪ್ರೇಮಸ್ಥಾನವೂ ತೂತು ಬಿದ್ದಿದೆ. ಈಗಾಗಲೇ ಒಮ್ಮೆ ಘಟಿಸಿದೆ. ನಿಮಗೆ ನಂಬಿಕೆದ್ರೋಹವೂ ಆಗಿದೆ. ಯಾರಿಗೇ ನಮ್ರತಾ ದುಡ್ಡು ಕೊಟ್ಟರೂ, ಅದು ವಾಪಸ್ ಬಂದಿಲ್ಲ, ಬರಲ್ಲ. ಸಹಾಯದ ನೆಪದಲ್ಲಿ ನೀವೇ ಕಷ್ಟಕ್ಕೆ ಸಿಲುಕುತ್ತೀರಿ. ಹೊಸ ವರ್ಷಕ್ಕೆ ಹೊಸ ಬೆಳಕಿನ ಜತೆಗೆ ಹೊಸ ವ್ಯಕ್ತಿಯ ಆಗಮನವಾಗುತ್ತೆ. ವೃತ್ತಿರಂಗದಲ್ಲಿ ಏಳಿಗೆ ಇದೆ. ಶತ್ರು ಕಾಟವೂ ಇದೆ ಎಂದಿದ್ದಾರೆ.
ವಿನಯ್‌ಗೆ ರಾಜಯೋಗ
ಅದೇ ರೀತಿ ವಿನಯ್‌ಗೆ ಅಚ್ಚರಿಯ ಭವಿಷ್ಯವನ್ನೇ ನುಡಿದಿದ್ದಾರೆ ವಿದ್ಯಾಶಂಕರಾನಂದ ಸರಸ್ವತಿ ಗುರೂಜಿ. ನಿಮ್ಮ ಜೀವನದಲ್ಲಿ ಸುಖ- ಸೌಕರ್ಯ ದಕ್ಕುವುದು ಸ್ತ್ರೀಯಿಂದ ಮಾತ್ರ. ಅದರಲ್ಲೂ ಮನದನ್ನೆಯಿಂದ ಮಾತ್ರ ಸಿಗುವಂಥದ್ದು. ಬಹಳಷ್ಟು ನೋವು, ಕಷ್ಟ ಹೆಣ್ಣಿನಿಂದಲೇ ಅನುಭವಿಸಿರುತ್ತೀರಿ. ಹೌದೂ ಅಲ್ಲವೋ. ನಿಮ್ಮ ಹೆಂಡತಿಯ ಬಿಗಿ ಹಿಡಿತದ ಒಳಗಡೆ ನಿಮ್ಮ ಜೀವನ ಸರಾಗವಾಗಿ ನಡೆಯುತ್ತಿದೆ. ಆ ಹಿಡಿತ ಸ್ವಲ್ಪ ಹಗುರಾದರೂ ಬದುಕು ಅಲ್ಲೋಲ ಕಲ್ಲೋಲ. ಎರಡೂ ಕಿವಿಗಳ ಮೇಲೆ ಅದೃಷ್ಟದ ಮಚ್ಚೆ ಇದೆ. ಈ ವರ್ಷ ದೊಡ್ಡ ರಾಜಯೋಗವಿದೆ. ವೃತ್ತಿ ಜೀವನದಲ್ಲಿ ಅಂದುಕೊಂಡಿದ್ದನ್ನ ಸಾಧಿಸಲಿದ್ದೀರಿ. ಎಲ್ಲವೂ ಒಳ್ಳೆಯದಾಗಲಿದೆ’’ ಎಂದು ವಿನಯ್‌ ಭವಿಷ್ಯ ನುಡಿದಿದ್ದಾರೆ ಗುರೂಜಿ.
ಮಾತೇ ನಿಮಗೆ ಸಮಸ್ಯೆ; ವರ್ತೂರುಗೆ ಹೆಚ್ಚಾಯ್ತು ಟೆನ್ಷೆನ್‌
ಇನ್ನು ಹಳ್ಳಿಕಾರ್‌ ಒಡೆಯ ವರ್ತೂರ್‌ ಸಂತೋಷ್‌ ಬಗ್ಗೆಯೂ ಭವಿಷ್ಯ ನುಡಿದ ಗುರೂಜಿ, ನಿಮಗೆ ನಿಮ್ಮ ಮಾತುಗಳೇ ಸಮಸ್ಯೆ ಎಂದಿದ್ದಾರೆ. ಸದ್ಯ ಇರುವ ಸಮಸ್ಯೆಗಳು ಮುಂದಿನ ದೀರ್ಘಕಾಲ ಬಾಧಿಸಲಿದೆ. ಬದುಕಿನಲ್ಲಿ ಈಗಾಗಲೇ ಒಂದು ವಿಚಾರದಿಂದ ನೆಮ್ಮದಿ ಕಳೆದುಕೊಂಡಿದ್ದೀರಿ. ಕಾಲಿನ ಮೇಲೆ ಹಾಕಿಸಿಕೊಳ್ಳಬಾರದ ಜಾಗದಲ್ಲಿ ಟ್ಯಾಟೂ ಹಾಕಿಸಿಕೊಂಡಿದ್ದೀರಿ. ಸಾಧ್ಯವಾದರೆ ಅದನ್ನು ತೆಗೆಸಿಬಿಡಿ. ಅದರಿಂದಲೇ ಸಮಸ್ಯೆ. ಯಾಕಂದ್ರೆ, ನಿಮ್ಮ ಬದುಕಿನಲ್ಲಿ ಏರುಪೇರು ಕಂಡಿದ್ದೇ ಅಲ್ಲಿಂದ. ಟ್ಯಾಟೂ ಹಾಕಿಸಿಕೊಂಡು ಬಂದ ದಿನದಿಂದಲೇ ನೆಮ್ಮದಿ ಹೋಯ್ತು. ಬದುಕಿನಲ್ಲಿ ಈ ಅರ್ಧ ವರ್ಷ ಕಷ್ಟ ಎದುರಿಸಲಿದ್ದೀರಿ. ಅದಾದ್ಮೇಲೆ ಸುಖ ಬರುತ್ತೆ. ಏನೂ ಭಯ ಪಡಬೇಕಾಗಿಲ್ಲ. ನಿಮ್ಮ ವೀಕ್ನೆಸ್‌ ನಿಮ್ಮ ಮಾತು. ಮಾತಿನಿಂದಲೇ ನೀವು ಸಮಸ್ಯೆ ಅನುಭವಿಸಬೇಕಾಗುತ್ತೆ. ಸ್ವಲ್ಪ ಜಾಗೃತವಾಗಿರಿ" ಎಂದಿದ್ದಾರೆ.
ಸಂಗೀತಾಗೆ ಕಲ್ಯಾಣ
ಸಂಗೀತಾ ಶೃಂಗೇರಿ ಎಂಬುದು ಇಂಡಸ್ಟ್ರಿ ಹೆಸರು. ಅವರ ಹುಟ್ಟು ಹೆಸರು ಶ್ರೀದೇವಿ. ಈ ಹೆಸರಿನ ರೀತಿಯಾಗಿ ಭವಿಷ್ಯ ನುಡಿದ ಗುರೂಜಿ, "2025ರ ನಂತರ ಮದುವೆ ಆಗುತ್ತೆ. ಒಂದು ಸಣ್ಣ ಬಿಸಿಗಾಯದಿಂದ ನಮ್ಮ ಜೀವನದಲ್ಲಿ ಬೆಂಕಿಯೇ ಬೇಡ ಅನ್ನಬಾರದು. ಬದುಕಿನಲ್ಲಿ ಮದುವೆ ನಂತರ ತುಂಬಾ ಚೆನ್ನಾಗಿರುತ್ತೀರಾ. ಅದರ ಬಗ್ಗೆ ಆಲೋಚನೆ ಮಾಡು. ಬೇಡ ಅಂದಿದ್ದು ನಮ್ಮ ಬದುಕಿನಲ್ಲಿ ಬರ್ತಾನೇ ಇರುತ್ತೆ. ಯಾವುದು ಬೇಡ ಅಂತ ಸಂಗೀತಾ ಓಡುತ್ತಿದ್ದಳೋ, ಅದೇ ಈಗ ಬಂದಿದೆ" ಎಂದಿದ್ದಾರೆ.
ಕುಟುಂಬದಿಂದ ದೂರವೇ ಇರು
ಕಳೆದ ಮೂರು ವರ್ಷದಿಂದ ಕುಟುಂಬದಿಂದ ದೂರವೇ ಉಳಿದಿರುವ ಡ್ರೋಣ್‌ ಪ್ರತಾಪ್‌ಗೆ ಗುರೂಜಿ ಅಚ್ಚರಿಯ ಭವಿಷ್ಯ ಹೇಳಿದ್ದಾರೆ. ಆ ಭವಿಷ್ಯ ಪ್ರತಾಪ್ ಕಣ್ಣಲ್ಲಿ ನೀರು ತರಿಸಿದೆ. "ಸಾಧನೆ ಕಷ್ಟ ಆಗುತ್ತಿದೆ. ಅಂದುಕೊಂಡಿರೋದು ಒಂದು. ಕೆಲಸ ಕಾರ್ಯಗಳಲ್ಲಿ ಆಗುತ್ತಿರುವುದು ಮತ್ತೊಂದು. ದುಡ್ಡು ಬರೋದು ತುಂಬಾ ಕಡಿಮೆ. ಈ ವರ್ಷ ಹಣಕಾಸು ವಿಷ್ಯದಲ್ಲಿ ಅಭಿವೃದ್ಧಿ ಕಾಣಲಿದ್ದೀರಿ. ಲಾಭದ ಪ್ರಮಾಣ ಕಡಿಮೆ. ನೀನು ಕುಟುಂಬದಿಂದ ದೂರವೇ ಇರಬೇಕಾಗುತ್ತದೆ.
ಕುಟುಂಬದ ಜೀವನ ಯಾಕೋ ಅಷ್ಟು ಸರಿಯಿಲ್ಲ. ನೀನು ದೂರ ಇದ್ದಷ್ಟು ನಿನಗೂ ಕ್ಷೇಮ. ಕೆಲಸ ಕಾರ್ಯಗಳಲ್ಲೂ ಅಭಿವೃದ್ಧಿ. ದೂರ ಇದ್ದಷ್ಟು ಧೂಪ, ಹತ್ತಿರ ಇದ್ದಷ್ಟು ಹೇಸಿಗೆ. ದೂರ ಇದ್ದು ಧೂಪವಾಗ್ತೀಯೋ, ಹತ್ತಿರವಿದ್ದು ಹೇಸಿಗೆಯಾಗ್ತೀಯೋ ನಿನಗೆ ಬಿಟ್ಟಿದ್ದು. ಕುಟುಂಬ ಜೀವನ ಅಷ್ಟು ಸರಿಯಾಗಿಲ್ಲ’’ ಎಂದು ಗುರೂಜಿ ಹೇಳುತ್ತಿದ್ದಂತೆ ಕಣ್ಣೀರು ಹಾಕಿದ್ದಾರೆ ಪ್ರತಾಪ್. ಅದಾದ ಬಳಿಕ ದೂರ ಅಂದ್ರೆ ಬೇರೆ ದೇಶದಲ್ಲಿರಬೇಕಾ? ಎಂದು ಪ್ರತಾಪ್ ಹೇಳಿದ್ದಾರೆ. ಹೊರಗಿನ ದೇಶದಲ್ಲಿ ನೀನು ಅಭಿವೃದ್ಧಿ ಆಗ್ತೀಯಾ. ನಿನ್ನಲ್ಲಿ ಪ್ರಯತ್ನದ ಕೊರತೆ ಇದೆ ಎಂದಿದ್ದಾರೆ.
