Haddi: ಹೆಣ್ಣಿನ ವೇಷ ಧರಿಸಿ ದಿಗ್ಭ್ರಮೆ ಮೂಡಿಸಿದ ಬಾಲಿವುಡ್ ನಟ!: ನೀವೇ ಪತ್ತೆ ಮಾಡಿ ಯಾರಿರಬಹುದೆಂದು...
ಆಯ್ಕೆ ಮಾಡುವ ಪಾತ್ರಗಳಿಂದ ಹಿಡಿದು, ನಟನಾ ಚಾತುರ್ಯವನ್ನು ಅಷ್ಟೇ ಅಚ್ಚುಕಟ್ಟಾಗಿ ತೆರೆಮೇಲೆ ಪ್ರದರ್ಶಿಸುವುದರಲ್ಲಿ ನವಾಜುದ್ದೀನ್ ಎತ್ತಿದ ಕೈ. ಇದೀಗ ಇದೇ ನಟ ತಮ್ಮ ಸಿನಿಮಾ ಕೆರಿಯರ್‌ನಲ್ಲಿ ಸವಾಲೆನಿಸುವ ಪಾತ್ರವೊಂದಕ್ಕೆ ಬಣ್ಣ ಹಚ್ಚಿದ್ದಾರೆ. ಆ ಲುಕ್‌ ಇದೀಗ ಬಿಡುಗಡೆ ಆಗಿದ್ದು, ನೋಡಿದ ಪ್ರೇಕ್ಷಕ ಅಚ್ಚರಿ ಹೊರಹಾಕಿದ್ದಾನೆ.
ಭಿನ್ನ ವಿಭಿನ್ನ ಸಿನಿಮಾಗಳು ಮತ್ತು ಪಾತ್ರಗಳ ಮೂಲಕವೇ ಗುರುತಿಸಿಕೊಂಡಿರುವ ನಟ ನವಾಜುದ್ದೀನ್ ಸಿದ್ದೀಕಿ, ತಮ್ಮ ನಟನೆಯ ಮೂಲಕವೇ ಬಾಲಿವುಡ್‌ನಲ್ಲಿ ಬೇರೆ ರೀತಿಯಲ್ಲಿಯೇ ಕಾಣಿಸುತ್ತಾರೆ. ಆಯ್ಕೆ ಮಾಡುವ ಪಾತ್ರಗಳಿಂದ ಹಿಡಿದು, ನಟನಾ ಚಾತುರ್ಯವನ್ನು ಅಷ್ಟೇ ಅಚ್ಚುಕಟ್ಟಾಗಿ ತೆರೆಮೇಲೆ ಪ್ರದರ್ಶಿಸುವುದರಲ್ಲಿ ನವಾಜುದ್ದೀನ್ ಎತ್ತಿದ ಕೈ. ಇದೀಗ ಇದೇ ನಟ ತಮ್ಮ ಸಿನಿಮಾ ಕೆರಿಯರ್‌ನಲ್ಲಿ ಸವಾಲೆನಿಸುವ ಪಾತ್ರವೊಂದಕ್ಕೆ ಬಣ್ಣ ಹಚ್ಚಿದ್ದಾರೆ. ಆ ಲುಕ್‌ ಇದೀಗ ಬಿಡುಗಡೆ ಆಗಿದ್ದು, ನೋಡಿದ ಪ್ರೇಕ್ಷಕ ಅಚ್ಚರಿ ಹೊರಹಾಕಿದ್ದಾನೆ.
ಹೌದು, ನವಾಜುದ್ದೀನ್ ಸಿದ್ದಿಕಿ ನಟನೆಯ 'ಹಡ್ಡಿ' ಸಿನಿಮಾದ ಫಸ್ಟ್‌ ಲುಕ್‌ ಬಿಡುಗಡೆ ಆಗಿದೆ. ಮೋಷನ್‌ ಪೋಸ್ಟರ್‌ನಲ್ಲಿ , ಬೂದು ಬಣ್ಣದ ಗೌನ್ ಧರಿಸಿ ನೀಳ ಕೂದಲು ಮತ್ತು ಮಿರ ಮಿರ ಮೇಕ್ಅಪ್‌ನಲ್ಲಿಯೇ ಎದುರಾಗಿದ್ದಾರೆ. ಜೀ ಸ್ಟುಡಿಯೋಸ್ ಮತ್ತು ಆನಂದಿತಾ ಸ್ಟುಡಿಯೋಸ್ ಬ್ಯಾನರ್‌ನಲ್ಲಿ ನಿರ್ಮಾಣವಾಗಲಿರುವ ಈ ಸಿನಿಮಾವನ್ನು ಅಕ್ಷತ್‌ ಅಜಯ್‌ ಶರ್ಮಾ ನಿರ್ದೇಶಿಸಲಿದ್ದಾರೆ. ಈ ಸಿನಿಮಾ ಬಗ್ಗೆ ನಿರ್ದೇಶಕರು ಮಾಹಿತಿಯನ್ನೂ ನೀಡಿದ್ದಾರೆ.
"ಈ ಚಿತ್ರಕ್ಕೆ ಕ್ರೈಂ ಕಥೆ ಹಿಂದೆಂದೂ ಇಷ್ಟೊಂದು ಚೆನ್ನಾಗಿ ಕಂಡಿರಲಿಲ್ಲ.. ಎಂಬ ಕ್ಯಾಪ್ಶನ್‌ ನೀಡಲಾಗಿದೆ. ನವಾಜುದ್ದೀನ್ ಅವರ ಜೊತೆಗೆ ಕೈ ಜೋಡಿಸಿರುವುದೇ ನನಗೆ ಸಿಕ್ಕ ದೊಡ್ಡ ಅವಕಾಶ. ನೋಡುಗರಿಗೆ ಈ ಸಿನಿಮಾ ಡಬಲ್‌ ಧಮಾಕಾ ಆಗಲಿದೆ. ಹೊಸ ಪ್ರಪಂಚದ ಅನಾವರಣ ಈ ಸಿನಿಮಾ ಮೂಲಕ ಆಗಲಿದೆ. ಶೀಘ್ರದಲ್ಲಿ ಶೂಟಿಂಗ್‌ ಶುರುವಾಗಲಿದೆ" ಎಂದಿದ್ದಾರೆ ನಿರ್ದೇಶಕ ಅಕ್ಷತ್‌.
ಹೀಗೆ ಚಿತ್ರದ ಮೋಷನ್‌ ಪೋಸ್ಟರ್‌ ಸೋಷಿಯಲ್‌ ಮೀಡಿಯಾದಲ್ಲಿ ಹೊರಬರುತ್ತಿದ್ದಂತೆ, ನವಾಜುದ್ದೀನ್ ಅವರ ಈ ಅವತಾರವನ್ನು ಕಂಡು ಎಲ್ಲರು ಅಚ್ಚರಿಗೊಂಡಿದ್ದಾರೆ. ಬಗೆಬಗೆ ಕಮೆಂಟ್‌ ಮೂಲಕ ಮೆಚ್ಚುಗೆ ವ್ಯಕ್ತಪಡಿಸುತ್ತಿದ್ದಾರೆ. "ಈ ಲುಕ್‌ ನನ್ನ ಮನಸ್ಸನ್ನು ದಿಗ್ಬ್ರಮೆ ಮಾಡಿತು. ನಿಮ್ಮ ಲುಕ್‌ ಎಪಿಕ್" ಎಂದು ಕೆಲವರು ಹೇಳಿದರೆ, "ಈ ಚಿತ್ರದಲ್ಲಿ ಯಾರೆಲ್ಲ ಭಾಗವಹಿಸಿದ್ದೀರೋ ಅವರೆಲ್ಲರಿಗೂ ನನ್ನ ಕಡೆಯಿಂದ ದೊಡ್ಡ ನಮನ. ಇಲ್ಲಿಯವರೆಗೂ ನಾನು ನೋಡಿದ ಅತ್ಯುತ್ತಮಗಳಲ್ಲಿ ಇದು ಮೊದಲನೆಯದು" ಎಂದೂ ಹೇಳಿಕೊಂಡಿದ್ದಾರೆ.
ಬಿಡುಗಡೆ ಆಗಿರುವ ಟೀಸರ್‌ನಲ್ಲಿ ನವಾಜ್‌ ತೃತೀಯ ಲಿಂಗಿಯ ರೀತಿಯಲ್ಲಿ ಗೋಚರವಾಗಿದ್ದಾರೆ. ರಕ್ತಸಿಕ್ತ ಕೈಗಳು, ರಕ್ತ ತೊಟ್ಟಿಕ್ಕುವ ಕತ್ತಿ, ಗಾಢ ಮೇಕಪ್‌ ನವಾಜ್‌ ಅವರನ್ನು ಬೇರೆಯದೇ ರೀತಿಯಲ್ಲಿ ಕಾಣುವಂತೆ ಮಾಡುತ್ತದೆ. ಶೀಘ್ರದಲ್ಲಿ ಚಿತ್ರೀಕರಣ ಶುರುವಾಗಲಿದ್ದು, 2023ರಲ್ಲಿ ಸಿನಿಮಾ ಬಿಡುಗಡೆ ಆಗಲಿದೆ ಎಂಬ ವಿಚಾರವನ್ನು ತಂಡ ಪೋಸ್ಟರ್‌ನಲ್ಲಿ ತಿಳಿಸಿದೆ.
