Ganapath: ಗಣಪತಿ ಹಬ್ಬ ಮುಗಿದ ಮೇಲೆ ಬಿಡುಗಡೆಯಾಯ್ತು ಗಣಪತಿ ಹಾಡು; ಜೈ ಗಣೇಶ ಹಾಡಿಗೆ ಟೈಗರ್ ಶ್ರಾಫ್ ಸಂಭ್ರಮದ ಕುಣಿತ
Ganapath Jai Ganesha Song: ಟೈಗರ್ ಶ್ರಾಫ್ ನಟನೆಯ ಗಣಪತ್‌ ಚಿತ್ರದ ಜೈ ಗಣೇಶ ಹಾಡು ಬಿಡುಗಡೆಯಾಗಿದೆ. ಅಕ್ಷಯ್‌ ತ್ರಿಪಾಠಿ ಸಾಹಿತ್ಯ, ವಿಶಾಲ್‌ ಮಿಶ್ರಾ ಸಂಗೀತ ಸಂಯೋಜನೆಯ ಈ ಹಾಡಿಗೆ ಟೈಗರ್ ಶ್ರಾಫ್ ಹೆಜ್ಜೆ ಹಾಕಿದ್ದಾರೆ. ಬನ್ನಿ ಈ ಹಾಡು ಹೇಗಿದೆ ನೋಡೋಣ.
ಬೆಂಗಳೂರು: ಗಣೇಶ ಚತುರ್ಥಿ ಕಳೆದು ಹಲವು ದಿನಗಳ ಬಳಿಕ ಟೈಗರ್ ಶ್ರಾಫ್ ನಟನೆಯ ಗಣಪತ್‌ ಚಿತ್ರದ ಜೈ ಗಣೇಶ ಹಾಡು ಬಿಡುಗಡೆಯಾಗಿದೆ. ಅಕ್ಷಯ್‌ ತ್ರಿಪಾಠಿ ಸಾಹಿತ್ಯ, ವಿಶಾಲ್‌ ಮಿಶ್ರಾ ಸಂಗೀತ ಸಂಯೋಜನೆಯ ಈ ಹಾಡಿಗೆ ಟೈಗರ್ ಶ್ರಾಫ್ ಅವರು ಎನರ್ಜೆಟಿಕ್‌ ಆಗಿ ಕುಣಿದಿದ್ದಾರೆ. ವಿಶಾಲ್‌ ಮಿಶ್ರಾ ಧ್ವನಿಯಲ್ಲಿರುವ ಈ ಹಾಡು ಗಣೇಶ ಹಬ್ಬದ ಸಂಭ್ರಮದಲ್ಲಿ ಬಿಡುಗಡೆಯಾಗಿದ್ದರೆ, ಗಣೇಶನ ಕಾರ್ಯಕ್ರಮಗಳಲ್ಲಿ ಈ ಹಾಡಿನದ್ದೇ ಅಬ್ಬರ ಇರುತ್ತಿತ್ತು.
ಗಣಪತ್‌ ಚಿತ್ರದ ಜೈ ಗಣೇಶ್‌ ಹಾಡು ಬಿಡುಗಡೆ
ಗಣೇಶ ಹಬ್ಬ ಕಳೆದು ನವರಾತ್ರಿ ಹಬ್ಬದ ಸಮಯದಲ್ಲಿ ಬಿಡುಗಡೆಯಾದ ಈ ಹಾಡಿನಲ್ಲಿ ಒಳ್ಳೆಯ ಜೋಶ್‌ ಇದೆ. ಅಂದಹಾಗೆ, ಗಣಪತ್‌ ಚಿತ್ರವು ಭವಿಷ್ಯದ ಚಿತ್ರ. ಟೈಗರ್ ಶ್ರಾಫ್ ಅವರು ಗುಡ್ಡು ಪಾತ್ರದಿಂದ 2070ರಲ್ಲಿ ಗಣಪತ್‌ ಆಗಿ ಬದಲಾವಣೆ ಕಾಣುವ ಚಿತ್ರಣ ಈ ಸಿನಿಮಾದಲ್ಲಿ ಇರಲಿದೆ. ಸಮಾಜಘಾತುಕರ ವಿರುದ್ಧ ಗಣಪತ್‌ ಆಗಿ ಇವರು ಯುದ್ಧ ನಡೆಸಲಿದ್ದಾರೆ. ಕೃತಿ ಸನನ್‌ ಮತ್ತು ಅಮಿತಾಬ್‌ ಬಚ್ಚನ್‌ ಕೂಡ ಈ ಸಿನಿಮಾದಲ್ಲಿದ್ದಾರೆ.
ಗಣಪತ್‌ ಸಿನಿಮಾವನ್ನು ಎರಡು ಭಾಗವಾಗಿ ಬಿಡುಗಡೆ ಮಾಡಲು ಮೊದಲು ಯೋಜಿಸಲಾಗಿತ್ತು. ಆದರೆ, ಇದೀಗ ಟೈಟಲ್‌ನಿಂದ ಪಾರ್ಟ್‌ 1 ಕೈಬಿಡಲಾಗಿದೆ. ಎಲ್ಲಾದರೂ ಸಿನಿಮಾ ಗಲ್ಲಾಪಟ್ಟಿಗೆಯಲ್ಲಿ ಮ್ಯಾಜಿಕ್‌ ಮಾಡಿದರೆ ಪಾರ್ಟ್‌ 2 ಸಿನಿಮಾ ಬಿಡುಗಡೆಯಾಗಬಹುದು. ಜತೆಗೆ, ಟೈಗರ್ ಶ್ರಾಫ್ ಅವರು ಬ್ಯುಸಿ ಶೆಡ್ಯೂಲ್‌ ಹೊಂದಿದ್ದು, ಈಗಲೇ ಗಣಪತ್‌ ಪಾರ್ಟ್‌ 2 ಕುರಿತು ಯೋಚಿಸದೆ ಇರಲು ಚಿತ್ರತಂಡ ನಿರ್ಧರಿಸಿದಂತೆ ಇದೆ.
ಟೈಗರ್ ಶ್ರಾಫ್ ಅವರು ಕಳೆದ ವರ್ಷ ಹೀರೊಪಂತಿ 2 ಸಿನಿಮಾದಲ್ಲಿ ಕಾಣಿಸಿಕೊಂಡಿದ್ದರು. ಆದರೆ, ಆ ಸಿನಿಮಾ ಅಂತಹ ಯಶಸ್ಸು ಪಡೆಯಲಿಲ್ಲ. 2020ರಲ್ಲಿ ಇವರು ನಟಿಸಿದ ಬಾಘಿ 3 ಸಿನಿಮಾವು ಕೊರೊನಾ ಆರಂಭವಾಗಲು ಕೆಲವು ದಿನಗಳಿದ್ದಾಗ ಬಿಡುಗಡೆಯಾಗಿತ್ತು. ಹೀಗಾಗಿ, ಅದರ ಮಾರುಕಟ್ಟೆಗೆ ಕೊರೊನಾ ಹೊಡೆತ ನೀಡಿತ್ತು. ಆದರೆ, ನಾಯಕಿ ಕೃತಿ ಸನನ್‌ ಈ ವರ್ಷ ಎರಡು ಸಿನಿಮಾದಲ್ಲಿ ನಟಿಸಿದ್ದಾರೆ. ಶೇಝಾದ ಮತ್ತು ಆದಿಪುರುಷ್‌ನಲ್ಲಿ ಇವರು ನಟಿಸಿದ್ದರು. ಈ ಎರಡು ಸಿನಿಮಾಗಳೂ ಫೇಲ್‌ ಆಗಿದ್ದವು. ಇತ್ತೀಚೆಗೆ ಕೃತಿ ಸನನ್‌ ತನ್ನದೇ ಪ್ರೊಡಕ್ಷನ್‌ ಹೌಸ್‌ನಲ್ಲಿ ಡೊ ಪತ್ತಿ ಹೆಸರಿನ ಸಿನಿಮಾ ತೆಗೆಯುತ್ತಿದ್ದಾರೆ. ಈ ಚಿತ್ರದಲ್ಲಿ ಕಾಜೋಲ್‌ ನಟಿಸಲಿದ್ದಾರೆ. ಈ ಸಿನಿಮಾದಲ್ಲಿ ಕರೀನಾ ಕಪೂರ್‌ ಮತ್ತು ತಬು ಕೂಡ ಇರಲಿದ್ದಾರೆ. ಕೃತಿ ಸನನ್‌ ಇತ್ತೀಚೆಗೆ ನ್ಯಾಷನಲ್‌ ಫಿಲ್ಮ್‌ ಅವಾರ್ಡ್‌ ಕೂಡ ಪಡೆದಿದ್ದಾರೆ.
ಗಣಪತ್‌ ಚಿತ್ರದ ಟ್ರೈಲರ್‌ ಬಿಡುಗಡೆ
ಇತ್ತೀಚೆಗೆ ಟೈಗರ್ ಶ್ರಾಫ್ ನಟನೆಯ ಗಣಪತ್‌ ಚಿತ್ರದ ಟ್ರೈಲರ್‌ ಬಿಡುಗಡೆಯಾಗಿತ್ತು. ಗಣಪತ್‌: ಎ ಹೀರೋ ಈಸ್‌ ಬಾರ್ನ್‌ ಚಿತ್ರದ ಟ್ರೈಲರ್‌ ಆಕರ್ಷಕವಾಗಿದ್ದು, ಸಿನಿ ಪ್ರಿಯರಲ್ಲಿ ಒಂದಿಷ್ಟು ನಿರೀಕ್ಷೆ ಹುಟ್ಟುಹಾಕಿದೆ. ಟೈಗರ್ ಶ್ರಾಫ್ ಅವರ ಪಾತ್ರದ ಬಗ್ಗೆ ತಿಳಿಸುವ ಮೂಲಕ ಟ್ರೈಲರ್‌ ಆರಂಭವಾಗುತ್ತದೆ. ಇವರು ದುಷ್ಟರ ಕೂಟದಿಂದ ಜನರನ್ನು ಹೇಗೆ ರಕ್ಷಿಸುತ್ತಾರೆ ಎಂಬುದರ ಕುರಿತು ಟ್ರೈಲರ್‌ ಮಾತನಾಡುತ್ತದೆ. ಬಳಿಕ ಟೈಗರ್ ಶ್ರಾಫ್ ಅವರ ಹಲವು ಆಕ್ಷನ್‌ ಸೀಕ್ವೆನ್ಸ್‌ಗಳು ಕಾಣಿಸುತ್ತವೆ. ನುಂಚಕು (ಒಂದು ರೀತಿಯ ಆಯುಧ) ಪರಿಣಿತರಾದ ಕೃತಿ ಸನೋನ್ ನಂತರದ ದೃಶ್ಯದಲ್ಲಿ ಕಾಣಿಸುತ್ತಾರೆ. ಬಳಿಕ ಅಮಿತಾಬ್‌ ಬಚ್ಚನ್‌ ಅವರು ಪರದೆಯನ್ನು ಆಕ್ರಮಿಸಿಕೊಳ್ಳುತ್ತಾರೆ. ಒಟ್ಟಾರೆ, ಶತ್ರುಗಳ ಜತೆಗೆ ಹೊಡೆದಾಟದ ದೃಶ್ಯವಿದೆ. ಗಣಪತ್‌ ಚಿತ್ರದ ಟ್ರೈಲರ್‌ ವಿಮರ್ಶೆ ಓದಲು ಇಲ್ಲಿ ಕ್ಲಿಕ್‌ ಮಾಡಬಹುದು.
ವಿಭಾಗ