Ramayana: ರಾವಣ ಪಾತ್ರಕ್ಕೆ ಕಾಲ್‌ಶೀಟ್‌ ನೀಡಿದ ಕನ್ನಡ ನಟ ಯಶ್‌; ಫೆಬ್ರವರಿಯಲ್ಲಿ ರಣಬೀರ್‌ -ಸಾಯಿ ಪಲ್ಲವಿ ನಟನೆಯ ರಾಮಾಯಣ ಶೂಟಿಂಗ್
Ramayana Film: ಸ್ಯಾಂಡಲ್ವುಡ್ ನಟ ಕೆಜಿಎಫ್‌ನ ರಾಕಿ ಬಾಯ್‌ ಅವರು ಬಾಲಿವುಡ್‌ನ ಪೌರಾಣಿಕ ಚಿತ್ರದಲ್ಲಿ ನಟಿಸಲಿದ್ದಾರೆ. ರಾಮಾಯಣದ ಮೊದಲ ಭಾಗದಲ್ಲಿ ನಟಿಸಲು ಕನ್ನಡ ನಟ ಯಶ್‌ 15 ದಿನದ ಕಾಲ್‌ಶೀಟ್‌ ನೀಡಿದ್ದಾರೆ ಎನ್ನಲಾಗಿದೆ. ಈ ಚಿತ್ರದಲ್ಲಿ ರಾಮನಾಗಿ ರಣಬೀರ್‌ ಕಪೂರ್‌, ಸೀತೆಯಾಗಿ ಸಾಯಿ ಪಲ್ಲವಿ ನಟಿಸಲಿದ್ದಾರೆ.
ಬೆಂಗಳೂರು: ಬಾಲಿವುಡ್‌ನಲ್ಲಿ ರಾಮಾಯಣವೆಂಬ ಸಿನಿಮಾ ನಿರ್ಮಾಣಗೊಳ್ಳಲಿದೆ ಎಂದು ಬಹು ಹಿಂದೆಯೇ ಸುದ್ದಿಯಾಗಿತ್ತು. ಇದನ್ನು ಭಾರತೀಯ ಸಿನಿಮಾರಂಗದ ಪ್ರಮುಖ ಪ್ರಾಜೆಕ್ಟ್‌ ಎಂದು ಬಿಂಬಿಸಲಾಗುತ್ತಿದೆ. ಇದೀಗ ಪಿಂಕ್‌ವಿಲ್ಲಾ ತಾಣವು ರಾಮಾಯಣ ಚಿತ್ರದ ಕುರಿತು ಒಂದಿಷ್ಟು ಹೆಚ್ಚಿನ ಮಾಹಿತಿ ಪ್ರಕಟಿಸಿದೆ. ಭಾರತೀಯ ಪುರಾಣ ಕತೆಯಾದ ರಾಮಾಯಣದಲ್ಲಿ ಸ್ಯಾಂಡಲ್ವುಡ್ ನಟ, ಕೆಜಿಎಫ್‌ ರಾಕಿ ಬಾಯ್‌ ಯಶ್‌ ನಟಿಸಲಿದ್ದಾರೆ. ರಾಮಾಯಣದ ರಾವಣನಾಗಿ ಯಶ್‌ ಬಣ್ಣ ಹಚ್ಚಲಿದ್ದಾರೆ. ರಾಮಾಯಣದ ಚಿತ್ರೀಕರಣವು 2024ರ ಮೊದಲ ತ್ರೈಮಾಸಿಕದಲ್ಲಿ ಆರಂಭವಾಗುವ ಸೂಚನೆಯಿದೆ ಎಂದು ಪಿಂಕ್‌ವಿಲ್ಲಾ ವರದಿ ಮಾಡಿದೆ. ರಾಮಾಯಣದ ಪಾರ್ಟ್‌ 1ಗೆ ಹದಿನೈದು ದಿನದ ಕಾಲ್‌ ಶೀಟ್‌ ಅನ್ನು ಯಶ್‌ ನೀಡಿದ್ದಾರೆ ಎನ್ನಲಾಗಿದೆ. ಎರಡನೇ ಭಾಗದಲ್ಲಿ ಯಶ್‌ ಪಾತ್ರ ಹೆಚ್ಚಿರಲಿದೆ.
ರಾಮ ಮತ್ತು ಸೀತೆ
ಈ ಸಿನಿಮಾದಲ್ಲಿ ರಣಬೀರ್‌ ಕಪೂರ್‌, ಸಾಯಿ ಪಲ್ಲವಿ ಮತ್ತು ಯಶ್‌ ಪ್ರಮುಖ ಪಾತ್ರದಲ್ಲಿ ನಟಿಸಲಿದ್ದಾರೆ. ರಾಮನಾಗಿ ರಣಬೀರ್‌ ಕಪೂರ್‌ ನಟಿಸಲಿದ್ದಾರೆ. ಸಾಯಿ ಪಲ್ಲವಿ ಸೀತೆಯಾಗಿ ನಟಿಸಲಿದ್ದಾರೆ. ಕನ್ನಡ ನಟ ಯಶ್‌ ಈ ಸಿನಿಮಾದಲ್ಲಿ ರಾವಣನಾಗಿ ಅಬ್ಬರಿಸಲಿದ್ದಾರೆ. ರಾವಣನೆಂಬ ವಿಶೇಷ ಪಾತ್ರ ಮಾಡಲು ಯಶ್‌ ಉತ್ಸುಕರಾಗಿದ್ದಾರೆ ಎಂದು ವರದಿಗಳು ತಿಳಿಸಿವೆ.
2024ರ ಫೆಬ್ರವರಿಯಿಂದ ಶೂಟಿಂಗ್
ನಿತೇಶ್‌ ತಿವಾರಿ ತಿವಾರಿ ಮತ್ತು ತಂಡವು ಫೆಬ್ರವರಿ 2024ರ ಬಳಿಕ ರಾಮಾಯಣದ ಶೂಟಿಂಗ್ ಆರಂಭಿಸುವ ನಿರೀಕ್ಷೆಯಿದೆ ಎಂದು ಪಿಂಕ್‌ವಿಲ್ಲಾ ವರದಿ ಮಾಡಿದೆ. "ವಲ್ಡ್‌ ಆಫ್‌ ರಾಮಾಯಣ ಸೃಷ್ಟಿಸಲು ನಿತೇಶ್‌ ತಿವಾರಿ ಮತ್ತು ತಂಡವು ಸಕ್ರೀಯವಾಗಿ ಕಾರ್ಯನಿರ್ವಹಿಸುತ್ತಿದೆ. ಈಗಾಗಲೇ ಸಿನಿಮಾದ ಬ್ಲೂಪ್ರಿಂಟ್‌ ರೆಡಿಯಾಗಿದೆ. ವಿಎಫ್‌ಎಕ್ಸ್‌ ಪ್ಲೇಟ್‌ಗಳನ್ನು ಆಸ್ಕರ್‌ ವಿನ್ನಿಂಗ್‌ ಕಂಪನಿಯಾದ ಡಿಎನ್‌ಇಜಿ ಸಿದ್ಧಪಡಿಸುತ್ತಿದೆ. ಇದು ಪ್ರೇಕ್ಷಕರಿಗೆ ಹೊಸ ಅನುಭವ ನೀಡಲಿದೆ. ಆದರೆ, ರಾಮಾಯಣ ಎನ್ನುವುದು ಕೇವಲ ವಿಶುಯಲ್‌ ದೃಶ್ಯವಲ್ಲ. ಸರಳವಾಗಿ ಪ್ರೇಕ್ಷಕರಿಗೆ ಕಥೆ ಹೇಳುವ ಪ್ರಯತ್ನವಾಗಲಿದೆ. ಸಿನಿಮಾದಲ್ಲಿ ಕಥೆಯ ಭಾವನೆಗೆ ಒತ್ತು ನೀಡಲಾಗುತ್ತದೆ" ಎಂದು ಮೂಲಗಳನ್ನು ಉದ್ದೇಶಿಸಿ ಪಿಂಕ್‌ವಿಲ್ಲಾ ವರದಿ ಮಾಡಿದೆ.
15 ದಿನದ ಕಾಲ್‌ಶೀಟ್‌ ನೀಡಿದ ಯಶ್‌
ರಣಬೀರ್‌ ಕಪೂರ್‌ ಮತ್ತು ಸಾಯಿ ಪಲ್ಲವಿ ಫೆಬ್ರವರಿ ತಿಂಗಳಿನಿಂದ ಶೂಟಿಂಗ್‌ನಲ್ಲಿ ಪಾಲ್ಗೊಳ್ಳಲಿದ್ದಾರೆ. ಮೊದಲು ರಾಮ ಮತ್ತು ಸೀತೆಯ ಕುರಿತು ಹೆಚ್ಚಿನ ಗಮನ ನೀಡುತ್ತೇವೆ. ಸೀತಾ ಅಪಹರಣದ ಬಳಿಕ ಸಿನಿಮಾ ಮುಂದಿನ ಹಂತಕ್ಕೆ ತೆರೆದುಕೊಲ್ಳಲಿದೆ. ಫೆಬ್ರವರಿಯಿಂದ ಆಗಸ್ಟ್‌ವರೆಗೆ ಈ ಶೂಟಿಂಗ್ ನಡೆಯಬಹುದು. ರಾವಣನಾಗಿ ಯಶ್‌ ಶೂಟಿಂಗ್ ಮುಂದಿನ ವರ್ಷ ಜುಲೈ ತಿಂಗಳಲ್ಲಿ ಆರಂಭವಾಗುವ ನಿರೀಕ್ಷೆಯಿದೆ" ಎಂದು ಮೂಲಗಳು ತಿಳಿಸಿವೆ.
ರಾಮಾಯಣ- ಭಾಗ 1ರಲ್ಲಿ ಯಶ್‌ ತುಸು ಕಾಣಿಸಿಕೊಳ್ಳಲಿದ್ದಾರೆ. ಯಶ್‌ ಅವರ ಹೆಚ್ಚಿನ ಪಾತ್ರ ಇರುವುದು ಪಾರ್ಟ್‌-2ನಲ್ಲಿ. ಇದು ಲಂಕೆಯಲ್ಲಿ ನಡೆಯುವ ಕತೆಯಾಗಲಿದೆ. ರಾಮಾಯಣದ ಪಾರ್ಟ್‌ 1 ಚಿತ್ರಿಕರಣಕ್ಕಾಗಿ ಯಶ್‌ರ 15 ದಿನದ ಕಾಲ್‌ಶೀಟ್‌ ಪಡೆಯಲಾಗಿದೆ" ಎಂದು ಮೂಲಗಳು ತಿಳಿಸಿವೆ.
2014ರಲ್ಲಿ ಯಶ್‌ ಕೆಜಿಎಫ್‌-3 ಶೂಟಿಂಗ್
"ಯಶ್‌ ಈಗ 19ನೇ ಸಿನಿಮಾದಲ್ಲಿ ಬ್ಯುಸಿ ಇದ್ದು ಶೀಘ್ರದಲ್ಲೇ ಹೊಸ ಸಿನಿಮಾ ಅನೌನ್ಸ್‌ ಮಾಡಲಿದ್ದಾರೆ. ಈ ಸಿನಿಮಾ ಮುಗಿಯುತ್ತಿದ್ದಂತೆ, ಅಂದರೆ ಮುಂದಿನ ವರ್ಷದ ಅಂತ್ಯದ ವೇಳೆಗೆ ಕೆಜಿಎಫ್‌ 3 ನಲ್ಲಿ ಭಾಗಿಯಾಗಲಿದ್ಧಾರೆ. 2025ಕ್ಕೆ ಸಿನಿಮಾ ರಿಲೀಸ್‌ ಆಗಲಿದೆ'' ಎಂದು ಹೊಂಬಾಳೆ ಫಿಲ್ಮ್ಸ್‌ ಆಪ್ತ ಮೂಲಗಳನ್ನು ಉಲ್ಲೇಖಿಸಿ ಇಂಡಿಯಾ ಟುಡೇ ವರದಿ ಮಾಡಿದೆ. ಈ ಕುರಿತ ವರದಿ ಇಲ್ಲಿದೆ.
