Samantha Ruth Prabhu: ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರನ್ನು ಭೇಟಿ ಮಾಡಿದ ಸಮಂತಾ ರುತು ಪ್ರಭು, ಬಾಲಿವುಡ್ ನಟ ವರುಣ್‌ ಧವನ್‌
ಭೇಟಿಯ ಫೋಟೋಗಳನ್ನು ವರುಣ್‌ ಧವನ್‌ ತಮ್ಮ ಸೋಷಿಯಲ್‌ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾರೆ. ಸೆರ್ಬಿಯಾದಲ್ಲಿ ನಿಮ್ಮನ್ನು ಭೇಟಿ ಮಾಡಿದ್ದು ನಮಗೆ ಬಹಳ ಖುಷಿ ನೀಡಿತು ಎಂದು ವರುಣ್‌ ಧವನ್‌ ಬರೆದುಕೊಂಡಿದ್ದಾರೆ.
ಟಾಲಿವುಡ್ ಬ್ಯೂಟಿ ಸಮಂತಾ ರುತು ಪ್ರಭುವಿಗೆ ಚಿತ್ರರಂಗಕ್ಕೆ ಬಂದ ಆರಂಭದ ದಿನಗಳಂತೆ ಈಗಲೂ ಸಿನಿಮಾಗಳಲ್ಲಿ ಬಹಳ ಬೇಡಿಕೆ ಇದೆ. ತಮಿಳು, ತೆಲುಗು ಸಿನಿಮಾಗಳಲ್ಲಿ ಮಾತ್ರವಲ್ಲದೆ ಈಗ ಬಾಲಿವುಡ್ ಹಾಗೂ ಇಂಗ್ಲೀಷ್‌ ಸಿನಿಮಾಗಲ್ಲಿ ಕೂಡಾ ಅವಕಾಶ ಪಡೆಯುತ್ತಿದ್ದಾರೆ. ವೆಬ್‌ ಸೀರೀಸ್‌ಗಳಲ್ಲೂ ನಟಿಸುತ್ತಿದ್ದಾರೆ. ಈ ನಡುವೆ ಸಮಂತಾ ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರನ್ನು ಭೇಟಿ ಮಾಡಿ ಬಂದಿದ್ದಾರೆ.
ಸಮಂತಾ, ಗೌತಮ್‌ ಮೆನನ್‌ ನಿರ್ದೇಶನದ ಏಂ ಮಾಯ ಚೇಸಾವೆ ಸಿನಿಮಾ ಮೂಲಕ ಚಿತ್ರರಂಗಕ್ಕೆ ಬಂದರು. ಆಕೆಯ ನಟನೆ, ಚೆಲುವಿಗೆ ಸಿನಿಪ್ರಿಯರು ಫಿದಾ ಆದರು. ಮುಂದೆ ಇದೇ ಆಕೆಗೆ ಚಿತ್ರರಂಗದಲ್ಲಿ ಹೆಸರು ಮಾಡಲು ಕಾರಣವಾಯ್ತು. ಆ ಸಿನಿಮಾ ಮೂಲಕ ಪರಿಚಯವಾದ ನಾಗಚೈತನ್ಯ ಜೊತೆ ಪ್ರೀತಿ ಮದುವೆ ಡಿವೋರ್ಸ್‌ ಎಲ್ಲವೂ ಈಗ ಇತಿಹಾಸ. ಸ್ಯಾಮ್‌ ಈಗ ತಮ್ಮ ಪಾಡಿಗೆ ಸಿನಿಮಾ, ಜಾಹೀರಾತುಗಳಲ್ಲಿ ನಟಿಸುತ್ತಾ ಫುಲ್‌ ಬ್ಯುಸಿ ಆಗಿದ್ದಾರೆ. ಸಮಂತಾ ಬಾಲಿವುಡ್‌ನಲ್ಲಿ ಈಗಾಗಲೇ ಫ್ಯಾಮಿಲಿ ಮ್ಯಾನ್‌ ವೆಬ್‌ ಸೀರೀಸ್‌ 2 ರಲ್ಲಿ ನಟಿಸಿದ್ದಾರೆ. ಇದೀಗ ವರುಣ್‌ ಧವನ್‌ ಜೊತೆ ಸಿಟಾಡೆಲ್‌ ವೆಬ್‌ ಸೀರೀಸ್‌ನಲ್ಲಿ ಸಮಂತಾ ನಟಿಸುತ್ತಿದ್ದಾರೆ. ಭಾರತೀಯ ವರ್ಷನ್‌ ಬಹುತೇಕ ಭಾಗ ಪೂರ್ಣಗೊಂಡಿದೆ. ರಾಜ್‌ ಹಾಗೂ ಡಿಕೆ ಈ ವೆಬ್‌ ಸರಣಿಯನ್ನು ನಿರ್ದೇಶಿಸುತ್ತಿದ್ದಾರೆ.
ಇತ್ತೀಚೆಗೆ ವರುಣ್‌ ಧವನ್‌, ಸಮಂತಾ ಸೇರಿದಂತೆ ವೆಬ್‌ ಸೀರೀಸ್‌ ತಂಡ ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರನ್ನು ಭೇಟಿ ಮಾಡಿದ್ದಾರೆ. ಈ ಭೇಟಿಯ ಫೋಟೋಗಳು ಸೋಷಿಯಲ್‌ ಮೀಡಿಯಾದಲ್ಲಿ ಹರಿದಾಡುತ್ತಿವೆ. ಸಿಟಾಡೆಲ್‌ ಶೂಟಿಂಗ್‌ ಸೆರ್ಬಿಯಾದಲ್ಲಿ ನಡೆಯುತ್ತಿದೆ. ಇತ್ತೀಚೆಗೆ ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರೂ ಕೂಡಾ ಸೆರ್ಬಿಯಾಗೆ ಭೇಟಿ ನೀಡಿದ್ದಾರೆ. ಅವರು ಅಲ್ಲಿಗೆ ಬಂದಿರುವ ವಿಚಾರ ತಿಳಿದ ವೆಬ್‌ ಸರಣಿ ತಂಡ, ರಾಷ್ಟ್ರಪತಿಗಳು ಇದ್ದ ಸ್ಥಳಕ್ಕೆ ಹೋಗಿ ಭೇಟಿ ಮಾಡಿ ಬಂದಿದ್ದಾರೆ. ಜೊತೆಗೆ ಅವರೊಂದಿಗೆ ಫೋಟೋ ಕೂಡಾ ತೆಗೆಸಿಕೊಂಡಿದ್ದಾರೆ.
ಈ ಭೇಟಿಯ ಫೋಟೋಗಳನ್ನು ವರುಣ್‌ ಧವನ್‌ ತಮ್ಮ ಸೋಷಿಯಲ್‌ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾರೆ. ಗೌರವಾನ್ವಿತ ಭಾರತದ ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರನ್ನು ಭೇಟಿ ಆಗುವ ಅವಕಾಶ ದೊರೆಯಿತು. ಸೆರ್ಬಿಯಾದಲ್ಲಿ ನಿಮ್ಮನ್ನು ಭೇಟಿ ಮಾಡಿದ್ದು ನಮಗೆ ಬಹಳ ಖುಷಿ ನೀಡಿತು ಎಂದು ವರುಣ್‌ ಧವನ್‌ ಬರೆದುಕೊಂಡಿದ್ದಾರೆ.
