Ganapath Teaser: ಟೈಗರ್ ಶ್ರಾಫ್ ಗಣಪತ್ ಟೀಸರ್ ರಿಲೀಸ್‌; ಕೆಟ್ಟ ವ್ಯವಸ್ಥೆ ವಿರುದ್ಧ ಸಿಡಿದೆದ್ದ ಆಕ್ಷನ್ ಹೀರೋ
ಬಾಲಿವುಡ್ ನಟ ಟೈಗರ್ ಶ್ರಾಫ್ ನಟನೆಯ ಗಣಪತ್ ಚಿತ್ರದ ಟೀಸರ್ ಬಿಡುಗಡೆಯಾಗಿದೆ. ಚಿತ್ರದಲ್ಲಿ ಟೈಗರ್‌ಗೆ ಜೋಡಿಯಾಗಿ ಕೃತಿ ಸನೋನ್ ಕಾಣಿಸಿಕೊಂಡಿದ್ದಾರೆ. ಹೊಸ ಲೋಕದ ಸಮಸ್ಯೆಗಳ ಕಥೆ ಹೇಳಲಿದೆ ಈ ಗಣಪತ್ ಸಿನಿಮಾ.
Ganapath Teaser: ಹೀರೋಪಂತಿ 2 ಬಳಿಕ ಕಾಣೆಯಾಗಿದ್ದ ಬಾಲಿವುಡ್ ನಟ ಟೈಗರ್ ಶ್ರಾಪ್‌ ಮತ್ತೊಮ್ಮೆ ತಮ್ಮ ಪವರ್‌ಫುಲ್ ಆಕ್ಷನ್ ಮೂಲಕ ಅಭಿಮಾನಿಗಳ ಮನ ಗೆಲ್ಲಲು ಆಗಮಿಸುತ್ತಿದ್ದಾರೆ. ತುಂಬ ವರ್ಷಗಳ ಬಳಿಕ ಟೈಗರ್ ಶ್ರಾಫ್ ಮತ್ತು ಕೃತಿ ಸನನ್ ಗಣಪತ್ ಸಿನಿಮಾ ಮೂಲಕ ಒಂದಾಗಿದ್ದಾರೆ. ಈ ಚಿತ್ರದ ಟೀಸರ್ ಇತ್ತೀಚೆಗಷ್ಟೇ ಬಿಡುಗಡೆ ಆಗಿದೆ. ಒಂದು ಹೊಸ ಪ್ರಪಂಚದ ಅನಾವರಣವನ್ನು ಈ ಸಿನಿಮಾದಲ್ಲಿ ಮಾಡಿದ್ದಾರೆ ನಿರ್ದೇಶಕ ವಿಕಾಸ್ ಬಾಹ್ಲ.
ಟೈಗರ್ ಶ್ರಾಫ್ ಸಿನಿಮಾ ಎಂದರೆ ಅಲ್ಲಿ ಮೈನವಿರೇಳಿಸುವ ಆಕ್ಷನ್ ಝಲಕ್‌ ಇರಲೇಬೇಕು. ಅದು ಗಣಪತ್ ಸಿನಿಮಾದಲ್ಲಿಯೂ ಮುಂದುವರಿದಿದೆ. ಮೈ ಹುರಿಗೊಳಿಸಿಕೊಂಡ ಟೈಗರ್, ಆಕ್ಷನ್ ಸ್ಟಂಟ್‌ಗಳ ಮೂಲಕವೇ ಮತ್ತೆ ಮೋಡಿ ಮಾಡಿದ್ದಾರೆ. ಈ ಟೀಸರ್‌ನ ಕೊಂಡಿಯನ್ನು ಸೋಷಿಯಲ್‌ ಮೀಡಿಯಾದಲ್ಲಿ ಶೇರ್‌ ಮಾಡಿಕೊಂಡಿರುವ ಟೈಗರ್, ಕಾಯುವ ಸಮಯ ಮುಗಿದಿದೆ... ನಾವು ನಿಮ್ಮನ್ನು ನಮ್ಮ ಜಗತ್ತಿಗೆ ಕರೆದೊಯ್ಯಲು ಬಂದಿದ್ದೇವೆ" ಎಂದು ಬರೆದುಕೊಂಡಿದ್ದಾರೆ.
ಅವ್ಯವಸ್ಥೆ ವಿರುದ್ಧ ಅಸ್ತ್ರ
ಇದು ಕ್ರಿಸ್ತ ಶಕ 2070ರಲ್ಲಿ ನಡೆಯುವ ಕಥೆ. ಟೀಸರ್ ತೆರೆದುಕೊಳ್ಳುತ್ತಿದ್ದಂತೆ, ಧ್ಯಾನಸ್ಥ ಭಂಗಿಯಲ್ಲಿ ಟೈಗರ್ ಶ್ರಾಫ್ ಕಾಣಿಸುತ್ತಾರೆ. ನಂತರ ಅವ್ಯವಸ್ಥೆ ಪ್ರಪಂಚದ ಒಂದು ಝಲಕ್‌ ಸಹ ಕಾಣುತ್ತದೆ. ಬಳಿಕ ಧ್ಯಾನದಿಂದ ಎಚ್ಚರಗೊಂಡು ಜನರಿಗಾಗಿ ನ್ಯಾಯಕ್ಕೆ ಹೋರಾಡುತ್ತಾನೆ. ನಾಯಕ ಟೈಗರ್ ಜತೆಯಲ್ಲಿ ಕೃತಿ ಸನನ್ ಕೂಡ ಸ್ಟಂಟ್ ಮಾಡಿದ್ದಾರೆ ಈ ಸಿನಿಮಾದಲ್ಲಿ. ಅಮಿತಾಬ್ ಬಚ್ಚನ್ ಅವರ ವಿಶೇಷ ಲುಕ್‌ ಚಿತ್ರದ ಮತ್ತೊಂದು ಹೈಲೈಟ್.
ಗಣಪತ್ ಟೀಸರ್‌ನಲ್ಲಿ ಹದಗೆಟ್ಟ ಸಮಾಜದ ಚಿತ್ರಣವನ್ನು ನಿರ್ದೇಶಕರು ತೋರಿಸುವ ಕೆಲಸ ಮಾಡಿದ್ದಾರೆ. ಅಂದರೆ ಯಾವುದೂ ಸರಿಯಿಲ್ಲದ, ಜನರು ತೊಂದರೆಗೊಳಗಾಗಿರುವ ಜಗತ್ತು. ಅದೊಂದು ಭ್ರಷ್ಟಾಚಾರದ ಜಗತ್ತು. ನ್ಯಾಯಾಂಗ ವ್ಯವಸ್ಥೆ ಸಂಪೂರ್ಣ ಹದಗೆಟ್ಟಿರುವ ಲೋಕದ ಅನಾವರಣವನ್ನು ಟೀಸರ್‌ನಲ್ಲಿ ತೋರಿಸಿದ್ದಾರೆ. ಇದೆಲ್ಲದರ ಒಳಿತಿಗಾಗಿ ಹೋರಾಡುವ ವೀರನಾಗಿ ಟೈಗರ್ ಕಾಣಿಸಿಕೊಂಡಿದ್ದಾರೆ.
ಟೈಗರ್‌ಗೆ ಸಾಥ್‌ ನೀಡಿದ ಶಿವಣ್ಣ
ಪ್ಯಾನ್‌ ಇಂಡಿಯಾ ಮಟ್ಟದಲ್ಲಿ ಗಣಪತ್ ಸಿನಿಮಾ ರಿಲೀಸ್‌ ಆಗುತ್ತಿದೆ. ಹಾಗಾಗಿ ಸೌತ್‌ನ ಸ್ಟಾರ್‌ ನಟರು ಈ ಸಿನಿಮಾಕ್ಕೆ ಸಾಥ್‌ ನೀಡಿದ್ದಾರೆ. ಕನ್ನಡದಲ್ಲಿ ನಟ ಶಿವರಾಜ್‌ಕುಮಾರ್‌ ಈ ಸಿನಿಮಾದ ಟೀಸರ್ ಬಿಡುಗಡೆ ಮಾಡಿಕೊಟ್ಟರೆ, ತೆಲುಗಿನಲ್ಲಿ ಚಿರಂಜೀವಿ ರಿಲೀಸ್‌ ಮಾಡಿ ಶುಭಕೋರಿದ್ದಾರೆ.
ದಸರಾ ಹಬ್ಬಕ್ಕೆ ಗಣಪತ್
ವಿಕಾಸ್ ಬಹ್ಲ್ ನಿರ್ದೇಶನದಲ್ಲಿ ಗಣಪತ್: ಎ ಹೀರೋ ಈಸ್ ಬಾರ್ನ್ ಸಿನಿಮಾ ಮೂಡಿಬಂದಿದೆ. ವಶು ಭಗ್ನಾನಿ, ಜಾಕಿ ಭಗ್ನಾನಿ ಮತ್ತು ದೀಪಶಿಖಾ ದೇಶಮುಖ್ ಈ ಚಿತ್ರಕ್ಕೆ ಬಂಡವಾಳ ಹೂಡಿದ್ದಾರೆ. ಗಣಪತ್ ಹಿಂದಿ, ಕನ್ನಡ, ತೆಲುಗು, ತಮಿಳು ಮತ್ತು ಮಲಯಾಳಂ ಭಾಷೆಗಳಲ್ಲಿ ದಸರಾ ಹಬ್ಬದ ಪ್ರಯುಕ್ತ ಅಂದರೆ, ಅಕ್ಟೋಬರ್‌ 20ರಂದು ಗಣಪತ್ ಸಿನಿಮಾ ರಿಲೀಸ್‌ ಆಗಲಿದೆ.
ಮನರಂಜನೆ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್‌ ಮಾಡಿ
