Jawan: ತುಂಬಿ ತುಳುಕುತ್ತಿದೆ ಜವಾನ್ ಗಲ್ಲಾಪೆಟ್ಟಿಗೆ, ಎರಡು ವಾರ ಪೂರ್ಣಗೊಳ್ಳುವ ಮೊದಲೇ ಹೊಸ ದಾಖಲೆ ಬರೆದ ಶಾರೂಖ್‌ ಖಾನ್ ಸಿನಿಮಾ
Jawan box office collection: ಬಾಲಿವುಡ್ ಬಾದ್‌ಶಾ ಶಾರೂಖ್‌ ಖಾನ್, ನಯನತಾರಾ ಮತ್ತು ವಿಜಯ ಸೇತುಪತಿ ನಟನೆಯ ಜವಾನ್ ಸಿನಿಮಾವು ಬಾಕ್ಸ್‌ ಆಫೀಸ್‌ ಅನ್ನು ಕೊಳ್ಳೆ ಹೊಡೆಯುತ್ತಿದೆ. ಹದಿಮೂರನೇ ದಿನದಂದು ಇದರ ಕಲೆಕ್ಷನ್‌ 500 ಕೋಟಿ ದಾಟಿದೆ.
Jawan box office collection day 13: ಭಾರತದಲ್ಲಿ ಶಾರೂಖ್‌ ಖಾನ್‌ನ ಜವಾನ್ ಸಿನಿಮಾ ಸಖತ್‌ ಸದ್ದು ಮಾಡುತ್ತಿದೆ. ಚಿತ್ರಮಂದಿರಗಳು ತುಂಬಿದ್ದು, ಗಲ್ಲಾಪೆಟ್ಟಿಗೆ ತುಂಬಿ ತುಳುಕುತ್ತಿದೆ. ಶಾರೂಖ್‌ ದ್ವಿಪಾತ್ರದಲ್ಲಿ ನಟಿಸಿರುವ ಈ ಚಿತ್ರದಲ್ಲಿ ನಯನತಾರ ಮತ್ತು ವಿಜಯ್‌ ಸೇತುಪತಿ ಕೂಡ ಮೋಡಿ ಮಾಡುತ್ತಿದ್ದಾರೆ. ಇದೀಗ 13 ದಿನಗಳ ಬಾಕ್ಸ್‌ ಆಫೀಸ್‌ ಕಲೆಕ್ಷನ್‌ ರಿಪೋರ್ಟ್‌ ಬಂದಿದ್ದು, ನಿನ್ನೆ 14 ಕೋಟಿ ರೂಪಾಯಿ ಸಂಗ್ರಹಿಸಿದೆ. ಸಕ್ನಿಲ್ಕ್.ಕಾಂನ ವರದಿಯ ಪ್ರಕಾರ ಈ ಹದಿಮೂರು ದಿನಗಳಲ್ಲಿ ಜವಾನ್ ಸಿನಿಮಾವು ಒಟ್ಟು 507.88 ಕೋಟಿ ರೂಪಾಯಿ ಕಲೆಕ್ಷನ್‌ ಮಾಡಿದೆ.
ಜವಾನ್ ಬಾಕ್ಸ್‌ ಆಫೀಸ್‌ ವರದಿ
ಶ್ರೀ ಕೃಷ್ಣ ಜನ್ಮಾಷ್ಠಮಿಯಂದು ಅಂದರೆ ಸೆಪ್ಟೆಂಬರ್‌ 7ರಂದು ಜವಾನ್ ಸಿನಿಮಾವು ಥಿಯೇಟರ್‌ಗಳಲ್ಲಿ ಬಿಡುಗಡೆಯಾಗಿತ್ತು. ಮೊದಲ ದಿನದಂದು ಭಾರತದಲ್ಲಿ 75 ಕೋಟಿ ರೂಪಾಯಿ ಸಂಗ್ರಹಿಸಿತ್ತು. ಎರಡು ದಿನದ ಬಳಿಕ ಭಾನುವಾರ 80 ಕೋಟಿ ರೂಪಾಯಿ ಸಂಗ್ರಹವಾಗಿತ್ತು. ಇದು ಒಂದೇ ದಿನದಲ್ಲಿ ಸಂಗ್ರಹವಾದ ಅತ್ಯಧಿಕ ಮೊತ್ತ. ಮೊದಲ ವಾರದಲ್ಲಿಯೇ ಜವಾನ್ ಚಿತ್ರವು 389 ಕೋಟಿ ರೂಪಾಯಿ ಸಂಗ್ರಹಿಸಿದೆ. ಇದೀಗ ಎರಡು ವಾರ ಪೂರ್ಣಗೊಳ್ಳುವ ಮೊದಲೇ 500 ಕೋಟಿ ರೂಪಾಯಿ ದಾಟಿದೆ.
ಪಠಾಣ್‌, ಬಾಹುಬಲಿ- ದಿ ಕನ್‌ಕ್ಲೂಷನ್‌ ಮತ್ತು ಗದರ್‌ 2 ಬಳಿಕ ಜವಾನ್ ಸಿನಿಮಾವು ಭಾರತದಲ್ಲಿ ನಾಲ್ಕನೇ ಅತ್ಯಧಿಕ ಹಣ ಗಳಿಕೆ ಮಾಡಿದ (ಕಡಿಮೆ ಅವಧಿಯಲ್ಲಿ) ಚಿತ್ರವೆಂಬ ಖ್ಯಾತಿಗೆ ಪಾತ್ರವಾಗಿದೆ. ಇತ್ತೀಚೆಗೆ ಈ ಸಿನಿಮಾವು ಕೆಜಿಎಫ್‌ ಚಾಪ್ಟರ್‌ 2ನ ಹಿಂದಿ ಅವತರಣಿಕೆಯ ಕಲೆಕ್ಷನ್‌ ಅನ್ನು ಹಿಂದಿಕ್ಕಿತ್ತು. ಜಾಗತಿಕವಾಗಿ ಇದೀಗ ಜವಾನ್ 883 ಕೋಟಿ ರೂಪಾಯಿ ನಿವ್ವಳ ಸಂಪಾದನೆ ಮಾಡಿದೆ.
ಅಟ್ಲಿ ನಿರ್ದೇಶನದ ಜವಾನ್ ಮೂಲಕ ನಯನತಾರಾ ಹಿಂದಿ ಚಿತ್ರರಂಗಕ್ಕೆ ಕಾಲಿಟ್ಟಿದ್ದಾರೆ. ದೀಪಿಕಾ ಪಡುಕೋಣೆ ಅವರು ಅತಿಥಿ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಸಂಜಯ್‌ ದತ್‌ ಕೂಡ ಅತಿಥಿ ಪಾತ್ರದಲ್ಲಿ ನಟಿಸಿದ್ದಾರೆ. ಪ್ರಿಯಾಮಣಿ, ಸನ್ಯಾ ಮಲ್ಹೋತ್ರಾ, ರಿಧಿ ಡೋಗ್ರಾ, ಲೆಹರ್ ಖಾನ್, ಗಿರಿಜಾ ಓಕ್, ಸಂಜೀತಾ ಭಟ್ಟಾಚಾರ್ಯ ತಾರಾಗಣದಲ್ಲಿದ್ದಾರೆ.
ಬಾಕ್ಸ್‌ ಆಫೀಸ್‌ನಲ್ಲಿ ಜವಾನ್ ಸಿನಿಮಾದ ಕಲೆಕ್ಷನ್‌ ಕುರಿತು ಬಾಲಿವುಡ್ ಬಾದ್‌ಶಾ ಖುಷಿಗೊಂಡಿದ್ದಾರೆ. ನಿನ್ನೆ ತನ್ನ ಮನೆ ಮನ್ನತ್‌ನಲ್ಲಿ ತನ್ನ ಅಭಿಮಾನಿಗಳಿಗೆ ಫ್ಲಯಿಂಗ್‌ ಕಿಸ್‌ ನೀಡಿದ್ದಾರೆ. ಇವರ ಮನೆಯ ಮುಂದೆ ಅಭಿಮಾನಿಗಳ ದಂಡು ನೆರೆದಿತ್ತು. ಅವರಿಗೆಲ್ಲರಿಗೂ ಕೈಬೀಸಿ ಖುಷಿ ವ್ಯಕ್ತಪಡಿಸಿದ್ದಾರೆ.
ಸದ್ಯಕ್ಕೆ ಜವಾನ್ ಕ್ರೇಜ್‌ ಕಡಿಮೆಯಾಗುವ ಲಕ್ಷಣ ಕಾಣಿಸುತ್ತಿಲ್ಲ. ಇನ್ನೂ ಹಲವು ವಾರ ದೇಶ ವಿದೇಶದಲ್ಲಿ ಹಲವು ನೂರು ಕೋಟಿ ರೂಪಾಯಿ ಬಾಚಿಕೊಳ್ಳುವ ಎಲ್ಲಾ ಲಕ್ಷಣಗಳೂ ಇವೆ. 2023ರಲ್ಲಿ ಪಠಾಣ್‌ ಹಾಗೂ ಸನ್ನಿ ಡಿಯೋಲ್‌ ಅಭಿನಯದ ಗದರ್‌ 2 ಸಿನಿಮಾಗಳ ನಂತರ 300 ಕೋಟಿ ರೂಪಾಯಿ ದಾಟಿದ 3ನೇ ಸಿನಿಮಾ ಜವಾನ್ ಆಗಿದೆ. ಅಲ್ಲದೆ ವರ್ಲ್ಡ್‌ ವೈಡ್‌ ಬಾಕ್ಸ್‌ ಆಫೀಸಿನಲ್ಲಿ ಅತಿ ಕಡಿಮೆ ಅವಧಿಯಲ್ಲಿ 531 ಕೋಟಿ ಗಳಿಸಿದ ಮೊದಲ ಹಿಂದಿ ಸಿನಿಮಾ ಎಂಬ ಹೆಸರು ಜವಾನ್ ಮಡಿಲಿಗೆ ಸೇರಿದೆ.
