Dasara box office collection Day 2: ಬಾಕ್ಸ್‌ ಆಫೀಸ್‌ನಲ್ಲಿ ಧೂಳ್ ಎಬ್ಬಿಸಿದ ನಾನಿ 'ದಸರಾ'; ಇದು ಎರಡು ದಿನದ ಒಟ್ಟಾರೆ ಗಳಿಕೆ..
ನಾನಿ ನಟನೆಯ ದಸರಾ ಸಿನಿಮಾ ಬಾಕ್ಸ್‌ ಆಫೀಸ್‌ನಲ್ಲಿ ಕಮಾಯಿ ಮುಂದುವರಿಸಿದೆ. ಎರಡೇ ದಿನಕ್ಕೆ 91 ಕೋಟಿ ಗಳಿಸಿ, ನೂರು ಕೋಟಿಯ ಸನಿಹದಲ್ಲಿದೆ.
Dasara Box office Collection: ನ್ಯಾಚುರಲ್ ಸ್ಟಾರ್ ನಾನಿ ನಟನೆಯ ಪ್ಯಾನ್ ಇಂಡಿಯಾ ಸಿನಿಮಾ 'ದಸರಾ' ಬಾಕ್ಸ್‌ ಆಫೀಸ್ ಲೂಟಿ ಮಾಡಿದೆ. ಮೊದಲ ದಿನವೇ ದಾಖಲೆ ಮೊತ್ತದ ಗಳಿಕೆ ಕಂಡಿದೆ. ಶ್ರೀರಾಮ ನವಮಿ ಪ್ರಯುಕ್ತ ತೆರೆಗೆ ಬಂದ 'ದಸರಾ' ವಿಶ್ವಾದ್ಯಂತ ಬರೋಬ್ಬರಿ 38 ಕೋಟಿಗೂ ಅಧಿಕ ಹಣ ದೋಚಿದೆ. ಲವರ್ ಬಾಯ್ ಆಗಿ ಪ್ರೇಕ್ಷಕರನ್ನು ರಂಜಿಸುತ್ತಿದ್ದ ನಾನಿ ಮೊದಲ ಬಾರಿ ಔಟ್ ಅಂಡ್ ಔಟ್ ಮಾಸ್ ಲುಕ್‌ನಲ್ಲಿ, ರಗಡ್ ಆಗಿ ಕಾಣಿಸಿಕೊಂಡಿದ್ದರು. ನಾನಿ ಹೊಸ ಅವತಾರಕ್ಕೆ ಫ್ಯಾನ್ಸ್ ಫಿದಾ ಆಗಿದ್ದಾರೆ.
ಎರಡನೇ ದಿನಕ್ಕೆ 53 ಕೋಟಿ ಗಳಿಕೆ..
ಇನ್ನು ಮೊದಲ ದಿನ 38 ಕೋಟಿ ಗಳಿಸಿದರೆ, ಎರಡನೇ ದಿನ ಗಳಿಕೆಯಲ್ಲಿ ಮತ್ತಷ್ಟು ಏರಿಕೆ ಕಂಡಿದೆ. ಬರೋಬ್ಬರಿ 53 ಕೋಟಿ ಗಳಿಕೆ ಮಾಡಿದೆ. ಈ ಮೂಲಕ ಎರಡು ದಿನಗಳ ಅವಧಿಯಲ್ಲಿ91 ಕೋಟಿ ಬಾಚಿಕೊಂಡಿದೆ.
ಮೂರನೇ ದಿನಕ್ಕೆ100 ಕೋಟಿ ಗಳಿಕೆ
ನಾನೀಸ್ 'ದಸರಾ' ಸಿನಿಮಾ ವಿದೇಶದಲ್ಲಿಯೂ ಜಾದು ಮಾಡಿದ್ದು, ಅಮೆರಿಕದಲ್ಲಿ ಭರ್ಜರಿ ಓಪನಿಂಗ್ ಕಂಡಿದೆ. ನಾನಿ ವೃತ್ತಿ ಜೀವನಕ್ಕೆ ಈ ಸಿನಿಮಾದಿಂದ ಮೈಲೇಜ್ ಸಿಕ್ಕಂತಾಗಿದೆ. ಚಿತ್ರಕ್ಕೆ ಎಲ್ಲ ಕಡೆಗಳಿಂದ ಮೆಚ್ಚುಗೆ ವ್ಯಕ್ತವಾದ ಹಿನ್ನೆಲೆಯಲ್ಲಿ ಎರಡನೇ ದಿನವೂ ಒಳ್ಳೆಯ ರೀತಿಯಲ್ಲಿ ಬುಕಿಂಗ್ ಆಗುತ್ತಿದೆ. ವೀಕೆಂಡ್ ನಲ್ಲಿ ಸಿನಿಮಾ ಭರ್ಜರಿ ಕಲೆಕ್ಷನ್ ಮಾಡುವ ಸಾಧ್ಯತೆ ಇದೆ. ಇನ್ನೊಂದು ದಿನದಲ್ಲಿ 100 ಕೋಟಿ ಕ್ಲಬ್ ಸೇರಲಿದೆ.
ದಸರಾ ಸಿನಿಮಾ ಶ್ರೀಕಾಂತ್ ಒಡೆಲಾ ಆಕ್ಷನ್ ಕಟ್ ಹೇಳಿದ್ದು, ರಾಷ್ಟ್ರ ಪ್ರಶಸ್ತಿ ವಿಜೇತೆ ಕೀರ್ತಿ ಸುರೇಶ್ ನಾನಿಗೆ ಜೋಡಿಯಾಗಿ ನಟಿಸಿದ್ದಾರೆ. ಕನ್ನಡದ ದಿಯಾ ಖ್ಯಾತಿಯ ನಟ ದೀಕ್ಷಿತ್ ಶೆಟ್ಟಿ ಸೂರಿ ಎಂಬ ಪಾತ್ರದಲ್ಲಿ ಅದ್ಭುತವಾಗಿ ಅಭಿನಯಿಸಿದ್ದಾರೆ.
ಸುಧಾಕರ್ ಚೆರಕೂರಿ ನಿರ್ಮಿಸಿರುವ ದಸರಾಗೆ ಸಂತೋಷ್ ನಾರಾಯಣನ್ ಸಂಗೀತ ನೀಡಿದ್ದು, ಸತ್ಯನ್ ಸೂರ್ಯನ್ ಛಾಯಾಗ್ರಹಣವಿದೆ. ಶೈನ್ ಟಾಮ್ ಚಾಕೋ, ಸಮುದ್ರಖನಿ, ಸಾಯಿಕುಮಾರ್, ಜಾನ್ಸಿ, ಶಮಾ ಖಾಸೀಂ, ರಾಜಶೇಖರ್ ಅನಿಂಗಿ, ರವಿ ತೇಜ ನನ್ನಿಮಾಲಾ ಮುಂತಾದ ತಾರಾಬಳಗ ಚಿತ್ರದಲ್ಲಿದೆ.
ಚಿತ್ರಕ್ಕಾಗಿ ರಿಯಲ್‌ ಡ್ರಿಂಕ್ಸ್‌..
ದಸರಾ ಸಿನಿಮಾಕ್ಕಾಗಿ ನಟ ನಾನಿ ನಿಜವಾಗಿಯೂ ಮದ್ಯಪಾನ ಮಾಡಿ ಕೆಲ ದೃಶ್ಯಗಳಲ್ಲಿ ಕಾಣಿಸಿಕೊಂಡಿದ್ದರಂತೆ. ''ಚಿತ್ರದಲ್ಲಿ ನಾನು ಡ್ರಿಂಕ್ಸ್‌ ಮಾಡುವ ದೃಶ್ಯಗಳಿವೆ. ಡ್ರಿಂಕ್ಸ್‌ ಮಾಡಿದಾಗ ನನ್ನ ಕಣ್ಣು ಕೆಂಪಗಾಗಬೇಕಿತ್ತು. ಆದರೆ ಏನೇ ಮಾಡಿದರೂ ನ್ಯಾಚುರಲ್ ಎಫೆಕ್ಟ್‌ ಬಾರದ ಕಾರಣ ಮದ್ಯಪಾನ ಮಾಡುವ ದೃಶ್ಯಗಳಲ್ಲಿ ನಾನು ನಿಜವಾಗಿಯೂ ಡ್ರಿಂಕ್ಸ್‌ ಮಾಡಬೇಕಾಯ್ತು. ಚಿತ್ರದ ಕೆಲವೊಂದು ದೃಶ್ಯಗಳಲ್ಲಿ ನನ್ನ ಪಾತ್ರ ಬಹಳ ರಫ್‌ ಆಗಿದೆ. ಆದರೆ ಸಿನಿಮಾ ಔಟ್‌ಪುಟ್‌ ಮಾತ್ರ ಬಹಳ ಚೆನ್ನಾಗಿದೆ. ಸಿನಿಮಾ ನೋಡಿದ ನಂತರ ನೀವೇ ಹೇಳುತ್ತೀರಿ. ಖಂಡಿತ ಸಿನಿಮಾ ಎಲ್ಲರಿಗೂ ಮೆಚ್ಚುಗೆ ಆಗಲಿದೆ. ನೋಡುಗರಿಗೆ ನಿಜವಾಗಲೂ ಥ್ರಿಲ್‌ ಕೊಡುತ್ತದೆ'' ಎಂದು ನಾನಿ ತಮ್ಮ ಸಿನಿಮಾ ಹಾಗೂ ಶೂಟಿಂಗ್‌ ಅನುಭವವನ್ನು ಹೇಳಿಕೊಂಡಿದ್ದಾರೆ.
