Pavan wadeyar apologies Ashika: ವೈರಲ್‌ ವಿಡಿಯೋ ಅವಾಂತರ...ಆಶಿಕಾಗೆ ಕ್ಷಮೆ ಕೇಳಿದ ನಿರ್ದೇಶಕ ಪವನ್‌ ಒಡೆಯರ್‌
ಆಶಿಕಾ ಬಾಟಲಿಯೊಂದನ್ನ ಹಿಡಿದು ಕುಡಿದು ತೂರಾಡುತ್ತಾ, ತಮ್ಮ ವಿಡಿಯೋ ಮಾಡುತ್ತಿದ್ದ ವ್ಯಕ್ತಿಗೆ ಮಧ್ಯದ ಬೆರಳು ತೋರಿಸಿರುವ ವಿಡಿಯೋ ಬಹಳ ವೈರಲ್‌ ಆಗುತ್ತಿದೆ. ಆರಂಭದಲ್ಲಿ ಇದು ಅಸಲಿ ವಿಡಿಯೋ ಎಂದು ಎಲ್ಲರೂ ತಪ್ಪು ತಿಳಿದಿದ್ದರು. ಆದರೆ ಇದು ಚಿತ್ರೀಕರಣದ ವಿಡಿಯೋ ಎಂಬುದು ನಂತರ ಬೆಳಕಿಗೆ ಬಂದಿದೆ.
ಸ್ಯಾಂಡಲ್ವುಡ್ ಬ್ಯೂಟಿ ಆಶಿಕಾ ರಂಗನಾಥ್ ಈಗ ಕನ್ನಡ ಮಾತ್ರವಲ್ಲದೆ ತಮಿಳು ಚಿತ್ರರಂಗದಲ್ಲಿ ಕೂಡಾ ಮಿಂಚುತ್ತಿದ್ದಾರೆ. ಸದ್ಯಕ್ಕೆ ಅವರು ಕನ್ನಡದಲ್ಲಿ ನಟಿಸಿರುವ 'ರೇಮೊ' ಸಿನಿಮಾ ಬಿಡುಗಡೆಗೆ ಕಾಯುತ್ತಿದ್ದಾರೆ. ಈ ನಡುವೆ ಆಶಿಕಾ ಅವರ ವಿಡಿಯೋವೊಂದು ವೈರಲ್‌ ಆಗಿ ಅವಾಂತರ ಸೃಷ್ಟಿಸಿದೆ. ಇದರಿಂದ ನಟಿ ಆಶಿಕಾ ಬಹಳ ಬೇಸರ ವ್ಯಕ್ತಪಡಿಸಿದ್ದಾರೆ.
ಪವನ್‌ ಒಡೆಯರ್‌ ನಿರ್ದೇಶನದ 'ರೇಮೊ' ಸಿನಿಮಾ ನವೆಂಬರ್‌ 25 ರಂದು ತೆರೆ ಕಾಣುತ್ತಿದೆ. ಚಿತ್ರದಲ್ಲಿ ಆಶಿಕಾ ರಂಗನಾಥ್ ಜೊತೆಗೆ ಇಶಾನ್ ನಟಿಸಿದ್ದಾರೆ. ಇದೊಂದು ಮ್ಯೂಸಿಕಲ್ ಹಿನ್ನೆಲೆ ಇರುವ ಸಿನಿಮಾ ಆಗಿದ್ದು ಈಗಾಗಲೇ ತೆರೆ ಕಂಡಿರುವ ರೇಮೊ ಟ್ರೇಲರ್‌ಗೆ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಆದರೆ ಮೂರು ದಿನಗಳಿಂದ ಆಶಿಕಾ ರಂಗನಾಥ್ ಅವರ ವಿಡಿಯೋವೊಂದು ಸೋಷಿಯಲ್ ಮೀಡಿಯಾದಲ್ಲಿ ಹರಿದಾಡುತ್ತಿದ್ದು ಇದರಿಂದ ಆಶಿಕಾ ಬೇಸರ ವ್ಯಕ್ತಪಡಿಸಿದ್ದಾರೆ. ಇದುವರೆಗೂ ಯಾವುದೇ ವಿವಾದವನ್ನು ಮೈ ಮೇಲೆ ಎಳೆದುಕೊಳ್ಳದ ಆಶಿಕಾ ರಂಗನಾಥ್, ಇದೀಗ ಆ ವಿಡಿಯೋ ಮೂಲಕ ವಿವಾದಕ್ಕೆ ಸಿಲುಕಿದ್ದಾರೆ.
ಆಶಿಕಾ ಬಾಟಲಿಯೊಂದನ್ನ ಹಿಡಿದು ಕುಡಿದು ತೂರಾಡುತ್ತಾ, ತಮ್ಮ ವಿಡಿಯೋ ಮಾಡುತ್ತಿದ್ದ ವ್ಯಕ್ತಿಗೆ ಮಧ್ಯದ ಬೆರಳು ತೋರಿಸಿರುವ ವಿಡಿಯೋ ಬಹಳ ವೈರಲ್‌ ಆಗುತ್ತಿದೆ. ಆರಂಭದಲ್ಲಿ ಇದು ಅಸಲಿ ವಿಡಿಯೋ ಎಂದು ಎಲ್ಲರೂ ತಪ್ಪು ತಿಳಿದಿದ್ದರು. ಆದರೆ ಇದು ಚಿತ್ರೀಕರಣದ ವಿಡಿಯೋ ಎಂಬುದು ನಂತರ ಬೆಳಕಿಗೆ ಬಂದಿದೆ. ಅಷ್ಟರಲ್ಲಿ ವಿಡಿಯೋ ವೈರಲ್‌ ಆಗಿದೆ. ಇನ್ನು 5 ದಿನಗಳಲ್ಲಿ ಸಿನಿಮಾ ಬಿಡುಗಡೆಯಾಗುತ್ತಿದೆ. ಆದರೆ ಆಶಿಕಾ ಮಾತ್ರ ತಾವು ಪ್ರಮೋಷನ್‌ಗೆ ಬರುವುದಿಲ್ಲ ಎಂದು ಬೇಸರ ಮಾಡಿಕೊಂಡಿದ್ದಾರಂತೆ. ಇದೇ ವಿಚಾರವನ್ನು ನಿರ್ದೇಶನ ಪವನ್‌ ಒಡೆಯರ್‌ ವಿಡಿಯೋ ಮೂಲಕ ಸ್ಪಷ್ಟಪಡಿಸಿದ್ದಾರೆ.
''ಆಶಿಕಾ ರಂಗನಾಥ್, ಕುಡಿದು ರಂಪಾಟ ಮಾಡುತ್ತಿರುವ ವಿಡಿಯೋವೊಂದು ಸೋಷಿಯಲ್ ಮೀಡಿಯಾದಲ್ಲಿ ವೈರಲ್‌ ಆಗುತ್ತಿದೆ. ಆದರೆ ಇದರಿಂದ ಆಶಿಕಾ ಬಹಳ ಅಪ್‌ಸೆಟ್‌ ಆಗಿದ್ದಾರೆ. ಈ ವಿಡಿಯೋ ಬಗ್ಗೆ ಸ್ಪಷ್ಟೀಕರಣ ನೀಡಲು ಬಯಸುತ್ತೇನೆ. ವೈರಲ್‌ ಆಗಿರುವುದು ಸಿನಿಮಾ ಶೂಟಿಂಗ್‌ ವೇಳೆ ಚಿತ್ರೀಕರಿಸಲಾದ ವಿಡಿಯೋ, ಪ್ರಮೋಷನ್‌ಗಾಗಿ ನಾವು ಸಿನಿಮಾ ಮೇಕಿಂಗ್‌ ಹಾರ್ಡ್‌ ಡಿಸ್ಕನ್ನು ಮಾರ್ಕೆಟಿಂಗ್‌ ಟೀಮ್‌ಗೆ ನೀಡಿದ್ದೆವು. ಆದರೆ ಅದರಲ್ಲಿ ಯಾರೋ ಈ ವಿಡಿಯೋವನ್ನು ಬೇಕಂತಲೇ ಸೋಷಿಯಲ್ ಮೀಡಿಯಾದಲ್ಲಿ ಹರಿಯಬಿಟ್ಟಿದ್ದಾರೆ. ಆ ವಿಡಿಯೋ ಆಶಿಕಾ ಅವರ ಪರ್ಸನಲ್‌ ಲೈಫ್‌ಗೆ ಸಂಬಂಧಿಸಿದ ವಿಡಿಯೋ ಅಲ್ಲ, ವಿಡಿಯೋ ಗಮನಿಸಿದರೆ ಹಿನ್ನೆಲೆಯಲ್ಲಿ ಕ್ಯಾಮರಾ, ಶೂಟಿಂಗ್‌ ಸೆಟ್‌ ನೋಡಬಹುದು. ಇದರಲ್ಲಿ ಆಶಿಕಾ ಅವರ ತಪ್ಪಿಲ್ಲ. ಅವರು ಬಹಳ ಒಳ್ಳೆಯವರು. ಅವರ ಬಗ್ಗೆ ಯಾರೂ ತಪ್ಪು ತಿಳಿಯಬೇಡಿ'' ಎಂದು ಪ್ರಮೋದ್‌ ಒಡೆಯರ್‌ ಸ್ಪಷ್ಟನೆ ನೀಡಿದ್ದಾರೆ. ಅಲ್ಲದೆ, ತಂಡದ ಪರವಾಗಿ ಪವನ್‌ ಒಡೆಯರ್‌ ಕ್ಷಮೆ ಕೂಡಾ ಕೇಳುವ ಮೂಲಕ, ವಿವಾದಕ್ಕೆ ತೆರೆ ಎಳೆದಿದ್ದಾರೆ.
'ರೇಮೊ' ಒಂದು ಮ್ಯೂಸಿಕಲ್ ಲವ್ ಸ್ಟೋರಿ. ಮ್ಯಾಜಿಕಲ್‌ ಕಂಪೋಸರ್ ಅರ್ಜುನ್ ಜನ್ಯ ಸಂಗೀತ ನೀಡಿರುವ ಆರು ಹಾಡುಗಳು ಈ ಚಿತ್ರದಲ್ಲಿದೆ. ಇಶಾನ್ - ಆಶಿಕಾ ರಂಗನಾಥ್ ಮೊದಲ ಸಲ ಈ ಸಿನಿಮಾದಲ್ಲಿ ಜೊತೆಯಾಗಿ ನಟಿಸಿದ್ದಾರೆ. ಈಗಾಗಲೇ ಈ ಜೋಡಿಯ ಕೆಲ ಪೋಸ್ಟರ್‌ಗಳಿಗೂ ಮೆಚ್ಚುಗೆ ಸಿಕ್ಕಿದೆ. ಚಿತ್ರವನ್ನು ಸಿ.ಆರ್. ಮನೋಹರ್ ನಿರ್ಮಿಸಿದ್ದಾರೆ. ಬೆಂಗಳೂರು, ಹೈದರಾಬಾದ್, ಜಮ್ಮು-ಕಾಶ್ಮೀರ, ಸೌತ್ ಆಫ್ರಿಕಾ, ಸಿಂಗಾಪುರ ಹಾಗೂ ಇನ್ನಿತರ ಕಡೆ ಸಿನಿಮಾ ಚಿತ್ರೀಕರಣ ಮಾಡಲಾಗಿದೆ. ವೈದಿ ಅವರ ಛಾಯಾಗ್ರಹಣ ಹಾಗೂ ಕೆ.ಎಂ.ಪ್ರಕಾಶ್ ಸಂಕಲನ 'ರೇಮೊ' ಚಿತ್ರಕ್ಕಿದೆ. ಸಿನಿಮಾ ನವೆಂಬರ್‌ 25 ರಂದು ತೆರೆ ಕಾಣುತ್ತಿದೆ.
