Hombale Films: ಶುಭ ದಿನದಂದೇ ಮತ್ತೊಂದು ಶುಭ ಕಾರ್ಯ ನೆರವೇರಿಸಿದ ಹೊಂಬಾಳೆ ಫಿಲಂಸ್!
ಪವನ್‌ ಕುಮಾರ್‌ ಮತ್ತು ಫಹಾದ್ ಫಾಸಿಲ್ ಕಾಂಬಿನೇಷನ್‌ನ "ಧೂಮಂ" ಸಿನಿಮಾ ಇದೀಗ ಸದ್ದಿಲ್ಲದೆ ಮುಹೂರ್ತ ಮುಗಿಸಿಕೊಂಡಿದೆ.
ʼಕಾಂತಾರಾʼ ಗೆಲುವಿನ ಗುಂಗಿನಲ್ಲಿರುವ ಹೊಂಬಾಳೆ ಫಿಲಂಸ್, ಇದೀಗ ಅದೇ ಕಾಂತಾರವನ್ನು ಇಡೀ ದೇಶಕ್ಕೆ ತೋರಿಸುವ ಕೆಲಸದಲ್ಲಿ ತೊಡಗಿಸಿಕೊಂಡಿದ್ದಾರೆ. ಅಂದರೆ, ದಕ್ಷಿಣದ ಎಲ್ಲ ಭಾಷೆಗಳಿಗೆ ಮತ್ತು ಹಿಂದಿ ಭಾಷೆಗೆ ಡಬ್‌ ಮಾಡಿ ಸಿನಿಮಾ ಬಿಡುಗಡೆಯ ಪ್ಲಾನ್‌ ಹಾಕಿದೆ. ಅದರಂತೆ ಈಗಾಗಲೇ ಆಯಾ ಅವತರಣಿಕೆಯ ಪೋಸ್ಟರ್‌ಗಳನ್ನೂ ಸಂಸ್ಥೆ ಬಿಡುಗಡೆ ಮಾಡಿದೆ.
ಹೀಗಿರುವಾಗಲೇ ಆ ಸಿನಿಮಾದ ಜತೆಗೆ ಇತ್ತೀಚೆಗಷ್ಟೇ ಘೋಷಣೆ ಮಾಡಿಕೊಂಡಿದ್ದ ಸಿನಿಮಾಕ್ಕೂ ಇದೀಗ ಚಾಲನೆ ಸಿಕ್ಕಿದೆ. ಅಂದರೆ, ಪವನ್‌ ಕುಮಾರ್‌ ಮತ್ತು ಫಹಾದ್ ಫಾಸಿಲ್ ಕಾಂಬಿನೇಷನ್‌ನ "ಧೂಮಂ" ಸಿನಿಮಾ ಇದೀಗ ಸದ್ದಿಲ್ಲದೆ ಮುಹೂರ್ತ ಮುಗಿಸಿಕೊಂಡಿದೆ. ಈ ವಿಚಾರವನ್ನು ಹೊಂಬಾಳೆ ಸಂಸ್ಥೆ ತನ್ನ ಅಧಿಕೃತ ಟ್ವಿಟರ್‌ನ ಖಾತೆಯಲ್ಲಿ ಈ ವಿಚಾರ ಹಂಚಿಕೊಂಡಿದೆ.
ಅಂದಹಾಗೆ, ಪವನ್‌ ಕುಮಾರ್‌ ನಿರ್ದೇಶನದ ಹೊಸ ಸಿನಿಮಾದ ಶೀರ್ಷಿಕೆ ಕಳೆದ ಶುಕ್ರವಾರದಂದು ಬಿಡುಗಡೆ ಆಗಿತ್ತು. ಚಿತ್ರಕ್ಕೆ "ಧೂಮಂ" ಎಂದು ನಾಮಕರಣ ಮಾಡಲಾಗಿತ್ತು. ಹೊಂಬಾಳೆ ಫಿಲಂಸ್ ಕೇವಲ ಚಿತ್ರದ ಮಲಯಾಳಂ ಪೋಸ್ಟರ್‌ ಅಷ್ಟೇ ಬಿಡುಗಡೆ ಮಾಡಿಕೊಂಡಿತ್ತು. ನಾಯಕನಾಗಿ ಫಹಾದ್ ಫಾಸಿಲ್ ಮತ್ತು ನಾಯಕಿಯಾಗಿ "ಸೂರರೈ ಪೋಟ್ರು" ಸಿನಿಮಾದಲ್ಲಿ ನಟಿಸಿದ್ದ ಅಪರ್ಣ ಬಾಲಮುರುಳಿ ನಟಿಸುತ್ತಿದ್ದಾರೆ.
ದ್ವಿತ್ವ- ಧೂಮಂ ಬೇರೆ ಬೇರೆನಾ?
ಎಲ್ಲವೂ ಅಂದುಕೊಂಡಂತೆ ಅಪ್ಪು ಇದ್ದಿದ್ದರೆ ಇಷ್ಟೊತ್ತಿಗೆ “ದ್ವಿತ್ವ” ಸಿನಿಮಾ ನಿರ್ಮಾಣವಾಗಿರುತ್ತಿತ್ತು. ಆದರೆ, ಕಾಲನ ನಿರ್ಣಯವೇ ಬೇರೆ. ಪುನೀತ್‌ ಅಕಾಲಿಕ ನಿಧನದಿಂದ "ದ್ವಿತ್ವ" ಸಿನಿಮಾ ಸೆಟ್ಟೇರಲಿಲ್ಲ. ಹೀಗಿರುವಾಗಲೇ ಆ ಕಥೆ ಯಾರ ಪಾಲಾಗಲಿದೆ? ಎಂಬಿತ್ಯಾದಿ ಪ್ರಶ್ನೆಗಳೂ ಓಡಾಡತೊಡಗಿದವು. ಆಗ ತೇಲಿ ಬಂದ ಹೆಸರು ಮಾಲಿವುಡ್‌ ನಟ ಫಹಾದ್ ಫಾಸಿಲ್. "ದ್ವಿತ್ವ" ಚಿತ್ರದ ಕಥೆಯಲ್ಲಿ ಫಹಾದ್ ನಟಿಸಲಿದ್ದಾರೆ ಎಂದೇ ಪುಕಾರು ಹಬ್ಬಿತು. ಆದರೆ, ಚಿತ್ರತಂಡ ಮಾತ್ರ ಯಾವುದೇ ಸುಳಿವು ಬಿಟ್ಟುಕೊಡಲಿಲ್ಲ. ಇದೀಗ "ಧೂಮಂ" ಹೆಸರಿನ ಶೀರ್ಷಿಕೆ ಘೋಷಣೆ ಮಾಡಿಕೊಂಡಿದೆಯಾದರೂ, ಅದೇ ಇದೆನೇ, ಅಥವಾ ಬೇರೆನಾ ಎಂಬ ಪ್ರಶ್ನೆ ಎಲ್ಲರಲ್ಲೂ ಕಾಡತೊಡಗಿದೆ.
