Baahubali Scene Recreated: ಕಂದನ ಪಾದ ಹಣೆ ಮೇಲಿಟ್ಟುಕೊಂಡು ರಾಜಮೌಳಿಗೆ ಫೋಟೋ ಅರ್ಪಿಸಿದ ಖ್ಯಾತ ನಟಿ..ಯಾರಿದು?

ಬಹುಭಾಷಾ ನಟಿ ಕಾಜಲ್ ಅಗರ್​​ವಾಲ್ ಸದ್ಯಕ್ಕೆ ತಾಯ್ತನ ಎಂಜಾಯ್ ಮಾಡುತ್ತಿದ್ದಾರೆ. ಚಿತ್ರರಂಗಕ್ಕೆ ಬಂದ ಆರಂಭದ ದಿನಗಳಿಂದಲೂ ತಮ್ಮ ಸಕ್ಸಸ್, ಕರಿಯರ್, ವೈಯಕ್ತಿಕ ಜೀವನ, ಮದುವೆ, ಮಗು ಎಲ್ಲಾ ವಿಚಾರಗಳನ್ನು ಅಭಿಮಾನಿಗಳೊಂದಿಗೆ ಸೋಷಿಯಲ್ ಮೀಡಿಯಾದಲ್ಲಿ ಹಂಚಿಕೊಳ್ಳುತ್ತಲೇ ಬಂದಿರುವ ಕಾಜಲ್ ಅಗರ್​ವಾಲ್ ತಾವು ಚಿತ್ರರಂಗಕ್ಕೆ ಕಮ್ ಬ್ಯಾಕ್ ಮಾಡುವ ಸುಳಿವು ಕೂಡಾ ನೀಡಿದ್ದಾರೆ.

ಇತ್ತೀಚೆಗಷ್ಟೇ ಗಂಡು ಮಗುವಿಗೆ ಜನ್ಮ ನೀಡಿರುವ ಕಾಜಲ್ ಅಗರ್​​ವಾಲ್ ತಮ್ಮ ಕಂದನಿಗೆ ನೀಲ್ ಎಂದು ಹೆಸರಿಟ್ಟಿದ್ದಾರೆ. ಕಂದನೊಂದಿಗೆ ಇರುವ ಕೆಲವೊಂದು ಫೋಟೋಗಳನ್ನು ಕೂಡಾ ಕಾಜಲ್ ಅಗರ್​​ವಾಲ್ ಸೋಷಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾರೆ. ಇದೀಗ ಮತ್ತೊಂದು ಹೊಸ ಫೋಟೋವನ್ನು ಅವರು ಹಂಚಿಕೊಂಡಿದ್ದು ಇದು ವೈರಲ್ ಆಗುತ್ತಿದೆ. ಮುದ್ದು ಕಂದನ ಪಾದವನ್ನು ತಲೆ ಮೇಲಿರಿಸಿಕೊಂಡು 'ಬಾಹುಬಲಿ' ಚಿತ್ರದ ದೃಶ್ಯವನ್ನು ಮರುಸೃಷ್ಟಿಸಿದ್ದಾರೆ. ಅಲ್ಲದೆ ಈ ಫೋಟೋವನ್ನು ಖ್ಯಾತ ಟಾಲಿವುಡ್ ನಿರ್ದೇಶಕ ರಾಜಮೌಳಿ ಅವರಿಗೆ ಅರ್ಪಿಸಿದ್ದಾರೆ. ''ರಾಜಮೌಳಿ ಸರ್​​​​, ನಿಮಗೆ ಇದು ನೀಲ್ ಮತ್ತು ನನ್ನ ಸಮರ್ಪಣೆ'' ಎಂದು ಕ್ಯಾಪ್ಷನ್ ನೀಡಿದ್ದಾರೆ. ಎಸ್​.ಎಸ್. ರಾಜಮೌಳಿ ನಿರ್ದೇಶನದಲ್ಲಿ 2009 ರಲ್ಲಿ ತೆರೆ ಕಂಡ 'ಮಗಧೀರ' ಚಿತ್ರದಲ್ಲಿ ಕಾಜಲ್ ಅಗರ್​ವಾಲ್ ನಟಿಸಿದ್ದರು.

ತೆಲುಗು, ತಮಿಳು ಭಾಷೆಗಳಲ್ಲಿ ಟಾಪ್ ಹೀರೋಯಿನ್ ಆಗಿ ಧೂಳೆಬ್ಬಿಸಿದ್ದ ಈ ಚೆಲುವೆ 2020ರಲ್ಲಿ ಮದುವೆಯಾಗಿ ಅಭಿಮಾನಿಗಳಿಗೆ ಶಾಕ್ ಕೊಟ್ಟಿದ್ದರು. ಅನೇಕ ನಾಯಕಿಯರು ಮದುವೆಯ ನಂತರವೂ ನಟನೆಯನ್ನು ಮುಂದುವರೆಸುತ್ತಾರೆ. ಆದರೆ ಸದ್ಯಕ್ಕೆ ಕಾಜಲ್ ಅಗರ್​​ವಾಲ್ ನಟನೆಯಿಂದ ವಿರಾಮ ತೆಗೆದುಕೊಂಡು ವೈವಾಹಿಕ ಜೀವನವನ್ನು ಆನಂದಿಸುತ್ತಿದ್ದಾರೆ. ಕಳೆದ ಏಪ್ರಿಲ್​​​​ನಲ್ಲಿ ಮಗುವಿಗೆ ಜನ್ಮ ನೀಡಿರುವ ಕಾಜಲ್ ಅಗರ್​ವಾಲ್​ ಸದ್ಯಕ್ಕೆ ತಾಯ್ತನವನ್ನು ಎಂಜಾಯ್ ಮಾಡುತ್ತಿದ್ದಾರೆ. ಆಪ್ತ ಮೂಲಗಳ ಮಾಹಿತಿ ಪ್ರಕಾರ, ಇನ್ನು ಕೆಲವೇ ದಿನಗಳಲ್ಲಿ ಕಾಜಲ್ ಚಿತ್ರರಂಗಕ್ಕೆ ರೀ ಎಂಟ್ರಿ ಕೊಡಲಿದ್ದಾರೆ ಎನ್ನಲಾಗುತ್ತಿದೆ.

2020 ರಲ್ಲಿ ತಮ್ಮ ಧೀರ್ಘಕಾಲದ ಸ್ನೇಹಿತ ಗೌತಮ್ ಕಿಚ್ಲು ಅವರನ್ನು ವಿವಾಹವಾಗಿದ್ದ ಕಾಜಲ್, ಮೊದಲು ಒಪ್ಪಿಕೊಂಡಿದ್ದ ಎಲ್ಲಾ ಪ್ರಾಜೆಕ್ಟ್​​​​ಗಳನ್ನು ಮುಗಿಸಿ ವೈಯಕ್ತಿಕ ಜೀವನದ ಕಡೆಗೆ ಗಮನ ನೀಡಿದರು. ಮದುವೆಯಾದ ನಂತರ ಕೂಡಾ ನಾನು ಸಿನಿಮಾಗಳಲ್ಲಿ ನಟಿಸುತ್ತೇನೆ ಎಂದು ಕಾಜಲ್ ಹೇಳಿದ್ದರೂ, ಆಕೆ ಸಿನಿಮಾ ರಂಗದಿಂದ ದೂರ ಉಳಿದು ಪತಿ ಗೌತಮ್ ಕಿಚ್ಲು ಬ್ಯುಸ್ನೆಸ್​​​​ಗೆ ಸಹಾಯ ಮಾಡುತ್ತಾರೆ ಎಂದು ಆಪ್ತ ಮೂಲಗಳಿಂದ ಮಾಹಿತಿ ದೊರೆತಿತ್ತು. ಗರ್ಭಿಣಿಯಾದ ನಂತರ ತಾವು ಒಪ್ಪಿಕೊಂಡಿದ್ದ 3-4 ಸಿನಿಮಾಗಳಿಂದ ಕಾಜಲ್ ಹೊರ ಬಂದಿದ್ದರು.

ಪಂಜಾಬಿ ಕುಟುಂಬಕ್ಕೆ ಸೇರಿದ ಕಾಜಲ್ ಅಗರ್​​ವಾಲ್ ಹೆಸರು ಮಾಡಿದ್ದು ಮಾತ್ರ ತೆಲುಗು ಚಿತ್ರರಂಗದಲ್ಲಿ. 2004 ರಲ್ಲಿ ಹಿಂದಿ ಚಿತ್ರದ ಮೂಲಕ ಚಿತ್ರರಂಗಕ್ಕೆ ಬಂದ ಕಾಜಲ್ ಅಗರ್​ವಾಲ್ ಅದೇ ವರ್ಷ ಲಕ್ಷ್ಮಿ ಕಲ್ಯಾಣಂ ಚಿತ್ರದ ಮೂಲಕ ತೆಲುಗು ಚಿತ್ರರಂಗಕ್ಕೆ ಬಂದರು. ಚಂದಮಾಮಾ, ಮಗಧೀರ, ಆರ್ಯ 2, ಡಾರ್ಲಿಂಗ್ , ಮಿ. ಪರ್ಫೆಕ್ಟ್, ಸಿಂಗಂ, ನಾಯಕ್, ಎವುಡು, ಜನತಾ ಗ್ಯಾರೇಜ್, ಕೈದಿ ನಂ 150 ಸೇರಿ ಕಾಜಲ್ ಅಗರ್​​ವಾಲ್ ಅನೇಕ ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಸೆಪ್ಟೆಂಬರ್‌ನಲ್ಲಿ ಕಮಲ್ ಹಾಸನ್ ಅವರ 'ಇಂಡಿಯನ್ 2' ರ ಚಿತ್ರೀಕರಣಕ್ಕೆ ಕಾಜಲ್ ಹಾಜರಾಗಲಿದ್ದಾರೆ ಎನ್ನಲಾಗುತ್ತಿದೆ. ಇನ್ನೂ 3-4 ಸಿನಿಮಾಗಳಿಗೆ ಈ ಚೆಲುವೆ ಸಹಿ ಹಾಕಿದ್ದಾರೆ.