ನೆಟ್‌ಫ್ಲಿಕ್ಸ್‌ ಒಟಿಟಿಯಲ್ಲಿ ಈ ವಾರ ಮೂವರು ಸ್ಟಾರ್‌ ಹೀರೋಗಳ ಮೂರು ಚಿತ್ರಗಳ ಆಗಮನ, ಅದರಲ್ಲೊಂದು ಬ್ಲಾಕ್‌ ಬಸ್ಟರ್‌

ಇನ್ನೇನು ಮೇ ತಿಂಗಳು ಮುಗಿಯಲು ಕೆಲವೇ ದಿನಗಳು ಬಾಕಿ ಇವೆ. ಆ ಐದು ದಿನಗಳಲ್ಲಿ ಘಟಾನುಘಟಿ ಸ್ಟಾರ್‌ ನಟರ ಸಿನಿಮಾಗಳು ಒಟಿಟಿ ಅಂಗಳಕ್ಕೆ ಆಗಮಿಸಲಿವೆ. ತಮಿಳು ನಟ ಸೂರ್ಯ ಅಭಿನಯದ ʻರೆಟ್ರೋʼ, ಸಲ್ಮಾನ್‌ ಖಾನ್‌ ನಟನೆಯ ʻಸಿಕಂದರ್‌ʼ, ತೆಲುಗು ನಟ ನಾನಿ ನಟನೆಯ ʻಹಿಟ್‌ 3ʼ ಸಿನಿಮಾಗಳು ಈ ವಾರ ಒಟಿಟಿಗೆ ಬರಲಿವೆ. ಈ ಮೂಲಕ ಒಂದೇ ವಾರದಲ್ಲಿ ಮೂವರು ಸ್ಟಾರ್‌ ನಟರ ಸಿನಿಮಾಗಳು ಒಟಿಟಿಗೆ ಬಂದಂತಾಗಲಿವೆ.

ಬಾಲಿವುಡ್‌, ಕಾಲಿವುಡ್‌, ಟಾಲಿವುಡ್‌ನ ಮೂರು ಸ್ಟಾರ್‌ ಹೀರೋಗಳ ಬಿಗ್‌ ಬಜೆಟ್‌ನ ಮೂರು ಸಿನಿಮಾಗಳು ನೆಟ್‌ಫ್ಲಿಕ್ಸ್‌ ಒಟಿಟಿಗೆ ಆಗಮಿಸಲಿವೆ. ಇವುಗಳಲ್ಲಿ ನಾನಿ ಅಭಿನಯಿಸಿದ ಹಿಟ್ 3 ಬ್ಲಾಕ್‌ಬಸ್ಟರ್ ಹಿಟ್ ಆಗಿದ್ದರೆ, ʻರೆಟ್ರೋʼ, ʻಸಿಕಂದರ್ʼ ಬಾಕ್ಸ್ ಆಫೀಸ್‌ನಲ್ಲಿ ಹಿನ್ನಡೆ ಅನುಭವಿಸಿವೆ. ಇದೀಗ ಈ ಸಿನಿಮಾಗಳಿಗೆ ಒಟಿಟಿಯಲ್ಲಿ ಅದ್ಯಾವ ರೀತಿಯ ರೆಸ್ಪಾನ್ಸ್‌ ಸಿಗಲಿದೆ ಎಂಬುದನ್ನು ಕಾದು ನೋಡಬೇಕಿದೆ.

ಇದನ್ನೂ ಓದಿ: ನಾದಬ್ರಹ್ಮ ಹಂಸಲೇಖ ಜೀವನದ ಮೂವರು ಸಂಗಾತಿಗಳ ವಿವರ ಬಹಿರಂಗ, ಒಬ್ಬರು ಧರ್ಮಪತ್ನಿ ಲತಾ, ಇನ್ನಿಬ್ಬರು ಯಾರು?

ಸಿಕಂದರ್ ಒಟಿಟಿ ಸ್ಟ್ರೀಮಿಂಗ್

ಸಲ್ಮಾನ್ ಖಾನ್ ಮತ್ತು ರಶ್ಮಿಕಾ ಮಂದಣ್ಣ ಅಭಿನಯಿಸಿದ ಸಿನಿಮಾ ಸಿಕಂದರ್. ಈ ವರ್ಷ ರಂಜಾನ್ ಸಂದರ್ಭದಲ್ಲಿ ಬಿಡುಗಡೆಯಾದ ಈ ಸಿನಿಮಾ ದೊಡ್ಡ ನಿರೀಕ್ಷೆಗಳ ನಡುವೆ ಬಿಡುಗಡೆಯಾದರೂ, ಪ್ರೇಕ್ಷಕರನ್ನು ಹೆಚ್ಚಾಗಿ ಆಕರ್ಷಿಸಲಿಲ್ಲ. ಈ ಸಿನಿಮಾ ಈಗ ಒಟಿಟಿಯಲ್ಲಿ ಸ್ಟ್ರೀಮಿಂಗ್ ಆಗುತ್ತಿದೆ. ಭಾನುವಾರ (ಮೇ 25) ದಿಂದ ನೆಟ್‌ಫ್ಲಿಕ್ಸ್‌ನಲ್ಲಿ ಸ್ಟ್ರೀಮಿಂಗ್ ಆರಂಭವಾಗಿದೆ. ಎ.ಆರ್. ಮುರುಗದಾಸ್ ನಿರ್ದೇಶಿಸಿದ ಈ ಚಿತ್ರಕ್ಕೆ ನೆಗೆಟಿವ್ ವಿಮರ್ಶೆಗಳೇ ಹರಿದುಬಂದಿವೆ. ನೆಗೆಟಿವ್‌ ವಿಮರ್ಶೆಗಳ ನಡುವೆಯೇ ಈ ಸಿನಿಮಾ ಬಾಕ್ಸ್‌ ಆಫೀಸ್‌ನಲ್ಲಿ 200 ಕೋಟಿಗೂ ಅಧಿಕ ಕಲೆಕ್ಷನ್‌ ಮಾಡಿತ್ತು.

ಇದನ್ನೂ ಓದಿ: ರೆಟ್ರೊ ಸಿನಿಮಾ ಒಟಿಟಿ ಬಿಡುಗಡೆ ವಿವರ: ಸೂರ್ಯ- ಪೂಜಾ ಹೆಗ್ಡೆ ನಟನೆಯ ಸಿನಿಮಾ ಆನ್‌ಲೈನ್‌ ಸ್ಟ್ರೀಮಿಂಗ್‌ ಯಾವಾಗ?

ಹಿಟ್ 3 ಒಟಿಟಿ ರಿಲೀಸ್ ದಿನಾಂಕ

ತೆಲುಗು ಸ್ಟಾರ್‌ ನಟ ನಾನಿ ಅಭಿನಯಿಸಿದ ಬ್ಲಾಕ್‌ಬಸ್ಟರ್ ಸಿನಿಮಾ ಹಿಟ್ 3 ಈ ವಾರ ನೆಟ್‌ಫ್ಲಿಕ್ಸ್‌ಗೆ ಬರಲಿದೆ. ಈ ಸಿನಿಮಾ ಗುರುವಾರ (ಮೇ 29) ದಿಂದ ಸ್ಟ್ರೀಮಿಂಗ್ ಆಗಲಿದೆ. ಮೂಲ ತೆಲುಗಿನ ಹಿಟ್‌ ಸಿನಿಮಾ ಪ್ಯಾನ್ ಇಂಡಿಯಾ ಮಟ್ಟದಲ್ಲಿ ಬಿಡುಗಡೆಯಾಗಿತ್ತು. ಇದೀಗ ಇದೇ ಸಿನಿಮಾ ತೆಲುಗು ಜತೆಗೆ, ತಮಿಳು, ಕನ್ನಡ, ಹಿಂದಿ ಮತ್ತು ಮಲಯಾಳಂ ಭಾಷೆಯಲ್ಲಿ ಸ್ಟ್ರೀಮಿಂಗ್‌ ಆಗಲಿದೆ. ವಿಶ್ವದಾದ್ಯಂತ ಹಿಟ್‌ 3 ಸಿನಿಮಾ 120 ಕೋಟಿಗೂ ಅಧಿಕ ಗಳಿಕೆ ಕಂಡಿದೆ. ಹಿಟ್ ಯೂನಿವರ್ಸ್‌ನಿಂದ ಬಂದ ಈ ಮೂರನೇ ಸಿನಿಮಾಗೆ ಮಿಶ್ರ ಪ್ರತಿಕ್ರಿಯೆ ಬಂದಿದ್ದರೂ, ಬಾಕ್ಸ್ ಆಫೀಸ್‌ನಲ್ಲಿ ಚಿತ್ರ ಯಶಸ್ಸು ಕಂಡಿತು. ಅರ್ಜುನ್ ಸರ್ಕಾರ್ ಎಂಬ ಐಪಿಎಸ್ ಅಧಿಕಾರಿಯ ಪಾತ್ರದಲ್ಲಿ ನಾನಿ ಅಭಿನಯಿಸಿದ್ದಾರೆ.

ಇದನ್ನೂ ಓದಿ: ನನ್ನ ಹುಟ್ಟಿಗೆ ನೀನೇ ಉಡುಗೊರೆ, ಹುಟ್ಟುಹಬ್ಬದಂದು ಸ್ಪಂದನಾ ನೆನಪಿನಲ್ಲಿ ವಿಜಯ ರಾಘವೇಂದ್ರ ಭಾವುಕ

ರೆಟ್ರೋ ಒಟಿಟಿ ರಿಲೀಸ್ ದಿನಾಂಕ

ತಮಿಳು ಸ್ಟಾರ್ ಹೀರೋ ಸೂರ್ಯ ಅಭಿನಯಿಸಿದ ʻರೆಟ್ರೋʼ ಸಿನಿಮಾ ಒಂದು ತಿಂಗಳೊಳಗೆ ಒಟಿಟಿಗೆ ಬರುತ್ತಿದೆ. ಮೇ 1ರಂದು ಥಿಯೇಟರ್‌ಗಳಲ್ಲಿ ಬಿಡುಗಡೆಯಾದ ಈ ಸಿನಿಮಾ ಮೇ 31 ರಂದು ನೆಟ್‌ಫ್ಲಿಕ್ಸ್‌ಗೆ ಬರುತ್ತಿದೆ. ಈ ಸಿನಿಮಾ ದೊಡ್ಡ ನಿರೀಕ್ಷೆಗಳ ನಡುವೆ ಬಿಡುಗಡೆಯಾದರೂ, ನೆಗೆಟಿವ್ ವಿಮರ್ಶೆಗಳಿಂದ ಬಾಕ್ಸ್ ಆಫೀಸ್‌ನಲ್ಲಿ ಹಿನ್ನಡೆ ಅನುಭವಿಸಿತು. ಇದೇ ʻರೆಟ್ರೋʼ ಸಿನಿಮಾ ಎದುರು ತೆರೆಕಂಡ ʻಟೂರಿಸ್ಟ್ ಫ್ಯಾಮಿಲಿʼ ಬಾಕ್ಸ್‌ ಆಫೀಸ್‌ನಲ್ಲಿ ಮುನ್ನಡೆ ಸಾಧಿಸಿತು. ಈ ಹಿಂದಿನ ಸೂರ್ಯ ನಟನೆಯ ʻಕಂಗುವಾʼ ಸಿನಿಮಾ ಸಹ ಸೋಲನುಭವಿಸಿತ್ತು.