ಹಿಟ್‌: ದಿ ಥರ್ಡ್‌ ಕೇಸ್‌- ತೆಲುಗು ಭಾಷೆಯಲ್ಲಿ 304 ಶೋ, ಕನ್ನಡದಲ್ಲಿ ಕೇವಲ 7 ಶೋ, ಬೆಂಗಳೂರಲ್ಲಿ ಪರಿಸ್ಥಿತಿ ಹೀಗಿದೆ ಗುರೂ
ಹಿಟ್‌ 3 ತೆಲುಗು ಸಿನಿಮಾವನ್ನು ಕರ್ನಾಟಕದಲ್ಲಿ ಬೆಂಗಳೂರು ಕುಮಾರ್‌ ಫಿಲ್ಮ್ಸ್‌ ಬಿಡುಗಡೆ ಮಾಡುತ್ತಿದೆ. ಮೇ 1ರಂದು ಈ ಸಿನಿಮಾವು ಬೆಂಗಳೂರಿನಲ್ಲಿ ತೆಲುಗು ಭಾಷೆಯಲ್ಲಿ 304 ಶೋ, ಕನ್ನಡದಲ್ಲಿ ಕೇವಲ 7 ಶೋ ಇರಲಿದೆ. ಕರ್ನಾಟಕದಲ್ಲಿ ಕೇವಲ 50 ಸ್ಕ್ರಿನ್‌ಗಳಲ್ಲಿ ಮಾತ್ರ ಕನ್ನಡ ವರ್ಷನ್‌ನಲ್ಲಿ ಈ ಸಿನಿಮಾ ವೀಕ್ಷಣೆಗೆ ಲಭ್ಯವಿರಲಿದೆ.
ಹಿಟ್‌: ದಿ ಥರ್ಡ್‌ ಕೇಸ್‌: ಬೇರೆ ಭಾಷೆಯ ಸಿನಿಮಾಗಳು ಕರ್ನಾಟಕದಲ್ಲಿ ಬಿಡುಗಡೆಯಾಗುವ ಸಮಯದಲ್ಲಿ ಪ್ರತಿಬಾರಿಯು ರಾಜ್ಯದಲ್ಲಿ ಕನ್ನಡ ಡಬ್ಬಿಂಗ್‌ ಆವೃತ್ತಿಯನ್ನು ಹೆಚ್ಚಿನ ಚಿತ್ರಮಂದಿರಗಳಲ್ಲಿ ಪ್ರದರ್ಶಿಸಿ ಎಂಬ ಕೂಗು, ಬೇಡಿಕೆ ಇರುತ್ತದೆ. ಹೆಚ್ಚಾಗಿ ಆನ್‌ಲೈನ್‌ನಲ್ಲಿ ಇಂತಹ ಬೇಡಿಕೆ, ಚರ್ಚೆಗಳು ನಡೆಯುತ್ತವೆ. ಆದರೆ, ಹೆಚ್ಚಿನ ಸಿನಿಮಾ ವಿತರಕರು ಕರ್ನಾಟಕದಲ್ಲಿ ಕನ್ನಡ ವರ್ಷನ್‌ನಲ್ಲಿ ಕಾಟಾಚಾರಕ್ಕೆ ಎಂಬಂತೆ ಕೆಲವೇ ಕೆಲವು ಥಿಯೇಟರ್‌ಗಳಲ್ಲಿ ರಿಲೀಸ್‌ ಮಾಡಿ "ಬೇರೆ ಭಾಷೆಯಲ್ಲೇ ಕನ್ನಡಿಗರು ನೋಡಲಿ ಬಿಡಿ" ಎಂಬ ತಾತ್ಸಾರ ಪ್ರದರ್ಶಿಸುತ್ತಾರೆ. ಡಬ್ಬಿಂಗ್‌ ಎನ್ನುವುದು ಚಿತ್ರತಂಡಕ್ಕೆ ಹೆಚ್ಚಿನ ಹೊರೆ ಎನ್ನುವುದು ನಿಜ. ಇದೇ ಸಮಯದಲ್ಲಿ ಬೇರೆ ಭಾಷೆ ತಿಳಿಯದ, ಮಾತ್ರ ಭಾಷೆಯಲ್ಲಿಯೇ ಸಿನಿಮಾ ನೋಡಲು ಇಷ್ಟಪಡುವ ದೊಡ್ಡ ಪ್ರೇಕ್ಷಕ ಬಳಗಕ್ಕೆ ಸಿನಿಮಾವೊಂದನ್ನು ರೀಚ್‌ ಮಾಡಿಸಲು ಇದು ನೆರವಾಗುತ್ತದೆ. ಕನ್ನಡದ ಕಾಂತಾರ, ಕೆಜಿಎಫ್‌ ಇದೇ ರೀತಿ ಭಾರತೀಯ ಭಾಷೆಗಳು ಮಾತ್ರವಲ್ಲದೆ ಅನ್ಯದೇಶಗಳ ವಿವಿಧ ಭಾಷೆಗಳಲ್ಲಿಯೂ ರಿಲೀಸ್‌ ಆಗಿತ್ತು. ಹೆಚ್ಚಾಗಿ ಬಿಗ್‌ ಬಜೆಟ್‌ ಚಿತ್ರಗಳು ಈ ರೀತಿ ಡಬ್ಬಿಂಗ್‌ ವರ್ಷನ್‌ ಹೊರತರುತ್ತವೆ. ಆದರೆ, ಕನ್ನಡ ಅಥವಾ ಬೆಂಗಳೂರಿನ ವಿಚಾರಕ್ಕೆ ಬಂದಾಗ ಪ್ರತಿಬಾರಿಯೂ "ಕಾಟಾಚಾರ" ಕಾಣಿಸುತ್ತದೆ ಎನ್ನುವುದು ಕನ್ನಡಿಗರ ಅಳಲು. ಈ ವಾರ ಚಿತ್ರಮಂದಿರಗಳಲ್ಲಿ ರಿಲೀಸ್‌ ಆಗಲಿರುವ ತೆಲುಗು ಸಿನಿಮಾ "ಹಿಟ್‌: ದಿ ಥರ್ಡ್‌ ಕೇಸ್‌" ವಿಚಾರದಲ್ಲಿಯೂ ಇದೇ ರೀತಿ ಆಗಿದೆ.
ಬೆಂಗಳೂರಲ್ಲಿ ಕನ್ನಡದಲ್ಲಿ 7 ಶೋ ಮಾತ್ರ
ಹಿಂದೂಸ್ತಾನ್ ಟೈಮ್ಸ್ ಕನ್ನಡವು ಬುಕ್‌ಮೈಶೋಗೆ ಹೋಗಿ ಮೇ 1ರಂದು ಕನ್ನಡ ಮತ್ತು ತೆಲುಗು ಆವೃತ್ತಿಯಲ್ಲಿ ಹಿಟ್‌: ದಿ ಥರ್ಡ್‌ ಕೇಸ್‌ ಎಷ್ಟು ಶೋ ಇರಲಿದೆ ಎಂದು ಲೆಕ್ಕಹಾಕಿದೆ. ಏಪ್ರಿಲ್‌ 29ರಂದು ಸಂಜೆ 5.30ರ ವೇಳೆಯಲ್ಲಿ ಲೆಕ್ಕ ಹಾಕಿದಾಗ ತೆಲುಗು ಭಾಷೆಯಲ್ಲಿ ಒಟ್ಟು 304 ಶೋಗಳು ಬೆಂಗಳೂರಿನಲ್ಲಿ ಪ್ರದರ್ಶನ ಕಾಣಲಿವೆ. ಅದೇ ರೀತಿ ಕನ್ನಡದಲ್ಲಿ ಕೇವಲ 7 ಶೋಗಳು ಇರುವುದು ತಿಳಿದುಬಂದಿದೆ. ವೈಟ್‌ಫೀಲ್ಡ್‌ನ ಐನಾಕ್ಸ್‌ ನೆಕ್ಸಾಸ್‌ನಲ್ಲಿ ಮಧ್ಯಾಹ್ನ 12:35ಕ್ಕೆ, ಐನಾಕ್ಸ್‌ ಬ್ರೋಕ್‌ಫೀಲ್ಡ್‌ ಮಾಲ್‌ನಲ್ಲಿ ಮಧ್ಯಾಹ್ನ 1:15ಕ್ಕೆ, ನೆಲಮಂಗಲದ ರೂಪಾ ಸಿನಿಮಾದಲ್ಲಿ ಬೆಳಗ್ಗೆ 10:30 ಮತ್ತು ಸಂಜೆ 4:30 ಗಂಟೆಗೆ ಶೋ ಇರಲಿದೆ. ಬೆಂಗಳೂರಿನಲ್ಲಿ ಐನಾಕ್ಸ್‌ನಲ್ಲಿ ಎರಡೇ ಎರಡು ಶೋಗಳು ನಟ ಮಧ್ಯಾಹ್ನ ಊಟ ಮಾಡುವ ವೇಳೆಯಲ್ಲಿ ಹೆಚ್ಚು ಜನರು ಬಾರದ ವೇಳೆಯನ್ನು ಕನ್ನಡ ವರ್ಷನ್‌ಗ ಅಲೋಟ್‌ ಮಾಡಿರುವುದನ್ನೂ ಗಮನಿಸಬಹುದು.
ಬೆಂಗಳೂರಿಗಿಂತ ಚೆನ್ನೈ ಪರಿಸ್ಥಿತಿ ವಾಸಿ
ಪಕ್ಕದ ತಮಿಳುನಾಡಿನಲ್ಲಿ ಪರಿಸ್ಥಿತಿ ಹೇಗಿದೆ ಎಂದು ಲೆಕ್ಕಹಾಕಿದಾಗ ಕನ್ನಡಕ್ಕಿಂತ ಬೆಟರ್‌ ಎನಿಸಬಹುದು. ತಮಿಳುನಾಡಿನ ಚೆನ್ನೈನಲ್ಲಿ ಮೇ 1ರಂದು 37 ಶೋಗಳು ತಮಿಳು ಭಾಷೆಯಲ್ಲಿ ಇರಲಿವೆ. ಕನ್ನಡದ ಏಳು ಶೋಗಳಿಗೆ ಹೋಲಿಸಿದರೆ ಚೆನ್ನೈನಲ್ಲಿ ಹಿಟ್‌ 3 ತಮಿಳು ಶೋಗಳು ಹೆಚ್ಚಿವ.
ಕನ್ನಡಕ್ಕೆ ಡಬ್‌ ಮಾಡಲಾದ ಸಿನಿಮಾದ ಆವೃತ್ತಿಗೆ ಬೇಡಿಕೆಗೆ ತಕ್ಕಂತೆ ಪರದೆಗಳನ್ನು/ಪ್ರದರ್ಶನಗಳನ್ನು ವಿತರಣೆ ಮಾಡಲಾಗುತ್ತದೆ ಎಂದು ವಿತರಕರು ಹೇಳುತ್ತಿರುತ್ತಾರೆ. ಆದರೆ, ಸಿನಿಮಾ ಪ್ರದರ್ಶಕರು ಮೂಲ ಆವೃತ್ತಿಯನ್ನು ಮಾತ್ರ ಪ್ರದರ್ಶಿಸಲು ಒತ್ತಾಯಿಸಿದಾಗ ವಿತರಕರಿಗೆ ಏನೂ ಮಾಡಲಾಗುವುದಿಲ್ಲ. ಈ ವಾರ ತೆಲುಗಿನ ಹಿಟ್‌ 3 ಸಿನಿಮಾವು ಕನ್ನಡದಲ್ಲಿಯೂ ರಿಲೀಸ್‌ ಆಗಲಿದೆ. ಆದರೆ, ಅದು ಬೆರಳೆಣಿಕೆಯ ಸಮಯದಲ್ಲಿ ಮತ್ತು ಬಹುತೇಕ ಹೊತ್ತಲ್ಲದ ಹೊತ್ತಿನಲ್ಲಿ ಮಾತ್ರ.
ಎಐ ಮೂಲಕ ಡಬ್ಬಿಂಗ್‌
ನಾನಿಯ ಹಿಟ್‌ 3 ಸಿನಿಮಾದಲ್ಲಿ ಕನ್ನಡಕ್ಕೆ ಡಬ್‌ ಮಾಡಲು ಆರ್ಟಿಫಿಶಿಯಲ್‌ ಇಂಟಲಿಜೆನ್ಸ್‌ (ಎಐ) ತಂತ್ರಜ್ಞಾನವನ್ನು ಬಳಸಲಾಗಿದೆಯಂತೆ. ಇದು ಪ್ರೇಕ್ಷಕರಿಗೆ ಉತ್ತಮ ಅನುಭವ ನೀಡುವ ನಿರೀಕ್ಷೆಯಲ್ಲಿ ಚಿತ್ರತಂಡ ನೀಡಿದೆ. ಇದು ಡಬ್ಬಿಂಗ್‌ ಕಲಾವಿದರ ಹೊಟ್ಟೆಗೆ ಹಿಟ್ಟಿಲ್ಲದಂತೆ ಮಾಡುವ ಸಮಯವೂ ಹೌದು. ಹಿಟ್‌ ಸಿನಿಮಾವನ್ನು ಕರ್ನಾಟಕದಲ್ಲಿ ವಿತರಣೆ ಮಾಡುವ ಬೆಂಗಳೂರು ಕುಮಾರ್‌ ಫಿಲ್ಮ್ಸ್‌ ಪ್ರಕಾರ "ಹಿಟ್‌ 3 ಸಿನಿಮಾವು ಕರ್ನಾಟಕದಲ್ಲಿ 50 ಪರದೆಗಳಲ್ಲಿ ಕನ್ನಡ ವರ್ಷನ್‌ನಲ್ಲಿ ಪ್ರದರ್ಶನ ಕಾಣಲಿದೆ".
"ಮಾರ್ಕೆಟ್‌ನ ಡೈನಾಮಿಕ್ಸ್‌ಗಳು (ಚಲನಶೀಲತೆ) ಸ್ಕ್ರೀನ್‌ ಅಥವಾ ಶೋದ ಮೇಲೆ ಪರಿಣಾಮ ಬೀರುತ್ತವೆ. ವ್ಯವಹಾರದ ದೃಷ್ಟಿಯಿಂದ ಸಂಪೂರ್ಣವಾಗಿ ಕನ್ನಡ ಮತ್ತು ತೆಲುಗು ಭಾಷೆಯಲ್ಲಿ ಪರದೆ ಮತ್ತು ಪ್ರದರ್ಶನಗಳನ್ನು ವಿಭಜಿಸುವುದು ಅಸಾಧ್ಯ. ಈ ಸಿನಿಮಾದ ತೆಲುಗು ಆವೃತ್ತಿಗೆ ಹೆಚ್ಚಿನ ಬೇಡಿಕೆ ಇದೆ. ಆದರೆ, ಕನ್ನಡ ಆವೃತ್ತಿಯನ್ನು ಸ್ಟ್ರಾಂಗ್‌ ಕನ್ನಡ ಸೆಂಟರ್‌ಗಳಲ್ಲಿ (ಹೆಚ್ಚು ಕನ್ನಡ ಸಿನಿಮಾಗಳನ್ನು ನೋಡುವ ಪ್ರದೇಶಗಳು?) ಮಾತ್ರ ಬಿಡುಗಡೆ ಮಾಡಲಾಗುತ್ತದೆ. ಕನ್ನಡ ಆವೃತ್ತಿಗೆ ಬೇಡಿಕೆ ಹೆಚ್ಚಿದ್ದರೆ ಖಂಢಿತಾ ನಾವು ಶೋ ಹೆಚ್ಚಿಸುತ್ತೇವೆ" ಎಂದು ಕುಮಾರ್‌ ಒಟಿಟಿ ಪ್ಲೇಗೆ ಹೇಳಿದ್ದಾರೆ.
ಹಿಟ್‌ 3 ಸಿನಿಮಾವು ಶೈಲೇಶ್ ಕೊಲನು ಅವರ ಹಿಟ್‌ ಯೂನಿವರ್ಸ್‌ನಲ್ಲಿ ಬರುತ್ತಿರುವ ಮೂರನೇ ಸಿನಿಮಾವಾಗಿದೆ. ಈ ಸಿನಿಮಾದಲ್ಲಿ ತನ್ನ ಕರಿಯರ್‌ನಲ್ಲಿ ಇದೇ ಮೊದಲ ಬಾರಿಗೆ ನಾನಿ ಅವರು ಪೊಲೀಸ್‌ ಪಾತ್ರದಲ್ಲಿ ನಟಿಸಿದ್ದಾರೆ. ಕೆಜಿಎಫ್‌ ನಟಿ ಶ್ರೀನಿಧಿ ಶೆಟ್ಟಿ ಈ ಸಿನಿಮಾದಲ್ಲಿ ನಾಯಕಿಯಾಗಿ ನಟಿಸಿದ್ದಾರೆ.
Praveen Chandra B
