ನಾನು ಕನ್ನಡದ ಮನೆ ಮಗಳು, ರಕ್ಷಿತ್ ಶೆಟ್ಟಿ, ರಿಷಬ್ ಶೆಟ್ಟಿ ಜೊತೆ ನಟಿಸುವಾಸೆ; ಮಾರ್ಟಿನ್ ಬೆಡಗಿ ವೈಭವಿ ಶಾಂಡಿಲ್ಯ ಮನದ ಮಾತು
ಆ್ಯಕ್ಷನ್ ಪ್ರಿನ್ಸ್ ಧ್ರುವ ಸರ್ಜಾ ನಟನೆಯ ಬಹುನಿರೀಕ್ಷಿತ ಮಾರ್ಟಿನ್ ಚಿತ್ರ ಶುಕ್ರವಾರ (ಅಕ್ಟೋಬರ್ 11) ಬಿಡುಗಡೆಯಾಗುತ್ತಿದೆ. ಈ ಹೊತ್ತಿನಲ್ಲಿ ಸಿನಿಮಾದ ನಾಯಕಿ ಮುಂಬೈ ಮೂಲದ ವೈಭವಿ ಶಾಂಡಿಲ್ಯ ಸಿನಿಮಾ ಹಾಗೂ ಕರ್ನಾಟಕದ ಬಗ್ಗೆ ಒಂದಿಷ್ಟು ಮಾತುಗಳನ್ನಾಡಿದ್ದಾರೆ. ರಕ್ಷಿತ್ ಶೆಟ್ಟಿ, ರಿಷಭ್ ಶೆಟ್ಟಿ ಇಷ್ಟ ಎಂದಿರುವ ವೈಭವಿ, ಕರ್ನಾಟಕ ನನ್ನ ಮನೆ ಎಂದಿದ್ದಾರೆ.
‘ಮಾರ್ಟಿನ್ ಸಿನಿಮಾವು ದೊಡ್ಡ ಬಜೆಟ್ ಸಿನಿಮಾ, ಇದರಲ್ಲಿ ಕನ್ನಡದ ಚಿತ್ರರಂಗದ ಹಲವು ದಿಗ್ಗಜರು ಕೆಲಸ ಮಾಡಿದ್ದಾರೆ. ಈ ಸಿನಿಮಾದಲ್ಲಿ ನಾಯಕಿಯಾಗಿ ನಟಿಸುತ್ತಿರುವ ಬಗ್ಗೆ ನನಗೆ ತುಂಬಾನೇ ಖುಷಿ ಇದೆ. ಸಿನಿಮಾ ಬಿಡುಗಡೆ ದಿನಕ್ಕಾಗಿ ಕಾತರದಿಂದ ಎದುರು ನೋಡುತ್ತಿದ್ದೇನೆ, ಪ್ರೇಕ್ಷಕರು ನನ್ನನ್ನು ಹೇಗೆ ಸ್ವೀಕರಿಸಬಹುದು ಎಂಬ ಸಣ್ಣ ಅಳುಕು ಕೂಡ ಇದೆ‘ ಎಂದು ಮಾರ್ಟಿನ್ ಬೆಡಗಿ ವೈಭವಿ ಶಾಂಡಿಲ್ಯ ಖಾಸಗಿ ಮಾಧ್ಯಮವೊಂದಕ್ಕೆ ನೀಡಿದ ಸಂದರ್ಶನದಲ್ಲಿ ಮನ ಬಿಚ್ಚಿ ಮಾತನಾಡಿದ್ದಾರೆ.
ಆ್ಯಕ್ಷನ್ ಪ್ರಿನ್ಸ್ ದ್ರುವ ಸರ್ಜಾ ನಟನೆಯ ಮಾರ್ಟಿನ್ ಸಿನಿಮಾ ಅಕ್ಟೋಬರ್ 11ಕ್ಕೆ ಬಿಡುಗಡೆಯಾಗುತ್ತಿದ್ದು, ಚಿತ್ರತಂಡ ದಾವಣೆಗೆರೆಗೆ ಭೇಟಿ ನೀಡಿತ್ತು, ಈ ವೇಳೆ ನಾಯಕಿ ವೈಭವಿ ಶಾಂಡಿಲ್ಯ ನೀಡಿದ್ದ ಸಂದರ್ಶನದ ತುಣುಕಿನ ಬರಹ ರೂಪ ಇಲ್ಲಿದೆ ನೀವೂ ಓದಿ.
‘ಮಾರ್ಟಿನ್ ಸಂಪೂರ್ಣ ಆ್ಯಕ್ಷನ್ ಸಿನಿಮಾ, ಇದರಲ್ಲಿ ಒಂದು ಚಿಕ್ಕ ಲವ್‌ಸ್ಟೋರಿಯೂ ಇದೆ. ನಾನು ಅದರ ಭಾಗವಾಗಿದ್ದೇನೆ. ಸಿನಿಮಾದಲ್ಲಿ ನನ್ನ ಹೆಸರು ಪ್ರೀತಿ. ಇಡೀ ಸಿನಿಮಾದಲ್ಲಿ ಪ್ರೀತಿಯ ಪಾತ್ರ ಖಂಡಿತ ಇಲ್ಲ, ಆದರೂ ಈ ಸಿನಿಮಾದ ಬಗ್ಗೆ ನನಗೆ ಸಾಕಷ್ಟು ನಿರೀಕ್ಷೆ ಇದೆ. ಸಿನಿಮಾದಲ್ಲಿ ನನ್ನ ಪಾತ್ರ ಚಿಕ್ಕದಾದರೂ ಇಂತಹ ಬಿಗ್ ಬಜೆಟ್ ಸಿನಿಮಾದ ಭಾಗವಾಗಿರುವುದಕ್ಕೆ ನನಗೆ ಖಂಡಿತ ಖುಷಿ ಇದೆ‘ ಎಂದು ಚಿಕ್ಕ ಪಾತ್ರವಾದರೂ ಮಾರ್ಟಿನ್‌ನಲ್ಲಿ ನಟಿಸಿರುವುದೇ ಖುಷಿ ಎಂದಿದ್ದಾರೆ.
‘ನಾನು ಸಿನಿಮಾಕ್ಕೆ ಬಂದು ದಶಕಗಳಾದ್ರೂ ಇದೇ ಮೊದಲ ಬಾರಿಗೆ ಬಿಗ್‌ಬಜೆಟ್ ಸಿನಿಮಾದಲ್ಲಿ ನಟಿಸುತ್ತಿದ್ದೇನೆ. ಇಂತಹ ದೊಡ್ಡ ಸಿನಿಮಾದಲ್ಲಿ ನಟಿಸುತ್ತಿರುವುದು ನನಗೆ ಖುಷಿ ಇದೆ. ಮೊದಲಿನಿಂದಲೂ ಈ ರೀತಿಯ ಸಿನಿಮಾಗಳಲ್ಲಿ ನಟಿಸುವ ಬಯಕೆ ನನಗಿತ್ತು. ಆ ಆಸೆ ಈಗ ಪೂರೈಸಿದೆ, ಇನ್ನೂ ಮುಂದೆ ಕನ್ನಡಗಿರು ಹೇಗೆ ನನ್ನ ಕೈಹಿಡಿಯುತ್ತಾರೆ ನೋಡಬೇಕು‘ ಎಂದು ಬಿಗ್ ಬಜೆಟ್ ಸಿನಿಮಾದಲ್ಲಿ ನಟಿಸಿದ ಬಗ್ಗೆ ಖುಷಿ ವ್ಯಕ್ತಪಡಿಸಿದ್ದಾರೆ.
ನಾನು ಕನ್ನಡದ ಹುಡುಗಿ, ಕರ್ನಾಟಕ ನನ್ನ ಮನೆ
ವೈಭವಿ ಶಾಂಡಿಲ್ಯ ಈಗಾಗಲೇ ಶರಣ್ ಹಾಗೂ ಗೋಲ್ಡನ್‌ ಸ್ಟಾರ್ ಗಣೇಶ್ ನಟನೆಯ ಗಾಳಿಪಟ 2 ಸಿನಿಮಾದಲ್ಲಿ ನಟಿಸಿದ್ದಾರೆ. ಹಾಗಾಗಿ ಇವರು ಕನ್ನಡಗರಿಗೆ ಖಂಡಿತ ಅಪರಿಚಿತರಲ್ಲ. ಕನ್ನಡಿಗರ ಬಗ್ಗೆ, ಕರ್ನಾಟಕದ ಸಿನಿ ಪ್ರೇಕ್ಷಕರ ಬಗ್ಗೆ ಖುಷಿಯಿಂದ, ಅಭಿಮಾನದಿಂದ ಮಾತನಾಡುವ ವೈಭವಿ ‘ತುಂಬಾ ಖುಷಿ ಆಗ್ತಾ ಇದೆ, ಕನ್ನಡಿಗರು ನನ್ನನ್ನು ಕರ್ನಾಟಕದ ಹುಡುಗಿ ಎಂಬಂತೆ ಪ್ರೀತಿಸುತ್ತಿದ್ದಾರೆ. ನನ್ನನ್ನು ಅವರು ಕನ್ನಡದ ಹುಡುಗಿ ಎಂದು ಒಪ್ಪಿಕೊಂಡಿದ್ದಾರೆ. ನಾನು ಕನ್ನಡ ಹುಡುಗಿ ಎಂದು ನನ್ನ ಮನಸ್ಸಿನಲ್ಲಿ ಇದೆ. ನನ್ನ ಕನ್ನಡ ಮಾತನಾಡಲು ಖಂಡಿತ ಟ್ರೈ ಮಾಡ್ತೀನಿ. ಕನ್ನಡಿಗರಿಂದ ಪ್ರೀತಿ ಪಡೆಯುತ್ತಿರುವುದು ನಿಜಕ್ಕೂ ಖುಷಿ ನೀಡಿದೆ, ಕರ್ನಾಟಕವೇ ನನ್ನ ಮನೆ ಎನ್ನಿಸುತ್ತಿದೆ‘ ಎಂದು ತಮಗೆ ಬರುವಷ್ಟು ಕನ್ನಡದಲ್ಲಿ ಚೆಂದಾಗಿ ಮಾತನಾಡಿದ್ದಾರೆ ವೈಭವಿ.
ಸತ್ಯ ಹೆಗಡೆ ಕಣ್ಣೇ ಕ್ಯಾಮೆರಾ
ಮಾರ್ಟಿನ್ ಸಿನಿಮಾದ ಜೀವ ನೀನೆ ಹಾಡು ಬಿಡುಗಡೆಯಾಗಿ ಸಾಕಷ್ಟು ಹಿಟ್ ಆಗಿದೆ. ಈ ಹಾಡಿನಲ್ಲಿ ಧ್ರುವ ಹಾಗೂ ವೈಭವಿ ಅವರ ರೊಮ್ಯಾಂಟಿಕ್ ಸೀನ್‌ಗಳಿದ್ದು ಈ ಹಾಡಿನ ಶೂಟಿಂಗ್ ಬಗ್ಗೆ ಮಾತನಾಡಿರುವ ವೈಭವಿ ‘ಸಿನಿಮಾಟೋಗ್ರಾಫರ್ ಸತ್ಯ ಹೆಗಡೆ ಅವರು ಕನ್ನಡ ಸಿನಿಮಾರಂಗಕ್ಕೆ ಆ‌ಸ್ತಿ ಇದ್ದಂತೆ. ಅವರು ಪ್ರತಿ ವಿಷಯದಲ್ಲೂ ತುಂಬಾ ನಿಖರವಾಗಿದ್ದಾರೆ, ಅವರ ಕಣ್ಣುಗಳೇ ಕ್ಯಾಮೆರಾ, ಈ ಸಿನಿಮಾ ಬಿಡುಗಡೆಯಾದ ಮೇಲೆ ಖಂಡಿತ ಅವರಿಗೆ ಬೇರೆ ಬೇರೆ ಭಾಷೆಯ ಸಿನಿಮಾಗಳಿಂದ ಅವಕಾಶ ಹುಡುಕಿ ಬರುತ್ತದೆ. ಸಿನಿಮಾದಲ್ಲಿ ನಾವೆಷ್ಟು ಸುಂದರವಾಗಿ ಕಂಡಿದ್ದೇವೆ ಅದಕ್ಕೆಲ್ಲಾ ಸತ್ಯ ಸರ್ ಕಾರಣ. ಇಮ್ರಾನ್ ಸರ್ ಕೂಡ ಅವರಿಗೆ ತಲೆಯಲ್ಲಿ ಏನಿರುತ್ತೆ, ಅದು ತೆರೆ ಮೇಲೆ ಬರಬೇಕು ಎಂಬ ಹಟದೊಂದಿಗೆ ಕೆಲಸ ಮಾಡುತ್ತಾರೆ. ಒಟ್ಟಾರೆ ಎಲ್ಲರ ಶ್ರಮದೊಂದಿಗೆ ಜೀವ ನೀನೇ ಹಾಡು ಎಷ್ಟು ಅದ್ಭುತವಾಗಿ ಮೂಡಿ ಬಂದಿದೆ‘ ಎಂದು ಜೀವಾ ನೀನೇ ಹಾಡಿನ ಬಗ್ಗೆ ಮನಬಿಚ್ಚಿ ಮಾತನಾಡಿದ್ದಾರೆ.
‘ನಾನು ಈ ಸಿನಿಮಾಕ್ಕೆ ಒರಿಜಿನಲ್ ವಾಯ್ಸ್ ಡಬ್ ಮಾಡಿಲ್ಲ. ಯಾಕೆಂದರೆ ನನ್ನ ಕನ್ನಡ ಸ್ವಲ್ಪ ಭಿನ್ನವಾಗಿದೆ. ನಾನು ಕರ್ನಾಟಕದಲ್ಲಿ ಹುಟ್ಟಿ ಬೆಳೆದಿಲ್ಲ, ಆದರೂ ಕನ್ನಡ ಮಾತನಾಡಲು ಕಲಿಯುತ್ತಿದ್ದೇನೆ. ಆದರೆ ಸಿನಿಮಾದಲ್ಲಿ ಬೊಂಬೆ ರೀತಿ ಆಕ್ಷನ್ ಬರಬಾರದು ಎನ್ನುವ ಕಾರಣಕ್ಕೆ ಮಾಡಿಲ್ಲ, ಮುಂದಿನ ಸಿನಿಮಾಗಳಲ್ಲಿ ಖಂಡಿತವಾಗಿಯೂ ನನ್ನದೇ ವಾಯ್ಸ್ ಇರುತ್ತೆ‘ ಎಂದು ಮುಂದಿನ ದಿನಗಳಲ್ಲಿ ಕನ್ನಡ ಚಿತ್ರರಂಗದಲ್ಲಿ ನೆಲೆಯೂರುವ ಭರವಸೆಯ ಮಾತುಗಳನ್ನು ಹೇಳಿದ್ದಾರೆ.
ಧ್ರುವ ಸರ್ಜಾ ರೊಮ್ಯಾಂಟಿಕ್ ಆ್ಯಕ್ಷನ್ ಪ್ರಿನ್ಸ್
ಧ್ರುವ ಸರ್ಜಾ ಅವರ ಬಗ್ಗೆ ಮಾತನಾಡಿರುವ ವೈಭವಿ ಶಾಂಡಿಲ್ಯ ‘ಧ್ರುವ ಅವರು ರೊಮ್ಯಾಂಟಿಕ್ ಆ್ಯಕ್ಷನ್ ಪ್ರಿನ್ಸ್. ಯಾಕೆಂದರೆ ಅವರು ರೊಮ್ಯಾಂಟಿಕ್, ಆ್ಯಕ್ಷನ್ ಕೂಡ ಸಂದರ್ಭಗಳಲ್ಲಿ ಅದ್ಭುತವಾಗಿ ನಟಿಸುತ್ತಾರೆ. ಅವರ ಅದ್ಧೂರಿ ಸಿನಿಮಾ ನನಗೆ ತುಂಬಾ ಇಷ್ಟವಾಗಿತ್ತು. ಅದರ ಎರಡೂ ಶೇಡ್ ನನಗೆ ಇಷ್ಟ ಆಯ್ತು‘ ಎಂದು ಧ್ರುವ ಸರ್ಜಾ ಬಗ್ಗೆ ಹೇಳಿದ್ದಾರೆ ಮಾರ್ಟಿನ್ ಬೆಡಗಿ.
‘ನನಗೆ ಮುಂದಿನ ದಿನಗಳಲ್ಲಿ ರಕ್ಷಿತ್ ಶೆಟ್ಟಿ ಹಾಗೂ ರಿಷಬ್ ಶೆಟ್ಟಿ ಅವರ ಜೊತೆ ಕೆಲಸ ಮಾಡುವ ಬಯಕೆ ಇದೆ. ಇದು ನನ್ನ ಆಸೆ, ಮುಂದಿನ ದಿನಗಳಲ್ಲಿ ನೆರವೇರಬಹುದು ಎಂದುಕೊಂಡಿದ್ದೇನೆ‘ ಎಂದಿದ್ದಾರೆ ವೈಭವಿ ಶಾಂಡಿಲ್ಯ.
‘ಕಾಂತಾರ ಸಿನಿಮಾವನ್ನು ನಾನು ಥಿಯೇಟರ್‌ನಲ್ಲೇ ಎರಡು ಬಾರಿ ನೋಡಿದ್ದೇನೆ. ನಾನು ಈ ಸಿನಿಮಾವನ್ನು ಕನ್ನಡದಲ್ಲೇ ನೋಡಿದ್ದೇನೆ. ರಿಷಬ್ ಅವರ ನಟನೆ, ನಿರ್ದೇಶನಕ್ಕೆ ನಾನು ಮನ ಸೋತಿದ್ದೇನೆ‘ ಎಂದು ರಿಷಬ್ ಶೆಟ್ಟಿ ಹಾಗೂ ಕಾಂತಾರ ಸಿನಿಮಾದ ಬಗ್ಗೆ ಖುಷಿಯಿಂದ ಮಾತನಾಡಿದ್ದಾರೆ.
ಫ್ಯಾಮಿಲಿ, ಕುಟುಂಬದ ಜೊತೆ ಸಿನಿಮಾ ನೋಡಿ
‘ಅಕ್ಟೋಬರ್ 11ಕ್ಕೆ ಮಾರ್ಟಿನ್ ಸಿನಿಮಾ ಬಿಡುಗಡೆಯಾಗುತ್ತಿದೆ. ದಯವಿಟ್ಟು ಎಲ್ಲರೂ ಸ್ನೇಹಿತರು, ಕುಟುಂಬದವರ ಜೊತೆ ಸಿನಿಮಾಕ್ಕೆ ಬನ್ನಿ. ಈ ಸಿನಿಮಾವನ್ನು ನೋಡಿ ನಮ್ಮನ್ನು ಹಾರೈಸಿ‘ ಎನ್ನುತ್ತಾ ಮಾತು ಮುಗಿಸಿದ್ದರು ಮಾರ್ಟಿನ್ ಬೆಡಗಿ.
