ಬಿಗ್‌ಬಾಸ್‌ ಕನ್ನಡ 11: ನನ್ನ ಗುಣ ಡಿಸೈಡ್‌ ಮಾಡೋಕೆ ನೀನು ಯಾವೊಳು? ನೇರ ನಾಮಿನೇಟ್ ಮಾಡಿದ ಐಶ್ವರ್ಯ ಶಿಂಧೋಗಿ ವಿರುದ್ಧ ಮಾನಸ ಗರಂ
ಬಿಗ್‌ಬಾಸ್‌ ಸೀಸನ್‌ 11 ನಾಲ್ಕನೇ ವಾರದ ನೇರ ನಾಮಿನೇಷನ್‌ ಪ್ರಕ್ರಿಯೆ ಆರಂಭವಾಗಿದೆ. ಈ ಬಾರಿ ಕ್ಯಾಪ್ಟನ್‌ ಆಗಿರುವ ಐಶ್ಚರ್ಯ ಶಿಂಧೋಗಿ ಹಾಗೂ ತ್ರಿವಿಕ್ರಮ್‌, ಮಾನಸಾ ಹಾಗೂ ಉಗ್ರಂ ಮಂಜು ಇಬ್ಬರನ್ನು ನೇರ ನಾಮಿನೇಟ್ ಮಾಡುತ್ತಾರೆ. ಕ್ಯಾಪ್ಟನ್‌ಗಳು ನೀಡಿದ ಕಾರಣ ಕೇಳಿ ಐಶ್ಚರ್ಯ ಮೇಲೆ ಮಾನಸಾ ಕೋಪಗೊಂಡು ಏಕವಚನ ಪ್ರಯೋಗಿಸಿ ಅರಚಾಡುತ್ತಾರೆ.
ಬಿಗ್‌ಬಾಸ್‌ ಕನ್ನಡ ಸೀಸನ್‌ 11 ನಾಲ್ಕನೇ ವಾರಕ್ಕೆ ಕಾಲಿಟ್ಟಿದೆ. ಮನೆಯಿಂದ ಮೂವರು ಸ್ಪರ್ಧಿಗಳು ಹೊರ ಹೋಗಿದ್ದಾರೆ. ಕಡಿಮೆ ಓಟುಗಳು ದೊರೆತ ಕಾರಣ ಯಮುನಾ ಶ್ರೀನಿಧಿ ಮೊದಲ ವಾರ ಮನೆಯಿಂದ ಹೊರ ಹೋದರೆ ಮಹಿಳಾ ಸ್ಪರ್ಧಿಗಳಿಗೆ ಅಸಭ್ಯ ಪದ ಬಳಕೆ ಮಾಡಿದ್ದಕ್ಕೆ ಜಗದೀಶ್‌ ಹೊರ ಹೋಗಿದ್ದಾರೆ. ಜೊತೆಗೆ ಸಹಸ್ಪರ್ಧಿ ಜಗದೀಶ್‌ ಅವರನ್ನು ತಳ್ಳಿದ್ದಕ್ಕೆ ರಂಜಿತ್‌ ಕೂಡಾ ಎಲಿಮಿನೇಟ್‌ ಆಗಿದ್ದಾರೆ.
ನಾಲ್ಕನೇ ವಾರದ ನಾಮಿನೇಷನ್‌ ಪ್ರಕ್ರಿಯೆ ಆರಂಭ
ವಾರದ ಆರಂಭದ ದಿನಗಳಲ್ಲಿ ಸ್ಪರ್ಧಿಗಳ ನಾಮಿನೇಷನ್‌ ಪ್ರಕ್ರಿಯೆ ನಡೆಯುತ್ತದೆ. ಮಂಗಳವಾರದ ಎಪಿಸೋಡ್‌ನಲ್ಲಿ ಕೂಡಾ ನಾಮಿನೇಷನ್‌ ನಡೆದಿದೆ. ಆದರೆ ಸಹಸ್ಪರ್ಧಿಗಳ ಎದುರಿಗೇ ಅವರ ಹೆಸರು ಹೇಳಿ, ಕಾರಣ ನೀಡಿ ಮಾಡುವ ನಾಮಿನೇಷನ್‌ ಪ್ರಕ್ರಿಯೆಯಲ್ಲಿ ಸ್ಪರ್ಧಿಗಳು ಜಗಳವಾಡುವುದು ಸಾಮಾನ್ಯವಾಗಿದೆ ಮಂಗಳವಾರದ ಎಪಿಸೋಡ್‌ನಲ್ಲಿ ಆಗಿದ್ದು ಕೂಡಾ ಅದೇ. ತಮ್ಮನ್ನು ನಾಮಿನೇಟ್ ಮಾಡಿದ್ದಕ್ಕೆ ಹಾಗೂ ನಾಮಿನೇಷನ್‌ ಮಾಡಲು ನೀಡಿದ ಕಾರಣ ಕೇಳಿ ತುಕಾಲಿ ಸಂತೋಷ್ ಪತ್ನಿ ಮಾನಸಾ ಹಾಗೂ ಉಗ್ರಂ ಮಂಜು ಕೋಪಗೊಂಡಿದ್ದಾರೆ. ನಮ್ಮ ವರ್ತನೆ ಬಗ್ಗೆ ಜಡ್ಜ್‌ ಮಾಡಲು ಯಾರಿಗೂ ರೈಟ್ಸ್‌ ಇಲ್ಲ ಎಂದು ಮಾನಸಾ ಹಾಗೂ ಉಗ್ರಂ ಮಂಜು ಇಬ್ಬರೂ ಕ್ಯಾಪ್ಟನ್‌ ಐಶ್ವರ್ಯ ಹಾಗೂ ತ್ರಿವಿಕ್ರಮ್‌ ಮೇಲೆ ಗರಂ ಆಗಿದ್ದಾರೆ.
ಮಾನಸಾ, ಉಗ್ರಂ ಮಂಜು ನೇರ ನಾಮಿನೇಟ್
ಐಶ್ವರ್ಯ ಸಿಂಧೋಗಿ ಹಾಗೂ ತ್ರಿವಿಕ್ರಮ್‌ ಇಬ್ಬರೂ ಈ ಬಾರಿ ಒಟ್ಟಿಗೆ ಕ್ಯಾಪ್ಟನ್‌ ಪಟ್ಟ ಅಲಂಕರಿಸಿದ್ದಾರೆ. ಕ್ಯಾಪ್ಟನ್‌ ಆದವರಿಗೆ ಬಿಗ್‌ಬಾಸ್‌ ಸೂಚನೆಯಂತೆ ಮನೆಯಲ್ಲಿ ಯಾವುದ್ ಸ್ಪರ್ಧಿಯನ್ನು ನೇರವಾಗಿ ನಾಮಿನೇಟ್ ಮಾಡುವ ಅಧಿಕಾರವಿರುತ್ತದೆ. ಐಶ್ವರ್ಯ, ತ್ರಿವಿಕ್ರಮ್‌ ಇಬ್ಬರನ್ನೂ ಕನ್ಫೆಷನ್ ರೂಮ್‌ಗೆ ಕರೆದ ಬಿಗ್‌ಬಾಸ್‌, ಈ ವಾರದ ನಾಮಿನೇಷನ್‌ ಪ್ರಕ್ರಿಯೆ ಆರಂಭವಾಗುತ್ತದೆ. ನಿಮ್ಮ ಪ್ರಕಾರ ಈ ಮನೆಯಲ್ಲಿ ಇರಲು ಅರ್ಹರಲ್ಲದ ಇಬ್ಬರು ಸ್ಪರ್ಧಿಗಳನ್ನು ನೇರವಾಗಿ ನಾಮಿನೇಟ್ ಮಾಡಿ ಎನ್ನುತ್ತಾರೆ. ಆಗ ಐಶ್ವರ್ಯ, ಮಾನಸಾ ಹೆಸರು ಹೇಳಿದರೆ ತ್ರಿವಿಕ್ರಮ್‌, ಉಗ್ರಂ ಮಂಜು ಹೆಸರನ್ನು ಹೇಳುತ್ತಾರೆ. ಮಾನಸಾ, ಮನೆಯವರ ಜೊತೆ ಬಹಳಷ್ಟು ಸಾರಿ ವಾಗ್ವಾದ ಮಾಡಿದ್ದಾರೆ, ಏನೇ ಒಳ್ಳೆಯದು ಹೇಳಲು ಹೊರಟರೂ ವೈಯಕ್ತಿಕವಾಗಿ ತೆಗೆದುಕೊಳ್ಳುತ್ತಾರೆ. ತಿಳುವಳಿಕೆ ಇಲ್ಲದಂತೆ ವರ್ತಿಸುತ್ತಾರೆ ಆದ್ದರಿಂದ ಅವರನ್ನು ನಾಮಿನೇಟ್ ಮಾಡುತ್ತಿದ್ದೇನೆ ಎಂದು ಐಶ್ಚರ್ಯ ಕಾರಣ ನೀಡುತ್ತಾರೆ.
ಐಶ್ಚರ್ಯ, ತ್ರಿವಿಕ್ರಮ್‌ ನೀಡಿದ ಕಾರಣವೇನು?
ಮಂಜು ಅವರನ್ನು ನಾಮಿನೇಟ್ ಮಾಡಿದ್ದಕ್ಕೆ ಕಾರಣ ನೀಡಿದ ತ್ರಿವಿಕ್ರಮ್‌, ಮೊದಲ 2-3 ವಾರದಂತೆ ಮಂಜಣ್ಣ ಈಗ ಇಲ್ಲ. ಅವರು ಈಗ ಎಲ್ಲರನ್ನೂ ಟಾರ್ಗೆಟ್‌ ಮಾಡಿಕೊಂಡು ಮಾತನಾಡುತ್ತಾರೆ. ಎಲ್ಲೋ ಒಂದು ಕಡೆ ಅವರು ಕಾರ್ನರ್‌ನಲ್ಲಿದ್ದಾರೆ ಆದ್ದರಿಂದ ಮಂಜಣ್ಣನ ಹೆಸರು ಹೇಳುತ್ತಿದ್ದೇನೆ ಎನ್ನುತ್ತಾರೆ. ಇದಕ್ಕೆ ಒಪ್ಪಿಗೆ ಸೂಚಿಸುವ ಬಿಗ್‌ಬಾಸ್‌, ಈಗ ನೀವು ಲಿವಿಂಗ್‌ ಏರಿಯಾಗೆ ತೆರಳಿ ನೀವು ನೇರ ನಾಮಿನೇಟ್ ಮಾಡಿರುವ ಇಬ್ಬರು ಸದಸ್ಯರ ಹೆಸರನ್ನು ಘೋಷಿಸಿ, ಅದಕ್ಕೆ ಕಾರಣವನ್ನೂ ಹೇಳುವಂತೆ ಸೂಚಿಸುತ್ತಾರೆ. ಲಿವಿಂಗ್‌ ಏರಿಯಾಗೆ ಬಂದು ಐಶ್ಚರ್ಯ, ತ್ರಿವಿಕ್ರಮ್‌ ತಾವು ನೇರ ನಾಮಿನೇಟ್ ಮಾಡಿರುವ ಇಬ್ಬರ ಹೆಸರನ್ನು ಹೇಳಿದಾಗ ಇಬ್ಬರೂ ಕೋಪಗೊಳ್ಳುತ್ತಾರೆ.
ಐಶ್ವರ್ಯ ಶಿಂಧೋಗಿಯನ್ನು ಏಕವಚನದಲ್ಲಿ ಮಾತನಾಡಿಸಿದ ಮಾನಸಾ
ನನ್ನ ಗುಣ ಡಿಸೈಡ್‌ ಮಾಡೋಕೆ ನೀನು ಯಾವೊಳೊ ಎಂದು ಮಾನಸಾ, ಐಶ್ವರ್ಯ ಅವರ ಮೇಲೆ ಏಕವಚನ ಪ್ರಯೋಗ ಮಾಡುತ್ತಾರೆ. ಇದಕ್ಕೆ ಪ್ರತಿಕ್ರಿಯಿಸುವ ಐಶ್ವರ್ಯ ಯಾವೊಳು, ಗೀವುಳೊ ಅಂತ ಮಾತನಾಡಬೇಡಿ ಎನ್ನುತ್ತಾರೆ. ಮಂಜಣ್ಣ ಬೇರೆ ಗುಂಪಿಗೆ ಸೇರಿದ್ದಾರೆ ಎಂದು ತ್ರಿವಿಕ್ರಮ್‌ ನೀಡಿದ ಕಾರಣ ಕೇಳಿದ ಮಂಜು, ನಾನು ಯಾರ ಜೊತೆ ಕೂತು ಮಾತನಾಡಬೇಕು ಅಂತ ಬಿಗ್‌ಬಾಸ್‌ ರೂಲ್ಸ್‌ನಲ್ಲಿ ಇಲ್ಲ ಎಂದು ಕೋಪಗೊಳ್ಳುತ್ತಾರೆ. ಇದೇ ವಿಚಾರಕ್ಕೆ ಮಾತಿಗೆ ಮಾತು ಬೆಳೆದು ಸ್ಪರ್ಧಿಗಳ ನಡುವೆ ಮನಸ್ತಾಪ ಉಂಟಾಗುತ್ತದೆ.
